1. Ngazvipi zvikonzero zvakanaka zvingamuita kuti mubhabhatijwe?

 YEMWI munoda Jehovha here, uwo anopa zviro zvakanaka zvese zvamunazvo kunyange upenyu? Munoda kukhombija kuti munomuda here? Maitiro akanakisisa okuita izvi ngo wokupira upenyu wenyu kuna Jehovha mobhabhatijwa. Izvi zvinoita kuti muve divi lo mbhuri ya Jehovha. Inga muviyo, munozova mundhu wa Jehovha uye iyena unozomungwarira no kumutungamirira mu upenyu wenyu inga Baba venyu no shamwari yenyu. (Ps. 73:24; Isa. 43:1, 2) Kuzvipira no kubhabhatijwa kunomupa soterero yo kuzobusa upenyu usikaperi.—1 Ped. 3:21.

2. Tinozojijenyi mu cijijo cino?

² Pano ciro cimweni ciri kumuita kuti musabhabhatijwa here? Kudai zviri izvona, zivanyi kuti asi yemwi mega. Mamiriyau o vandhu vakacinja maitire avo no mulangariro wavo kuti vabhabhatijwe asi zvino vari kushandira Jehovha vakacunga uye vakadakala. Zvicinyi zvamungajija kuvha kuvamweni vakabhabhatijwa mu zana lo kutanga? Ngatijije zvineso zvimweni zvovakasangana nazvo uye ngatiwone kuti tingajijenyi ngo muezaniso wavo.

VASAMARIYA VAKABHABHATIJWA

3. VaSamariya vamweni vakanyisa zvineso zvipi kuti vabhabhatijwe?

³ Mu nguva ya Jesu vaSamariya cainga cikwata cainamata vesigara phedo no thaundhi lo Shikemi no kuSamariya kuchambhembhe ko Judheya. Vasati vabhabhatijwa, ivona vaidikana kuva no zivo yakazala yo Soko la Mwari. VaSamariya vaitenda kuti mabhuku o Bhaibheri mashanu basi kutangira Genesisi mbhera Dheuteronomiyo uye dangani no bhuku la Joshuwa ndiwona basi akafemerwa ndi Mwari. VaSamariya vaisoterera kuviya ka Mesiya, zvesienderana no cipikirwa ca Mwari ciri pana Dheuteronomiyo 18:18, 19. (Johani 4:25) Kuti vabhabhatijwe, vaidikana kutenda kuti Jesu ndiyena Mesiya  wainga akapikirwa. ‘Uye vaSamariya vakawanda’ vakaita kudalo. (Johani 4:39) Vamweni vaidikana kukurira dambujiko lo mukheto rainga pakati po vaJudha no vaSamariya.—Ruka 9:52-54.

4. Maererano na Mabasa 8:5, 6, 14, vaSamariya vamweni vakaitenyi povakaparijirwa ndi Firipi?

⁴ Zvicinyi zvakabesa vaSamariya kuti vabhabhatijwe? Firipi muevhangeri wakaparijira vaSamariya ngo pamusolo “pa Kristu,” “uye vamweni vakatenda soko la Mwari.” (Verenganyi Mabasa 8:5, 6, 14.) Firipi wainga ari mu Judha, kunyange zvakadalo avato kulamba. Dangani vakalangarira ngo pamusolo po mativi amweni ozvinyorwa anobhuya kuti Mwari aakheti. (Dhe. 10:17-19) Kunyange zvakadalo, ivona “vakayaeya zvaibhuiwa ndi Filipi” ngo pamusoro pa Jesu uye vakava no cokwadi cokuti Firipi wainga akatumwa ndi Mwari. Iyena wakaita mushamaiso jakawanda, kubatanijawo no kulapa vaiwaja uye kugogomera madhimoni.—Mabasa 8:7.

5. Tinojijenyi ngo muezaniso wo vaSamariya?

⁵ Kukhetana no kutama uzivi zvaizoita kuti vaSamariya vatame kukura ku divi lo zvokunamata. Asi, ivona avato kutendera kuti izvi zviitike. Bhaibheri rinoti: ‘Ivona vakatenda masoko aibhuiwa ndi Firipi, ngo pamusoro po Umambo wa Mwari uye ngo pamusoro po zina la Jesu Kristu, ngo kudalo vanarume no vanakaji vakabhabhatijwa.’ (Mabasa 8:12) Yemwiwo keni, munothemba kuti soko la Mwari ngo ro cokwadi, munotenderana nazvo kuti Zvapupu zva Jehovha azvina mukheto, uye zvinovangisira kukhombijirana rudo inga zvainga zvakabhuya Jesu kuti maKristu ocokwadi aizozviita here? (Johani 13:35) Ngo kudalo, musathya kubhabhatijwa ivanyi no cokwadi cokuti Jehovha unozomukomborera.

6. Mungabeseswa kudini ngo muezaniso wa Rubheni?

⁶ Rubheni wo ku Alemanha, wakakurira mu mbhuri yo Zvapupu zva Jehovha. Ngo kudalo, paainga ari mujaha wainga asina cokwadi cokuti Mwari uriyo. Wakaitenyi kuti apeje kukana-kana uku? Iyena wakazwisisa kuti waidikana kujija maningi ngo pamusolo po shwiro iyi uye wakakheta kuzviita. Iyena wakati: “Ndakashandisa jijo yangu yo mundhu ega kuti ndipeje kukana-kana kondainga nako. Uye ndakajija kakawanda ngo pamusolo po kuphinduka-phinduka.” Yena wakaverenga bhuku rinozwi: Existe um Criador Que Se Importa com Você? Bhuku iri rakamubesa kuti ave no kutenda kakavanga kuna Mwari. Uye iyena wakati ngo comumweyo: ‘Jehovha uriyo.’ Kunja ka izvi Rubheni wakavhakacira Bheteri guru lo Zvapupu zva Jehovha, iyena wakaziva kuti kubatana ko hama mu nyika yese cishamiso uye wakaguma pa kushamaiswa maningi ndizvona. Rubheni wakazohwirira ku Alemanha uye wakazobhabhatijwa paainga no makore 17. Kudai yemwi musina cokwadi ngo pamusolo po zvomakajija kana kuti shwiro jimweni, psakisisanyi mu zvinyorwa zvedu. Kutama kuva no cokwadi kenyu kungapejwa ngo “zivo yo cokwadi.” (VaE. 4:13, 14) Pamunozwa zvakaitika ngo pamusolo po kubatana uye rudo rino hama no hanzvaji munyika yese no kuwona muezaniso wazvo mu ungano menyu, izvi zvinoengejera kuda kenyu mbhuri yenyu yo pasi pese.

SAURO WO KUTARSO WAKABHABHATIJWA

7. Icinjo ipi yaidikana kuizwa ndi Sauro mumulangariro wake?

⁷ Wonanyi muezaniso wa Sauro wo kuTarso. Iyena wakaashira jijiso yo pamusoro-soro yo ciJudha uye waibudirira mu ciJudha. (VaG. 1:13, 14; VaF. 3:5) Mu nguva iyi vaJudha vakawanda vaiwona maKristu inga vapanduki, ngo kudalo Sauro wakavateverera ngo ushungu.  Esilangarira kuti wainga esiita kuda ka Mwari. (Mabasa 8:3; 9:1, 2; 26:9-11) Kuti atende muna Jesu uye obhabhatijwa inga mu Kristu, Sauro waidikana kuva akanasiririka kuti atevererwewo.

8. (a) Zvicinyi zvakabesa Sauro kuti abhabhatijwe? (b) Maererano na Mabasa 22:12-16, Ananiya wakabesesa kudini Sauro? (Wonanyi foto.)

⁸ Icinyi cakabesa Sauro kuti Abhabhatijwe? Jesu ari kudenga wakabhuya naye uye ruvheneko raivha kudenga rakaitisa Sauro bofu. (Mabasa 9:3-9) Sauro wakatsanya Ko mazuva matatu uye pasina muvhunjo iyena wailangarijisisa ngo pamusolo po zviro zvaingari zvaitika. Hina, Sauro wakathemba kuti Jesu wainga ari Mesiya uye vaKristu vaiita kunamata kocokwadi. Zvinoita inga kuti Sauro wakazvidemba maningi ngo kubatanijwa kaakaita pakuulaya Estefani! (Mabasa 22:20) Papera mazuva matatu, mujiji anozwi Ananiya wakabhuya na Sauro, ngo njira yo unyasha wakamulapa uye wakamuvangisa kuti abhabhatijwe ngo kukasika. (Verenganyi Mabasa 22:12-16.) Sauro ngo kuzvidodokesa kese, wakatenda besero ra Ananiya uye wakatanga upenyu wake upsa inga mukristu akabhabhatijwa.—Mabasa 9:17, 18.

9. Tinojijenyi ngo muezaniso wa Sauro?

⁹ Pano zvatinojija pano zvakaitika na Sauro. Iyena ingadai akaita kuti kuzvikuja no kuthya vandhu kumuite kuti asabhabhatijwa. Asi iyena aato kusiya izvi kuti zviitike. Sauro ngo kuzvidodokesa kese, wakacinja zvaaita mu upenyu wake kuti ave muteveri wa Kristu. (Mabasa 26:14, 19) Sauro waizviziva kuti waizotambujwa asi kunyange zvakadalo iyena wainga akanasiririka kuti ave muKristu. (Mabasa 9:15, 16; 20:22, 23) Pasure pokubhabhatijwa, Sauro wakaenderera mberi esithemba besero la Jehovha kunyange paaisangana no muejo jakawanda. (2 VaK. 4:7-10) Pomunobhabhatijwa inga Capupu ca Jehovha munozosangana no zviro zvingaeja kutenda kenyu asi yemwi munozowana besero. Mungathemba henyu besero rakakura la Jehovha na Jesu Kristu.—VaF. 4:13.

10. Muezaniso wa Ana ungamubesesa kudini?

 ¹⁰ Ana wakarerwa mu mbhuri yo ciKurdha mu nyika iri kumavhazuva ko Europa. Amake povakabhabhatijwa, Ana wakatenderwa kujija Bhaibheri ndi babake ano makore 9. Ngo kudalo, Izvi zvakabara cineso kumbhuri yake yakakura na vese vaigara pamwepo no mbhuri ya Ana. Vabereki vake vaiwona inga zvinopseruja maningi mundhu kusiya ceci yo majitateguru ake. Paainga no makore 12, Ana wakakumbira abake kuti abhabhatijwe. Ivona vaida kuziva kuti ici cainga cikhetwa cake kamare here kana kuti wainga akavangirijwa ngo mundhu umweni. Iyena wakavavhunja kuti: “Yeni ndinoda Jehovha.” Ponapo abake vakatendera kuti abhabhatijwe. Pasure pa izvi, Ana wakaenderera mberi esisekwa uye esibatwa zvisito kunaka. Hama yake imweni yokunyama yakati: “Zvainga zviri nane kuti urarame upenyu wo uhure nokubhema pano kuti uve Capupu ca Jehovha.” Ana wakazvinyisisa kudini? Iyena wakati: “Jehovha wakandibesa kuti ndive no simba uye abangu naamangu vakanditsigira maningi.” Ana uno lista yo zviro zvakamuitikira uye wakazwa nyala ya Jehovha mu upenyu wake. Nguva no nguva iyena waigara esisota lista yake kuti asakanganwa kuti Jehovha wakamubesesa kudini. Kudai mesithya kutambujwa langariranyi kuti Jehovha unozomubesawo.—VaH. 13:6.

KORNERIYO WAKABHABHATIJWA

11. Korneriyo wakasangana no mugariro jakadini?

¹¹ Bhaibheri rinobhuyazve ngo muezaniso wa Korneriyo. Iyena wainga ari “mukuru” wo 100 womasoca o Roma. (Mabasa 10:1) Ngo kudalo, iyena waizivikanwa maningi mu ndharaundha yake uye kuhondo. Iyena ‘wakapa zvipo zvakawanda zvo unyasha ku vandhu.’ (Mabasa 10:2) Jehovha wakatuma mu postori Pedhru kuti aparijire masoko akanaka kuna Korneriyo. Kubhuya kuti iyena wakanonoka kubhabhatijwa ngo ndava yo ndau yake yainga ino mbiri here?

12. Zvicinyi zvakabesera Korneriyo kuti abhabhatijwe?

¹² Zvicinyi Zvakabesa Korneriyo kuti Abhabhatijwe? Bhaibheri rinobhuya kuti iyena “waithya Mwari pamwepo no mbhuri yake yese.” Nguva jese Korneriyo wainga akajaera kuita mukumbiro kuna Mwari. (Mabasa 10:2) Pedhru paakavhunja Korneriyo ngo pamusolo po masoko akanaka, iyena no mbhuri yake vakatenda muna Jesu Kristu uye ngo kukasika vakabhabhatijwa. (Mabasa 10:47, 48) Pasina muvhunjo Korneriyo wainga akanasiririka kuti aite cinjo jese jaidiwa kuti anamate Jehovha pamwepo no mbhuri yake.—Jos. 24:15; Mabasa 10:24, 33.

13. Tinojijenyi ngo muezaniso wa Korneriyo?

¹³ Inga ndi Sauro, cigaro cainga cino mbiri cingadai cakaita kuti Korneriyo asava mukristu. Asi Iyena aato kusiya kuti izvi zviitike. Kubhuya kuti kutenda cokwadi kunomuita kuti muite cinjo jakakura mu upenyu wenyu kuti mubhabhatijwe here? Kana zviri izvona, Jehovha unozova mubeseri wenyu. Kudai mukakheta kushandisa ndhungamiriro jo Bhaibheri kuti mudakajise Jehovha iyena unozomukomborera.

14. Mungabeseswa kudini ngo muezaniso wa Tsuyoshi?

¹⁴ Tsuyoshi wo Japau, waidikana kucinja basa lake kuitira kuti akwanise kubhabhatijwa. Iyena waishanda inga mubeseri wo mukuru wo pacikora cinombiri uye cinodanijwa kuti Ikenobho caijijisa vandhu kuti vanganasiririsa kudini maruva. Mukuru wocikora paanonga asipo, Tsuyoshi ndiyena waitungamirira zvaibatanija tsika yo ciBhudha. Asi, Tsuyoshi paakajija cokwadi ngo pamusolo po rufu, tsika iyi yakava cineso cokubhabhatijwa kake. Ngo kudalo, wakakheta kuti wainga  asingazobatanijwizve mu tsika jo cibhudha. (2 VaK. 6:15, 16) Tsuyoshi wakabhuya no mukuru wo pacikora wiya ngo pamusolo po shwiro iyi. Ngaupi wakava muviyo? Tsuyoshi wakaenderera mberi ari pa basa rake asingaiti divi lo tsika iyi. iyena wakazobhabhatijwa papera gore aatanga kujija Bhaibheri. a Kudai mesida kunasirisa basa renyu kuti mudakaje Mwari, mungava no cokwadi cokuti iyena aazoregeri kumubesa pa zvese zvamunonga mesida no mbhuri yenyu.—Ps. 127:2; Mateu 6:33.

VAKORINDE VAKABHABHATIJWA

15. Zvineso zvipi zvaidikana kunyiswa ngo vaKorinde kuti vabhabhatijwe?

¹⁵ Vandhu vakawanda vo Korinde yokare vaizivikanwa ngo kudisisa zvo nyika uye kutama kuzvibata ko tsika. Vakawanda vaigara monamo vairarama upenyu wainga usikatenderwi ndi Mwari. Ngo njira yakajeka, mugariro wakadalo wakapa mawonero ocokwadi ku mundhu upi na upi aizoashira masoko akanaka. Ngo kudalo, mupostori Pauro paakaguma kuthaundi iri, oparijira masoko akanaka ngo pamusolo pa Kristu, ‘vaKorinde vakawanda pavakazwa masoko aya vakatanga kumatenda uye votobhabhatijwa.’ (Mabasa 18:7-11) Pasure pazvo Ishe Jesu Kristu wakazvikhombija pambhene kuna Pauro muciwoniso esiti: ‘Ndino vandhu vakawanda mu thaudhi rino.’ Ngo kudalo, Pauro wakalamba esiparija ari konayo ko gore rimwe no hafu.

16. Zvicinyi zvakabesa vamweni vainga kuKorinde kuti vanyise zvineso zvokuti vabhabhatijwe? (2 VaKorinde 10:4, 5)

¹⁶ Zvicinyi zvakabesa vaKorinde kuti vabhabhatijwe? (Verenganyi 2 VaKorinde 10:4, 5.) Soko la Mwari no simba lo mweya mupsene zvakavabesa kuti vaite cinjo huru mu upenyu wavo. (VaH. 4:12) Vandhu vo Korinde vakaashira masoko akanaka ngo pamusolo pa Kristu vaidikana kusiya tsika uye mabasa akadai inga kudhakwa, kuba, kuvatana ko mwanarume no mwanarume uye ko mwanakaji no mwanakaji.—1 VaK. 6:9-11. b

17. Tingajijenyi ngo muezaniso wo vaKorinde?

¹⁷ Ambowonanyi kuti, kunyange vamweni vo kuKorinde vainga no tsika jo nyika jovaidikana kusiya asi ivona avato kuita kuti izvi zvivaite kuti vatame kuva makristu. Ivona vakashanda ngo simba kuti vawane gwanja rakatetepa rinoyendesa ku upenyu usingaperi. (Mateu 7:13, 14) Muri kurwisa kuti musiye tsika jakashata kana maitiro akashata anomukoreresa  kubhabhatijwa here? Ngo kudalo, musasiya kurwa! Kumbiranyi Jehovha kuti amupe mweya mupsene kuti umubese kunyise muejo jokuda kuita zvakashata.

18. Muezaniso wa Monika ungamubesesa kudini?

¹⁸ Monika anogara Georgia, wakashanda ngo simba kuti akurire tsika yokuvereketa uye kuzwa no kuona zviro zvakashata kuti abhabhatijwe. Iyena wakati: “Pondainga ndesikura, mukumbiro ndiwona wakandibesa kuti ndiite cinjo. Jehovha waizviziva kuti yeni ndaida kuita zviro zvakanaka uye iyena nguva jese waindibesa no kunditungamirira.” Monika wakazobhabhatijwa ano makore 16. Pano tsika yamunoda kusiya kuti munamate Jehovha ngo njira yaanoda here? Lambanyi mesimukumbira simba ramunoda kuti muite cinjo. Jehovha ngo kunaka mweyo unozomupa mweya wake mupsene kuti umubese.—Johani 3:34.

KUTENDA KENYU KUNGATHUTHISA MATUNDHU

19. Zvicinyi zvingatibesa kuti tinyise zvineso zvakaita inga matundhu? (Wonanyi foto.)

¹⁹ Ivanyi no cokwadi cokuti Jehovha unomuda, cimwenizve unoda kuti muve divi lo mbhuri yake. Ici icokwadi, azvinenyi hazvo no zvineso zvamungasangana nazvo zvingamuita kuti muwone inga zvinonesa kuti mubhabhatijwe. Jesu wakati kuvajiji vake vomu zana lo kutanga: “Kudai mainga no kutenda kakakula inga tsanga yo mastadhi maizovhunja dundhu iri kudai, ‘Ivha pano wende apo,’ irona rinozoenda, apana camunozokorera.” (Mateu 17:20) Vaya vaizwa masoko aya vainga na Jesu ko makore manganani, ngo kudalo kutenda kavo kailamba kesikula. Asi Jesu wakavathembesa kuti kudai vakava no kutenda kakavanga, Jehovha waizovabesa kukurira zvineso zvakakura inga dundhu. Jehovha unozomubesawo kuti muite zvakatojana!

20. Muezaniso jo vaKristu vo muzana lo kutanga uye no vomazuva ano jabhuiwa mucijijo cino, jamuvangisa kudini?

²⁰ Kudai imwimwi mukaziva kuti pano zviri kumuita kuti musabhabhatijwa, musanonoka kuita zvinodiwa kuti munyise cineso ici. Wonanyi muezaniso jinovangisa no kupa simba jo maKristu o muzana lo kutanga no o mazuva ano. Muezaniso javo jingamuvangisa kuti muzvipire kuna Jehovha uye mobhabhatijwa. Ici cinozova cikhetwa cakanakisisa mu upenyu wenyu!