1-2. (a) Mugariro upi unganesa kuregerera mundhu umweni? (b) Zvicinyi zvakaizwa ndi Dhenise?

 IMWIMWI munolangarira kuti zvinonesa kuregerera? Vakawanda vanolangarira kudalo, maningi-ningi povanowajiswa. Asi zvinokwanisika kutama kugara no bundu uye toregerera. Wonanyi muezaniso wo hanzvaji imweni inodanijwa Dhenise, a iyona yakakwanisa kuva inoregerera ngo maitire anoshamisa. Mu gore la 2017, Dhenise no mbhuri yake vakaenda koovhakacira ku Bheteri guru lo Nyika yese lo Zvapupu zva Jehovha. Povainga vesehwirira kanyi, muhambisi umweni wo karu wakashaisha kuhamba otakira pa karu yainga na Dhenise no mbhuri yake. Dhenise wakakomoka ngo ndava yo asidhenti iyi. Paakamuka wakawona kuti vana vake vainga vakhuvazika maningi uye mwamuna wake Brian wainga afa. Esilangarira zvakaitika Dhenise wakati: “Ndakapera simba uye ndakawajiwa maningi.” Cakamuwajisa maningi ngo cokuziva kuti muhambisi wo karu uwu wainga asito kudhakwa, wainga asito kumwa mutombo jinodhakwisa uye mucitaka mainga musina ciro caivhiringija, ngo divi rimweni painga pasina cikonzero caizoita kuti paitike asidhenti iyi. Ngo kudalo, wakaita mukumbiro kuna Jehovha esikumbira runyararo.

² Mu hambisi wo karu wakazopuwa ndava yo kuuraya mundhu ngo asidhenti. Kudai akawoneka no ndava, ingadai akavharirwa mujere. Asi tiribhunari yavhunja Dhenise kuti mutongo wo mwanarume uwu waizocamira pozvaizobhuiwa ndi Dhenise. Dhenise wakati: “Ndaijizwa inga mundhu wavhura cironda cangu ocikanda munyu ngokuti ndaidikana kulangarira nguva inonesa yo upenyu wangu.” Pasure po mavhiki manganani asidhenti yayaitika, Dhenise wainga aakutiribhunari kuti averekete pamberi po mwanarume wiya akaviisa dambujiko  kumbhuri yake. Zvicinyi zvakaitika? Dhenise wakakumbira mutongi kuti aregerere mwanarume uwu. b Paakapeja kuvereketa mutongi uwu watanga kucema. Iyena wakati: “Inini ndiri mutongi ko makore anokwana kuita 25, uye andisati ndambowona mbhuri yo mushaishirwi yesibhuya kuti muiti wo ndava aregererwe. Andisati ndambozwa masoko orudo uye okuregerera.”

3. Zvicinyi zvakaita kuti Dhenise aregerere?

³ Zvicinyi zvakabesa Dhenise kuti aregerere? Iyena wakalangaririra kuregerera ka Jehovha. (Mika 7:18) Kudai tikakhombija kubonga maregerere anoita Jehovha, zvinozotiita kuti tidewo kuregerera vamweni.

4. Jehovha unoda kuti tiitenyi? (VaEfeso 4:32)

⁴ Jehohva unoda kuti tiregererewo vamweni inga zvaanoita kuna umwe nga umwe wedu. (Verenganyi VaEfeso 4:32.) Jehovha unoda kuti tive vakanasiririka kuregerera vaya vanotishaishira. (Ps. 86:5; Ruka 17:4) Mu cijijo cino, tinoda kuwona zviro zvitatu zvingaita kuti tive vandhu vanoregerera.

MUSAFURATIRA MAZWIRO ENYU

5. Maererano na Zvirevo 12:18, tingazvizwa kudini mundhu umweni paanotishaishira?

⁵ Nguva jimweni, tingawajiwa maningi nga zvingaizwa kana zvingabhuiwa ngo vamweni vedu maningi-ningi shamwari yedu kana umwe wo pambhuri yedu. (Ps. 55:12-14) Kuwajiwa mu mulangariro kunonesa maningi zvokuti tinoita inga takabaiwa ngo banga. (Verenganyi Zvirevo 12:18.) Nguva imweni tinoeja kuita inga pasina caitika uye tofuratira mazwire edu. Asi kuita kudalo, zvinoita inga tiri kuhamba no banga lakatibaya. Mukutojanawo, atidikani kugara no bundu tesinyepejera inga kuti apana cakaitika.

6. Zvicinyi zvatingaita nguva jimweni patinonyangajiswa?

⁶ Patinowajiswa, nguva jimweni pakutanga tingada kugala no bundu. Bhaibheri rinokhombija nguva jimweni kuti zvakareruka kuva no hasha. Asi rinobhuyazve kuti, mazwiro aya akashata aadikani kutinyisa. (Ps. 4:4; VaE. 4:26) Ngo ndava yenyi? Ngokuti mazwire edu angatiita kuti tiite ciito uye hasha ajizoiti kuti tiite zviro zvakanaka. (Jak. 1:20) Asi kuva no hasha kungaitika asi kuramba tinajo tingazvikhetera.

7. Mazwiro api akashata atingava nawo patinonyangajiswa?

⁷ Patinobathwa zvisito kunaka tinova no mazwiro amweni. Inga muezaniso hanzvaji imweni inozwi Ana yakati: “Pondainga ndiri mwana mudoko abangu vakasiyana naamangu uye volovora musikane waindipenda. Ndakajizwa inga ndasiiwa. Vakava no vana uye ndaizvizwa inga ndacinjaniswa. Iyeni ndakakula ndesizwa inga ndisikadiwi.” Hanzvaji imweni inodanijwa kuti Georgete yakabhuya mazwire ayo mwamuna wayo paakahura, iyena wakati: “Tainga tiri shamwari kuvha tiri vana vadoko. Isusu taishanda tese basa lo upiyona! Inini ndakapera simba.” Hanzvaji imweni inodanijwa Naomi yakati: “Inini ndainga ndisikalangariri kuti mwamunangu waizondinyangaja. Pandakazwa kuti waiwona zvo umitu-mitu esindivigira ndakazvizwa ndaungwiswa uye asito kugondeka kandiri.”

8. (a) Zvikonzero zvipi zvatinazvo kuti tiregerere? (b) Ngenyi zvakanaka kuti tive vandhu vanoregerera? (Wonanyi bhokiso rakazwi “ Kudai Mundhu Umweni Akatiitira Ciro Cakashata Maningi Keni?”)

⁸ Isusu atikwanisi kuwonerera zvinoizwa no  zvinobhuiwa ngo vamweni. Asi tinokwanisa kuwonerera mazwire edu. Kuitisa kudini? Kakawanda kakona, mazwiro akanaka ngo okuregerera ngokuti tinoda Jehovha. Uye iyena unoda kuti tive vandhu vanoregerera, kudai tikaenderera mberi tino hasha atizokwanisi kuregerera, kuita zvikhethwa zvakanaka uye kuva utano wakanaka. (Zvi. 14:17, 29, 30) Wonanyi muezaniso wa hanzvaji Kristina. Ivona vakati: “Pandinova no hasha kana kunyangajiswa andikwanisi kuseka zvakanaka, andizorori zvakanaka, andirhyi zvakanaka uye zvinondinesa kuwonerera mazwiro angu. Zvinopejisira zvavhiringija mucadho wangu uye no ushamwari wangu no vamweni.”

9. Ngenyi tisikadikani kucengeta bundu?

⁹ Kunyange mundhu watinyangajisa akatama kutikumbira ruregerero, isusu tingaita kuti tipungure mazwiro akashata aakaita kuti tive nawo. Kuitisa kudini? Georgeti, abhuiwaya pakutanga anoti: “Azvito kuva nyore asi ndakaema kuva no hasha no mwamunangu wokare uye ndakazvizwa ndino runyararo lakakula. Inga muviyo ndakava no runyararo wakakula.” Patinotama kuva mundhu anocengeta bundu tinonga tesizvipa cipo pacedu cokuenderera mberi tino upenyu unodakajisa. (Zvi. 11:17) Asi kudai imwimwi musati manasirira kuti muve mundhu anoregera keni?

RWIASANANYI NO MAZWIRE ENYU

10. Ngenyi zvinokosha kuti tizvipe nguva yo kuzvilapa mu mulangariro? (Wonanyi foto.)

¹⁰ Mungaitenyi kuti musava no hasha kana kucengeta bundu? Mundhu wakakhuvazika zvinotora nguva kuti aite nane. Mukutojanawo kuti tiregerere mundhu wakatinyangajisa kana kuti tizvizwezve zvakanaka zvinotora nguva.—Mup. 3:3; 1 Ped. 1:22.

11. Mukumbiro ungamubesesa kudini kuti muregerere?

¹¹ Itanyi mukumbiro kuna Jehovha kuti amubese kuti muve mundhu anoregerera. c Ana wakabhuya kuti mukumbiro wakamubesesa kudini. Iyena unoti: “Ndakaita mukumbiro kuna Jehovha kuti andibese kuregerera  umwe nga umwe wedu wo pambhuri pedu pane zvakashata zvatakaita no zvatakabhuya. Ngo kudalo, ndakanyora tsamba kuna abangu no mukaji wavo ndesivavhunja kuti ndakaregerera zvese zvavakaita.” Ana unotendera kuti kuita zvonazvo akuzivi kuita nyore. Soterero yangu yainga yokuti: “Nditevejere kuregerera ka Jehovha uye kuti abangu no mukaji wavo vazojija zvakawanda ngo zva Jehovha.”

12. Ngenyi tinoda kuthemba Jehovha pano kuthemba mazwire edu? (Zvirevo 3:5, 6)

¹² Langariranyi kuti nguva yese Jehovha unoita zvakarurama asi imwimwi amuiti ngokuti mazwire enyu angamucengeja kamare. (Verenganyi Zvirevo 3:5, 6.) Jehovha basi unoziva zvakatinakira. (Isa. 55:8, 9) Uye iyena aazotikumbiri kuita zviro zvinozotikhuvaza. Ngo kudalo, iyena paanotivangisa kuti tive vanoregerera, ngative no cokwadi cokuti izvi zvinozova zvakatinakira kamare. (Ps. 40:4; Isa. 48:17, 18) Ngo divi rimweni kudai tikathemba mazwiro edu atizokwanisi kuva vanoregerera. (Zvi. 14:12; Jer. 17:9) Naomi wakati: “Inini pakutanga ndailangarira kuti, ndainga no citenderwa cese cokutama kuregerera mwamunangu ngo kuwona vhidhiyo jo umitu-mitu kainga akaita. Inini ndaitya kuti, unozondiwajisazve kana kuti unozokanganwa kuti wakandiwajisa zvakadini. Uye ndaizvivhunja kuti Jesu na Jehovha vanonasa kuzwisisa mazwiro angu. Asi ponapo ndakazwisisa kuti Jehovha unozwisisa mazwire angu, asi izvi azvidi kubhuya kuti unotenderana nazvo. Jehovha unoziva mazwire angu uye zvinotora nguva kuti ndizvizwe zvakanaka asi iyena unoda kuti ndive anoregerera.” d

TINGAITENYI KUTI TIVE NO MAZWIRE AKANAKA

13. Maererano na VaRoma 12:18-21, zvicinyi zvatinodikana kuita?

¹³ Patinoregerera mundhu watinyangajisa, isusu tinoda kuita zvakawanda kupinda kubhuya zvakaitika. Kudai mundhu wakatinyangajisa ari hama yedu, tinoda kuita zvakawanda kuti tiite runyararo. (Mateu 5:23, 24) Isusu tinoda kucinja hasha ngo unyasha uye kucengeta bundu ngo kuregerera.  (Verenganyi VaRoma 12:18-21; 1 Ped. 3:9) Zvicinyi zvinozotibesa kuita izvi?

14. Kuvangisira kupi katinodikana kuita, uye ngenyi?

¹⁴ Tinoda kuita zviri zvese kuti tiwone mundhu wakatinyangajisa inga mawonerwe aanoizwa ndi Jehovha. Jehovha unopsaka zvakanaka kuvandhu. (2 Mk. 16:9; Ps. 130:3) Kakawanda mundhu unopsaka unowana, zvingava zvakashata kana kuti zvakanaka. Patinopsaka zvakanaka kuvamweni, zvinova nyore kuregerera. Inga muezaniso hama imweni inodanijwa Jarrod inoti: “Kandiri zvakareruka kuregerera hama kudai ndikalangarira zviro zvandinodakarira kaari pane kulangarira zvaanondishaishira.”

15. Ngenyi zvinokosha kuvhunja mundhu wakamunyangajisa kuti ndakuregerera?

¹⁵ Ciro cimweni cinokosha ngo cokuvhunja mundhu wakamushaishira kuti ndakuregerera. Ngenyi? Wonanyi zvakabhuiwa ndi Naomi wabhuiwaya pakutanga, iyena unoti: “Mwamunangu wakandivhunjisa kuti, ‘iwewe wandiregerera?’ Pondainga ndoda kutendera kuti eya ‘ndakuregerera,’ inini ndakaema ndozwisisa  kuti ndainga ndisito kuregerera mwamunangu ngo mweyo wese. Asi ngo kuhamba ko nguva, ndakazokwanisa kubhuya masoko aya ngo simba rese kuti, ‘ndakuregerera.’ Pondakaregerera mwamunangu, majiso ake akazala musoji inini ndakashamisika maningi ngo kuwona kunyalajwa kaakaita uye ndakava no runyararo lakakula. Mu masure mazvo, ndakatangazve kumuthemba uye zvino taashamwarizve jo phedo.”

16. Zvicinyi zvamajija ngo pamusolo pokuregerera?

¹⁶ Jehovha unoda kuti tive vanoregerera. (VaK. 3:13) Asi cokwadi ngo cokuti izvi zvinganesa. Asi isusu tinokwanisa kuregerera kudai tikatama kufuratira mazwire edu uye tovangisira kuti tisava no hasha. Tikaita izvi, ndipona basi patinokwanisa kuva no runyararo.—Wonanyi bhokiso rakazwi “ Zviro Zvitatu Kuitira Kuregerera.”

LANGARIRANYI ZVAKANAKIRA KUREGERERA

17. Tino zvikonzero zvipi zvinotiita kuti tiregerere?

¹⁷ Wonanyi zvikonzero zvinganani zvinovha pa zvikonzero zvakawanda zvatinazvo kuti tiregerere. Cokutanga, ngo cokuti tinotevejera Baba vedu Jehovha uye izvi zvinovadakaja maningi. (Ruka 6:36) Cocipiri, tinokhombija kubonga kedu ngo unyasha wa Jehovha wo kutiregerera. (Mateu 6:12) Uye cocitatu, kuregerera kunoita kuti tive no utano wakanaka no kuva no ushamwari wakavanga no vamweni.

18-19. Zvicinyi zvinozoitika kudai tikaregerera vamweni?

¹⁸ Patinoregerera, pangaitika zviro zvinoshamisa. Inga muezaniso wonanyi zvakaitika na Dhenise. Paainga ari mu tiribhunari, wainga asingazivi kuti mwanarume wiya waingaya akaitisa asidhenti wainga esida kuzviuraya pasure pokutongwa. Asi wakashamisika maningi ngo kuregerera ka Dhenise uye wakakheta kujija Bhaibheri no Zvapupu zva Jehovha.

¹⁹ Tingalangarira kuti kuregerera ciro cinonesa catinodikana kuita, asi kuita izvi cingava cikhethwa cinodakaja maningi. (Mateu 5:7) Ngo kudalo, itanyi zvese zvamunokona kuti mutevejere kuregerera ka Jehovha.