MUSOLO WO KUJIJA 41
NGOMA 13 Kristu, Muezaniso Wedu
Tinojijenyi ngo Mazuva 40 Okupejisira a Jesu Panyika
“Ivona vakamuwona ko 40 o mazuva, esibhuya ngo pamusoro po Umambo wa Mwari.”—Mabasa 1:3.
ZVATISAJIJA
Kutevejera muezaniso waakagaja pa mazuva ake 40 okupejisira pasi pano.
1-2. Zvicinyi zvakaitika ku vajiji vaviri va Jesu povaienda ku Emausi?
YAINGA 16 ya Nisani, yo gore la 33 K.A. vajiji va Jesu vaitambujwa maningi ngo ulombo, uye vainga vesithya. Vajiji vake vaviri,vakavha kuJerusarema voenda ku Emausi, ikona kainga ndhambo maningi no Jerusarema uye kainga no mumango unokwana kuita 11 o makilometro. Vanarume vaviri ava vainga vakacamwa, ngokuti Jesu wovaihambaya naye wainga avha kuuraiwa. Soterero yavo ngo pamusoro po zviro zvaida kuithwa ndi Mesiya yaiita inga ya lasika. Vasikazvizivi havo kuti vainga vooda kuwona zviro zvaizovashamisa.
2 Povainga vesihamba, pakaguma mundhu ovasikazivi otanga kuhamba navo. Ngo kudaro, vajiji ava vanotanga kumuvhunja zviro zvaivawaja zvainga zvaitika kuna Jesu. Asi mwanarume wiya, unotanga kubhuya navo masoko ovasikazombokanganwi. “Kutangira ndi Mosi mbhera kuva Phorofita vese,” iyena wakasanangura kuti Mesiya waidikana kutambujika uye ofa. Vajiji vaviri ava povakaguma ku Emausi, vakazozwisisa kuti mwanarume wiya wainga ari Jesu uye wainga amuswa ndi Mwari! Ambolangariranyi mudakalo wakava no vajiji ava, wokuziva kuti Mesiya wainga amuswa!—Ruka 24:13-35.
3-4. Zvicinyi zvakaitika ku vajiji va Jesu uye tinozowonenyi mu cijijo cino? (Mabasa 1:3)
3 Jesu wakazvikhombija kuvajiji vake mukati mo 40 yo mazuva ake okupejisira pasi pano. (Verenganyi Mabasa 1:3.) Mukati mo mazuva aya, Kusuruvara kese no kuthya kaaita vajiji zvese zvakava mudakaro uye vovaka kutenda kavo, wakaita kuti cikwata ici cive cakacunga pakuparijira masoko akanaka o Umambo nokujijisawo vamweni cokwadi. a
4 Kujija ngo pamusoro po zviro zvakaitika mu upenyu wa Jesu zvinotivangisa maningi, ngo kudaro mucijijo cino tinozowona kuti Jesu wakashandisisa kudini mazuva aya (1) kuti avangise vajiji vake, (2) kuti vazwisise maningi zvinyorwa (3) kuti avajijise zvovaidikana kuita muno lamangwana. Padivi rimwe nga rimwe, tinozowona kuti tingatevejeresa kudini Jesu.
KUVANGISAWO VAMWENI
5. Ngenyi vajiji va Jesu vaida kuvangiswa?
5 Vajiji va Jesu vaidawo kuvangiswa. Ngenyi? Ngokuti vamweni vainga vasiya muzi, mbhuri uye mabasa avo kuti vatevere Jesu. (Mateu 19:27) Vamweni vaiwoniwa inga vandhu vasikashandi, ngondava yo kuti vakava vajiji va Jesu. (Johani 9:22) Ivona vakashinga kuita izvi ngokuti vaitenda kuti Jesu wainga Mesiya. (Mateu 16:16) Asi Jesu paakafa ivona vakaruza Soterero yavo vakanyangajwa maningi.
6. Jesu paakamuswa zvicinyi zvaakaita?
6 Jesu wainasa kuziva kuwajiwa kaaita vajiji vake, kuwajiwa uku akusainga kuremba munozvokunamata, indava yokuti vainga varuza mundhu wovaida maningi. Ndiyo ndava zuva laakamuswa iyena wakatanga kuvangisa shamwari jake. Inga muezaniso, wakazviwonesa kuna Mariya Magadharena uwo wainga paguva la Jesu esicema. (Johani 20:11, 16) Iyena wakazviwonesazve kuvajiji vake vaviri vabhuiwaya pakutanga. Uye wakazviwonesawo kumu Postori Pedhro. (Ruka 24:34) Zvicinyi zvatingajija pa muezaniso uwu wa Jesu? Ngatiwone kuti zvicinyi zvaakaita paakazviwonesa kuna Mariya Magadharena.
7. Maererano na Johani 20:11-16, Jesu wakawona Mariya esiitenyi uye zvicinyi zvaakamuitira? (Wonanyi pikica)
7 Verenganyi Johani 20:11-16. Mumaamba kueja a 16 ya Nisani, vanakaji vainga vakagondeka vakaenda ku guva lainga lavingwa Jesu. (Ruka 24:1, 10) Umwe wo vanakaji ava wainga Mariya Magadharena. Mariya paakaguma paguva iri, iyena wakawona kuti mutembo wa Jesu wainga usisimo. Ngo kudaro wakahwirira sure esigogoma koovhunja Pedhro na Johani zvaainga awona, iyena wakatolana navo vohwirirazve ku guva la Jesu. Vese povakava no cokwadi cokuti muviri wa Jesu wainga usisimo ivona vakahwirira kanyi. Asi Mariya aato kwenda navo kanyi, wakasara esicema, asikazvizivi kuti Jesu wainga esimuwona. Jesu wakawona mwanakaji uwu akagondeka esicema, izvi zvakamusiririsa maningi. Ngo kudaro Jesu wakazviwonesa kaari omuvhunja masoko akapfava anovangisa maningi—Jesu wakapa Mariya basa rinokosha maningi, iyena waidikana koovhunja hama jake kuti Jesu wainga amuswa.—Johani 20:17, 18.
Mungatevejera Jesu, pamunozwawo mazwire avaya vakasuruvara moita zvese kuti muvavangise. (Wonanyi ndima 7)
8. Tingatevejeresa kudini Jesu?
8 Tingatevejeresa kudini Jesu? Inga ndi Jesu, tingavangisa hama jedu kuti jienderere mberi jesinamata Jehovha, maitire otingazviita ngookuzwisisa zvineso zviri kusangana no hama no hanzvaji jedu, tozwisisa mazwire avo uye tovabesa kudai zvesikwanisika. Wonanyi zvakaitika ku hanzvaji imweni inodanijwa kuti Jocelyn, hama yavo yakafa ngo asidhenti. Jocelyn wakati: “Ndakapeja mweji yakawanda maningi ndakasuruvara”. Ngo kudaro, hama imweni no mukaji wayo vakamudanija kumuzi kavo ivona vakamupa besero rese raaida, vakamuvhunja zviro zvakanaka zvokuti iyena waikosha pamberi pa Jehovha. Jocelyn wakati: “Yeni ndakajizwa inga kuti Jehovha wakashandisa varovorani ava kuti vaviye koondibesa. Ngo besero ravo ndinokwanisa kwenderera mberi ndesinamata Jehovha.” Tingavangisawo vamweni kudai tikazwisisa zvovanonga vesibhuya ngo pamusoro po mazwire avo, tinodikana kuvabesa no cinangwa cokuti vaenderere mberi vesinamata Jehovha.—VaRoma 12:15.
BESANYI VAMWENI KUTI VAZWISISE BHAIBHERI
9. Zvineso zvipi zvaisangana no vajiji va Jesu uye iyena wakaitenyi kuti avabese?
9 Vajiji va Jesu vaitenda zvovaijija mu Bhaibheri uye vaivangisira kuti vazvishandise mu upenyu hwavo. (Johani 17:6) Jesu paakauraiwa inga mbavha, ivona vakaneseka maningi ndizvona. Jesu waizviziva kuti vajiji vake vainga no rutendo uye vaida maningi Jehovha, asi iyena wakawona kuti vaidikana kunasa kuzwisisa Bhaibheri. (Ruka 9:44, 45; Johani 20:9) Ngo kudaro iyena wakavabesa kuti vazwisise zvovaiverenga. Wonanyi zvaakaita paakazviwonesa kuvajiji vaviri vaingaya vesiyenda ku Emausi.
10. Jesu wakaitenyi kuti athembese vajiji vake kuti iyena wainga Mesiya? (Ruka 24:18-27)
10 Verenganyi Ruka 24:18-27. Wonanyi kuti Jesu paakazviwonesa ku vanarume ava aato kubhuya ciripo-ripoco kuti wainga ani. Asi iyena wakavaitira muvhunjo. Ngenyi? Nguva jimweni waida kuvapa mukana kuti vabhuye zvainga zviri mu mweyo mavo. Izvi ndizvona zvovakaita. Ivona vakabhuya kuti vairangarira kuti Jesu waizosujunura VaIsraeri munyara jo Varoma. Pasure pokunge vabhuya zvaivahwaja, Jesu wakashandisa zvinyorwa kuti avabese kuzwisisa zvainga zvaitika. b Co usiku wo zuva ronaro, Jesu wakabesazve vajiji vamweni kuti vazwisise zvimwe-zvimwezvo. (Ruka 24:33-48) Tinojijenyi pa ndhoroodho iyi?
11-12. (a) Tinojijenyi ngo majijisire akaita Jesu cokwadi co Bhaibheri? (Wonanyi mafoto) (b) Nortey wakabeswa kudini ngo mujijisi wake wo Bhaibheri?
11 Tingatevejeresa kudini Jesu? Cokutanga, pamunonga mesijijisa Bhaibheri itanyi muvhunjo jinoita kuti mujiji abhuye zviri mu mweyo make. (Zvirevo 20:5) Mapeja kuzwa mazwiro ake, mubesenyi kuti awane vhesi inoenderana no zvaari kuzwa. Amudikani kumuvhunja zvaanodikana kuita. Asi, mubesenyi kuti arangarijisise ega ngo pamusoro po vhesiyo kuti awone mashandisire aangaita mu upenyu wake. Wonanyi muezaniso wo hama imweni yo kuGana inozwi Nortey.
12 Paainga no 16 o makore, wakatanga kujija Bhaibheri. Ngo kudaro ukama wake wakatanga kumuzonda. Asi zvicinyi zvakamubesa kuti aenderere mberi? Mujijisi wake wo Bhaibheri wakashandisa bhuku la Mateu citsauko 10 kuti amubese kuwona kuti Vakristu vocokwadi vaizotevererwa. Nortey wakabhuya kuti: “Pondaisongana no kutevererwa zvaindiita kuti ndive no cokwadi cokuti ndainga ndawana cokwadi.” Uye mujijisi wake, wakamubesa kuti alangarijisise zvinobhuiwa pana Mateu 10:16 kuitira kuti ave no nderemejo uye uzivi paanonga esibhuisana no ukama wake ngo pamusoro po shwiro yokunamata. Paakapera kubhabhatijwa, iyena waida kushanda inga phiyona, asi abake vailangarira kuti iyena waizokheta kuyenda koita jijo yo pamusoro. Kunja kokumuvhunja zvokuita, mujijisi wa Nortey wakamuita muvhunjo yakamubesa kuti alangarijisise ngo pamusoro po ndhungamiriro jiri mu Bhaibheri. Zvicinyi zvakazoitika? Nortey wakazvikhetera ega kungwina mu nguva yakazara. Abake vakamugogomera pa muzi. Nortey wakazwa kudini pakaitika izvi? Iyena wakati: “Ndino cokwadi cokuti ndakakheta kuita zviro zvakanaka.” Kudai tikapsakawo mukana kuti tibesewo vamweni kuti vanase kuzwisisa Bhaibheri, tinonga tesivabesa kuti vave Vakristu vakavanga muno zvokunamata.—VaEfeso 3:16-19.
Mungatevejera Jesu, ngokubesa vamweni kuti vazwisise Bhaibheri. (Wonanyi ndima 11) e
BESANYI VAMWENI KUTI VAVE “CIPO KUVAMWENI”
13. Jesu wakaitenyi kuti basa rokuparijira rilambe resienderera mberi paaizohwirira kudenga? (VaEfeso 4:8)
13 Jesu painga pasi pano, wakaita zvese zvaakavhunjwa ndi Jehovha kuti aite. (Johani 17:4) Asi jesu aato kuva no mulangariro wokuti: ‘Kudai wesida kuti zviro zvako zvibude ushoni itai wega.’ Mukati momakore matatu o basa rake, iyena wakajijisa vamweni kuti vaitewo basa iri. Jesu asati ahwirira kudenga, wakapa vajiji vake basa rokujijisa no kuparijira. Vamweni vakhona vainga na 20 o makore—asi iyena wakavathemba kuti vaizoenderera mberi vesitungamirira magundata a Jehovha. (Verenganyi VaEfeso 4:8.) Jesu wakashandisisa kudini mazuva ake 40 kuti abese vamweni kuti vave “zvipo kuvamweni”?—Wonanyi masoko okujija pana VaEfeso 4:8.
14. Jesu wakaitenyi kuti ajijise vajiji vake mu mazuva ake 40 okupejisira pasi pano? (Wonanyi foto)
14 Jesu wakapa mbhangiro kuvajiji vake, asi wakazviita ngo rudo wese. Inga muezaniso, iyena wakawona kuti vamweni vakhona vainga vasina kutenda kakaperera, asi iyena wakavapangira. (Ruka 24:25-27; Johani 20:27) Jesu wakavavhunja kuti vaidikana kubatikana pakutungamirira vandhu va Mwari, kusiripi kupsaka mare. (Johani 21:15) Wakavavhunjazve kukosha kunoita kurega kuzviezanisa no zvingaizwa ngo vamweni pakushandira Jehovha. (Johani 21:20-22) Wakabesa vamweni vainga no mawonero akashata ngo pamusoro po Umambo wa Mwari, ovaita kuti vabatikane pa kuita basa rokuparijira masoko akanaka. (Mabasa 1:6-8) Vakuru vo ungano vangajijenyi?
Mungatevejera Jesu, ngo kujijisa vamweni kuti vakwanise kuita mabasa mu ungano. (Wonanyi ndima 14)
15-16. (a) Vakuru vo ungano vangatevejeresa kudini Jesu? Tsananguranyi. (b) Patrick wakabeswa kudini ngo mbhangiro yaakapuwa?
15 Vakuru vangatevejeresa kudini Jesu? Ivona vanodikana kubesa no kujijisa vamweni, maningi-ningi majaha kuitira kuti vakwanise kuita zviro zvakawanda mu ungano. c Asi vakuru avadikani kuemera kuti hama iji jive vandhu vasina cishaishi. Kuitira kuti hama iji jikwanise kuita zvakanaka mabasa ajo mu ungano, vakuru vanodikana kupangira ngo rudo wese, kuitira kuti vawone dikano yokuva vandhu vanozvidodokesa, vakagondeka uye vanozvipira kuti vabese vamweni.—1 Timoti 3:1; 2 Timoti 2:2; 1 Petro 5:5.
16 Wonanyi kuti hama imweni inozwi Patrick yakabesereka ngo mbhangiro yo yakapuwa. Paaiga asiri mujaha iyena waibata vamweni zvakashata, kubatanijawo no hanzvaji mu ungano. Mukuru umweni paakawona kuti Patrick waida besero iyena wakamupanga asikakhoni-khoni. Patrick wakati: “Mukuru uwu wakashuma maningi, inini ndaiwajiwa maningi pondaiwona vamweni vesiita mabasa ondaidakarira kuita mu ungano. Asi mbhangiro yo mukuru uwu yakandibesa maningi kuti ndibatikane pakushandira hama jangu, ndisinganeseki ngo kuda zvigaro mu ungano.” Inga muviyo, Patrick wakagajwa kuva mukuru anomakore anoti darikenyi 20.—Zvirevo 27:9.
17. Jesu wakaitenyi kuti akhombije kuti waithemba vajiji vake?
17 Jesu wakapawo vajiji vake basa rokujijisa kusiripi kuparijira basi. (Wonanyi masoko anoti “vajijisenyi” pana Mateu 28:20.) Nguva jimweni vajiji va Jesu vaijizwa vasito kunasiririka kuti vaite basa iri rokujijisa. Ngo kudaro, Jesu wainga no cokwadi cokuti vajiji vaizokwanisa kuita basa iri. Izvi ndizvona zvakaita kuti Jesu abhuye kuti: “Inga zvavakandituma Baba, inini ndiri kumutumawo.”—Johani 20:21.
18. Vakuru vo ungano vangatevejeresa kudini Jesu?
18 Vakuru vangatevejesera kudini Jesu? Vakuru vano ruzivo, vanoziva kukosha kunoita kujijisa no kupa mabasa vaya vasiri kujijiswa. (VaFiripi 2:19-22) Inga muezaniso, vakuru vangaja majaha pa basa rokucenesa no kunasirira nasirira Nyumba yo Kunamatira. Vakapera kupa hama iji mabasa, vakuru vanodikana kuthemba kuti jinozoita zvakanaka kamare. Mukuru umweni wo cijaha anozwi Mateu wakati: Ndinobonga maningi ngo jijiso yo ndakapuwa ngo vakuru vainga no ruzivo, izvi zvakandibesa kuti ndikwanise kuita ushoni mabasa ese ondaipuwa mu ungano. Iyena wakati: “Ndakabeswa maningi, ngokuti ivona vaiwona zvondaiposha inga divi rokujijira kangu, ngo kudaro ivona vaindibesa kuti ndikwanise kuita zvakanaka.” d
19. Iyemwi masunga kuitenyi?
19 Jesu wakashandisa mazuva ake 40 okupejisira panyika kuti avangise, ajijise uye apangijirewo vamweni. Yesu tinodikana kushanda ngo simba kuti titevejere muezaniso wa Jesu. (1 Petro 2:21) Iyena unozotibesa kuti tizviite, ngo kuti wakatiphoromisa kuti: “Ndina imwimwi mbhera pa kupera ko nyika.”—Mateu 28:20.
NGOMA 15 Kusimba Mwana wo Dangwe la Jehovha!
a Ma Bhuku ocivhangeri uye no amweni, anobhuya kuti Jesu paakamuswa iyena wakazviwonesa kakawanda ku vandhu vakadai inga ndi: Mariya Magadharena (Johani 20:11-18); ku vanakaji vamweni (Mateu 28:8-10; Ruka 24:8-11); ku vajiji vake vaviri (Ruka 24:13-15); kuna Pedhro (Ruka 24:34); ku vapostori, tisikabataniji na Tomasi (Johani 20:19-24); ku vapostori, kubatanijawo na Tomasi (Johani 20:26); ku vajiji vanomwe (Johani 21:1, 2); ku vajiji vanodarika 500 (Mateu 28:16; 1 VaK. 15:6); ku munukuna wake Jakobho (1 VaK. 15:7); ku vapostori vese (Mabasa 1:4); ku vapostori, phedo no Bhetaniya. (Ruka 24:50-52) Mumweni maaizvivonesa amuto kunyorwa.—Johani 21:25.
b Kuti muwone uphorofita umweni ngo pamusoro pa Mesiya, endanyi mu saiti jw.org pamusoro unoti: “Jesu ndi Mesiya Anobhuiwa mu Uphorofita Here?”
c Pamweni paya, hama jinomakore anodarika 20, jingatogajwa kuva muwonereri wo ndharaundha. Ngo kudalo, hama iji jinodikana kutanga jashanda inga vakuru vo ungano kuti jiwane ruzivo.
d Kuti muwane mazano amweni angabesa hama jisiri majaha kuti jiite mabasa akawanda mu ungano, wonanyi Mungwaji wa Agosto wo 2018, mapheji 11-12, ndima 15-17, uye Mungwaji 15 ya Abril wo 2015, mapheji 3-13.
e KUSANANGURWA KO MUFOTO WO: Pasure pokunge abeswa kurangarijisira zvinobhuiwa ngo Bhaibheri, mujiji wo Bhaibheri unosunga kurasa zviro zvisoshandiswa pa khisimusi.
