MUSOLO WO KUJIJA 40
NGOMA 30 Baba Vangu, Mwari Wangu uye Shamwari
Jehovha “Unolapa Vano Mweyo Unowaja”
“Iyena unolapa vano mweyo unowaja; uye unosunga zvilonda zvavo.”—Pis 147:3.
ZVATISAJIJA
Jehovha unoneseka maningi paanowona vaya vano zvilonda zvomumulangariro. Cijijo ici, cinozotiwonesa kuti Jehovha unopungurisa kudini zvineso zvedu zvo mumulangariro uye tingaitenyi kuti tibese vamweni vari kunesekawo.
1. Jehovha unozwa kudini paanosota vanamati vake?
ZVICINYI zvinowoniwa ndi Jehovha paanosota vanamati vake pasi pano? Jehovha unowona patinodakala uye patinonyangajwa. (Pis 37:18) Iyena unodakala maningi paanowona vanamati vake vesimunamata ngo gwanja rakanaka azvinenyi no matambujiko avanosangana nawo! Kupinda izvi, Jehovha unoda maningi kutsigira uye kutinyalaja.
2. Jehovha unoitenyi ku vandhu vano mweyo jinoneseka? Uye tingaitenyi kuti tiwane besero lake?
2 Mapisarema 147:3 inobhuya kuti: Jehovha unosunga zvilonda zva vaya vano mweyo inowaja. Pa bhuku iri, Jehovha uri kuezaniswa na vaya vanobata zvakanaka vakaremajwa mumulangariro. Hino, tingaitenyi kuti tibesereke ngo rudo iri la Jehovha? Ambolangariranyi ngo zvo muezaniso uwu: Medhiko anokona kulapa zvakanaka ungabesa mundhu wakakhuvazika kuti apone. Kuti abeswe mundhuwo, wakakhuvazikalo, unodikana kuzwira mazano ese aakavhujwa ndi medhiko. Mucijijo cino, tinozowona zvinobhuiwa ndi Jehovha mu soko lake Bhaibheri ngo pamusolo pa vaya vanoneseka mumulangariro uye tinozowonazve kuti tingamashandisisa kudini mazano aya o rudo.
TINOKOSHA MANINGI KUNA JEHOVHA
3. Ngenyi vamweni vanolangarira kuti avakoshi?
3 Tiri kurarama mu nyika ino vandhu vasina rudo. Vandhu mazuva ano, avaripi kukhombijirana rudo umwe kuno umweni uye vari kuita kuti vamweni vazvizwe inga vandhu vasikabatwi zvakanaka kana vasikakoshi. Hanzvaji imweni inodanijwa Helen a yakati: “Inini ndakakurira pa mbhuri yainga isingakhombijiri rudo. Abangu nguva jese vaindoita zviro zvo hasha uye mazuva ese vaigara vesindotivhunja kuti apana cotaibesa.” Mukufananawo na Helen, nguva jimweni makambobatwa zvisina kunaka kana kuti makambosangana no mugariro wakamuita kuti muzvizwe musingadiwi. Kudai makambosangana no mugariro iji, nguva jimweni zvingamunesa kuthemba kuti Jehovha unomuda maningi.
4. Maererano na Pisarema 34:18, Jehovha unotipa cokwadi cipi?
4 Kudai musingabatwi zvakanaka ngo vamweni, ivanyi no cokwadi cokuti Jehovha unomuda maningi uye unomukoshesa. Iyena “uri phedo na vaya vano mweyo unowaja.” (Verenganyi Mapisarema 34:18.) Kudai mesizvizwa mesineseka kudivi lo zvokunamata langariranyi kuti: Jehovha zviripo zvaakawona pamuri uye ndiyena wakamukheta kuti mumushandire. (Joh 6:44) Langariranyizve kuti Jehovha Mwari wakanasiririka nguva jese kuti amubese uye kaari munokosha maningi.
5. Zvicinyi zvatinojija ngo maonero aiita Jesu vandhu vaibatwa zvisito kunaka?
5 Tingajija zvakawanda maningi ngo pamusolo po mazwiro a Jehovha patinonga tesilangarijisisa ngo muezaniso wa Jesu. Paainga pasi pano, Jesu waibatikana maningi ngo vandhu kubatanijawo na vaya vainga vasingabathwiwo zvakanaka. (Mat. 9:9-12) Inga muezaniso, mwanakaji umweni wainga no citenda cainesa maningi wakapsasa nguwo ya Jesu esisoterera kulapwa, uye Jesu wakamubonga ngo kutenda uku kaakakhombijira. (Mak 5:25-34) Isusu tinonasa kuzviziva kamare kuti Jesu wakanasa kukhombija undhu wa abake Jehovha. (Joh 14:9) Ngokudalo, ivanyi no cokwadi cokuti kuna Jehovha imwimwi munokosha maningi. Zivanyi kuti Jehovha Mwari unodakarira maningi mugariro jenyu jakanaka, kutenda kenyu uye rudo ramunomukhombijira.
6. Zvicinyi zvingaizwa ngo mundhu unozvizwa asingakoshi?
6 Zvicinyi zvamungaita kudai musingathembi kuti munokosha kuna Jehovha? Verenganyi vhesi jomuBhaibheri jinokhombija kuti imwimwi munokosha zvakadini kuna Jehovha uye psakanyi nguva kuti mulangarijisise ngo pamusolo pazvo. b (Pis. 94:19) Kudai yemwi amuto kukwanisa cinangwa comaida kana kuti muri kuneseka ngo pamusolo pokuti amuto kukwanisa kuita zvakawanda inga zviri kuizwa ngo vamweni, musazviezanisa, ngokuti Jehovha aaezanisi mabasa edu. Iyena unoda kuti tiite zvatinokona. (Pis. 103:13, 14) Kudai makasangana no mugariro wo kutama kubatwa zvakanaka, kuwajiswa mumulangariro, kuvangirijwa kuizwa zvo uhure musaneseka maningi ngo zvakamuitikirari. Kubhuya cokwadi yemwi amusaidikana kuizirwa zvakadalo! Zivanyi kuti kuna Jehovha imwmwi amuto kushaisha asi, wakashaisha mundhu wakamuitiraro zvakashata. (1 Pet. 3:12) Sandra, uwo asito kubatwa zvakanaka wakati: “Nguva jese ndinoita mukumbiro kuna Jehovha kuti andibese kuti ndive no mawonero anondiita Jehovha.”
7. Kuitisa kudini zvatinosangana nazvo muupenyu zvingabesa mu basa la Jehovha?
7 Musakana-kana kuti Jehovha ungamushandisa kuti mubesewo vamweni. Jehovha wakamupa mukana wo kubesera vamweni mu basa lo kuparijira masoko akanaka. (1 VaK. 3:9) Zviro zvakamuitikira muupenyu, zvingamubesa kuti mubatikane no matambujiko ari kusangana no vamweni no mazwiro avari kuita. Yemwi mungaita zvakawanda maningi kuti muvabese. Helen, wabhuiwaya pakutanga, iyena wakaashira besero uye zvino uri kukona kubesawo vamweni. Iyena wakati: “Ndainga ndisingazvizwi zvakanaka asi ngo besero la Jehovha ndaakudakala maningi muupenyu wangu.” Zvino Helen waakuzvizwa akasununguka uye waakutoshanda inga piyona wo nguva jese.
TENDERANYI KUREGERERWA NDI JEHOVHA
8. Zvicinyi zviri kutivhunja Jehovha pana Isaya 1:18?
8 Vashandiri vamweni va Jehovha vasiri kuneseka ngo pamusoro po zvishaishi zvovakaita kare, pavainga vasati vabhabhatijwa kana vapera kubhabhatijwa. Asi zvakanaka kulangarira kuti Jehovha wakatipa mwanake inga muripo ngo ndava yokuti unotida maningi. Iyena, unoda kuti titendere cipo ici. Jehovha unotithembesa kuti: “Kudai tikatonga shwiro naye” c iyena unozotiregerera nokusingaperi. (Verenganyi Isaya 1:18.) Rudo lakadini rina Jehovha ro kutama kulangarira zvishaishi zvedu zvotakaita kare! Uye panguva imweyo iyena unoti: Nguva jese ndinolangarira zvakanaka zvamunoita.—Pis. 103:9, 12; VaH. 6:10.
9. Pano kuti tibatikane pa zviro zvakaitika kare, ngenyi zvakanaka kubatikana pa zviro zvatinokona nyamasi no munolamangwana?
9 Kudai mesineseka ngo pamusolo po zviro zvomakaita kare, itanyi zvamunokona kuti mubatikane ngo zvamuri kuita uye no zvamunoda kuzoita mberiyo. Ambolangariranyi ngo muezaniso wo mupostori Pauro. Iyena waineseka maningi ngokuti wainga akatambuja maningi Vakristu esivaitira utsinye, asi waizviziva kuti Jehovha wainga akamuregerera. (1 Tim. 1:12-15) Kubhuya kuti mupostori Pauro wakaenderera mberi esilangarira zviro zvaakashaisha kare here? Kubhuya cokwadi, haiwa. Aato kulamba esilangarira zvaainga esiita paainga ari mu farisi waireremejwa. (VaF. 3:4-8, 13-15) Pano kuti abatikane muno zvaakaita, mupostori Pauro waibatikana mu basa lo kuparijira uye no lamangwana rake. Inga ndi Pauro, isusu atikoni kucinja zvakaitika kare. Asi tingaita mukumbiro kuna Jehovha kuti atibese pa zviya zvatiri kuita zvino, kuti tikwanise kusota lamangwana redu uye kuzvipikirwa zvatakagondeswa.
10. Zvicinyi zvatingaita kudai takashaishira vandhu vamweni kare?
10 Nguva jimweni muri kuneseka maningi ngo pamusoro po zviro zvamakaita kare zvokuti zvakapsasawo vamweni. Zvicinyi zvingamubesa? Itanyi zvamunokona kuti mutame kuphindazve zvomakashaishalo, bhuyanyi cokwadi pano zvakaitikaro no kukumbira ruregerero. (2 VaK. 7:11) Kumbiranyizve Jehovha kuti abese vaya vakakanganiswa ngo zvishaishi zvomakaita. Jehovha unozomubesa, uye unozobesawo vaya vakakanganiswa ngo zviro zvomakaita kuti muwane simba ro kucungirira uye kuvazve no runyalaro.
11. Zvicinyi zvatingajija ngo muezaniso wa Jona? (Wonanyi pakhavha.)
11 Jijanyi ngo zvishaishi zvomakaita munguva yakadarika, uye ivanyi no cido cokusiya kuti Jehovha amushandise ngo gwanja raanoda. Wonanyi zvakaitika no muporofita Jona. Jehovha wainga akamukumbira kuti aende ku Ninivhi, ngokudalo iyena wakatiza oenda kaainga asito kuvhunjwa. Jehovha wakapangira Jona, uye iyena wakajija ngo zvaakashaisha. (Jon 1:1-4, 15-17; 2:7-10) Jehovha aato kusiya kushandisa Jona. Jehovha Mwari wakapazve Jona mukana umweni wokuti aende ku Ninivhi, pa hwendu uwu, Jona wakazwira asito kumbolangarira kaviri kana katatu. Iyena aato kusiya kuti kuneseka ngo zvaakaita kare kumukorerese kushandiswa ndi Jehovha.—Jon 3:1-3.
Pasure pokuti muporofita Jona wabuda mu dambujiko ro kumijwa ngo hove huru, Jehovha wakamukumbirazve kuti aende Ninivhi koparijira ngo pamusolo po masoko ake (Wonanyi ndima 11)
JEHOVHA UNOSHANDISA MWEYA WAKE MUPSENE KUTI ATIVANGISE
12. Tingaitenyi kuti tiwane runyalaro la Jehovha panoitika zviro zvakashatisisa? (VaFiripi 4:6, 7)
12 Jehovha unoshandisa mweya wake kuti atinyalaje no kutivangisa paya patinosangana no zvineso. Ambolangariranyi zviro zvinowaja zvakasangana na Ron pamwepo no mujimai wake Carol. Mwana wavo worume, wakazviuraya. Ivona vakabhuya kuti: “Taimbosangana no matambujiko kare, asi kubhuya cokwadi iri lakava dambujiko rakakura maningi katiri. Takaita mukumbiro kuna Jehovha usiku wese uye takazwa runyalaro ngo co mumweyo inga zvinobhuiwa pana VaFiripi 4:6, 7.” (Verenganyi.) Kudai muri kusangana no zvineso zvinomuwaja maningi, dururanyi mweyo wenyu kuna Jehovha ngo kuita mukumbiro, mesimuvhunja zvese zvinomunesa pa nguva yamunoda. (Pis. 86:3; 88:1) Kumbiranyi Jehovha mweya wake mupsene nguva jese uye thembanyi kuti iyena unozodavira zvicemo zvenyu.—Ruka 11:9-13.
13. Kuitisa kudini mweya mupsene ungatibesa kuti tienderere mberi tesinamata Jehovha? (VaEfeso 3:16)
13 Imwimwi muri kuzvizwa musingakoni kuita zviri zvese ngo ndava yo dambujiko ramuri kusangana naro here? Kudai zvakadalo, kumbiranyi Jehovha kuti amupe simba ro mweya mupsene kuti mulambe mesimunamata makagondeka. (Verenganyi VaEfeso 3:16.) Wonanyi zvakaitikira hanzvaji imweni inodanijwa kuti Flora. Ivona no mwamuna wavo, vaishanda inga misiyonario, asi mwamuna wavo aato kuva akagondeka kavari uye ngo ndava yazvo, vakazorambana. Ivona vakati: “Ndakawajiwa maningi ngo kutama kugondeka ko mwamuna wangu, zvokuti zvakaitikari zvakandipeja simba. Inini ndakaita mukumbiro kuna Jehovha kuti andipe mweya wake mupsene kuti ndikwanise kucungirira. Jehovha wakandipa zvandaida kuti ndive no simba lo kunyisa cineso caita inga cisinganyisiki.” Flora wakawona besero la Jehovha pa nguva iyi, uye iyena wakathembazve kuti Jehovha waizomubesera pa zvineso zvimweni zvaizotevera. Iyena wakaengejera esiti: “Masoko ari pana Mapisarema 119:32 anosanangura zvakajeka kuti Jehovha wakandibesa zvakadini, ipona panoti: ‘Inini ndinodakarira kutevejera mutemo yenyu, ngokuti inovhura gwanja mumweyo mangu.’”
14. Zvicinyi zvatinodikana kuita kuti tiashire mweya mupsene wa Mwari?
14 Pamunopera kuita mukumbiro kuna Jehovha mesikumbira mweya mupsene, zvicinyi zvamunodikana kuita zvinoenderana no zvamakumbiraro? Ejanyi kuita zviri zvese zvingamubesa kuti muwane besero lo mweya mupsene. Inga muezaniso kuenda kumusangano no kuenda kubasa ro kuparijira. Zajanyi mulangariro wenyu ngo zvinoda Jehovha ngo kuverenga Bhaibheri mazuva ese. (VaF. 4:8, 9) Pamunonga mesiverenga Bhaibheri, nasanyi kulangarija ngo pamusoro po vamweni vakasangana no matambujiko uye wonanyi kuti Jehovha wakavabesesa kudini. Sandra, uwo wakasangana no mugariro unonesa waaidikana kuhwisana nawo muupenyu wakati: “Muezaniso wa Josefa wakabaya maningi mweyo wangu. Iyena wakasangana no matambujiko akawanda maningi no kuizirwa zviro zvisito kururama, asi aato kusiya kuti izvi, zvipungure ushamwari wake na Jehovha.”—Gen. 39:21-23.
JEHOVHA UNOSHANDISA HAMA NO HANZVAJI KUTI JITINYALAJE
15. Tinganyalajwa ndiyani, uye vangazviitisa kudini? (Wonanyi foto.)
15 Patinonga tesitambujika, “tingawana besero kuvha ku hama no hanzvaji jedu jo Cikristu.” (VaK. 4:11) Jehovha unoshandisa hama no hanzvaji jedu kuti atikhombijire rudo lake. Ivona vanotinyalaja pa matambujiko atinonga tesisangana nawo, uye vanoeja kuzwisisa mazwiro edu, kana kuti nguva jimweni vangagala phedo pedu, kunyage vakanyarara zvingatibesa maningi. Ivona vangatikhombija vhesi iri yese iri mu Bhaibheri kana kuti kuita mukumbiro nesu. d (VaR. 15:4) Nguva jimweni hama no hanzvaji jedu, jingatibesa kuti tilangarire kuti Jehovha unowona kudini ngo pamusolo po zvatiri kusangana nazvo uye vangatibesazve kuti tive takagajana no kuramba tesicungirira. Nguva jimweni tingazvizwa takasuruvara maningi, uye munguva yonawo shamwari yedu yo Cikristu ingativiisira zvokurhya no kutinyalaja.
Shamwari jakathembeka, ndi jiya jakaivha munozvokunamata jinozotibesa maningi no kutinyalaja (Wonanyi ndima 15)
16. Zvicinyi zvatinodikana kuita kuti tibeswe ngo vamweni?
16 Kuti vamweni vatibese, vangada kuziva zvatiri kudalo. Hama no hanzvaji jedu jinotida maningi uye jinoda kutibesa. (Zvi. 17:17) Asi nguva jimweni zvingavanesera kuziva kuti tiri kuva no mazwiro api uye zvicinyi zvatiri kuda. (Zvi. 14:10) Kudai mesineseka mumulangariro, vhunjanyi mazwiro enyu shamwari yakaivha muno zvokunamata. Muvhunjenyi kuti zvicinyi zvaangaita kuti amubese. Nguva jimweni mungakheta kuvhunja mukuru umwe kana kuti vaviri vangamurerukira kubhuya navo ngo pamusolo po zvamuri kuzwa. Kuveni ngo divi lo kujihanzvaji, nguva jimweni vangava vakarerukirwa kubhuisana no hanzvaji jakaivha munozvokunamata.
17. Zvicinyi zvingativhiringija kuti tibeswe ngo hama no hanzvaji jedu? Uye tingaitenyi kuti tirhwisane nazvo?
17 Musapeja nguva yakareba muri mega. Ngo ndava yo kuneseka katinonga tesisangana nako mumulangariro, nguva jimweni tingatama kuda kuva phedo no mundhu ari wese. Icokwadi kuti, nguva jimweni hama no hanzvaji jedu jingatama kutizwisisa, joita zviro zvinotisiya takanyangajwa. (Jak. 3:2) Asi musatendera kuti zvineso zvamunosangana nazvo, zvimupalajanise no hama no hanzvaji jenyu ngokuti Jehovha ungavashandisa kuti vaite zviro zvingamudakaja. Mukuru umweni unodanijwa Gavin, unogara esineseka ngo ndhendha yo kukasika kunyangajwa wakati: “Nguva zinji ciro candinoda maningi ikuva no shamwari jangu.” Kunyange zvakadalo, Gavin unoenderera mberi esivangisira kuti agare no jihama jo Cikristu, pese paanoita kudalo unozvizwa ari nane. Hanzvaji imweni inodanijwa Amy yakati: “Ngo ndava yo zviro zvakandiitikira, zvinondinesa kuthemba vamweni. Asi yeni ndiri kujija kuda hama no hanzvaji jangu no kujithemba inga zvinoizwa ndi Jehovha. Ndinozviziva kuti, kuita izvi kunoita kuti Jehovha adakare uye inini ndinozovawo ndakadakala.”
ZVIGONDISO ZVA JEHOVHA NGO PAMUSOLO PO LAMANGWANA ZVINOTINYALAJA
18. Zvicinyi zvatinosoterera munolamangwana? Uye zvicinyi zvatinodikana kuita zvino?
18 Tinodikana kusotesesa lamangwana redu ngo kuthemba kese, tesiziva kuti Jehovha ngo kukasika unozotivhisira zvinotiwaja no kuneseka mumulangariro. (Zvak. 21:3, 4) Zuva iri parinoguma, zviro zvese zvaitinesa atizozvilangaririzve uye “azvizoviizve mu mweyo.” (Isa. 65:17) Inga zvatajija mu cijijo cino, Jehovha unolapa zvilonda zvedu kutangira zvino. Ngokudalo, itanyi zvese zvamunokona kuti Jehovha Mwari amunyalaje no kumubesa. Nguva jese, thembanyi kuti Jehovha “unozomungwarira.”—1 Pet. 5:7.
NGOMA 7 Jehovha, I Simba Redu
a Mazina akacinjwa.
b Wonanyi bhokiso rinoti: “ Imwimwi Munokosha Maningi Kuna Jehovha.”
c Kuti “titonge zvineso” na Jehovha tinodikana kukhombijira kuti takhauya ngo kukumbira ruregerero pa zvishaishi zvedu uye tosiya kuitazve zvakashata. Kudai tikaita cishaishi cakakura tinodikana kupsaka besero ku vakuru vo ungano.—Jak. 5:14, 15.
