MUSOLO WO KUJIJA 44
NGOMA 33 Turanyi Mutoro Wenyu Kuna Jehovha
Tinganyisisa kudini Kutama Kururama
“Musanyiswa ngo ushaishi, asi lambanyi mesinyisa ushaishi ngo zvakanaka.”—VaRoma 12:21.
ZVATISAJIJA
Mu cijijo cino tinozowona kuti tinganyisisa kudini kutama kururama ngo kutama kunyanyisa kuita zviro zvakashata.
1-2. Mugariro ipi yatingaizirwa zvisito kururama?
JESU wakabhuya ngozvo muezaniso wononi imweni yailamba yesikumbira kumutongi kuti itongwe zvakarurama. Ndhorovondho iyi yakabaya maningi mweyo yo vajiji va Jesu, ngokuti munguva iyi vandhu vaibathwa zvisito kururama. (Ruka 18:1-5) Muezaniso uwu unoshandawo katiri mazuva ano, ngokuti tinobathwawo zvisito kururama.
2 Munyika nyamasi uno, mukheto, kuwonera vamweni pasi, uye kudzvinyirira zviro zviri kuitika maningi, ngondava yazvo atishamisiki patinobathwa zvisito kururama. (Mup. 5:8) Isusu, atisotereri kubathwa zvisito kururama ngo hama kana hanzvaji; asi izvi, zvingaitika. Zvakajeka kuti, hama jedu jakasiyana na vaya vanotibata zvisito kururama. Ivona vandhu vanocishaishi. Asi, tingashandisa muezaniso wa Jesu wokutama kubathwa zvisito kururama kuti tikwanise kuhwisana no mugariro jakadalo. Kudai tikavangisira kuti tive vandhu vanosengerera, kuvaya vasikanamati Jehovha navaya vanotibata zvisito kururama tinodikanazve kuva vanosengerera ku hama no hanzvaji jedu! Jehovha unozwa kudini paanotiwona tesibathwa zvisito kururama, vangava vandhu vasinganamati Jehovha kana muungano? Kubhuya kuti Jehovha uno hanya nesu here?
3. Jehovha uno hanya here no vanobathwa zvisito kururama, uye ngenyi?
3 Jehovha unowona mabatirwe atinoizwa ngo vamweni. “Jehovha unoda kururama.” (Pis. 37:28) Jesu wakatithembesa kuti Jehovha “unozoita kuti kururama . . . kuvepo” nguva yakona inozoguma ngokukasika. (Ruka 18:7, 8) ngokukasika Jehovha unozovhisa zvese zvinotiita kuti titambujike uye kuvhisa kutama kururama.—Pis. 72:1, 2.
4. Ibesero ripi ratinopuwa ndi Jehovha mazuva ano?
4 Zvino ngatiemere nguva yokuti Jehovha azopeja zvineso zvese zvatiri kusanganari nazvo, asi munguva yatiri kuraramari Jehovha unozotibesa kuti tizive zvatinodikana kuita kuna vaya vanotibata zvisito kunaka. (2 Pet. 3:13) Iyena unotijijisa zvatinodikana kuita kuti tisaita zviro zvinotiviisira zvineso. Esishandisa mwana wake Jesu, Jehovha wakatipa muezaniso wakakwana wokuti tinganyisisa kudini kutama kururama. Iyena unotipazve ndhungamiriro jiri mu Bhaibheri jinokhombija kuti tingaitenyi kudai tikabathwa zvisito kunaka.
NGWARIRANYI ZVAMUNOITA
5. Ngenyi tinodikana kungwarira mahwisire atingaita kutama kururama?
5 Isusu tingazvizwa takakhuvazika uye kuneseka ngo ndava yo kutama kururama kuri kuitika. (Mup. 7:7) Kunyange vanamati va Jehovha vakagondeka vokare vakadai inga ndi Jobho uye Habhakuki vakavawo no mazwiro akadalo. (Job 6:2, 3; VaH. 1:1-3) Icokwadi kuti tingava no mazwiro onawo asi tinodikana kungwarira kuti zvisatiita kuti tiite zviro zvisikabesi.
6. Muezaniso wa Absaromu unotijijisenyi? (Wonanyi foto.)
6 Kudai tesibathwa zvisito kunaka kana kuwona umweni wedu watinoda esitambujika ngokubathwa zvisito kururama. Nguva jimweni tingada kuhwirijira kana kupanica mundhuwo ngo njira yakasiyana-siyana asi kuita izvi zvingaita kuti zviro zvinyanye kushata. Wonanyi muezaniso wa Absaromu mwana wamambo Dhavhidhi. Iyena wakanyangajwa maningi hanzvaji yake Tamari poyakajipwa ngo mukoma wake Amoni. Maererano no mutemo wa Mosi, Amoni waidikana kuuraiwa ngo ndava yo zvaakaita. (Re 20:17) Kunyange Absaromu wainga no cikonzero cokunyangajwa ngo zvakaitika asi wainga asikatendehwi kuti amuulaye ngo nyala jake.—2 Sam. 13:20-23, 28, 29.
Tamari paakasangana no mugariro wo kutama kubathwa zvisito kururama, mukoma wake Absaromu aato kukwanisa kuzvibata (Wonanyi ndima 6)
7. Kutama kururama kakapsasisa kudini munyori wo mapisarema?
7 Vaya vanoita zvisito kururama vakatama kupangihwa, isusu tinowona kuti azvishandi kuita zvakarurama. Ambolangariranyi ngo zvo munyori wo mapisarema wakawona kuti vandhu vanoita zvakashata vanobudirira uye vanoita zvakanaka avabudiriri. “Iyena wakati, vanoita zvakashata nguva jese vanodakala”. (Pis. 73:12) Iyena wakavhiringijika maningi oguma pakuda kuruza soterero yake no makomborero okushandira Jehovha, iyena wakati: “Pandakaeja kuzvizwisisa zvakandinesa.” (Pis. 73:14, 16) Ngokudalo iyena wakati: “Soka jangu jainga joda kupauka, soka jangu jainga jaaphedo kuti jindiwise.” (Pis. 73:2) Izvi zvakaitikawo kuhama imweni inodanijwa Alberto.
8. Alberto wakapsasiswa kudini ngo kutama kururama?
8 Kutama kururama kakaita kuti Alberto apumbhwe kuti wainga aba mare yo muungano. Inga muviyo iyena wakaruza makomborero aainga nawo muungano, uye izvi zvakaita kuti vese vakazwa zvakaitikalo vasamureremeja. Iyena wakati: “Inini ndaizvizwa ndisikadiwi, ndakaremba uye ndeineseka,” iyena wakatendera kuti kuwajiwa kake kumurembese kudivi lo zvokunamata, uye zvakamuita kuti apeje makore mashanu asingasaiti mabasa ouMwari. Zvakaitikari zvinokhombija zvingazoitika tikanyangajwa maningi ngokuizirwa zvisito kururama.
TEVEJERANYI MUEZANISO WA JESU WO KUHWISA KUTAMA KURURAMA
9. Kutama kururama kupi kakasangana na Jesu? (Wonanyi foto.)
9 Jesu wakapa muezaniso wakakwana wokuti tingahwisisa kudini kutama kururama. Wonanyi kutama kururama kakasangana na Jesu kumbhuri yake, uye kuvandhu vokunja. Inga muezaniso hama jake jakamunyepera kuti waipenga, vatungamiriri vo maceci vakamunyepera kuti wainga esitungamirirwa ngo madhimoni, masoca ociRoma vakamuseka vomutaka vopejisira ngo kumuulaya. (Mak 3:21, 22; 14:55; 15:16-20, 35-37) Ngokudalo, Jesu wakahwisana no kutama kururama uku asingahwirijiri. Tingajijenyi ngo muezaniso wake?
Jesu wakatisiira muezaniso wakakwana wokuti tingaitisa kudini kuti tihwisane no mugariro wokutama kururama (Wonanyi ndima 9-10)
10. Jesu wakahwisisa kudini kutama kururama? (1 Petro 2:21-23)
10 Verenganyi 1 Petro 2:21-23. a Jesu wakatisiira muezaniso wakakwana wokutevejera patinohwisana no kubathwa zvisito kururama. Iyena waiziva paaidikana kuvereketa no paaidikana kunyarara. (Mat. 26:62-64) Iyena aasaidavira masoko okunyepa aibhuiwa ngo pamusoro pake. (Mat. 11:19) Iyena paaivereketa aasaituka vaimuzonda. Jesu wakava akaterama pamugariro iji, ngokuti waithemba wiya “anotonga ngo kururama.” Jesu waiziva maonero a Jehovha ngo pamusoro poshwiro jainyanya kukosha. Uye waizivazve kuti Jehovha unozovhisa kutama kururama pa nguva kwayo.
11. Ngapapi patinodikana kungwarira zvatinovereketa? (Wonanyi foto.)
11 Tingatevejera muezaniso wa Jesu ngokuwona zvatinovereketa paya patinoizirwa zvisito kururama. Kutama kururama kumweni kakareruka, uye tingatokwanisa kukusiya. Nguva jimweni tinotodikana kunyarara kuti tingwarire kuzobhuya zviro zvingazonyanyisa kushata. (Mup. 3:7; Jak. 1:19, 20) Ngo divi rimweni, tingatodikana kuvereketa paya patinobathwa zvisito kururama kana kuti patinoda kujivirira cokwadi. (Mab. 6:1, 2) Pese patinovereketa, tinodikana kuita zvese zvatinokona kuti tive takaterama uye no nderemejo.—1 Pet. 3:15. b
Patinohwisana no mugariro usito kunaka, tingatevejera muezaniso wa Jesu wokukheta kuti ngapapi patinodikana kuvereketa (Wonanyi ndima 11-12)
12. Zvicinyi zvatinodikana kuita kuti tithembe Jehovha wiya “anotonga ngo ururami”?
12 Tingatevejerawo muezaniso wa Jesu wokuthemba wiya “anotonga zvakarurama.” Vamweni pavanotitonga zvakashata, nokutibata zvisito kunaka, ngatithembe kuti Jehovha unoziva cokwadi. Kuthemba uku kunozotibesa kuti ticungirire kutama kururama ngokuti tinoziva kuti Jehovha unozopeja mugarirojo. Kudai tikasiya zvese munyala ja Jehovha, zvinozotibesa kuti titame kuva no shungu kana kunyangajwa. Pano kusiya kuti zvatinosangana nazvo zvigare mu mweyo, mazwiro asito kunaka angatiita kuti tiite zvakashata uye tozoruza mudakalo no ushamwari wedu na Jehovha.—Pis. 37:8.
13. Zvicinyi zvingatibesa patinohwisana no kutama kururama?
13 Atingakwanisi kutevejera muezaniso wa Jesu zvakakwana. Nguva jimweni, tinovereketa kana kuita zviro zvokuti tapeja tinozozvicumba. (Jos. 3:2) Kutama kururama kumweni kungatisiya tino mavanga mumulangariro medu uye mumuviri medu zvinonesa kupera. Kudai makaizirwa zvisito kururama ivanyi no cokwadi cokuti Jehovha unoziva zvese zvamunosangana nazvo. Uye Jesu wakasanganawo no kubathwa zvisito kururama ungakwanisa kuzwisisa mazwiro edu. (VaH. 4:15, 16) Pakuengejera kutipa muezaniso wakakwana wo kutevejera wa Jesu, Jehovha unotipa ndhungamiriro jinotibesa uye angatibesa kuti tihwisane no kutama kururama. Ngatiwone mavhesi maviri ari mubhuku la vaRoma angatibesa.
“REGERANYI KUTI MWARI AWONESE HASHA JAKE”
14. Zvinobhuyenyi “kupa mukana hasha”? (VaRoma 12:19)
14 Verenganyi VaRoma 12:19. Mupostori Pauro paakapa murairo wokuti Vakristu “varegere kuti Mwari awonese hasha jake,” waida kubhuyenyi? Mukuzwirana no masoko aya Pauro waibhuira kuti tinodikana kuregera kuti Mwari awonese hasha jake. Isusu tinopa mukana hasha ja Jehovha ngokusiya kuti aviise kururama pa nguva kwayo uye ngo maitire aanoda. Hama imweni inodanijwa kuti Joni yakabathwa zvisito kururama yakati: “Inini ndaidikana kujibata pa hasha jangu kuti ndisaeja kunasirira zviro ngo mulangariro wangu, asi zvainga zvisiripi nyore. VaRoma 12:19 yakandibesa kuti ndienderere mberi ndesithemba Jehovha.”
15. Ngenyi zvakanaka kusiya Jehovha kuti atonge zvineso zvedu?
15 Pano zvakawanda zvakanakira kuti tiemere Jehovha kuti anasirire kutama kururama. Kudai tikaita izvi, zvinozotisujunula pakuremehwa uye no kuneseka ngo kueja kunasirira matambujiko edu tega, Jehovha unozvipira kuti atibese. Jehovha unoti: “Pamunohwisana no kutama kururama zvisiyenyi kandiri ndinozozvinasirira.” Kudai tikathemba zvipikirwa zva Jehovha zvokuti unozozviita tinozosiya zvese “Munyala jake,” uye tothemba kuti Jehovha unozozviita ngo gwanja lakanaka. Izvi ndizvona zvakabesa Joni paakati: “Kudai ndikasiya Jehovha kuti atonge zvineso zvangu, zvinozova no muviyo wakanaka maningi kupinda kutonga ndega.”
“LAMBANYI MESIRWISA ZVAKASHATA NGOKUITA ZVAKANAKA”
16-17. Kuitisa kudini mukumbiro unotibesa kuti tienderere mberi “tesihwisa zvakashata ngokuita zvakanaka”? (VaRoma 12:21)
16 Verenganyi VaRoma 12:21. Pauro wakakurujira vakristu kuti “valambe vesihwisa zvakashata ngokuita zvakanaka.” Pa hurukuro yake yo padundhu Jesu wakati: “Endereranyi mberi mesida vavengi venyu, itiranyi mukumbiro vaya vanomutambuja.” (Mat. 5:44) Izvi ndizvona kamare zvakaizwa ndi Jesu. Imwimwi makambolangarirawo kuwajiwa kaakaita paakakohomehwa padanda ngo masoca oRoma. Atingakwanisi kulangarira kuwajiwa kaakazwa , kubathwa zvisito kunaka uye kupserujwa kaakacungirira.
17 Jesu aato kutendera kuti kutama kururama kumutsause paaitambujwa. Pano kuti akumbire Jehovha kuti apanice masoca aya iyena wakaita mukumbiro esiti: “Baba varegererenyi ngokuti avazivi zvavari kuita.” (Ru 23:34) Kudai tikaitira mukumbiro vandhu vanotibata zvakashata tingapungura mazwiro edu asito kunaka no hasha uye tingatocinja mawonero edu ngo pamusoro po vandhu vakatiitira zvakashata.
18. Mukumbiro wakabesesa kudini Alberto na Joni kuti vahwisane no kutama kubathwa zvakanaka?
18 Mukumbiro wakabesa hama mbiri jabhuiwa mucijijo cino kuti jihwisane no kutama kururama kavaisangana nako. Alberto wakati: “Ndaiitira mukumbiro hama jaindibata zvisito kunaka. Inini ndaikumbira Jehovha kuti andibese kuti ndisiye zvese zvainga zvaitika.” Zvinodakajisa ngo zvokuti, Alberto wahwirirazve kuti anamate Jehovha akagondeka. Joni wakati: “Kakawanda ndaiita mukumbiro ngo pamusoro po hama yakandinyangajisaya, ngo ndava yo mukumbiro iji Jehovha wakandibesa kuti ndireremeje hama iyi uye ndisava no hasha nayo no kuitonga uye mukumbiro iji jandibesazve kuti ndive no runyararo.”
19. Ngazvipi zvatinodikana kuita mbhera kumugumo wo nyika ino? (1 Petro 3:8, 9)
19 Mbhera kumugumo wo nyika ino, atikwanisi kuziva kuti tisada kusangana no kutama kururama kakadini. Azvinenyi no zvatisada kusangana nazvo mberiyo, atidikani kusiya kukumbira kuti Jehovha atibese. Ngokudalo ngatienderere mberi tesishandisa ndhungamiriro jiri muBhaibheri. Uye tisakanganwa kutevejera Jesu, patinonga tesihwisana no kutama kururama, mukaita izvi munozova no cokwadi cokuti Jehovha unozomukomborera nokusingaperi.—Verenganyi 1 Petro 3:8, 9.
NGOMA 38 Iyena Unozomuvangisa
a Pana Petro wo kutanga citsauko 2 no 3 mupostori Pedhro wakanyora kakawanda ngo pamusoro po kutama kururama, kaihwisana no maKristu omuzana lo kutanga omakore inga muezaniso, vamweni vashandi vaishaishwa kubathwa ngomajiIshe avo, vamweni vainga vakaji vaishaishwa kubathwa ngo majimwamuna avo vainga vasiripi maKristu.—1 Pet. 2:18-20; 3:1-6, 8, 9.
b Wonanyi vhidhiyo ino musoro unoti: Musalamwa kudai mukabathwa zvisito kururama pamunda-nda-nda unoti: Ivanyi shamwari ya Jehovha mu saiti jw.org —Pacijijo 28: Ivanyi shamwari ya Jehovha.
