CIJIJO 24

Ngacipi cokwadi ngo zvo ngirosi?

PLAY

Jehovha anoda kuti tijije ngo mbhuri yake yokudenga. Mbhuri iyi inosanganisira ngirosi, jinodanijwaya kuti “vana va Mwari.” (Jobho 38:7) Bhaibheri rinoti kudini ngo zvo ngirosi? Ijona jinoita basa renyi? Kubhuya kuti ngirosi jese jinobatanijwawo mu mbhuri ya Mwari here?

1. Icinyi cinozwi ngirosi?

Jehovha wakasika ngirosi asati asika nyika. Kudaiwo inga ndi Mwari, ngirosi ajiwoneki uye jinoraramira kudenga. (VaHebheru 1:14) Kuno ma miliyau no ma miliyau o ngirosi, asi ijona jakasiyana-siyana inga zvakaitariwo vandhu. (Zvakazarurwa 5:11) Ijona ‘jinoita zvinobhuiwa ndi Jehovha nokuzwira zvaanobhuya.’ (Mapisarema 103:20) Kareko, Jehovha waishandisa ngirosi kuti jigumise masoko kuvandhu vake, waijishandisazve kuti jivabesere nokuvaponesa. Mazuva ano, ngirosi jiri kubesa Vakristu kuti vakwanise kuwana vandhu vanoda kujija ngo zva Jehovha Mwari.

2. Sathana no madhimoni ake ngo vanaani?

Ngirosi jimweni ajito kulamba jakatendeka kuna Jehovha. Ngirosi yakatanga kupandukira Mwari, ngaiya inodanijwa kuti ‘Dhiyabhu uye Sathana, ndiyena ari kucengeja vandhu munyika yese.’ (Zvakazarurwa 12:9) Sathana waida kutonga vamweni, ndiyo ndava wakacengeja vandhu vokutanga kuti vapandukire Mwari uye wakacengejazve ngirosi jimweni kuti jipandukewo. Ngirosi jakapandukari ndijona jinodanijwaya kuti madhimoni. Jehovha wakagogomera ngirosi iji kudenga kuti jiviye pasi pano, asi ijona jinozopalajwa.—Verenganyi Zvakazarurwa 12:9, 12.

3. Sathana no madhimoni ake vanoitenyi kuti vaeje kuticengeja?

Sathana no madhimoni ake, vanoeja kucengeja vandhu vakawanda kuti vavatevejere, ivona vanoita izvi vesishandisa zvo mujimu. Inga muezaniso, vandhu vamweni povanoeja kuda kuziva ngo lamangwana lavo, vanoenda koovhunjisira kuvandhu vakadai inga nyanga, vafemberi, varingiji no vazivi vo nyereji. Asi izvi zvakashata. Vamweni vanoenda kuvandhu vanoita zvomadhimoni pavanonga vesiwaja. Sathana anoshandisazve gwanja rimweni rinoita kuti vandhu vatende kuti vari kubhuya no vandhu vakafa. Asi Jehovha unotivhunja kuti: ‘Musaenda ka vaya vanoringijira vakafa, no vanovhunjisa majinyanga.’ (Revhitiko 19:31) Iyena wakatipa ngwajo iyi kuitira kuti atijivirire kuna Sathana no madhimoni ake. Ivona vavengi va Mwari uye vanoda kutiitira zvakashata.

JIJANYI ZVIZINJI

Jijanyi zviro zvakanaka zvinoizwa ngo ngirosi, jijanyizve kuti zvakashatira papi kuita zvo mujimu nokuti tingaitenyi kuti tizvijivirire kuna Sathana no madhimoni ake.

4. Ngirosi jinobesa vandhu kuti vajije ngo zva Jehovha

Ngirosi andijopi jinoparijira vandhu. Asi jinokwanisa kutungamirira vanamati va Jehovha kuti vawane vandhu vanoda kujija ngo zvake. Verenganyi Zvakazarurwa 14:6, 7, mapeja bhuisananyi ngo muvhunjo jinotevera:

Ngenyi tinoda kubeswa ngo ngirosi pakuita basa lokuparijira?
Amuzviwoniwo zvakanaka kuziva kuti ngirosi jinotibesa kuti tiwane vandhu vanoda kujija Bhaibheri here? Ngenyi madalo?

5. Lambanyi kuita zvomujimu

Sathana no madhimoni vavengi va Jehovha. Ivona vavengi veduwo. Verenganyi Ruka 9:38-42, mapeja bhuisananyi ngo muvhunjo unotevera:

Madhimoni anoitenyi kuti atambuje vandhu?

Atidikani kuita zviro zvinotidanijira madhimoni mu upenyu wedu. Verenganyi Dheteronomi 18:10-12, mapeja bhuisananyi ngo muvhunjo jinotevera:

Madhimoni anoshandisenyi kuti aticengeje kuti tibhuye nawo? Mamunogarari, vandhu vanonyanya kuita zviro zvipi zvocidhimoni?
Iyemwiwo munowona kudini ngo kulambijwa katinoizwa ndi Jehovha kuita zvomujimu? Ngenyi madalo?

Wonanyi VHIDHIYO, mapeja bhuisananyi ngo muvhunjo jinotevera:

VHIDHIYO: “Rwisananyi na Dhiyabhu” (5:02)

Munolangarira kuti citovo cainga mu muhoko mo mwana wa Palesa caizobara ngozi here? Ngenyi madalo?
Palesa waidikana kuitenyi kuti ajingwarire ku madhimoni?

Vakristu vocokwadi vanolamba kuita zvo ciudhimoni nguva yese. Verenganyi Mabasa 19:19 na 1 VaKorinde 10:21, mapeja bhuisananyi ngo muvhunjo unotevera:

Ngenyi zvakanaka kuti tipise zvese zvakabatana no ciudhimoni?

6. Mungawina pakurwa na Sathana no madhimoni ake

Madhimoni anotongwa ndi Sathana. Asi ngirosi jese jakagondeka jinotungamirirwa ngo mukuru wo ngirosi jese anozwi Arkanjo Mikaeri, zina rimweni la Jesu. Mikaeri unosimba lakadini? Verenganyi Zvakazarurwa 12:7-9, mapeja bhuisananyi ngo muvhunjo jinotevera:

Ndiyani anosimba pakati pa Mikaeri no ngirosi jake na Sathana no madhimoni ake?
Munolangarira kuti vajiji va Jesu vanodikana kuthya Sathana no madhimoni ake here?

Mungakwanisa kuwina pa hondo yo kurwisana na Sathana no madhimoni ake. Verenganyi Jakobho 4:7, mapeja bhuisananyi ngo muvhunjo unotevera:

Zvicinyi zvamungaita kuti muzvijivirire kuna Sathana no madhimoni ake?

VAMWENI VANOTI: “Apana cakashata kuita mutambo kana kuwona ma vhidhiyo anokhombija zvo ciudhimoni. Kutori kuvalaijawo hako.”

Ngenyi kulangarira kudai kuno ngozi?

TAJIJENYI

Tajija kuti ngirosi jakagondeka jinotibesa. Tajijazve kuti Sathana no madhimoni ake vavengi va Jehovha, ivona vanoshandisa zvo ciudhimoni kuti vacengeje vandhu.