CIJIJO 20

Ungano Yakarongeswa Kudini

PLAY

Jehovha ndi Mwari unoda zviro zvakarongeka. (1 VaKorinde 14:33) Ngo kudalo, zvinokosha kuti vandhu vake vavewo vakarongeka. Ungano yo Cikristu yakarongeswa kudini? Tinodikana kuitenyi kuti zviro zvihambe zvakanaka mu ungano?

1. Mutungamiriri wo ungano ndiyani?

VaEfeso 5:23 inoti: ‘Kristu ndiyena musoro wo ungano.’ Jesu unotungamirira basa lo vanamati va Jehovha munyika yese ari kudenga. Jesu wakagaja “muranda wakagondeka wakangwara.” Muranda uwu, cikwata cidoko covakuru vakagondeka vanodanijwazve kuti “Dare Rinotungamirira.” (Verenganyi Mateu 24:45-47.) Munguva yokare, vapostori no vakuru vo ungano ku Jerusarema ndivona vaipa ndhungamiriro mu ungano yo nguva iyi. (Mabasa 15:2) Mukutojanawo, mazuva ano Dare Rinotungamirira ndirona rinopa ndhungamiriro mu ungano jiri munyika yese. Asi vanarume ava, avasi vatungamiriri vo sangano redu. Ivona vanojija Bhaibheri kuti vazive zvinoda Jehovha kuti vaite, vesitevejera Jesu mutungamiriri wo ungano.

2. Vakuru vo ungano ngo vanaani uye vanoita basa renyi?

Vakuru vo ungano vanarume Vocikristu vanouzivi muno zvokunamata, vanojijisa zviri mu Bhaibheri vandhu va Mwari, vesivabesera uye vesivakurujira. Avabhadharwi ngo basa iri. Ivona vanoshandira Mwari ‘vasingaiti zvokuvangirijwa, asi zvesivha pamweyo inga zvinodiwa ndi Mwari; vasingazviiti ngo kuda upfumi, asi ngo mweyo wese.’ (1 Petro 5:1, 2) Vakuru vo ungano vanobeserwa ngo vabatiri vo ungano, avo vangazokwanirisavo kuva vakuru mukuhamba konguva.

Dare Rinotungamirira rinogaja vakuru vo ungano vamweni kuti vave vavonereri vo ndharaundha. Basa lavo ngo lo kuvhakacira ungano, vesipa ndhungamiriro nokuvangisa hama. Ndivona vanogaja vakuru no vabatiri vo ungano, asi vanotanga vasota zvinobhuiwa ngo Bhaibheri.—1 Timoti 3:1-10, 12; na Tito 1:5-9.

3. Ibasa ripi rina umwe nga umwe wo Zvapupu zva Jehovha?

Mundhu wese ari mu ungano ‘anokuja zina la Jehovha’ paanopinda musangano wo ungano, uye paanoenda mu basa lokuparijira zvinoenderana no zvaanokona—Verenganyi Mapisarema 148:12, 13.

JIJANYI ZVIZINJI

Jijanyi kuti Jesu mutungamiriri wakadini, no kuti vakuru vangamutevejeresawo kudini, wonanyiwo kuti tingatevejeresa kudini Jesu no kubesa vakuru vo ungano.

4. Jesu mutungamiriri wakanaka

Jesu unotikoka ngo mweyo wese. Verenganyi Mateu 11:28-30, mapeja bhuisananyi ngo muvhunjo jinotevera:

Jesu mutungamiriri wakadini? Iyena unoda kuti tizwe kudini ngo utungamiriri wake?

Vakuru vanotevejeresa kudini Jesu? Wonanyi VHIDHIYO.

VHIDHIYO: Vakuru Vakabesera Pakaitika Mudhuma ngo Pasi ku Nepal (4:56)

Bhaibheri rinobhuya zvakajeka kuti vakuru vo ungano vanodikana kuitisa kudini basa lavo.

Verenganyi Isaya 32:2 na 1 Petro 5:1-3, mapeja bhuisananyi ngo muvhunjo jinotevera:

Munozwa kudini ngo cido cino vakuru vo ungano cokushanda ngo simba kuva vakanaka inga ndi Jesu?
Vakuru vangaitenyizve kuti vatevejere Jesu?

5. Vakuru vo ungano vanoita zvinoenderana no zvavanojijisa

Jesu unoda kuti vakuru vo ungano vawonese kudini basa lavo? Wonanyi VHIDHIYO.

VHIDHIYO: Vakuru Tungamiriranyi! (7:39)

Jesu wakabhuya ngo zvinodikana kuizwa nga vaya vanotungamirira ungano. Verenganyi Mateu 23:8-12, mapeja bhuisananyi ngo muvhunjo jinotevera:

Vakuru vo ungano vanotevejeresa kudini zvinobhuiwa mu Bhaibheri? Munolangarira kuti vatungamiriri vo maceci vanoita izvi here?

Vakuru vo ungano vanovangisa ushamwari wavo na Jehovha, uye vanobesa mbhuri javo kuti vaite zvakaezana.
Vakuru vo ungano vanoda vandhu vese vo mu ungano
Vakuru vo ungano vanoshanda ngo simba pa basa lokuparijira
Vakuru vo ungano vanojijisa ungano. Vanoitawo mabasa amweni akadai inga kupsvaira mu ndau yokunamatira.

6. Tingashanda pamwepo no vakuru tesivatevejera

Bhaibheri rinotivhunja kuti ngenyi zvinokosha kuti tizwire vakuru vo ungano. Verenganyi VaHebheru 13:17, mapeja bhuisananyi ngo muvhunjo jinotevera:

Ngenyi Bhaibheri rinoti tinodikana kuzwira vakuru ngo mweyo wese? Munotiwo kudini?

Verenganyi Ruka 16:10, mapeja bhuisananyi ngo muvhunjo unotevera:

Ngenyi tinodikana kuzwira vakuru kunyange pazviro zvidoko?

VAMWENI VANOTI: “Amudikani kwenda ku ceci iri yese kuti munamate Mwari.”

Ngenyi zvakanaka kuti tinamate Mwari tiripamwepo no vamweni vari muungano?

TAJIJENYI

Tajija kuti Jesu ndiyena musoro wo ungano. Tajijawo kuti tinoshanda pamwepo no vakuru takadakala ngo kuti vanotivangisa uye vanoita zvinoenderana no zvavanojijisa.