IBhayibhili lisinika amacebo amahle kakhulu esingawasebenzisa nxa sisenza izinqumo. Lingasinceda ukuthi ‘sizuze ukuhlakanipha lokuzwisisa.’ (IZaga 4:5) Kwesinye isikhathi liyasitshela ukuthi yikuphi okungcono kakhulu esingakhetha kukho. Ikanti kwezinye izimo liyasinika amacebo angasinceda ukuthi sikhethe kuhle.

Ozakufunda esihlokweni lesi

•  Amacebo angakunceda ukuthi wenze izinqumo ezinhle

•  Kuqondile yini ukutshintsha isinqumo osusenzile?

•  Kufanele wenzeni nxa usukhethe ngendlela engayisiyo futhi sokunzima ukuthi utshintshe isinqumo sakho?

•   Ungenzi izinqumo ngamawala. IBhayibhili lithi: “Okhaliphileyo uyacabangisisa ngawo wonke amanyathelo akhe.” (IZaga 14:15) Nxa ungenza izinqumo ngamawala uzacina ukhohlwa izinto eziqakathekileyo. Zinike isikhathi sokucabangisisa ukuze ukhethe kuhle ofuna ukukwenza.—1 KwabaseThesalonika 5:21.

•   Ungenzi izinqumo ufuqwa yimizwa. IBhayibhili lithi singathembi inhliziyo yethu. (IZaga 28:26; UJeremiya 17:9) Ngokwesibonelo, kasingeke senze izinqumo ezinhle nxa sizondile, sihlulukelwe, sicaphukile loba sidinwe kakhulu.—IZaga 24:10; 29:22.

•   Thandaza ucele ukuhlakanipha. (UJakhobe 1:5) UNkulunkulu uyayiphendula imithandazo yethu nxa sicela ukuhlakanipha okuvela kuye. UnguBaba olothando ongafuniyo ukuthi abantwabakhe bawele ezinkingeni abakade bengazibalekela. ILizwi lakhe lithi: “UJehova nguye onika ukuhlakanipha; emlonyeni wakhe kuphuma ulwazi lokuqedisisa.” a (IZaga 2:6) Izikhathi ezinengi usebenzisa iBhayibhili ukuze asinike inhlakanipho le.—2 KuThimothi 3:16, 17.

•   Dingisisa. Ukuze wenze isinqumo esihle, kumele ube lolwazi oluqondileyo. IBhayibhili lithi “umuntu ohlakaniphileyo uyalalela afunde okunengi.” (IZaga 1:5) Singaluthola ngaphi ulwazi oluliqiniso njalo olungasinceda?

   Okokuqala, khangela lokho iBhayibhili elikutshoyo ngodaba lwakho. UMdali wethu uyakwazi okusilungeleyo, ngakho iLizwi lakhe lilamacebo esingawathemba ukwedlula loba yiwaphi amanye. (IHubo 25:12) Kwezinye izikhathi singathola imithetho kumbe imilayo eBhayibhilini esinceda ukuthi senze isinqumo esithile. (U-Isaya 48:17, 18) Kodwa kwezinye izimo, iBhayibhili kalisitsheli okokwenza. Lilezimiso ezingasinceda ukuthi sikhethe kuhle lanxa isinqumo sethu singaphuma singafanani lesomunye umuntu. Ukuze uthole amavesi aseBhayibhilini akhuluma ngodaba lwakho, chwayisisa emabhukwini ethu lasezihlokweni ezitholakala mahala kuwebhusayithi yonale okuyo. b

   Kwezinye izikhathi kungadingeka ukuthi udingisise lakwezinye indawo ezithenjwayo. Ngokwesibonelo ungakathengi into edulayo, kuyabe kuyikuhlakanipha ukuthi udingisise ngayo langenkampani eyenzayo, kanye lokuthi kuzakwenzakalani nxa ingasasebenzi loba nxa usufuna ukuyibisela. Kuqakathekile lokunanzelela ukuthi indlela into leyo abathi isebenza ngayo iyilokho kanye okudingayo yini.

   IBhayibhili lithi: “Amacebo ayafadalala nxa umuntu engabuzi kwabanye, kodwa kuba lokuphumelela nxa kulabacebisi abanengi.” (IZaga 15:22) Ngakho ungakenzi isinqumo, buza ebantwini abalolwazi. Ngokwesibonelo, ungakakhethi indlela ofuna ukwelatshwa ngayo, kuyikuhlakanipha ukubuzisisa kubodokotela. (UMathewu 9:12) Kwezinye izikhathi kungadingeka ukuthi uxoxe labantu abadlule esimeni esifanana lesakho. Kodwa hlala ukhumbula ukuthi okuzamele enze isinqumo nguwe, hatshi abantu obuza kubo.—KwabaseGalathiya 6:4, 5.

•   Cabangisisa. Nxa usudingisisile wathola konke okumayelana lesinqumo ofuna ukusenza, ungabhala phansi izinqumo ezitshiyeneyo ongakhetha kuzo njalo ubhale lobuhle kumbe ububi besinqumo ngasinye ubusucabangisisa ngakho. Ungazami ukubalekela iqiniso nxa ukwenza lokhu. (UDutheronomi 32:29) Ngokwesibonelo, zibuze ukuthi imuli yangakini kanye labanye abantu bazakuzwa njani ngesinqumo sakho. (IZaga 22:3; KwabaseRoma 14:19) Ukucabangisisa ngemibuzo enjengale kanye lalokho okufundiswa liBhayibhili kuzakunceda ukuthi wenze izinqumo ezitshengisa ukuhlakanipha kanye lothando.

•   Yenza isinqumo. Kwesinye isikhathi singesaba ukwenza isinqumo ngoba singelaqiniso lesikwenzayo. Kodwa nxa singathikaza singacina siphelelwa yisikhathi kumbe sicine singena enkingeni. Phela khumbula ukuthi ukungenzi isinqumo kuyazifananela nje lokwenza isinqumo esibi. IBhayibhili lifanisa ukwenza izinqumo lokulima, lithi: “Lowo okhangela umoya kasoze ahlanyele inhlanyelo, lalowo okhangela amayezi kasoze avune.”—UmTshumayeli 11:4.

 Hlala ukhumbula ukuthi lanxa isinqumo singaze sibe sihle kangakanani, akutsho ukuthi kasisoze sibe lezinhlupho. Ukwenza izinqumo kungadinga ukuthi wehlukane lezinye izinto. Kanti njalo kungavela ezinye izinto ebesingazicabangeli. (UmTshumayeli 9:11) Ngakho lusebenzise kuhle ulwazi ongabe usulutholile, ubusukhetha indlela obona kuyiyo ezaphumelela kulezinye.

 Kayisizo zonke izinqumo ezingatshintshekiyo. Izimo zakho zingatshintsha, kumbe uthole ukuthi isinqumo obusenze kuqala silempumela obungayikhangelelanga. Ngakho kungaba yikuhlakanipha ukuthi uphinde ucabangisise ngaso njalo ukhethe enye indlela ezaphumelela ngcono.

 Kodwa-ke zikhona izinqumo okungamelanga sizitshintshe. (IHubo 15:4) Ngokwesibonelo, uNkulunkulu ufuna abantu abatshadileyo bagcine isifungo sabo somtshado. c (UMalakhi 2:16; UMathewu 19:6) Nxa kungaba lezinhlupho phakathi kwabatshadileyo, kumele benze konke okusemandleni abo ukuthi bazilungisise hatshi ukuthi behlukane.

 Sonke siyake sizenze izinqumo ezimbi loba ezilobuthutha. (UJakhobe 3:2, amabala angaphansi) Singazisola loba sidliwe yisazela, futhi lokhu kuyenzakala ebantwini bonke. (IHubo 69:5) Kuhle lakho ukuthi sizisole ngezinye izikhathi ngoba lokho kuzasinceda ukuthi singaphindi iphutha elifananayo. (IZaga 14:9) Lanxa kunjalo, iBhayibhili lithi akumelanga sizisole size sidlulise amalawulo, ngoba lokhu kungasiqeda amandla njalo kusilimaze. (2 KwabaseKhorinte 2:7) d IBhayibhili lithi “uJehova ulozwelo lesihawu.” (IHubo 103:8-13) Ngakho zama ukuthi isinqumo esibi osenzileyo esingasatshintshekiyo sibe yisifundo kuwe njalo wenze konke okusemandleni akho ukuthi ulungisise uhlupho osuphakathi kwalo.