Okwenza abantu abanengi bazibuze imibuzo le yikuthi bafuna ukududuzwa ngenxa yokufelwa yizihlobo zabo ngesikhathi amaJuda amanengi ebulawa eYurophu. Abanye bathi ukubulawa kwamaJuda kutshengisa ukuthi abantu sebebabi futhi lokho kwenza kube nzima ukuthi bakholwe kuNkulunkulu.

  Okungaqondanga: Akumelanga sibuze ukuthi yindaba uNkulunkulu wavumela ukubulawa kwamaJuda.

 Okuqondileyo: Endulo abantu ababethembekile kuNkulunkulu bake babuza ukuthi kungani evumela ukuthi izinto ezimbi zenzakale. Ngokwesibonelo, umphrofethi uHabakhukhi wabuza uNkulunkulu wathi: “Kungani ubekezelela abantu abahlukuluza abanye? Kungani impahla zabantu zithunjwa futhi kulodlakela? Kungani abantu behlala baxabana futhi besilwa?” (UHabakhukhi 1:3) UNkulunkulu kazange amsole uHabakhukhi ngokubuza imibuzo le kodwa wabhala amazwi akhe eBhayibhilini ukuze lathi siwabale.

  Okungaqondanga: UNkulunkulu kalandaba lokuthi abantu bayahlupheka.

 Okuqondileyo: UNkulunkulu kakuthandi ngitsho ukubona abantu bethwele nzima njalo behlupheka. (IZaga 6:16-19) Ngensuku zikaNowa uNkulunkulu wezwa ’ubuhlungu enhliziyweni’ ngoba kwasekugcwele udlakela emhlabeni wonke. (UGenesisi 6:5, 6) Akuthandabuzwa ukuthi uNkulunkulu wabuzwa ubuhlungu obukhulu ngesikhathi amaJuda amanengi ebulawa eYurophu.—UMalakhi 3:6.

  Okungaqondanga: Ukubulawa kwamaJuda kwakuyisijeziso esivela kuNkulunkulu.

 Okuqondileyo: UNkulunkulu wavumela ukuthi iJerusalema ibhujiswe ngamasotsha eRoma ngesikhathi samaKhristu akuqala. (UMathewu 23:37–24:2) UNkulunkulu kasakhethi isizwe esithile ukuthi asibusise kumbe asijezise. Ngokubona kwakhe akulamehluko phakathi komJuda lomGrikhi.—KwabaseRoma 10:12.

  Okungaqondanga: Aluba uNkulunkulu wayekhona futhi elamandla lothando wayengasoze avumele ukuthi amaJuda abulawe.

 Okuqondileyo: Lanxa uNkulunkulu engayisuye obangela ukuhlupheka, kwesinye isikhathi uyakuvumela.—UJakhobe 1:13; 5:11.

 Isizatho esenza uNkulunkulu wavumela ukuthi amaJuda abulawe siyafanana laleso esenza avumele konke ukuhlupheka okukhona. Ufuna kulungisiswe indaba ehluphayo eyaqalisa kudala le. IBhayibhili likwenza kucace ukuthi uSathane nguye obusa umhlaba khathesi hatshi uNkulunkulu. (ULukha 4:1, 2, 6; UJohane 12:31) Nanzi izinto ezimbili eziseBhayibhilini ezisinceda sizwisise ukuthi kungani uNkulunkulu wavumela ukuthi amaJuda abulawe.

1.   UNkulunkulu wadala abantu belenkululeko yokuzikhethela. UNkulunkulu wanika u-Adamu lo-Eva imithetho okwakumele bayilandele kodwa kazange ababambe ngamandla ukuthi bamlalele. Bona bakhetha ukuzenzela abakufunayo futhi abakukhethayo lalokho obekusenziwa ngabantu okweminyaka yonke le kubangele ukuthi kube lenhlupho ezinengi kakhulu emhlabeni. (UGenesisi 2:17; 3:6; KwabaseRoma 5:12) Lokhu kuyahambelana lokutshiwo libhuku elithi Statement of Principles of Conservative Judaism. Lithi: “Inhlupho ezinengi ezikhona emhlabeni zibangelwa yikuthi sisebenzisa kubi inkululeko yokuzikhethela esayinikwayo.” Kulokuthi abathathele inkululeko yokuzikhethela uNkulunkulu unike abantu isikhathi sokuthi bazibuse.

2.   UNkulunkulu uzawulungisa wonke umonakalo owabangelwa yikubulawa kwamaJuda eYurophu ngoba ulamandla. UNkulunkulu uthembisa ukuvusa izigidi zabantu abafileyo okuhlanganisa lamaJuda abulawa eYurophu. Uzaqeda bonke ubuhlungu obuzwiwa yizihlobo zamaJuda la abulawayo. (U-Isaya 65:17; Imisebenzi 24:15) Indlela uNkulunkulu abathanda ngayo abantu yiyo eyenza singathandabuzi ukuthi uzazigcwalisa izithembiso lezi.—UJohane 3:16.

 Abanengi abasinda ngesikhathi amaJuda ebulawa balokholo oluqinileyo njalo bayakwazi ukuthi kungani uNkulunkulu evumela izinto ezimbi lokuthi uzawuqeda njani wonke umonakalo obangelwe yizinto ezimbi ezenzakalayo.