Bakholwa ukuthi “iMibhalo yonke yaphefumulelwa nguNkulunkulu njalo ilosizo.” (2 KuThimothi 3:16) IBhayibhili siyalisebenzisa kakhulu ngoba limumethe ulwazi olungasinceda ukuthi siphile ukuphila okulenjongo lokuthi sifunde ngoMdali wethu.

IBhayibhili lithi: “Yenza bakwazi ukuthi wena obizo lakho unguJehova—ukuthi wena wedwa ungoPhezukonke emhlabeni wonke.” (IHubo 83:18) Ngakho-ke sikhonza uJehova uNkulunkulu kuphela futhi njengoba singoFakazi bakhe, sizimisele ukwenza abantu balazi ibizo lakhe.—U-Isaya 43:10-12.

Sikholwa ukuthi ‘iNdodana kaNkulunkulu’ * uJesu yabuya emhlabeni njalo yaba nguMesiya. (UJohane 1:34, 41; 4:25, 26) Ngemva kokufa kwayo yavuswa yaya ezulwini. (1 KwabaseKhorinte 15:3, 4) Ngokuya kwesikhathi yaba yiNkosi yoMbuso kaNkulunkulu. (ISambulo 11:15) UMbuso lo unguhulumende okhona sibili futhi uzakwenza ukuthi umhlaba uphinde ube liPharadayisi. (UDanyeli 2:44) IBhayibhili lithi: “Abathobekileyo bazakudla ilifa lelizwe bakholise ukuthula okukhulu.”—IHubo 37:11, 29.

OFakazi bakaJehova bakholwa ukuthi izimiso zeBhayibhili ziyasebenza lakhathesi. (U-Isaya 48:17, 18) Lokhu yikho okwenza sizilandele njalo sizisebenzise. Ngokwesibonelo iBhayibhili liyasixwayisa ukuthi sibalekele imikhuba engangcolisa izingqondo lemizimba yethu, yikho singabhemi njalo singasebenzisi kubi izidakamizwa. (2 KwabaseKhorinte 7:1) IBhayibhili kalikuvumeli ukudakwa, ukuziphatha kubi emacansini kanye lokuntshontsha, yikho lathi sizibalekela izinto lezi.—1 KwabaseKhorinte 6:9-11.