Abangane abazwanana kakhulu bahlala bexoxa. Kwezinye izikhathi bangaxoxa ngefoni, nge-email loba ngokubhalelana incwadi. Yikho-ke nxa sifuna ukuba seduze loNkulunkulu kumele sihlale sikhuluma laye. Kodwa singakhuluma laye njani?

Singakhuluma loJehova ngokuthandaza. Kodwa ukuthandaza kuNkulunkulu akufanani lokuxoxa losowenu. Kumele sikwazi ukuthi nxa sithandaza siyabe sikhuluma loMdali wethu oPhezukonke. Lokhu kuzakwenza ukuthi sibe lenhlonipho ejulileyo nxa sithandaza. Kanti njalo kulezinto okumele sizenze ukuze uNkulunkulu alalele imithandazo yethu. Nanzi ezintathu zakhona.

Okokuqala, kumele sithandaze kuJehova uNkulunkulu kuphela hatshi kuJesu kumbe ezithombeni loba ebantwini okuthiwa “ngabangcwele.” (U-Eksodusi 20:4, 5) IBhayibhili lithi: “Ezintweni zonke, ngokukhuleka langokuncenga, ngokubonga, bekani izicelo zenu kuNkulunkulu.” (KwabaseFiliphi 4:6) Okwesibili, kumele sithandaze ngebizo likaJesu Khristu, iNdodana kaNkulunkulu. UJesu wathi: “Kakho oza kuBaba engezi ngami.” (UJohane 14:6, The Holy Bible in Ndebele) Okwesithathu, imithandazo yethu kumele ihambelane lalokho okufunwa nguNkulunkulu. IBhayibhili lithi: “Uma sicela ulutho ngokwentando yakhe, uyasizwa.” *​—1 UJohane 5:14.

Ubungane abuhlali isikhathi eside nxa kuyikuthi kuhlala kukhuluma umuntu oyedwa kuphela. Kodwa okumnandi yikuthi bobabili baxoxe. Yikho-ke lathi kumele sivume ukuthi uNkulunkulu akhulume lathi njalo kumele silalele nxa ekhuluma. Ubona angani uNkulunkulu ukhuluma lathi njani?

Lamuhla uJehova uNkulunkulu “ukhuluma” lathi esebenzisa iLizwi lakhe elibhaliweyo iBhayibhili. (2 KuThimothi 3:16, 17) Kungani sisitsho njalo? Ngokwesibonelo, ake sithi wamukele incwadi oyibhalelwe ngumngane wakho omthandayo. Nxa usuyibala kuyabe kungani umngane wakho ukhuluma lawe sibili lanxa yena engekho lapho okhona. Uyabe ekubhalele kuphela. Yikho-ke nxa ubala iBhayibhili uyabe uvuma ukuthi uJehova akhulume lawe. UGina esikhulume ngaye esihlokweni sokuqala uthi, “Ngicabanga ukuthi nxa ngifuna ukuba ngumngane kaNkulunkulu kumele ngilihlolisise iBhayibhili, ‘incwadi’ asibhalele yona.” Uqhubeka esithi, “Ukubala iBhayibhili nsuku zonke sekungenze ngasondela eduze kukaNkulunkulu.” Wena ulibala nsuku zonke yini iLizwi likaNkulunkulu iBhayibhili ukuze lingaphumi liyetshona engakhulumanga lawe? Ukwenza lokhu kuzakwenza ukuthi uzizwe useduze loNkulunkulu.