1, 2. (a) Yiwuphi umtshado ozakwenza kube lokuthokoza ezulwini? (b) Yiphi imibuzo ebakhona?

 UKULUNGISELELA umtshado kujayele ukuthatha isikhathi eside. Kodwa lapha sizahlola umtshado wesikhosini oqakathekileyo. Akucabange! Sekuleminyaka engu-2 000 ulungiselelwa. Khathesi sesiseduze kakhulu isikhathi sokuthi umyeni lomlobokazi bahlanganiswe. Masinya nje esigodlweni seNkosi kuzazwakala izingoma zokuthaba njalo amaxuku asezulwini azahlabela esithi: ‘Haleluya! Ngoba iNkosi yethu uNkulunkulu uSomandla iyabusa. Kasithokozeni sithabe simuphe udumo. Ngoba umthimba kumbe umtshado weWundlu usufikile lomlobokazi walo usezilungisele.’​—Isam. 19:6, 7.

2 Akuthandabuzwa ukuthi “iWundlu” elilomtshado ozakwenza kube lokuthokoza ezulwini nguJesu Khristu. (Joh. 1:29, The Holy Bible in Ndebele) Ugqokeni emtshadweni? Ngubani umlobokazi wakhe? Umlobokazi ulungiselelwe njani ukuthi atshade? Unini umtshado lo? Umtshado lo uzakwenza kube lokuthaba ezulwini. Kodwa labo abalethemba lokuphila phakade emhlabeni bazathokoza yini? Sizaqhubeka sihlola iHubo 45 ukuze sithole izimpendulo zemibuzo le.

3, 4. (a) Kuthiwani ngezambatho ezizagqokwa nguMyeni emtshadweni, njalo kuyini okuyithokozisayo? (b) Ngobani “amadodakazi amakhosi” kanye ‘lomlobokazi wesikhosini’ abathokoza kanye loMyeni?

3 Bala iHubo 45:8, 9. UMyeni, uJesu Khristu, ugqoka izambatho zomtshado ezikhazimulayo zasesikhosini. Yikho zinukelela kamnandi ‘njengezinhlobo zamakha amahle’ anjengemure lekhasiya ayesetshenziswa ko-Israyeli ukwenza amafutha angcwele okugcoba.​—Eks. 30:23-25.

4 Izingoma ezizwakala esigodlweni soMyeni ezulwini zingezelela intokozo yakhe njengoba umtshado usondela. Omunye othokoza loMyeni ‘ngumlobokazi wesikhosini,’ ingxenye yasezulwini yenhlanganiso kaNkulunkulu egoqela “amadodakazi amakhosi” okutsho izingilosi ezingcwele. Kumnandi ukuzwa amaphimbo asezulwini ehlabela esithi: ‘Kasithokozeni sithabe ngoba umthimba kumbe umtshado weWundlu usufikile.’

5. Ngubani ‘umkaWundlu’?

5 Bala iHubo 45:10, 11. UMyeni sesimazi, kodwa umlobokazi wakhe ngubani? Ngumlobokazi oliqembu obunjwa ngamalunga ebandla elikhokhelwa nguJesu Khristu. (Bala u-Efesu 5:23, 24.) Amalunga la azakuba yingxenye yoMbuso kaMesiya. (Luk. 12:32) AmaKhristu la agcotshwe ngomoya angu-144 000 ‘ayalilandela iWundlu loba kungaphi lapho eliyakhona.’ (Isam. 14:1-4) Yikho-ke aba ‘ngumkaWundlu’ abesesiyahlala laye ezulwini.​—Isam. 21:9; Joh. 14:2, 3.

6. Kungani abagcotshiweyo bebizwa ngokuthi ‘yindodakazi yenkosi,’ njalo kungani belaywa ukuthi ‘bakhohlwe abakibo’?

6 Umlobokazi ozatshada kabizwa ngokuthi ‘yindodakazi’ kuphela kodwa ubizwa langokuthi ‘yindodakazi yenkosi.’ (Hubo. 45:13, The Holy Bible in Ndebele) Yiphi ‘inkosi’ etshiwo lapha? NguJehova ngoba wamukela amaKhristu agcotshiweyo ‘njengabantwana’ bakhe. (Rom. 8:15-17) Njengoba bezakuba ngumlobokazi wasezulwini, abagcotshiweyo batshelwa umlayezo lo: “Khohlwa abakini, lendlu yakwenu [esemhlabeni].” Kumele bagcine izingqondo zabo ‘zibekwe ezintweni eziphezulu, hatshi ezintweni zasemhlabeni.’​—Kol. 3:1-4.

7. (a) UKhristu ubemlungiselela njani umlobokazi azamthatha? (b) Umlobokazi uzizwa njani ngoMyeni azatshada laye?

7 Okwamakhulu eminyaka uKhristu ubelokhu encedisa umlobokazi wakhe ukuthi alungiselele umtshado ozabe usezulwini. Umphostoli uPhawuli wachaza ukuthi uKhristu ‘wathanda ibandla wazinikela ngenxa yalo ukuba alenze libe ngcwele, elihlambulula ngokuligezisa ngamanzi ngokusebenzisa ilizwi, kanye lokulethula kuye njengebandla elilenkazimulo, elingelachatha loba umxhele loba esinye nje isici, kodwa lingcwele njalo lingelacala.’ (Efe. 5:25-27) UPhawuli watshela amaKhristu agcotshiweyo eKhorinte yasendulo ukuthi: “Ngilobukhwele ngani ngobukhwele bokukholwa. Ngathembisa ukulendisela endodeni eyodwa, uKhristu, ukuze ngilethule kuyo liyintombi epheleleyo.” (2 Khor. 11:2) UMyeni, iNkosi uJesu Khristu uyakuvuma ukuthi umlobokazi wakhe azamthatha ‘muhle’ ngoba ukhonza kuhle. Kanti njalo umlobokazi laye uyakuvuma ukuthi uKhristu ‘yinkosi’ yakhe njalo ‘uyamhlonipha’ njengoba ezakuba ngumkakhe.

8. Kungani kuqondile ukuthi umlobokazi achazwe ngokuthi ‘ubucwazicwazi’?

8 Bala iHubo 45:13, 14a. Umlobokazi ukhanya ‘ebucwazicwazi’ elungele umtshado wesikhosini. KuSambulo 21:2,  umlobokazi ufaniswa ledolobho, iJerusalema eLitsha njalo ukhanya “ececele umkakhe.” Lelidolobho lasezulwini ‘lilenkazimulo kaNkulunkulu’ njalo liyacazimula, ‘njengelitshe eliligugu, njengejaspha, licwebezela njengelitshe elikhanyisayo.’ (Isam. 21:10, 11) Ubuhle obumangalisayo beJerusalema eLitsha buchazwa kuhle ebhukwini leSambulo. (Isam. 21:18-21) Yikho umhubi echaza umlobokazi ngokuthi ‘ubucwazicwazi.’ Lokhu akumangalisi ngoba umtshado lo uzabe usezulwini.

9. Umlobokazi usiwa kuyiphi ‘inkosi,’ futhi ugqoke njani?

9 Umlobokazi usiwa kuMyeni wakhe, iNkosi enguMesiya. Umyeni ubemlungiselela ‘emhlambulula ngokumgezisa ngamanzi esebenzisa ilizwi.’ ‘Ungcwele njalo kalasici.’ (Efe. 5:26, 27) Umlobokazi laye ugqoke kuhle emtshadweni njengoba kumele abe njalo. Sibona ‘isembatho sakhe siceciswe ngegolide’ njalo ‘usiwa enkosini embethe izivunulo ezelukiweyo.’ Emtshadweni weWundlu umlobokazi lo ‘uphiwe ilineni elihle, elicazimulayo elihlanzekileyo ukuba agqoke. (Ilineni elihle limele imisebenzi emihle yabangcwele.)’​—Isam. 19:8.

10. Unini umtshado weWundlu?

10 Bala iSambulo 19:7. Unini umtshado weWundlu? Lanxa ivesi le isithi ‘umlobokazi usezilungisele’ ukutshada, amavesi alandelayo awakhulumi ngomtshado ngokwawo. Kodwa achaza ngendlela ecacileyo lokho okuzakwenzakala ngengxenye yokucina yokuhlupheka okukhulu. (Isam. 19:11-21) Lokhu sekusitsho yini ukuthi umtshado uzakuba khona iNkosi enguMyeni ingakaqedisi ukunqoba kwayo? Hatshi. Imibono esebhukwini leSambulo ayibhalwanga ngokulandelana kwayo. KuHubo-​45, umtshado wesikhosini uzakubakhona ngemva kokuba iNkosi, uJesu Khristu, isihlome inkemba yayo ‘isiyanqoba’ izitha zayo.​—Hubo. 45:3, 4.

11. UKhristu uzakuqedisa njani ukunqoba kwakhe?

11 Yikho-ke singaphetha ngokuthi ukulandelana kwezehlakalo lezi kuzabe kumi kanje: Okwakuqala, kuzakwahlulelwa ‘isiphingi esikhulu,’ iBhabhiloni eNkulu, umbuso womhlaba wonke wenkolo yamanga. (Isam. 17:1, 5, 16, 17; 19:1, 2) Ngemva kwalokho uKhristu uzakwahlulela umumo wezinto kaSathane emhlabeni ngokuwubhubhisa nge-Amagedoni, ‘impi yosuku olukhulu lukaNkulunkulu uSomandla.’ (Isam. 16:14-16; 19:19-21) Ekucineni, iNkosi eliQhawe izaqedisa ukunqoba kwayo ngokuphosela uSathane lamadimoni akhe emgodini ongelamkhawulo, basale bengasenelisi ukudukisa umhlaba.​—Isam. 20:1-3.

12, 13. (a) Uzabe unini umtshado weWundlu? (b) Ngobani abazathokoza emtshadweni weWundlu ozabe usezulwini?

12 AmaKhristu agcotshiweyo afa ngesikhathi sokuba khona kukaKhristu, ayavuswa ayephila ezulwini. Ngemva kokutshabalaliswa kweBhabhiloni eNkulu, uJesu uzabuthelela wonke amalunga aseleyo eqembu lomlobokazi. (1 Thes. 4:16, 17) Yikho-ke, impi ye-Amagedoni ingakaqalisi, bonke abaseqenjini ‘lomlobokazi’ bazabe sebesezulwini. Impi le isiphelile, siyabe sesifikile-ke isikhathi somtshado weWundlu. Akuthandabuzwa ukuthi umtshado lo uzabe umnandi kakhulu. ISambulo 19:9 sithi: “Babusisiwe labo abanxusiweyo edilini lomtshado weWundlu!” Azathokoza sibili amalunga eqembu lomlobokazi angu-144 000. Kanti njalo iNkosi enguMyeni izathokoza kakhulu nxa isilabo bonke abazabusa layo, sekufanana lokuthi ‘bayadla njalo bayanatha etafuleni layo eMbusweni wayo.’ (Luk. 22:18, 28-30)  Kodwa uMyeni lomlobokazi ayisibo bodwa abazathokoza emtshadweni weWundlu.

13 Njengoba sibonile ekuqaliseni, amaxuku asezulwini azahlabela emanyene esithi: ‘Kasithokozeni sithabe simuphe udumo [uJehova] ngoba umthimba kumbe umtshado weWundlu usufikile lomlobokazi walo usezilungiselele.’ (Isam. 19:6, 7) Kodwa izinceku zikaJehova ezisemhlabeni zizathokoza yini?

14. Ngobani “abakhaphi” bomlobokazi abaqanjwe kuHubo 45?

14 Bala iHubo 45:12, 14b, 15. Umphrofethi uZekhariya waphrofetha ukuthi esikhathini sokucina abantu bezizwe bazajabulela ukuhlangana labaseleyo baka-Israyeli kaNkulunkulu. Wabhala wathi: “Ngalezonsuku amadoda alitshumi aphuma kuzo zonke izindimi lezizwe azagagadlela umphetho wengubo yomJuda oyedwa athi, ‘Wothi sihambe lawe ngoba sesizwile ukuthi uNkulunkulu ulani.’” (Zek. 8:23) KuHubo 45:12, “amadoda alitshumi” amela “indodakazi yaseThire” kanye ‘lamadoda anothileyo.’ Babuya kwabagcotshiweyo befuna usizo ekukhonzeni uJehova njalo bebasekela. Kusukela ngo-1935 amamiliyoni abantu avumele ukuthi insalela ‘ibaholele ekulungeni.’ (Dan. 12:3) Lababakhaphi bamaKhristu agcotshiweyo abathembekileyo sebengcwelise ukuphila kwabo baba zintombi ekukhonzeni. “Abakhaphi” bomlobokazi bazinikele kuJehova njalo batshengisa ngezenzo ukuthi bathembekile eNkosini enguMyeni.

15. “Abakhaphi” bebesebenza njani ndawonye leqembu lomlobokazi elisesemhlabeni?

15 Insalela yeqembu lomlobokazi iyababonga  kakhulu “abakhaphi” ngenxa yokutshiseka kwabo beyincedisa ekutshumayeleni ‘ivangeli lombuso’ kuwo wonke umhlaba. (Mat. 24:14) Kayisibo bodwa ‘umoya lomlobokazi abathi, “Woza!”’ kodwa lalabo abezwayo bathi, “Woza!” (Isam. 22:17) Yikho-ke, “ezinye izimvu” zezwa amalunga eqembu eligcotshiweyo lomlobokazi esithi “Woza!” lazo njengomlobokazi zithi “Woza!” kwabanye bazo abasemhlabeni.​—Joh. 10:16.

16. UJehova uzinike siphi isibusiso ezinye izimvu?

16 Abagcotshiweyo abasesemhlabeni bayazithanda ezinye izimvu njalo kuyabathokozisa ukuthi uJehova, uYise woMyeni useziphe isibusiso sokuthi lazo zithokoze ngomtshado weWundlu wasezulwini. Kwaphrofethwa ukuthi “abakhaphi” laba ‘babezangeniswa ngentokozo langenjabulo.” Yikho-ke, ezinye izimvu lanxa zilethemba lokuthola ukuphila okungapheliyo emhlabeni zizathokoza sibili kanye lemuli kaJehova yasezulwini yezidalwa zonke nxa iWundlu selitshada ezulwini. Yikho ibhuku leSambulo lichaza ‘ixuku elikhulukazi’ ngokuthi limi “phambi kwesihlalo sobukhosi laphambi kweWundlu.” Lenza inkonzo kaJehova engcwele emagumeni ethempeli lakhe emhlabeni.​—Isam. 7:9, 15.

17, 18. Umtshado weWundlu uzafezani, njalo uKhristu uzakuba nguyise wabobani ngesikhathi sokubusa kwakhe kweminyaka eyinkulungwane?

17 Bala iHubo 45:​16. “Abakhaphi” bomlobokazi kaKhristu wasezulwini bazaba lesinye isizatho sokujabula lapho sebebona umtshado sufeza okunengi emhlabeni omutsha. UMyeni oyiNkosi uzavusa ‘oyise’ basemhlabeni abazakuba ‘ngamadodana’ akhe asemhlabeni. (Joh. 5:25-29; Heb. 11:35) Phakathi kwabo uzakhetha ‘amakhosana elizweni lonke.’ Akuthandabuzwa ukuthi abanye abadala abathembekileyo lamuhla bazakhethwa nguKhristu ukuthi bakhokhele emhlabeni omutsha.​—Isaya. 32:1.

18 Ngesikhathi sokubusa kwakhe kweminyaka eyinkulungwane, uKhristu uzakuba ngubaba kwabanye futhi. Bonke abasemhlabeni abazathola ukuphila okungapheliyo bazakuthola ngenxa yokuthi bayabe belokholo emhlatshelweni kaJesu wenhlawulo. (Joh. 3:16) Uyabe ‘esenguBaba wabo Waphakade’ sibili.​—Isaya. 9:6, 7.

19, 20. Izenzakalo ezibhalwe kuHubo-45 ziwathinta njani amaKhristu eqiniso lamuhla?

19 (Bala iHubo 45:1, 17.) Sesibonile ukuthi izenzakalo ezikuHubo-45 ziyasithinta sonke njengamaKhristu. Abagcotshiweyo abasele emhlabeni bayathokoza kakhulu ngenxa yokuthi sekuseduze ukuthi bayehlangana labafowabo kanye loMyeni wabo ezulwini. Ezinye izimvu lazo zizimisele ukuzithoba eNkosini yenkazimulo njalo ziyabonga ngesibusiso sokusebenza ndawonye lamalunga omlobokazi asesemhlabeni. Ngemva komtshado, uKhristu lalabo abazabusa laye eMbusweni wakhe bazaletha izibusiso ezimangalisayo emhlabeni.​—Isam. 7:17; 21:1-4.

20 Njengoba silindele ukuthi ‘indaba enkulu [“enhle,” NW]’ ephathelane leNkosi enguMesiya igcwaliseke, sizimisele yini ukwenza ukuthi ibizo likaNkulunkulu laziwe? (Hubo 45:1) Kungaba kuhle kakhulu nxa sonke ‘singadumisa iNkosi kuze kube nini lanini.’