IMPILO esiyiphila lamuhla ayisiyo eyayihloswe nguNkulunkulu. UJehova wayefuna umhlaba ugcwale abantu abamthandayo, abenza intando yakhe labakhetha ukubuswa nguye. Wayefuna abantu bakholise ukuba ndawonye befunda izinto ezintsha, bekhulisa abantwana futhi besenza umhlaba ube lipharadayisi.

• “Uyathulisa izimpi kuze kube semikhawulweni yomhlaba.”​—IHubo 46:9.

• “Safika isikhathi esibekiweyo . . . sokubhubhisa ababhubhisa umhlaba.”​—ISambulo 11:18.

• “Kakulamuntu ohlala khona ozakuthi: ‘Mina ngiyagula.’”​—Isaya 33:24, The Holy Bible in Ndebele.

• “Abakhethiweyo bami bazakholisa umsebenzi wezandla zabo okwesikhathi eside.”​—Isaya 65:22.

Izithembiso lezi zizagcwaliseka njani? UJehova ukhethe iNdodana yakhe uJesu ukuthi ibuse umhlaba. IBhayibhili lithi lo nguMbuso kaNkulunkulu. (UDanyeli 2:44) Liphinda lithi uJesu ‘uzaphiwa isihlalo sobukhosi.’​—ULukha 1:32, 33.

Ngesikhathi uJesu esemhlabeni wenza izimangaliso ezinengi ezatshengisa ukuthi impilo izabe isimnandi kakhulu nxa esebusa.

• Welapha yonke imihlobo yemikhuhlane. Lokhu kutshengisa ukuthi uzaqeda yonke imikhuhlane lezifo ezikhathaza abantu lamuhla.​—UMathewu 9:35.

• Wathulisa isiphepho esilolaka. Lokhu kutshengisa ukuthi ulamandla okuqondisa imvelo.​—UMakho 4:36-39.

• Wapha izinkulungwane zabantu ukudla. Lokhu kutshengisa ukuthi ngesikhathi esizayo abantu bazathola konke abakufunayo ukuze baphile.​—UMakho 6:41-44.

• Wantshintsha amanzi aba liwayini ngesikhathi esemtshadweni. Lokhu kutshengisa ukuthi abantu bazayikholisa kakhulu impilo nxa sebebuswa nguye.​—UJohane 2:7-11.

Kumele wenzeni ukuze uthole impilo enhle esiyithenjiswe nguNkulunkulu? ‘Kulendlela’ okumele uhambe ngayo. Indlela le ‘iya ekuphileni futhi balutshwana abayitholayo.’​—UMathewu 7:14.

Iyini indlela eya ekuphileni? UNkulunkulu uthi: “Mina nginguJehova, uNkulunkulu wakho, okufundisa lokho okuhle kakhulu kuwe, ekutshengisa indlela okumele uhambe ngayo.” (U-Isaya 48:17) Ungalalela lokhu akutshela khona uzathola impilo engcono kakhulu.

UJesu wathi: “Mina ngiyindlela leqiniso kanye lokuphila.” (UJohane 14:6) Nxa sifuna ukusondela kuJehova kumele silalele lokho uJesu akutshoyo futhi silingisele isibonelo sakhe. Le yiyo kuphela indlela esingathola ngayo ukuphila okungcono.

Ungayithola njani indlela eya ekuphileni? Lamuhla kulamasonto amanengi kakhulu. Manje  ungawabona njani amaKhristu eqiniso? (UJohane 17:17) UJesu wathi: “Lizabazi ngezithelo zabo.” (UMathewu 7:16) Waqhubeka wathi: “Kayisuye wonke umuntu othi kimi, ‘Nkosi, Nkosi,’ ozangena eMbusweni wamazulu, kodwa ozangena ngulowo kuphela owenza intando kaBaba osezulwini.”​—UMathewu 7:21.

Ungenzani ukuze uhambe endleleni eya ekuphileni? Kumele ufunde ngalowo owasinika ukuphila. Ngubani? Ulebizo yini? Unjani? Kuyini asenzele khona? Ufuna senzeni? *

UJehova wasidalela ukuthi sisebenze, sidle futhi sikholise impilo lezimuli zethu kuphela yini? Hatshi, kulokunye asidalela khona. Ufuna simazi njalo sibe ngabangane bakhe. Nxa sisenza intando kaNkulunkulu siyabe sitshengisa ukuthi siyamthanda. UJesu wathi: “Ukuze bathole ukuphila okungapheliyo, kumele bakwazi wena onguwe wedwa uNkulunkulu weqiniso.”​—UJohane 17:3.

Nxa sifuna ukuthokozisa uNkulunkulu kumele sintshintshe indlela ebesiphila ngayo. Lokhu kungakhanya kunzima. Kodwa impilo yethu izaba ngcono kakhulu nxa singaqalisa ukuhamba endleleni eya ekuphileni. OFakazi bakaJehova bangakuvakatshela ngesikhathi okhululeke ngaso ukuze baxoxe lawe ngeBhayibhili langemibuzo ongabe ulayo ngoNkulunkulu. Hamba kuwebhusayithi yethu i-jw.org ukuze uthintane lathi.