1-2. Yikuphi ukunyikinywa umphrofethi uHagayi athi kwakuzakwenzakala esikhathini sethu?

“NGESIKHATSHANA nje izitolo lezakhiwo ezindala zaqalisa ukudilika.” ‘Wonke umuntu wayephaphatheka. Abantu abanengi bathi ukunyikinyeka kwathatha phose imizuzu emibili kodwa kimi kwakungathi kuthethe isikhathi eside kakhulu.’ La ngamazwi akhulunywa ngabanye abasindayo kuze kube lokuzamazama komhlaba eNepal ngo-2015. Nxa ubungabona into eyethusa kangaka isenzakala ubungasoze uyikhohlwe.

² Kodwa sikhuluma sisenzenje siphakathi kokunyikinyeka okutshiyene lalokho esisanda kukhuluma ngakho njalo ukunyikinyeka lokhu akwenzakali edolobheni kumbe elizweni elilodwa. Khona kwenzakala ezizweni zonke njalo sekuleminyaka eminengi kusenzakala. Umphrofethi uHagayi wakhuluma ngokunyikinyeka lokho wathi: “Nanku okutshiwo nguJehova uSomandla: ‘Ngesikhatshana nje ngizaphinda nginyikinye amazulu lomhlaba, ulwandle lelizwe elomileyo.’”—Hag. 2:6.

3. Ukunyikinywa uHagayi akhuluma ngakho kutshiyene njani lokuzamazama komhlaba?

³ Ukunyikinywa uHagayi akhuluma ngakho akufanani lokuzamazama komhlaba okubangela umonakalo kuphela kodwa khona kuphinda kwenze kube lezinto ezinhle. UJehova ngokwakhe uthi: “Ngizanyikinya izizwe zonke, abathandwayo kuzo zonke izizwe bazakuza, njalo indlu le ngizayigcwalisa ngenkazimulo.” (Hag. 2:7) Isiphrofetho lesi sasisitshoni ebantwini abaphila ngesikhathi sikaHagayi futhi sitshoni kithi lamuhla?  Sizayiphendula imibuzo le njalo sifunde ukuthi singenzani ukuze sihlanganyele emsebenzini wokunyikinywa kwezizwe lamuhla.

4. Kungani uJehova wathuma umphrofethi uHagayi ebantwini bakhe?

⁴ UJehova wanika umphrofethi uHagayi umsebenzi oqakathekileyo. Kuyini okwenza waphiwa umsebenzi lo? Kumele ukuthi uHagayi wayephakathi kwamaJuda abuyela eJerusalema ngo-537 B.C.E. * evela eBhabhiloni lapho ayethunjwe khona. Ngemva kwezinyanga ezithile izinceku zikaJehova lezi ezithembekileyo zifike eJerusalema, zabeka isisekelo sethempeli. (Ezra. 3:8, 10) Kodwa kungakayi ngaphi kwenzakala into edanisayo. Abantu bakaJehova baphela amandla njalo bama ukwakha ngenxa yokuphikiswa yizizwe ezazingomakhelwane babo. (Ezra. 4:4; Hag. 1:1, 2) Yikho ngo-520 B.C.E. uJehova wathuma uHagayi ukuthi abavuselele ukuze bakhuthale njalo baqedise ukwakha ithempeli. *—Ezra. 6:14, 15.

5. Kungani amazwi kaHagayi abakhuthaza abantu bakaNkulunkulu?

⁵ Amazwi uJehova athuma uHagayi ukuthi awatsho kumaJuda ayengawokuwanceda ukuthi aqinise ukholo lwawo. Umphrofethi lo owayelesibindi watshela amaJuda ayesephele amandla wathi: “‘Qinani, lonke lina bantu belizwe,’ kutsho uJehova. ‘Lisebenze, ngoba ngilani,’ kutsho [“uJehova wamabutho,” NWT].” (Hag. 2:4) Kumele ukuthi umutsho othi “uJehova wamabutho” wawakhuthaza sibili. UJehova ungumlawuli webutho elikhulu lezingilosi yikho amaJuda kwakumele amthembe ukuze aphumelele.

6. Kuyini okwakuzakwenzakala ngemva kokunyikinywa uHagayi akhuluma ngakho?

⁶ UJehova wathuma uHagayi ukuthi atshele amaJuda ukuthi wayezanyikinya izizwe zonke. Lokho akutshelwayo kwakhuthaza amaJuda ayesephele amandla futhi eseyekele ukwakha ithempeli. Wawatshengisa ukuthi uJehova uzanyikinya iPhesiya eyayingumbuso olamandla kulayo yonke ngalesosikhathi. Kuyini okwakuzakwenzakala ngemva kokunyikinya lokhu? Abantu bakaNkulunkulu babezaqedisa ukwakha kutsha ithempeli futhi abantu ababengayisiwo maJuda babezabuya bezokhonza uJehova ndawonye labo ethempelini lelo. Amazwi kaHagayi abakhuthaza sibili abantu bakaNkulunkulu!—Zek. 8:9.

7. Yiwuphi umsebenzi wokunyikinya esiwenzayo lamuhla? Chasisa.

⁷ Isiphrofetho sikaHagayi sitshoni kithi? UJehova usephinda ukunyikinya zonke izizwe futhi khathesi lathi siyancedisa ekwenzeni umsebenzi lo. Cabanga ngalokhu: Ngo-1914 uJehova wabeka uJesu Khristu waba yiNkosi yoMbuso wakhe wasezulwini. (Hubo. 2:6) Lokho kwaba yizindaba ezimbi kubabusi bomhlaba ngoba kwakusitsho ukuthi “izikhathi ezibekiweyo zabezizwe” zaseziphelile. “Izikhathi ezibekiweyo zabezizwe” yisikhathi lapho okwakungelambusi owayebusa emele uJehova. (Luk. 21:24) Abantu bakaJehova bakuzwisisa lokhu futhi kusukela ngo-1919 bakhuthala kakhulu betshela bonke abantu ukuthi uMbuso kaNkulunkulu yiwo kuphela ozaqeda inhlupho zabantu. Ukutshunyayelwa ‘kwezindaba ezinhle zoMbuso’ kuyawunyikinya umhlaba wonke.—Mat. 24:14.

8. IHubo 2:1-3 lithi izizwe ezinengi zenzani nxa zisizwa izindaba ezinhle?

 ⁸ Abantu bayalalela yini nxa izindaba ezinhle zitshunyayelwa? Abanengi abafuni lakuzizwa. (Bala iHubo 2:1-3.) Izizwe zizondile, azifuni ukwamukela uMbusi okhethwe nguJehova. Aziboni umlayezo woMbuso esiwutshumayelayo ‘uyizindaba ezinhle.’ Abanye ohulumende baze bavimba umsebenzi wethu wokutshumayela. Lanxa ababusi abanengi bezizwe lezi besithi bayamkhonza uNkulunkulu, abafuni kusuka ezikhundleni zabo. Benza njengababusi bangesikhathi sikaJesu ngoba bamelana loGcotshiweyo kaJehova ngokuhlasela abalandeli bakhe abaqotho.—ImiSeb. 4:25-28.

9. UJehova uthini ezizweni ezingamukeli izindaba ezinhle?

⁹ UJehova uthini ngezizwe ezingafuni ukwamukela izindaba ezinhle? IHubo 2:10-12 lithi: “Ngakho-ke lina makhosi, limukani; liyaxwayiswa lina babusi bomhlaba. Mkhonzeni uJehova ngokumesaba, lithokoze lithuthumele. Ikhothameleni iNdodana, funa ithukuthele beselibhujiswa endleleni yenu, ngoba intukuthelo yakhe ingavutha ngesikhatshana. Babusisiwe bonke abaphephela kuye.” UJehova ulomusa futhi unika abaphikisi laba isikhathi sokuthi batshintshe. Sisesekhona isikhathi sokuthi benze njalo, futhi bakhethe ukwamukela uMbuso kaNkulunkulu. Lanxa kunjalo sesisincane. Siphila “ezinsukwini zokucina” zomumo lo wezinto. (2 Tim. 3:1; Isaya. 61:2) Lesi yiso kanye isikhathi sokuthi abantu bafunde iBhayibhili njalo bakhethe ukukhonza uJehova.

10. Umsebenzi wokunyikinya okukhulunywe ngawo kuHagayi 2:7-9 uncede ngani?

¹⁰ Ukunyikinywa uHagayi akhuluma ngakho kuyabanceda abanye abantu. Usitshela ukuthi ukunyikinywa lokhu kwenza ‘abathandwayo [abantu abazimisele ukufunda ngoNkulunkulu] kuzo zonke izizwe baze’ bezokhonza uJehova. * (Bala uHagayi 2:7-9.) U-Isaya loMikha  labo bathi lokhu kwakuzakwenzakala “ngezinsuku zokucina.”—Isaya. 2:2-4; Mik. 4:1, 2.

11. Omunye umfowethu wenzani eqala ukuzwa izindaba ezinhle zoMbuso?

¹¹ Khathesi asixoxeni ngalokho okwenziwa ngumfowethu okuthiwa nguKen osebenza emawofisini ethu amakhulu ngesikhathi esizwa izindaba ezinhle. Ulokhu ekukhumbula kuhle okwenzakalayo ngesikhathi eqala ukuzizwa eminyakeni engaba ngu-40 eyadlulayo. Uthi: “Ngathi ngiqalisa ukuzwa iqiniso eliseLizwini likaNkulunkulu ngathokoza ukwazi ukuthi siphila ezinsukwini zokucina zomumo lo wezinto. Ngazwisisa ukuthi kwakumele ngitshiyane lomhlaba lo omi manzonzo njalo ngisekele uJehova ukuze angamukele futhi ngithole ukuphila okungapheliyo. Ngahle ngazimisela ukwenza njalo ngasengithandaza ngitshela uJehova ngalokho. Ngayekela ukusekela umhlaba lo ngaphephela eMbusweni kaNkulunkulu olezisekelo eziqinileyo.”

12. Ithempeli likaJehova ligcwaliswe njani ngenkazimulo ezinsukwini lezi zokucina?

¹² Kusegcekeni ukuthi uJehova uyababusisa abantu bakhe. Ezinsukwini lezi zokucina, inani labantu abamkhonzayo liqhubeka likhwela. Ngo-1914 sasisedlula kancane i-5 000 kodwa khathesi sesisedlula 8 miliyoni njalo amanye amamiliyoni ananza iSikhumbuzo ndawonye lathi minyaka yonke. Lokhu kwenze ukuthi ithempeli likaJehova elimela konke okwenza senelise ukumkhonza ngendlela eqondileyo ligcwale “abathandwayo kuzo zonke izizwe.” Lebizo likaNkulunkulu liyakhazinyuliswa nxa abantu laba begqoka ubuntu obutsha.—Efe. 4:22-24.

13. Yiziphi ezinye iziphrofetho ezigcwalisekileyo? (Khangela umfanekiso ongaphandle.)

¹³ Konke lokhu okwenzakalayo kugcwalisa lezinye iziphrofetho ezinjengaleso esiku-Isaya isahluko 60. Uvesi 22 uthi: “Ingcosana yakho izakuba yinkulungwane, abancinyane bazakuba yisizwe esilamandla. Mina nginguJehova; ngesikhathi esifaneleyo lokhu ngizakwenza ngokuphangisa.” Kulokunye okuhle okwenzakalayo nxa kusiba labantu abanengi kangaka ababuya ukuzokhonza uJehova. Abantu laba “abathandwayo” balolwazi lokwenza izinto ezitshiyeneyo njalo bazimisele  ukuhlanganyela emsebenzini wokutshumayela ‘izindaba ezinhle zoMbuso.’ Lokhu kwenza abantu bakaJehova basebenzise ulwazi lolo u-Isaya alubiza ngokuthi ‘luchago lwezizwe.’ (Isaya. 60: 5, 16) Abantu laba abathandwayo bancedisa emsebenzini wokutshumayela owenziwa emazweni adlula 240 lasekudindweni kwamabhuku ngezindimi ezedlula 1 000.

14. Yisiphi isinqumo okumele abantu basenze khathesi?

¹⁴ Ukunyikinywa kwezizwe okwenzakala kulezi insuku zokucina kunika abantu ithuba lokutshengisa ukuthi bami ngaphi. Bazasekela uMbuso kaNkulunkulu yini kumbe bazathemba ohulumende balumhlaba? Lesi yisinqumo esiqakathekileyo okumele bonke abantu basenze. Abantu bakaJehova bayayilalela imithetho yabohulumende bamazwe abahlala kuwo kodwa abazingeni ezombusazwe zalo umhlaba. (Rom. 13:1-7) Bayakwazi ukuthi uMbuso kaNkulunkulu yiwo kuphela ozaqeda inhlupho zabantu. UMbuso lo kawusiwo walo umhlaba.—Joh. 18:36, 37.

15. Ibhuku leSambulo litshengisa njani ukuthi abantu bakaNkulunkulu bazalingwa?

¹⁵ Ibhuku leSambulo likhuluma ngokuthi abantu bakaNkulunkulu bazalingwa njani ezinsukwini zokucina. Sizaqhubeka siphikiswa okuzwayo njalo sihlukuluzwa. Ohulumende balumhlaba bazasibamba ngamandla ukuthi sizinikele kubo ngokupheleleyo njalo bahlukuluze labo abangafuni ukubasekela. (Isam. 13:12, 15) ‘Bazababamba ngenkani bonke abantu, abancane labakhulu, abanothileyo labayanga, abakhululekileyo lezigqili ukuze babekwe uphawu esandleni sabo sokudla loba emabunzini abo.’ (Isam. 13:16) Kudala izigqili zazifakwa uphawu ukuze kukhanye ukuthi ngezikabani. Ngendlela efananayo abantu bazakhangelela ukuthi umuntu wonke abe lophawu esandleni sakhe kumbe ebunzini okutsho ukuthi kuzamele batshengise ukuthi basekela bani. Bazafuna bonke abantu batshengise ukuthi bayabasekela ohulumende lokuthi bangababo.

16. Kungani kuqakathekile ukuthi sibe leqiniso lokuthi siqotho sibili kuJehova?

¹⁶ Sizavuma yini ukufakwa uphawu lolo njalo sisekele ohulumende? Labo abazakwala ukufakwa uphawu bazathwala nzima futhi babe sengozini. Ibhuku leSambulo liqhubeka lisithi: ‘Akusoze kube lomuntu ozathenga kumbe ozathengisa ngaphandle kwalowo olophawu.’ (Isam. 13:17) Kodwa abantu bakaNkulunkulu bayakwazi lokho azakwenza kulabo abalophawu okukhulunywa ngalo kuSambulo 14:9, 10. Kulokuthi bafakwe uphawu lolu kuzabe kungathi babhalwe ukuthi “okaJehova” esandleni. (Isaya. 44:5) Khathesi yisikhathi sokuba leqiniso lokuthi siqotho sibili kuJehova. Nxa siqotho, uzathokoza ngokusibiza ngokuthi singabakhe!

17. Kuyini okumele sikukhumbule ngokubekezela kukaJehova?

¹⁷ UJehova utshengise ukuthi uyabekezela sibili ezinsukwini lezi zokucina. Kafuni loba ngubani abhujiswe. (2 Phet. 3:9) Unika wonke umuntu ithuba lokuthi aphenduke njalo akhethe ukumkhonza. Kodwa ukubekezela kwakhe kulalapho okuphelela khona. Labo abangafuni ukusekela uMbuso wakhe bazayifunda ivaliwe njengoFaro. UJehova wathi kuye: “Kunje nje ngabe sengiselulile isandla sami ngakutshaya kanye labantu bakho ngesifo ebesizakucitsha emhlabeni. Kodwa ngikuphephisile ngayonale injongo yokuthi ngikubonise amandla ami, lokuthi ibizo lami lifakazwe kuwo wonke umhlaba.” (Eks. 9:15, 16)  Zonke izizwe zizakwazi ukuthi uJehova nguye yedwa uNkulunkulu weqiniso. (Hez. 38:23) Lokhu kuzakwenzakala njani?

18. (a) Yikuphi okunye ukunyikinywa okukhulunywa ngakho kuHagayi 2:6, 20-22? (b) Sazi njani ukuthi amazwi kaHagayi azagcwaliseka esikhathini esizayo?

¹⁸ Ngemva kweminyaka eminengi uHagayi efile umphostoli uPhawuli watshela amaKhristu angamaHebheru ukuthi amazwi akuHagayi 2:6, 20-22 ayezagcwaliseka esikhathini esizayo. (Bala.) Wathi: “Khathesi uthembisile wathi: ‘Ngizaphinda futhi nginyikinye umhlaba, ngize nginyikinye lezulu.’ Amazwi athi ‘ngizaphinda futhi,’ atshengisa ukuthi kuzakhitshwa izinto ezinyikinyekayo, lezo ezenziweyo, ukuze izinto ezinganyikinyekiyo zisale.” (Heb. 12:26, 27) Ukunyikinywa uPhawuli akhuluma ngakho kutshiyene lalokho okukuHagayi 2:7. Lokhu khona kutsho ukuthi labo abangafuni ukuvuma ukuthi uJehova nguye olelungelo lokubusa bazabhujiswa njengoFaro.

19. Kuyini okungasoze kunyikinywe njalo sikwazi njani lokho?

¹⁹ Kuyini okungasoze kunyikinywe kumbe kukhitshwe? UPhawuli uqhubeka esithi: “Njengoba sizakwamukela uMbuso ongeke unyikinywe, kasiqhubekeni sithola umusa omkhulu ongenza sinikele kuNkulunkulu inkonzo engcwele ayamukelayo, siyinikela ngokumesaba langenhlonipho enkulu.” (Heb. 12:28) Nxa ukunyikinya kokucina sekuphelile uMbuso kaNkulunkulu yiwo wodwa ozasala ukhona. Uzaqhubeka umile endaweni yawo.—Hubo. 110:5, 6; Dan. 2:44.

20. Yisiphi isinqumo okumele abantu basenze njalo singabancedisa njani?

²⁰ Isikhathi sesihambile! Abantu kumele bakhethe. Nxa bangakhetha ukusekela umhlaba lo bazabhujiswa. Nxa bangakhetha ukukhonza uJehova njalo batshintshe indlela abaphila ngayo ukuze bamthokozise bazathola ukuphila okungapheliyo. (Heb. 12:25) Umsebenzi wethu wokutshumayela unceda abantu ukuthi benze isinqumo lesi esiqakathekileyo. Sengathi singanceda abathandwayo abanengi ukuthi bakhethe ukusekela uMbuso kaNkulunkulu. Kanti njalo asihlaleni sikhumbula amazwi eNkosi yethu uJesu athi: “Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.”—Mat. 24:14.