Lindela UJehova Uthokoza
USILINDELE ngabomvu yini isikhathi lapho uJehova azasusa khona konke okubi futhi enze zonke izinto zibe zintsha? (Isam. 21:1-5) Kumele ukuthi usilindele sibili! Kodwa kwezinye izikhathi kunzima ukuthi siqhubeke sibekezela futhi silindele uJehova, ikakhulu nxa silenhlupho. Nxa esikukhangeleleyo kungaphuza ukugcwaliseka siyadana.—Zaga. 13:12, amabala angaphansi.
Lanxa kunjalo uJehova ukhangelele ukuthi simlindele ngesineke aze asincede ngesikhathi sakhe esifaneleyo. Kungani efuna senze njalo? Kuyini okungasinceda ukuthi simlindele sithokoza?
KUNGANI UJEHOVA EFUNA SIMLINDELE?
IBhayibhili lithi: “UJehova ukulindele ngesineke ukulenzela umusa, uzasukuma ukuze alitshengise isihawu. Ngoba uJehova nguNkulunkulu owahlulela kuhle. Bayathokoza bonke abaqhubeka bemlindele.” (Isaya. 30:18) Amazwi la ka-Isaya ayebhalelwe amaJuda ayeyiziqholo. (Isaya. 30:1) Kodwa akhona amanye amaJuda ayethembekile futhi amazwi la awanika ithemba. Lalamuhla azinika ithemba izinceku zikaJehova ezithembekileyo.
Yikho lathi kumele silinde futhi sibekezele ngoba uJehova ukulindele ngesineke ukusinceda. Usesibekile isikhathi lapho azasusa khona umumo lo wezinto, njalo ulilindele lelolanga lalelohora ukuthi lifike. (Mat. 24:36) Ngalesosikhathi kuyabe sekukhanya bha ukuthi okukhulunywa nguDeveli ngoJehova kanye lalabo abamkhonzayo kungamanga. UJehova uzasusa uSathane lalabo abamsekelayo, kodwa thina ‘uzasitshengisa isihawu.’
Okwakhathesi uJehova ngeke asuse zonke inhlupho zethu. Kodwa uyasiqinisekisa ukuthi singenelisa ukuthokoza sisamlindele. Njengoba u-Isaya watsho, singenelisa ukuthokoza ngapha sikulindele ngabomvu okuhle azasenzela khona. (Isaya. 30:18) a Kuyini okungasinceda ukuthi sithokoze? Nanzi izinto ezine ezingasinceda.
ONGAKWENZA UKUZE ULINDELE UJEHOVA UTHOKOZA
Cabanga ngezinto ezinhle ezenzakala empilweni yakho. Zinengi izinto ezimbi iNkosi uDavida eyazibona zisenzakala. (Hubo. 37:35) Lanxa kunjalo yabhala yathi: “Thula phambi kukaJehova, umlindele ngesineke. Ungamzondeli umuntu omubi nxa ephumelela ukwenza akucabangileyo.” (Hubo. 37:7) UDavida wakwenza lokhu ngokuhlala ecabangisisa ngokuthi uJehova wayezamsindisa. Kanti njalo wayezinanzelela zonke izibusiso uJehova ayemnika zona. (Hubo. 40:5) Nxa lathi singahlala sicabanga ngezinto ezinhle ezenzakala empilweni yethu, siyekele ukuhlala sicabanga ngokubi okuyabe kusenzakala, kuzakuba lula ukuthi sihlale simlindele uJehova.
Hlala udumisa uJehova. Umlobi weHubo 71 wathi kuJehova: “Ngizaqhubeka ngilindile, ngizakudumisa kakhulu kulakuqala.” (Hubo. 71:14) Kungenzakala ukuthi umlobi weHubo leli kwakunguDavida. Manje wayezamdumisa njani uJehova? Wayezatshela abanye futhi ahlabele lezingoma zokumdumisa. (Hubo. 71:16, 23) Lathi singalingisela uDavida ngokulindela uJehova sithokoza. Siyamdumisa ngokutshumayela, lokuhlala sixoxa ngaye labanye langokuhlabela ingoma zoMbuso. Ngesikhathi uhlabela ingoma yoMbuso cabangisisa ngamazwi ayo uzame ukubona ukuthi akunceda njani ukuthi uthokoze.
Vuma ukukhuthazwa ngabafowenu labodadewenu. Ngesikhathi uDavida ephakathi kobunzima wathi kuJehova: “Phambi kwabantu bakho abaqotho, ngizathembela ebizweni lakho.” (Hubo. 52:9) Lathi singakhuthazwa yizinceku zikaJehova eziqotho emihlanganweni yebandla, lasekutshumayeleni lasemibuthanweni yokuzikholisela.—Rom. 1:11, 12.
Qinisa ithemba lakho. IHubo 62:5 lithi: “Ngimlindele ngithule uNkulunkulu ngoba nguye onginika ithemba.” Nxa umuntu elethemba eliqinileyo uyabe engathandabuzi ukuthi akukhangeleleyo kuzagcwaliseka. Ukuba lethemba elinjalo kuqakathekile ngoba kuyasinceda ukuthi siqinisele ikakhulu nxa sesibona angani umumo lo wezinto usuphuza ukuphela. Kumele singathandabuzi ukuthi izithembiso zikaJehova zizagcwaliseka lanxa singaze sizilindele okwesikhathi eside. Okunye okungasinceda ukuthi siqinise ithemba lethu yikutaditsha iLizwi likaNkulunkulu. Ngokwesibonelo singahlola iziphrofetho ezikulo, sihlole lokuthi izinto ezabhalwa ngabalobi beBhayibhili abatshiyeneyo zivumelana njani, siphinde sikhangele lokunengi okumayelana lobuntu bukaJehova. (Hubo. 1:2, 3) Kanti njalo kumele ‘sithandaze siqondiswa ngumoya ongcwele’ ukuze sihlale singabangane bakaJehova ngesikhathi simelele ukuthi isithembiso sakhe sokuphila okungapheliyo sigcwaliseke.—Jud. 20, 21.
NjengeNkosi uDavida qiniseka ukuthi uJehova ubakhangele bonke abamlindeleyo futhi uba lothando oluqotho kubo. (Hubo. 33:18, 22) Qhubeka umlindele ngesineke uJehova ngokuhlala ucabanga ngezinto ezinhle ezenzakala empilweni yakho, langokumdumisa, langokuvuma ukukhuthazwa ngabafowenu labodadewenu kanye lokuhlala uqinisa ithemba lakho.
a Ibala lesiHebheru elihunyutshwe ngokuthi “abaqhubeka bemlindele” lingatsho “abantu abakulindele ngabomvu ukuthi okuthile kwenzakale.” Lokhu kutshengisa ukuthi akukubi ukuthi sikulindele ngabomvu ukusindiswa kwethu.
