KWEZINYE izikhathi abalobi beBhayibhili babephinda eminye imitsho injengoba injalo. Nanzi izizatho ezintathu ezingabe zenza ukuthi benze njalo:

Isikhathi elabhalwa ngaso. Ngesikhathi sama-Israyeli asendulo abantu abanengi babengelawo amakhophi abo oMthetho. Izikhathi ezinengi babewuzwa ubalwa ngesikhathi bebuthene ethabanikeli. (Dute. 31:​10-12) Kufanele ukuthi kukhona okwakubaphambanisa ukuthi bangezwa konke okwakubalwa njengoba babesima okwamahora amanengi futhi bebanengi. (Neh. 8:​2, 3, 7) Yikho ukuphindaphinda izinto eziqakathekileyo kwakungenza kube lula ukuthi abantu bakhumbule imibhalo futhi benze ekutshoyo. Ukuphinda eminye imitsho kwakubanceda ukuthi bakhumbule izinto eziqakathekileyo njengemilayo kaNkulunkulu lemithetho yakhe yokwahlulela.—Levi. 18:​4-22; Dute. 5:1.

Indlela elabhalwa ngayo. Ezinye ingxenye zeBhayibhili kwakuzingoma. Ngokwesibonelo ibhuku lamaHubo, iNgoma Yezingoma kanye leZililo. Ezinye ingoma zazilamazwi aphindwaphindwayo futhi lokhu kwakunceda abalaleleyo ukuthi bawabambe lula amazwi azo. Ngokwesibonelo khangela amazwi akumaHubo 115:​9-11 athi: “Awu bantu bako-Israyeli thembani uJehova, ungumsizi wenu lehawu lenu. Lina abendlu ka-Aroni, thembani uJehova, ungumsizi wenu lehawu lenu. Thembani uJehova lina elesaba uJehova, ungumsizi wenu lehawu lenu.” Ukuphindaphinda amazwi la aqakathekileyo kwakunceda abahlabelayo ukuthi bahlale bewakhumbula futhi bawagcine ezinhliziyweni zabo.

Kulendaba eziqakathekileyo okwakumele zigcizelelwe. Kwezinye izikhathi abalobi beBhayibhili babephinda imitsho eqakathekileyo. Ngokwesibonelo, ngesikhathi uNkulunkulu etshela abako-Israyeli ukuthi kwakumele bangadli igazi, waphefumulela uMosi ukuthi abhale ephindaphinda izizatho zokuthi kungani kwakungamelanga balidle. UNkulunkulu wayefuna ukugcizelela ukuthi ukuphila kusegazini, okutsho ukuthi igazi limela ukuphila. (Levi. 17:​11, 14) Ngokuhamba kwesikhathi abaphostoli lamadoda amadala ayeseJerusalema bathi bekhuluma ngezinto amaKhristu okwakumele angazenzi ukuze athokozise uNkulunkulu, bagcizelela lendaba yokuxwaya igazi.—Imiseb. 15:​20, 29.

Lanxa eminye imitsho iphindaphindiwe eBhayibhilini, lokho akutsho ukuthi uJehova ufuna sibe lomkhuba wokuphindaphinda imitsho eseBhayibhilini. Ngokwesibonelo, uJesu wathi: “Nxa lithandaza lingaphindi izinto ezifananayo kanenginengi.” (Mat. 6:7) Ngemva kwalokho waqamba ezinye izinto esingazithandazela ezihambelana lentando kaNkulunkulu. (Mat. 6:​9-13) Yikho lanxa sizama ukuthi singasebenzisi amazwi afananayo kanenginengi emithandazweni yethu, sikhululekile ukukhulekela indaba efananayo kanengi.—Mat. 7:​7-11.

Kulezizatho ezinhle ezenza kwaphindwaphindwa amanye amazwi leminye imitsho eLizwini likaNkulunkulu. Le ngeyinye indlela uMfundisi wethu omkhulu asifundisa ngayo lokho okusincedayo.—Isaya. 48:​17, 18.