1. Yiliphi ithemba esilinikwe nguJehova?

 UJEHOVA usinike ithemba elimangalisayo elokuphila okungapheliyo. Abanye balethemba lokuthola ukuphila okungapheliyo ezulwini sebeyizidalwa zomoya ezingafiyo. (1 Khor. 15:50, 53) Kodwa abantu abanengi balethemba lokuphila kuze kube nini lanini emhlabeni beqine saka futhi bethokoza. (Isam. 21:3, 4) Kungelani lokuthi silethemba lokuphila phakade ezulwini kumbe emhlabeni ithemba lethu liqakatheke kakhulu.

2. Ithemba lethu lisekelwe ngaphi futhi kungani sisitsho njalo?

² Kwesinye isikhathi nxa iBhayibhili likhuluma ngokuba lethemba liyabe likhuluma ngokukhangelela ukuthi kwenzakale izinto ezinhle. Ithemba lethu liqinisekile ngoba livela kuJehova. (Rom. 15:13) Siyakwazi lokho asithembise khona njalo siyakwazi ukuthi uhlala egcina izithembiso zakhe. (Nani. 23:19) Asikuthandabuzi ukuthi uJehova ulesifiso njalo ulamandla okwenza konke athi uzakwenza. Ngakho ithemba lethu kayisilo phupho loba izinto esizifisayo kodwa lisekelwe kulokho esikwaziyo ukuthi kuliqiniso.

3. Sizaxoxa ngani esihlokweni lesi? (IHubo 27:14)

³ UBaba wethu osezulwini uyasithanda njalo ufuna simthembe. (Bala iHubo 27:14.) Nxa simthemba ngenhliziyo yonke uJehova sizenelisa ukuqinisela nxa sihlangana lezilingo njalo sizakuba lesibindi futhi sithokoze lanxa kungaze kwenzakaleni. Ake sibone ukuthi ithemba lethu lisivikela njani. Sizaqala sihlole ukuthi ithemba lethu lifanana njani lesikhonkwane kanye lengwane yesotsha. Ngemva kwalokho sizaxoxa ngokuthi singaliqinisa njani ithemba lethu.

4. Ithemba lethu lifanana njani lesikhonkwane? (UHebheru 6:19)

⁴ Encwadini umphostoli uPhawuli ayibhalela amaHebheru wafanisa ithemba lethu lesikhonkwane. (Bala uHebheru 6:19.) UPhawuli wayekwazi ukuthi izikhonkwane zazisetshenziswa ukubamba umkhumbi ukuze ungazunguzeki ngoba wayejayele ukuhamba ngayo imikhumbi. Ngelinye ilanga uPhawuli esemkhunjini kwaba lesiphepho esilamandla. Wabona abatshayeli bomkhumbi bephosela izikhonkwane emanzini ukuze umkhumbi ungafuqwa ngumoya usiya ematsheni. (Imiseb. 27:29, 39-41) Ithemba lethu linjengesikhonkwane ngoba liyasivikela ukuze singaqhelelani loJehova nxa sihlangana lezikhathi ezinzima ezinjengesiphepho. Ithemba lethu liyasinceda ukuthi sihlaliseke lanxa siphakathi kobunzima ngoba siyabe sikwazi ukuthi izinto zizakuba ngcono. Khumbula ukuthi uJesu wasitshela ukuthi sizahlukuluzwa. (Joh. 15:20) Ukucabangisisa ngalokho uJehova asithembise khona kuyasinceda ukuthi singanyikinyeki kodwa siqhubeke simkhonza.

5. Ithemba lamnceda njani uJesu esekhangelane lokufa?

⁵ Ake sihlole ukuthi ithemba lamnceda njani uJesu ukuthi ame eqinile lanxa wayekwazi ukuthi uzabulawa ngendlela ebuhlungu. NgePhentekhosti lika-33 C.E., umphostoli uPhetro wakhuluma amazwi esiphrofetho esikuHubo achaza kuhle indlela uJesu ayehlaliseke ngayo kanye lokuqiniseka ayelakho. Wathi: ‘Ngizahlala ngilethemba ngoba awusoze ungitshiye engcwabeni njalo awusoze uvume ukuthi oqotho wakho akubone ukonakala, futhi uzangigcwalisa ngentokozo enkulu phambi kwakho.’ (Imiseb. 2:25-28; Hubo. 16:8-11) Lanxa uJesu wayekwazi ukuthi wayezakufa wayelethemba eliqinileyo elokuthi uYise wayezamvusa njalo wayekwazi ukuthi uzathokoza sebephinde baba ndawonye ezulwini.—Heb. 12:2, 3.

6. Omunye umzalwane wathini ngethemba?

⁶ Ithemba esilalo selincede abafowethu labodadewethu abanengi ukuthi baqinisele ebunzimeni. Ngokwesibonelo ithemba lanceda umzalwane owayethembekile owayehlala e-England okuthiwa nguLeonard Chinn. Ngesikhathi seMpi Yomhlaba Yokuqala wavalelwa ejele ngenxa yokwala ukuya empini. Wavalelwa yedwa ejele okwenyanga ezimbili. Ngemva kwalokho wasetshenziswa gadalala. Wabhala wathi: “Engahlangana lakho kwanginceda ngabona ukuqakatheka kokuba lethemba ukuze siqinisele. Silesibonelo sikaJesu labaphostoli labaphrofethi njalo silezithembiso eziligugu eziseBhayibhilini. Konke lokhu kusenza sibe lethemba lekusasa njalo kuyasinika amandla okuthi siqinisele.” Ithemba laliyisikhonkwane kuLeonard njalo lingaba yisikhonkwane lakithi.

7. Ubunzima buqinisa njani ithemba lethu? (URoma 5:3-5; UJakhobe 1:12)

⁷ Ithemba lethu liyaqina nxa singaqinisela ebunzimeni njalo sibone indlela uJehova asincedisa ngayo futhi sikwazi ukuthi uyathokoza ngesikwenzayo. (Bala uRoma 5:3-5; uJakhobe 1:12.) Yikho khathesi silethemba eliqinileyo ukwedlula ngesikhathi siqalisa ukuzwa izindaba ezinhle. USathane ufuna sikhulelwe yibunzima kodwa uJehova uyasincedisa ukuthi simelane labo.

8. Ithemba lifanana njani lengwane yesotsha? (U-1 Thesalonika 5:8)

⁸ IBhayibhili liphinda lifanise ithemba esilalo lengwane yesotsha. (Bala u-1 Thesalonika 5:8.) Isotsha ligqoka ingwane evikela ikhanda  lalo ukuze lingalinyazwa yisitha. Empini esiyilwa loSathane kumele sivikele ingqondo zethu. Usihlasela ngezilingo kanye lemicabango engaphambanisa ingqondo zethu. Ithemba lethu livikela ingqondo zethu ukuze siqhubeke sithembekile kuJehova njengoba nje ingwane ivikela ikhanda lesotsha.

9. Kwenzakalani nxa abantu bengelathemba?

⁹ Ithemba esilalo lokuthola ukuphila okungapheliyo lizasinceda ukuthi sihlakaniphe futhi senze izinqumo ezinhle. Kodwa nxa singavumela ukuthi ithemba lethu lixege, sivume ukukhulelwa yizifiso zethu singakhohlwa ngethemba lethu lokuphila okungapheliyo. Lokhu yikho okwenzakala kumaKhristu ayehlala edolobheni leKhorinte. Babengasasikholwa isithembiso sikaNkulunkulu esiqakathekileyo sokuvuswa kwabafileyo. (1 Khor. 15:12) UPhawuli wabhala ukuthi labo abangakholwayo ukuthi abafileyo bazavuswa baphilela ukugcwalisa izifiso zabo kuphela. (1 Khor. 15:32) Lamuhla abantu abanengi abangazithembiyo izithembiso zikaNkulunkulu benza konke abangakwenza ukuze bakholise impilo khathesi. Kodwa thina sithemba lokho esikuthenjiswe nguNkulunkulu. Ithemba lethu linjengengwane evikela ingqondo zethu. Liyasivikela ukuthi singahlali sicabanga ukuzithokozisa ngoba lokhu kungaphambanisa ubungane bethu loNkulunkulu.—1 Khor. 15:33, 34.

10. Ithemba lingasivikela njani ukuthi singabi lemicabango engayisiyo?

¹⁰ Ingwane yethu elithemba esilalo iyasivikela ukuthi singacabangi ukuthi ngeke senelise ukuthokozisa uJehova. Ngokwesibonelo omunye angathi, ‘Mina angisoze ngenelise ukuthola ukuphila okungapheliyo njalo angisoze ngenelise ukwenza lokho uNkulunkulu afuna ngikwenze.’ Khumbula ukuthi u-Elifazi owayesenza angathi ududuza uJobe wakhuluma amazwi ahambelana lalawa lapho esithi: “Uyini umuntu ukuthi angaba ngohlanzekileyo?” Waphinda wakhuluma ngoNkulunkulu wathi: “Phela uNkulunkulu kazithembi lezingilosi zakhe, lamazulu uwabona engahlambulukanga.” (Jobe. 15:14, 15) La ngamanga aluhlaza tshoko! Khumbula ukuthi uSathane nguye ofuna ucabange ngaleyondlela. Uyakwazi ukuthi uzaphelelwa lithemba nxa ungaba lemicabango enjalo. Yikho ungawakholwa amanga la kodwa cabanga ngezithembiso zikaJehova. Ungakuthandabuzi ukuthi uJehova ufuna uphile kuze kube nini lanini lokuthi uzakuncedisa ukuthi ukuthole ukuphila lokhu.—1 Thim. 2:3, 4.

11. Kungani kumele sibekezele sisalindele ukuthi uJehova agcwalise lokho asithembise khona?

¹¹ Akulula ngazo zonke izikhathi ukugcina ithemba lethu liqinile. Singehluleka ukulindela ukuthi izithembiso zikaNkulunkulu zigcwaliseke. Kithi kungakhanya angani uthatha isikhathi eside kodwa kuye sifitshane ngenxa yokuthi wayevele ekhona njalo uzahlala ekhona. (2 Phet. 3:8, 9) Uzazigcwalisa izithembiso zakhe kodwa kungenzeka ukuthi lokhu kungenzakali ngesikhathi esikhangelele ngaso. Kuyini okungasinceda ukuthi sigcine ithemba lethu liqinile njengoba sisalindele ukuthi uJehova agcwalise izithembiso zakhe?—Jak. 5:7, 8.

12. UHebheru 11:1, 6 uthi ithemba lingenelana njani lokholo?

¹² Ithemba lethu lizaqina nxa singahlala siseduze loJehova onguye ozaligcwalisa ithemba lelo. IBhayibhili lithi ukuze sibe lethemba kumele sikholwe ukuthi uJehova ukhona lokuthi “uyabapha umvuzo labo abamdinga ngeqiniso.” (Bala uHebheru 11:1, 6.) Nxa singathandabuzi ukuthi uJehova ukhona  ithemba lethu lokuthi uzakwenza konke akuthembisileyo lizaqina. Asixoxeni ngezinto ezizaqinisa ubungane bethu loJehova njalo ziqinise lethemba lethu.

13. Singenzani ukuze sisondele kuNkulunkulu?

¹³ Khuleka kuJehova futhi ubale iLizwi lakhe. Siyenelisa ukusondela kuJehova lanxa singamboni. Siyakhuluma laye ngomthandazo sileqiniso lokuthi uyasizwa. (Jer. 29:11, 12) Nxa sibala futhi sicabangisise ngeLizwi likaNkulunkulu siyabe simlalela. Nxa singabala ngokuthi uJehova wayebanakekela njani labo ababethembekile kuye kudala ithemba lethu lizaqina. Konke okuseLizwini likaNkulunkulu ‘kwabhalelwa ukuthi kufundiswe thina. Lokho kwenza sibe lethemba ngoba iMibhalo le isinceda ukuthi siqinisele njalo iyasiduduza.’—Rom. 15:4.

14. Kungani kufanele sicabangisise ngalokho uJehova akwenzele abanye?

¹⁴ Cabangisisa ngokuthi uJehova uzigcwalise njani izithembiso zakhe. Cabanga ngalokho uJehova akwenzela u-Abrahama loSara. Basebegugile okokuthi babengasenelisi ukuba labantwana. Lanxa kunjalo uNkulunkulu wabathembisa ukuthi bazakuba lomntwana. (Gen. 18:10) IBhayibhili lithi u-Abrahama wayelokholo ngoba lithi: “Wakholwa ukuthi wayezakuba nguyise wezizwe ezinengi.” (Rom. 4:18) Lanxa kwakukhanya angani lokhu ngeke kwenzakale u-Abrahama wayelethemba lokuthi uJehova wayezagcwalisa izithembiso zakhe. UJehova kazange amdanise u-Abrahama. (Rom. 4:19-21) Izindaba ezinje zisifundisa ukuthi sihlale simthemba uJehova ukuthi uzagcwalisa izithembiso zakhe lanxa kungakhanya angani lokhu ngeke kwenzakale.

15. Kungani kumele sicabangisise ngalokho uNkulunkulu asesenzele khona?

¹⁵ Cabanga ngalokho uJehova akwenzele  khona. Cabanga ngokuthi izithembiso eziseBhayibhilini esezigcwalisekile sezikuncede njani. Ngokwesibonelo uJesu wathembisa ukuthi uYise uzasinika esikudingayo empilweni. (Mat. 6:32, 33) UJesu waphinda wasithembisa ukuthi uJehova uzasinika umoya ongcwele nxa singawucela. (Luk. 11:13) UJehova uzigcwalisile izithembiso lezi. Mhlawumbe ungacabanga ngezinye izithembiso uJehova asezigcwalisile empilweni yakho. Ngokwesibonelo wathembisa ukuthi uzakuthethelela, akududuze njalo akunike konke okudingayo ukuze uhlale useduze laye. (Mat. 6:14; 24:45; 2 Khor. 1:3) Nxa ungacabangisisa ngalokho uNkulunkulu asekwenzele khona uzaqinisa ithemba olalo ngazakwenzela khona esikhathini esizayo.

16. Kungani ithemba liyisipho esiligugu?

¹⁶ Ithemba lokuphila okungapheliyo liyisipho esivela kuNkulunkulu. Silethemba lokuthi sizakuba lekusasa elihle njalo asithandabuzi ukuthi lokhu kuzakwenzakala. Ithemba lelo linjengesikhonkwane esisinceda ukuthi sime siqinile lanxa siphakathi kobunzima njalo sibekezele nxa sihlukuluzwa, lanxa sikhangelane lokufa. Linjengengwane yesotsha ngoba livikela ingqondo zethu ukuze sitshiye imicabango emibi njalo senze okuqondileyo. Ithemba lethu elisekelwe eBhayibhilini lenza sisondele eduze kukaNkulunkulu njalo lenza sibone ukuthi usithanda kangakanani. Siyancedakala kakhulu nxa sigcina ithemba lethu liqinile.

17. Kungani ithemba esilalo lisenza sithokoze?

¹⁷ Encwadini umphostoli uPhawuli ayibhalela abaseRoma wathi: “Jabulani ngenxa yethemba lenu.” (Rom. 12:12) UPhawuli wayengathokoza ngoba wayeleqiniso lokuthi nxa wayengaqhubeka ethembekile wayezathola ukuphila okungapheliyo ezulwini. Lathi singathokoza ngethemba lethu ngoba sileqiniso lokuthi uJehova uzazigcwalisa izithembiso zakhe. Aliqiniso amazwi omhubi athi, ‘Uyathokoza umuntu othembele kuJehova uNkulunkulu wakhe, uNkulunkulu ozahlala ethembekile.’—Hubo. 146:5, 6.