Umnyaka ngamunye kuba labafowethu labodadewethu abasenkonzweni yesikhathi sonke abanxuswa ukuthi bangene iSikolo seGiliyadi esenzelwa eWatchtower Educational Center ePatterson, eNew York. a Isikolo lesi sifundisa abafowethu labodadewethu ukuthi bayenze kuhle kakhulu imisebenzi abalayo enhlanganisweni kaJehova. Siyabanceda ukuthi baqinise amabandla asemhlabeni wonke kanye lamawofisi egatsha.

 Isikolo seGiliyadi singenwa ngabafowethu labodadewethu abavela emazweni atshiyeneyo. Ngokwesibonelo, ikilasi yesi-147 eyenziwa ngo-2019 yayilabafundi abangu-56 ababevela emazweni angu-29. Isikolo lesi singenwa ngabafowethu labodadewethu abasebenza eBhetheli, abangababonisi beziqinti, abanali kumbe amaphayona aqakathekileyo.

 Kodwa kunengi okumele kwenziwe ukuze abafundi benelise ukuyangena isikolo lesi. Ngokwesibonelo, uHlangothi Lwezokuvakatsha Olusemawofisini Amakhulu luthengela abafundi amatikiti ezindizamtshina. Umfundi ngamunye wekilasi yesi-147 wathengelwa itikiti ngemali engamadola angaba ngu-1 075 (U.S.). Abafundi ababevela eSolomon Islands bagada izindizamtshina ezingu-4 ukuze bayefika ePatterson basebegada ezintathu sebebuyela. Uhambo lwabo lonke lwalungamakhilomitha adlula 35 400 futhi kwasetshenziswa imali engamadola angu-2 300 (U.S.) ukubhadalela umfundi ngamunye. Ukuze kongiwe imali yenhlanganiso, abakuHlangothi Lwezokuvakatsha basebenzisa uhlelo lwekhompiyutha olubanceda ukuthi bathole amatikiti atshiphileyo. Lanxa bengabambisa amatikiti lawo, uhlelo lolu luyaqhubeka ludinga amanye atshiphe ukwedlula lawo. Abanye abafowethu labodadewethu banikela ngamakhilomitha amahara abayabe bewaphiwe ngabezindizamtshina, yikho amanye amatikiti siwathenga sisebenzisa amakhilomitha lawo.

 Abafundi abanengi kuyabe kumele babe lamaviza ukuze bangene e-United States. UHlangothi Lwezomthetho Olusemawofisini Amakhulu yilo olubona ngendaba le. Kubhadalwa imali engamadola angaba ngu-510 (U.S.) ukuze umfundi ngamunye athole iviza.

 Abafowethu labodadewethu abangena isikolo lesi babancede njani abanye? Kwelinye ibandla elise-Southeast Asia kulomfowethu ongumdala okuthiwa nguHendra Gunawan futhi ebandleni labo kulendoda lomkayo abangena isikolo seGiliyadi. Uthi: “Ibandla lethu lalingela maphayona esikhathi sonke. Kodwa ngemva kokufika kwabafundi abavela eGiliyadi izinto zatshintsha. Abanye ebandleni bacina sebengamaphayona esikhathi sonke futhi ngokuhamba kwesikhathi omunye udadewethu ebandleni wangena iSikolo Sabavangeli BoMbuso.”

 USergio Panjaitan usebenza egatsheni eliseSoutheast Asia labafowethu labodadewethu abangena isikolo seGiliyadi. Uthi: “Izinto abazifundayo azincedi bona kuphela, kodwa ziyasinceda lathi. Bafunda okunengi kakhulu kodwa lokho akubenzi bazibone sebengcono kulathi. Bayasixoxela abakufundayo futhi lokhu kuyasikhuthaza njalo kusiqinise.”

 Ivela ngaphi imali yokubhadalela izindleko zesikolo lesi? Ivela eminikelweni yokusekela umsebenzi womhlaba wonke, njalo abanengi bayenza ku-donate.jw.org. Siyalibonga kakhulu ngokusekela kwenu ngeminikelo le.