IMpi Yomhlaba Yesibili yabangela umonakalo omkhulu ezindaweni ezinengi ezise-Europe. Lanxa kunjalo, okuhle yikuthi impi le yathi isiphelile oFakazi bakaJehova kanye labanye abantu nje basebekhululiwe enkambeni zokuhlukuluzwa zamaNazi. Kodwa lokhu akutsho ukuthi izinto zahle zatshelela. Abantu bakaJehova labo njengabanye babeswela ukudla, okokugqoka, indawo yokuhlala lezinye nje izinto eziqakathekileyo. Udade okuthiwa nguKarin Hartung uthi, “Abantu abanengi babengelandawo yokuhlala yikho kwakumele sihlale lezihlobo zethu besesifaka amaloja kwezinye izindlu.” Udade Gertrud Poetzinger owayesenkambeni yokuhlukuluzwa okweminyaka engu-7 lenyanga eziyisithupha wathi esekhululiwe wayahlala okwesikhathi esithile kokunye okuyindlwana okokugcinela amathuluzi futhi wayelala esitulweni. a

 Kuyini okwenziwa yinhlanganiso ukuze kuncediswe abafowethu labodadewethu ababesebunzimeni lobu? Thina sifundani kubo?

 Inhlanganiso yasukumela phezulu ukuze incedise abantu bakaJehova ababese-Europe. Umfowethu uNathan Knorr lomfowethu uMilton Henschel ababevela emawofisini ethu amakhulu bavakatshela oFakazi ababesezindaweni lezi ukuze babone ukuthi kuyini sibili ababekudinga. Kusukela ngoNovember kusiya kuDecember 1945 bavakatshela amazwe la alandelayo: i-England, iSwitzerland, iFrance, iBelgium, iNetherlands, iDenmark, iSweden, iFinland leNorway. Umfowethu uKnorr wathi, “Sizibonele ngawethu ukuthi impi idale umonakalo omkhulu kangakanani e-Europe.”

 Kodwa umfowethu uKnorr kazange aphiwe imvumo yokuthi angene eGermany ngalesosikhathi. Yikho umfowethu u-Erich Frost owayekhangela umsebenzi owenziwa egatsheni laseGermany yena waphuma elizweni wayahlangana lomfowethu uKnorr. b Umfowethu uFrost wathi: “UKnorr usitshele ezinye izinto okumele sizenze waphinda wasithembisa ukuthi kuzathunyelwa ukudla lezigqoko. Kungakayingaphi kwathunyelwa ukudla okunengi kakhulu okuhlanganisa ifulawa, amafutha okupheka, ama-oats lokunye ukudla okutshiyeneyo. Abafowethu labodadewethu bakwamanye amazwe baphinda basithumela amabhokisi amakhulu ayegcwele izigqoko ezitshiyeneyo lezicathulo.” Abafowethu labodadewathu bathaba ngesikhathi bethola izinto lezi zaze zehla ezentokozo. Omunye umbiko utshengisa ukuthi “uncedo lolu aluzange lube ngolwalesosikhathi kuphela kodwa abafowethu labodadewethu baqhubeka benikwa izinto ababezidinga okweminyaka emibili lengxenye.” c

 Izimo zathi sezingcono abafowethu labodadewethu abazange bamkhohlwe uJehova. Kuyini okwabancedayo?

 Baqhubeka besenza izinto eziphathelane lokukhonza. (Kwabase-Efesu 5:15, 16) Ngesikhathi kulempi kwakunzima ukuthi abafowethu labodadewethu bathole amabhuku adindwa yinhlanganiso lokuthi benze eminye imisebenzi ephathelane lokukhonza. Kodwa impi yathi isiphelile kwasekulula ukuthi bangene imihlangano yebandla zikhathi zonke njalo batshumayele. Umfowethu okuthiwa nguJürgen Rundel ohlala e-Austria uthi: “Inhlanganiso yasebenzisa i-Informant d kanye lababonisi abahambelayo ukuze basikhuthaze ukuthi senze izinto ezizaqinisa ukholo lwethu.” Uqhubeka esithi: “Sazinika isikhathi sokutaditsha iBhayibhili ukuze sigxilise ingqondo zethu kuJehova loJesu lasemsebenzini wokutshumayela. Kwakungelazinto ezingasiphambanisa njengama-TV.”

 Udade okuthiwa ngu-Ulrike Krolop uthi: “Ngathokoza ukuphinda ngithole ithuba lokugebha ngijule eBhayibhilini. Umkami wayeyisibonelo esihle endabeni yokutaditsha. Sasisithi singathola iNqabayokulinda entsha ahle ayekele akwenzayo aqalise ukuyibala.” UKarin esike sakhuluma ngaye uthi: “Ngesikhathi sempi sazibonela ngawethu ukuthi impahla esilayo ingaphongutshabalala masinyane nje. Kodwa iyamangalisa indlela esasithola ngayo ukudla okuqinisa ukholo. Lanxa sasingatholi amabhuku amatsha, esasilakho kwakuluqinisa ukholo lwethu. UJehova wababusisa sibili abantu bakhe.”

 Bakhuthalela ukutshumayela. (UMathewu 28:19, 20) Impi yenza kwaba nzima ukuthi abantu bakaJehova batshumayele njalo bafundise abantu iBhayibhili. Umfowethu okuthiwa nguFriedhelm uthi impi yathi isiphelile “wonke umuntu waphinda waqalisa futhi ukutshumayela.” U-Ulrike uthi: “UFakazi owaqala ukutshumayeza abangakibo bomkami wayelokhe egqoke iyunifomu yejele, okutshengisa ukuthi wahle watshumayela ephuma nje enkambeni yokuhlukuluzwa.” UJürgen uthi, “Ngemva kwempi phose wonke umuntu wayetshiseka sibili. Abasakhulayo abanengi bangena enkonzweni yesikhathi sonke.”

 U-Ulrike uthi, “Impilo yayinzima kakhulu emadolobheni ayeke abhonjwa ngesikhathi sempi.” Abantu abanengi babehlala ezakhiweni ezazingekho esimeni esihle. Manje oFakazi babebabona njani abantu laba ukuze babatshumayeze? U-Ulrike owaba nguFakazi labangakibo ngemva kwempi uthi: “Sasidinga lapho okungabe kulelayithi kumbe okuthunqa khona intuthu.”

 Babekhuthazana. (1 KwabaseThesalonika 5:11) Ngesikhathi sempi, oFakazi bakaJehova abanengi babephathwa ngesihluku. Kodwa impi yathi isiphelile baqalisa ukukhuthazana lokuqinisana kulokuthi babelokhu bezihlupha ngalokho okwakubehlele. Ukholo lwabo ‘oluhloliweyo’ lwabenza bathokoza sibili. (UJakhobe 1:2, 3) Umfowethu okuthiwa nguJohannes ohlala e-United States uthi: “Umbonisi wethu wesiqinti wayeke waba sezinkambeni zokuhlukuluzwa ezitshiyeneyo yikho wayesilandisela indlela uJehova ayebancedisa ngayo ngalesosikhathi. Kwasikhuthaza kakhulu ukuzwa imibiko le.”

 UJohannes uqhubeka esithi, ‘Okwanceda abafowethu labodadewethu ukuthi baqhubeke belokholo oluqinileyo yikukhumbula indlela uJehova ayebancedisa ngayo ezinkambeni zokuhlukuluzwa layephendula ngayo imithandazo yabo.’ Njengoba sike satsho okunye okwanceda abafowethu labodadewethu laba yikuqhubeka besenza izinto eziphathelane lokukhonza okugoqela ukubala iBhayibhili, ukungena imihlangano yebandla kanye lokutshumayela. Udadewethu okuthiwa ngu-Elisabeth owayekhona emhlanganweni wesabelo owawuseNuremberg ngo-1946 wathi, “Kwakuzikhanyela ukuthi abafowethu labodadewethu abasebekhululiwe emajele babengondlekanga kuhle. Kodwa babekhanya ukuthi bayathokoza lokuthi ‘bayavutha emoyeni’ ngesikhathi besixoxela lokho okwabehlelayo.”—KwabaseRoma 12:11.

 Abazange bazehlukanise labanye abafowethu labodadewethu. (KwabaseRoma 1:11, 12) Ngesikhathi sempi kwakungalula ukuthi oFakazi bavakatshelane ngoba lokhu kwakungabangela ukuthi bahlukuluzwe kakhulu. UKarin uthi, “Babengavakatshelani kangako ngoba babesesaba ukuthi iziphathamandla zizababona besezibabuza imibuzo eminenginengi mayelana labanye abafowethu labodadewethu.” Kodwa uhlupho lolu lwalungasekho ngesikhathi impi isiphelile. UFriedhelm uthi, “Abafowethu labodadewethu basebesenza izinto ndawonye. Babekuqakathekisa kakhulu ukungena imihlangano lokutshumayela.”

 Umfowethu okuthiwa nguDietrich ongumdala eGermany uthi, “Balutshwana kakhulu oFakazi ababelezimota ngemva kwempi yikho sasiqoqana sihambe singamaqembu nxa sisiya emihlanganweni. Ukutshona sisenza izinto ndawonye kwenza saba ngabangane sibili. Kwasekungani siyimuli.”

 Lamuhla abantu bakaJehova abanengi babekezelela ubunzima obubangelwa zingozi zemvelo, imikhuhlane, izimpi, ukuhlukuluzwa kanye lokukhwela kwezinto. (2 KuThimothi 3:1) Kodwa izinto lezi akumelanga zisikhathaze kakhulu. Ngenxa yani? Isibonelo sabafowethu labodadewethu abaphila ngesikhathi samaNazi eGermany sisitshiya singathandabuzi ukuthi uNkulunkulu wethu uzasincedisa ngesikhathi sisebunzimeni kulezinsuku zokucina. Kwangathi amazwi akhulunywa ngumphostoli uPhawuli angasiqinisa. Wathi: “Lokhu kwenza sibe lesibindi sokuthi: ‘UJehova ungumsizi wami, angisoze ngesabe. Umuntu angangenzani?’”—KumaHebheru 13:6.