UJobe 12:1-25
12 UJobe waphendula wathi:
2 “Lina yini elikwazi konke,*Kungafa lina ukuhlakanipha kuzahle kuphele!
3 Kodwa lami ngihlakaniphile.
Kalingcono kulami.
Kanti ngubani ongakwaziyo konke elikutshoyo?
4 Abangane bami bayangihleka,+Mina engibiza uNkulunkulu ngifuna angiphendule,+Bahleka umuntu olungileyo lomsulwa.
5 Umuntu ohlezi kuhle uyalweyisa uhlupho,Ucabanga ukuthi lwehlela abantu abazidubekelayo kuphela.
6 Emizini yezigebenga* kulokuthula,+Abeyisa uNkulunkulu bavikelekile,+Bahlezi kuhle labo abathwala onkulunkulu babo ngezandla.
7 Kodwa ngicela ubuze izinyamazana zizakufundisa,Ubuze lezinyoni zizakutshela.
8 Kumbe ukhangelisise umhlaba* uzakufundisa,Lenhlanzi zolwandle zizakutshela.
9 Yikuphi phakathi kwezinto lezi okungaziyo
Ukuthi kwenziwa yisandla sikaJehova?
10 Impilo yazo zonke izinto isesandleni sakhe,Lempilo yomuntu isesandleni sakhe.+
11 Indlebe ayiwahloli yini amazwi,Njengolimi lunambitha ukudla?+
12 Kanti ukuhlakanipha akutholakali ebantwini abadala yini?+
Asebephile iminyaka eminengi ayisibo yini abalokuzwisisa?
13 UNkulunkulu uhlakaniphile njalo ulamandla,+Uyazwisisa futhi uyakwenza akuhlosileyo.+
14 Nxa angadiliza ulutho kakho ongalwakha,+Lapho avale khona akulamuntu ongavula.
15 Nxa angavala izulu, konke kuyatsha,+Angalithulula kuba lezikhukhula emhlabeni.+
16 Ulamandla amakhulu njalo uhlakaniphile.+
Odukayo lodukisayo basesandleni sakhe.
17 Uyangisa abeluleki,Enze abahluleli babe yizithutha.+
18 Uqamula amaketane abotshwe ngamakhosi,+Abophe amakhosi ngebhanti ekhalweni.
19 Wehlisa abaphristi isithunzi,+Agenqule iziphathamandla.+
20 Wenza abeluleki abathenjiweyo baswele okokutsho,Aqede ukuhlakanipha kwabantu abadala.
21 Uyangisa izikhulu,+Aqede amandla ababusi.*
22 Izinto ezijulileyo ezisemnyameni uziveza egcekeni,+Akhanyise lapho okumnyama kakhulu.
23 Wenza izizwe zibe lamandla ukuze azibhubhise,Enze izizwe zikhule ukuze azisuse endaweni yazo.
24 Uqeda ukuhlakanipha kwabakhokheli babantu,Abenze bazulazule enkangala engelandlela,+
25 Baphumputhe emnyameni+ ongela ngitsho ukukhanya.
Ubenza badiyazele njengabantu abadakiweyo.+
Amabala angaphansi
^ NgesiHebheru, “Lina yini abantu.”
^ Kumbe, “Ematendeni ezigebenga.”
^ Ezinye inguqulo zithi, “ukhulume lomhlaba.”
^ NgesiHebheru, “Axegise ibhanti lalabo abalamandla.”
