UHezekheli 36:1-38
36 “Ndodana yomuntu, phrofetha ngezintaba zako-Israyeli uthi, ‘Lina zintaba zako-Israyeli, zwanini ilizwi likaJehova.
2 Nanku okutshiwo yiNkosi Enkulu uJehova: “Izitha zenu zilihlekile zathi, ‘Lezindawo eziphakemeyo* zakudala lazo sezingezethu!’”’+
3 “Ngakho phrofetha uthi, ‘Nanku okutshiwo yiNkosi Enkulu uJehova: “Bathutshe kuzo zonke izindawo balihlasela balitshabalalisa, lathathwa ngabantu bezizweni abasalayo* njalo laba yingxoxo ebantwini, baqhubeka bekhuluma kubi ngani.+
4 Yikho zwanini ilizwi leNkosi Enkulu uJehova lina zintaba zako-Israyeli! Nanti ilizwi leNkosi Enkulu uJehova eliya ezintabeni, lasemaqaqeni, lasezifudlaneni, lasezigodini, lasemanxiweni+ kanye lasemadolobheni aphundlwa impahla yawo yonke, atshiywa engelamuntu futhi eyiswa ngabantu bezizwe eziseduze abasalayo.+
5 INkosi Enkulu uJehova ithi: ‘Ngizakhuluma ngolaka oluvuthayo+ labo bonke abantu bako-Edomi kanye labantu bezizweni abasalayo. Yibo abathokoza kakhulu ngesikhathi bethatha ilizwe lami belenza elabo, bengidelela+ befuna ukuthi amadlelo alo lempahla yonke ekulo kube ngokwabo.’”’+
6 “Ngakho phrofetha ngelizwe lako-Israyeli ukhulume lezintaba, lamaqaqa, lezifula lezigodi uthi, ‘Nanku okutshiwo yiNkosi Enkulu uJehova: “Ngizakhuluma ngolaka ngithukuthele kakhulu ngoba izizwe zilenze inhlekisa.”’+
7 “Ngakho nanku okutshiwo yiNkosi Enkulu uJehova: ‘Ngifunga ngiphakamise isandla sami ngisithi abantu bezizwe ezingomakhelwane bazathwala ihlazo labo.+
8 Kodwa lina zintaba zako-Israyeli lizamila izihlahla ezizakuba lengatsha zithele izithelo ezizadliwa ngabantu bami bako-Israyeli+ ngoba sekuseduze ukuthi baphenduke.
9 Ngilani futhi ngizalinakekela. Abantu bazalima bahlanyele phezu kwenu.
10 Ngizakwenza ukuthi abako-Israyeli abahlala kini babe banengi. Amadolobho azahlala abantu,+ lamanxiwa avuselelwe.+
11 Abantu benu ngizabenza babe banengi sibili, lezifuyo zenu zande.+ Zizazalana zibe zinengi kakhulu. Ngizakwenza ukuthi lihlalwe ngabantu njengakuqala+ futhi lizaphumelela ukwedlula kudala.+ Lapho-ke lizakwazi ukuthi mina nginguJehova.+
12 Ngizakwenza abantu bami bako-Israyeli bahambe phezu kwenu futhi bahlale kini.+ Lizakuba lilifa labo njalo alisoze liphinde libathathele abantwababo.’”+
13 “Nanku okutshiwo yiNkosi Enkulu uJehova: ‘Ngenxa yokuthi bathi kuwe, “Ulilizwe eliqeda abantu futhi uthathela izizwe ezihlala kuwe abantwana,”’
14 ‘awusoze uphinde uqede abantu loba uthathele izizwe ezihlala kuwe abantwana,’ kutsho iNkosi Enkulu uJehova.
15 ‘Angisoze ngiphinde ngenze izizwe zikuthethise futhi angisoze ngiyekele abantu bekuchothoza.+ Awusoze uphinde wenze izizwe ezihlala kuwe zikhubeke,’ kutsho iNkosi Enkulu uJehova.”
16 Ilizwi likaJehova laphinda lafika kimi lisithi:
17 “Ndodana yomuntu, ngesikhathi abako-Israyeli besahlala elizweni labo, bangcolisa ilizwe+ ngezenzo zabo langendlela ababeziphatha ngayo. Izenzo zabo zazingcolile kimi njengowesifazana osesikhathini.+
18 Ngakho ngathululela ulaka lwami phezu kwabo ngenxa yokuthi babulala abantu abanengi elizweni+ futhi bangcolisa ilizwe ngezithombe zabo ezenyanyekayo.*+
19 Ngabachithachitha baya ezizweni basabalala emazweni+ njalo ngabahlulela ngokufanele izenzo zabo lokuziphatha kwabo.
20 Bathi sebefikile ezizweni lezo, abantu bangcolisa ibizo lami elingcwele+ bekhuluma ngabo besithi, ‘Laba ngabantu bakaJehova kodwa bacina besuka elizweni lakhe.’
21 Ngakho ngizalikhumbula ibizo lami elingcwele, elangcoliswa ngabantu bako-Israyeli ezizweni abaya kuzo.”+
22 “Yikho-ke khuluma labantu bako-Israyeli uthi, ‘Nanku okutshiwo yiNkosi Enkulu uJehova: “Engikwenzayo angikwenzeli lina bantu bako-Israyeli, kodwa ngikwenzela ibizo lami elingcwele elilingcolisileyo ezizweni elaya kuzo.”’+
23 ‘Ngizakwenza abantu babone sibili ukuthi ibizo lami elikhulu lingcwele,+ lelo elangcoliswa phakathi kwezizwe lingcoliswa yini. Indlela engizaliphatha ngayo izakwenza izizwe zikwazi ukuthi mina nginguJehova+ lokuthi nginguNkulunkulu ongcwele,’ kutsho iNkosi Enkulu uJehova.
24 ‘Ngizalithatha ezizweni ngiliqoqe lasemazweni wonke, besengililetha elizweni lenu.+
25 Ngizalifafaza ngamanzi ahlanzekileyo lisale lihlambulukile.+ Ngizalihlambulula kukho konke ukungcola kwenu,+ ngisuse zonke izithombe zenu ezenyanyekayo.+
26 Ngizaguqula inhliziyo zenu+ ngitshintshe lendlela elicabanga ngayo.*+ Ngizakhipha inhliziyo yelitshe+ emizimbeni yenu, ngilinike inhliziyo yenyama.*
27 Ngizafaka umoya wami ngaphakathi kwenu futhi ngizalenza lilandele imilayo yami.+ Lizalalela imithetho yami yokwahlulela njalo liyilandele.
28 Lingenza njalo lizahlala elizweni engalipha okhokho benu, libe ngabantu bami, mina ngibe nguNkulunkulu wenu.’+
29 “‘Ngizalikhulula kukho konke ukungcola kwenu. Ngizakwenza amabele abe manengi njalo angisoze ngenze ukuthi lihlaselwe yindlala.+
30 Ngizakwenza izihlahla zithele izithelo ezinengi futhi lizatshaya inala emasimini ukuze lingaphindi liyangeke phakathi kwezizwe ngenxa yokuswela ukudla.+
31 Lapho-ke lizakhumbula ukuziphatha kwenu okubi lakho konke okungalunganga elalikwenza, njalo lizazenyanya ngenxa yamacala enu lokuziphatha kwenu okwenyanyekayo.+
32 Kodwa nanku okumele likwazi: Lokhu angikwenzeli lina,’+ kutsho iNkosi Enkulu uJehova. ‘Yikho yangekani libe lenhloni ngenxa yezenzo zenu lina bantu bako-Israyeli.’
33 “Nanku okutshiwo yiNkosi Enkulu uJehova: ‘Ngelanga engizalihlambulula ngalo ezonweni zenu zonke, ngizakwenza amadolobho ahlale abantu,+ lamanxiwa avuselelwe.+
34 Ilizwe eliyinkangala futhi elibonwa ngumuntu wonke odlulayo ukuthi seliyinkangala lizalinywa.
35 Abantu bazakuthi: “Ilizwe ebeliyinkangala selinjengensimu yase-Edeni,+ lamadolobho ayetshabalalisiwe aba ngamanxiwa asevikelwe ngezinqaba futhi asehlala abantu.”+
36 Izizwe ezasalayo eziseduze lawe zizakwazi ukuthi mina Jehova sengikwakhile lokho okwakudilikile, ngahlanyela kutsha elizweni elaseliyinkangala. Mina Jehova sengikhulumile njalo sengikwenzile lokhu.’+
37 “Nanku okutshiwo yiNkosi Enkulu uJehova: ‘Ngizavumela abantu bako-Israyeli bangicele ukuthi ngibandise babe banengi angathi ngumhlambi wezimvu njalo ngizakwenza lokho.
38 Amadolobho angamanxiwa azagcwala abantu+ kube angathi ngumhlambi wabangcwele, umhlambi weJerusalema* ngezikhathi zemikhosi.*+ Lapho-ke bazakwazi ukuthi mina nginguJehova.’”
Amabala angaphansi
^ Khangela iNgcazelo Yamabala.
^ Kumbe, “abasindayo.”
^ Ibala lesiHebheru elisetshenziswe lapha lingabe lihambelana lebala elitsho ubulongwe futhi lisetshenziswa nxa kukhulunywa ngento enyanyisayo.
^ NgesiHebheru, “Ngizalinika inhliziyo entsha njalo ngifake umoya omutsha ngaphakathi kwenu.”
^ Lapha kutshiwo inhliziyo ephangisa ukwamukela lokho uNkulunkulu akutshoyo.
^ Ezinye inguqulo zithi, “kube angathi yimihlambi yezimvu zokunikela eJerusalema.”
^ Kumbe, “zamadili.”
