IHubo 89:1-52
Imaskili.* Ihubo lika-Ethani+ um-Ezra.
89 Ngizahlabela ngendlela uJehova atshengisa ngayo ukuthi ulothando oluqotho kuze kube phakade.
Ngizakhuluma ngokuthembeka kwakho ngikwenze kwaziwe ezizukulwaneni zonke.
2 Phela ngathi: “Uthando oluqotho luzahlala kuze kube nini lanini,+Ukuthembeka kwakho ukumise kwaqina emazulwini.”
3 “Ngenze isivumelwano lokhethiweyo wami,+Ngifunge kuDavida inceku yami ngathi:+
4 ‘Ngizakwenza izizukulwane+ zakho zihlale zikhona kuze kube nini lanini,Ngizakwenza isihlalo sakho sobukhosi sihlale sikhona izizukulwane ngezizukulwane.’”+ (Selah)
5 Amazulu ayakudumisa ngenxa yezimanga zakho, awu Jehova,Ngenxa yokuthembeka kwakho ebandleni labangcwele.
6 Kambe ngubani esingamqathanisa loJehova emazulwini?+
Ngubani phakathi kwamadodana kaNkulunkulu+ onjengoJehova?
7 UNkulunkulu uyesatshwa futhi uyahlonitshwa emhlanganweni wabangcwele,+Mkhulu njalo uyamangalisa kubo bonke abamgombolozeleyo.+
8 Jehova Nkulunkulu wamabutho,Ngubani olamandla njengawe, awu Jah?+
Uthembekile kukho konke.+
9 Ubusa phezu kolwandle olulolaka,+Lapho amagagasi alo alamandla ephakama, wena uyawathulisa.+
10 Umchobozile uRahabi+ wafanana lomuntu obuleweyo.+
Ngengalo yakho elamandla, wenze izitha zakho zasabalala.+
11 Amazulu ngawakho lomhlaba ngowakho,+Ilizwe kanye lakho konke okukulo+ kwadalwa nguwe.
12 Wadala inyakatho leningizimu,IThabhori+ leHemoni+ kudumisa ibizo lakho ngentokozo.
13 Ulengalo elamandla,+Isandla sakho silamandla,+Isandla sakho sokudla siphakeme.+
14 Ukulunga lokwahlulela kuhle kuyisisekelo sesihlalo sakho sobukhosi,+Uthando oluqotho lokuthembeka kumi phambi kwakho.+
15 Bayajabula abantu abamemeza ngentokozo bekudumisa.+
Awu Jehova, bahamba ekukhanyeni kobuso bakho.
16 Usuku lonke bayathokoza ngenxa yebizo lakho,Bayaphakanyiswa ngenxa yokulunga kwakho.
17 Uyinkazimulo yabo lamandla abo,+Njalo amandla ethu aba makhulu ngenxa yokuthi uyasamukela.+
18 Ihawu lethu livela kuJehova,Inkosi yethu ivela koNgcwele ka-Israyeli.+
19 Ngalesosikhathi watshengisa abaqotho bakho umbono, wathi kubo:
“Nginike iqhawe amandla,+Lowo engimkhethe phakathi kwabantu sengimphakamisile.+
20 Sengithole uDavida inceku yami,+Ngamgcoba ngamafutha angcwele.+
21 Isandla sami sizamsekela,+Lengalo yami izamqinisa.
22 Asikho isitha esizambhadalisa umthelo,Njalo akulamuntu ongalunganga ozamcindezela.+
23 Ngizachoboza izitha zakhe phambi kwakhe,+Ngibulale abamzondayo.+
24 Ngizathembeka kuye ngimtshengise uthando oluqotho,+Uzakuba lamandla amakhulu ngenxa yebizo lami.
25 Isandla sakhe ngizasibeka* phezu kolwandle,Isandla sakhe sokudla ngisibeke phezu kwemifula.+
26 Uzakuthi kimi: ‘UnguBaba,UnguNkulunkulu wami leDwala lami elingisindisayo.’+
27 Ngizamenza abe lizibulo,+Abe phezu kwawo wonke amakhosi asemhlabeni.+
28 Ngizakuba lothando oluqotho kuye kuze kube phakade,+Njalo isivumelwano sami laye asisoze siphele.+
29 Ngizakwenza izizukulwane zakhe zihlale kuze kube nini lanini,Ngizakwenza isihlalo sakhe sobukhosi sihlale kuze kube phakade njengamazulu.+
30 Nxa amadodana akhe angatshiya umthetho wami,Angalandeli izahlulelo zami,*
31 Nxa angephula izimiso zami,Angagcini imilayo yami,
32 Ngizawajezisa ngomqwayi+ ngenxa yokungalaleli* kwawo,Ngiwatshaye ngenxa yecala lawo.
33 Kodwa angisoze ngiyekele ukuba lothando oluqotho kuye,+Ngizasigcwalisa isithembiso sami.
34 Angisoze ngisephule isivumelwano sami+Kumbe ngitshintshe lokho engikukhulume ngomlomo wami.+
35 Ngifunge ngobungcwele bami,Ngifunge kanye angisoze ngiphinde.
Ngeke ngitshele uDavida amanga.+
36 Izizukulwane zakhe zizahlala kuze kube nini lanini.+
Isihlalo sakhe sobukhosi sizahlala sikhona phambi kwami njengelanga.+
37 Sizamiswa siqine, sihlale kuze kube phakade njengenyanga,Engufakazi othembekileyo esibhakabhakeni.” (Selah)
38 Kodwa wena umlahlile wamtshiya,+Umthukuthelele ogcotshiweyo wakho.
39 Ususikhalele isivumelwano owasenza lenceku yakho,Uwulahlele phansi umqhele wakhe wawungcolisa.
40 Uyidilizile yonke imiduli yakhe yamatshe,Watshiya inqaba zakhe zingamanxiwa.
41 Bonke abadlulayo bathumbe impahla yakhe,Useyinhlekisa kubomakhelwane bakhe.+
42 Wenze izitha zakhe zanqoba,*+Lalabo abamzondayo bajabula.
43 Inkemba yakhe uyiphendukisile,Awumvumelanga ukuthi anqobe empini.
44 Wenze inkazimulo yakhe yaphela,Waphosela isihlalo sakhe sobukhosi emhlabathini.
45 Wenze insuku zobutsha bakhe zaba zimfitshane,Wamembesa ngehlazo.
(Selah)
46 Uzazifihla kuze kube nini Jehova? Kuze kube phakade?+
Ulaka lwakho luzaqhubeka luvutha njengomlilo yini?
47 Khumbula ukuthi ngiphila isikhathi esifitshane kangakanani!+
Kanti abantu wabadala ungahlosanga lutho yini?
48 Ukhona yini umuntu ongaphila engafi?+
Ukhona yini ongasindisa impilo yakhe ukuze angayi engcwabeni? (Selah)
49 Awu Jehova, lungaphi uthando oluqotho owawulalo kuqala,Owafunga ukuthi uzalutshengisa uDavida ngenxa yokuthi wena uthembekile?+
50 Khumbula awu Jehova, ukuthi izinceku zakho zichothozwa njani.
Khumbula indlela engibekezelela ngayo ukuchothozwa yizizwe zonke.
51 Awu Jehova izitha zakho ziyathethisa,Zichothoza konke okwenziwa ngogcotshiweyo wakho.
52 UJehova kadunyiswe kuze kube nini lanini. Ameni, Ameni.+
Amabala angaphansi
^ Khangela iNgcazelo Yamabala.
^ Kumbe, “Ngizakwenza abe lamandla.”
^ Kumbe, “imilayo yami.”
^ Kumbe, “yokuhlamuka.”
^ NgesiHebheru, “Uphakamise isandla sokudla sezitha zakhe.”
