Eyesibili EyamaKhosi 7:1-20
7 U-Elisha wathi, “Lalelani ilizwi likaJehova. Nanku okutshiwo nguJehova: ‘Kusasa ngalesisikhathi egedini leSamariya* iseya* eyodwa yefulawa ecolekileyo izathengiswa ngeshekheli* eyodwa, futhi amaseya amabili ebhali azathengiswa ngeshekheli eyodwa.’”+
2 Umphathi webutho owayethenjwa yinkosi waphendula umuntu kaNkulunkulu weqiniso wathi: “Lanxa uJehova engavula amagedi ezimpophoma zasezulwini, kambe into enjalo ingenzakala?”+ Yena wamphendula wathi: “Uzakubona ngamehlo akho+ kodwa awusoze ukudle.”+
3 Kwakulamadoda amane ayelobulephero ayehlala egedini ledolobho.+ Amadoda la akhuluma wodwa athi: “Kanti sihlaleleni sizaze sifele khonapha?
4 Nxa singangena edolobheni, sizafela khona njengoba indlala ingaka edolobheni.+ Nxa singaqhubeka sihlezi lapha sizakufa futhi. Yikho asambeni enkambeni yamaSiriya. Nxa angasiyekela angasibulali sizaqhubeka siphila kodwa angasibulala siyabe sifile.”
5 Ngakho kwathi sekumnyama asuka ayangena enkambeni yamaSiriya. Athi efika enkambeni athola kungelabantu.
6 UJehova wayebangele ukuthi amabutho eSiriya ayesenkambeni azwe umsindo wezinqola zempi lamabhiza kanye lomsindo webutho elikhulu,+ asetshelana athi: “Inkosi yako-Israyeli ithenge amakhosi amaHithi lamakhosi eGibhithe ukuthi azosihlasela!”
7 Yikho ahle asukuma abaleka kumnyama ukuze asindise impilo zawo, atshiya amatende awo, lamabhiza, labobabhemi lenkamba yonke injengoba injalo.
8 Amadoda ayelobulephero athi efika enkambeni yamaSiriya angena kwelinye itende adla futhi anatha. Athatha isiliva legolide lezembatho ayazifihla. Aphinda abuyela afika angena kwelinye itende abutha impahla ahamba ayayifihla.
9 Amadoda la acina esithi: “Lokhu esikwenzayo akulunganga. Leli lilanga lezindaba ezinhle! Nxa singathula kuze kuse sizajeziswa. Yikho asambeni siyebika esigodlweni senkosi.”
10 Ngakho ahamba afika amemeza abalindi begedi ledolobho athi kubo: “Besiye enkambeni yamaSiriya kodwa asitholanga muntu futhi asizwanga lizwi lomuntu. Bekulamabhiza labobabhemi bebotshelwe njalo amatende abetshiywe enjengoba enjalo.”
11 Abalindi bamagedi bathi bekuzwa lokho bamemeza, umbiko wayafika esigodlweni senkosi.
12 Inkosi yahle yavuka ebusuku yathi ezincekwini zayo: “Ngicela ukulitshela lokho amaSiriya azama ukukwenza. Ayakwazi ukuthi siyalamba,+ yikho asuke enkambeni ayacatsha egangeni ecabanga ukuthi sizaphuma edolobheni abe esesibamba angene edolobheni.”+
13 Enye inceku yenkosi yathi: “Asithumeni amanye amadoda, athathe amabhiza amahlanu phakathi kwalawo asele edolobheni, ahambe ayebona. Phela lamadoda lawo azacina efile njengoba nje bonke abantu abaseleyo edolobheni bezakufa. Azakufa njengabo bonke abako-Israyeli asebefile.”
14 Ngakho athatha inqola ezimbili zempi ezidonswa ngamabhiza, inkosi yasiwathuma enkambeni yamaSiriya yathi kuwo: “Hambani liyebona.”
15 Izithunywa zawalandela amaSiriya zaze zayafika kuJodani. Indlela yonke yayigcwele impahla lezembatho ezazilahlwe ngamaSiriya ayephaphatheka ebaleka. Izithunywa zasezibuyela edolobheni zayabikela inkosi.
16 Ngakho abantu baphuma bayabutha impahla enkambeni yamaSiriya. Iseya eyodwa yefulawa ecolekileyo yathengiswa ngeshekheli eyodwa futhi amaseya amabili ebhali athengiswa ngeshekheli eyodwa, njengoba nje uJehova wayetshilo.+
17 Inkosi yathi umphathi webutho eyayimthemba alinde egedini kodwa abantu bamnyathela waze wafa, njengoba nje umuntu kaNkulunkulu weqiniso wayetshilo enkosini ize ifike kuye.
18 Kwenzakala njengoba nje umuntu kaNkulunkulu weqiniso wayetshilo enkosini. Wayethe: “Kusasa ngalesisikhathi amaseya amabili ebhali azathengiswa ngeshekheli eyodwa futhi iseya eyodwa yefulawa ecolekileyo izathengiswa ngeshekheli eyodwa egedini leSamariya.”+
19 Kodwa umphathi webutho wayephendule umuntu kaNkulunkulu weqiniso wathi: “Lanxa uJehova engavula amagedi ezimpophoma zasezulwini, kambe into enjalo ingenzakala?” U-Elisha yena wamphendula wathi: “Uzakubona ngamehlo akho kodwa awusoze ukudle.”
20 Lokhu yikho kanye okwenzakala kuye, abantu bamnyathela waze wafa egedini.
Amabala angaphansi
^ Kumbe, “emamakethe eSamariya.”
^ Iseya yayilingana lamalitha angu-7,33. Khangela iSengezo ku-B14.
^ Ishekheli yayilingana lamagremu angu-11,4. Khangela iSengezo ku-B14.
