Eyesibili EyamaKhosi 5:1-27
5 Kwakulendoda okwakuthiwa nguNamani eyayiyinduna yebutho leSiriya. Indoda le yayilodumo futhi ihlonitshwa layinkosi yayo ngoba uJehova wenza amaSiriya anqoba esebenzisa yona. UNamani wayeliqhawe elilesibindi kodwa wayelobulephero.
2 Ngelinye ilanga amaSiriya athi ehlasela ko-Israyeli athumba intombazana encane. Intombazana le yaba yisisebenzi somkaNamani.
3 Yatshela umkaNamani yathi: “Nxa inkosi yami ingayabona umphrofethi+ oseSamariya, uzayelapha ubulephero bayo.”+
4 Okwakukhulunywe yintombazana yako-Israyeli kwafika endlebeni zenkosi.
5 Ngakho inkosi yeSiriya yathi kuNamani: “Hamba, mina ngizabhalela inkosi yako-Israyeli incwadi.” Yikho uNamani wahamba ethwele amathalenta* esiliva alitshumi lenhlamvu zegolide ezingu-6 000 kanye lezembatho ezilitshumi.
6 Wafika wanika inkosi yako-Israyeli incwadi eyayibhalwe ukuthi: “Ngikuthumele incwadi le kanye loNamani inceku yami ukuze umelaphe ubulephero.”
7 Inkosi yako-Israyeli yathi iqeda nje ukubala incwadi le, yadabula izembatho zayo yathi: “Kanti mina nginguNkulunkulu yini ukuthi sengingaba lamandla okubulala lawokwenza umuntu aqhubeke ephila?+ Phela inkosi yeSiriya ithumele umuntu lo kimi isithi ngimelaphe ubulephero! Lani liyazibonela ukuthi idinga ukulwa lami.”
8 Kodwa u-Elisha umuntu kaNkulunkulu weqiniso wathi esizwa ukuthi inkosi idabule izembatho zayo, wahle wathumela ilizwi kuyo wathi: “Kungani udabule izembatho zakho? Mtshele abuye kimi ukuze akwazi ukuthi kulomphrofethi ko-Israyeli.”+
9 Ngakho uNamani waya ku-Elisha lamabhiza akhe lezinqola zakhe zempi wafika wama phambi komnyango wendlu ka-Elisha.
10 Kodwa u-Elisha wathumela isithunywa kuye sayamtshela sathi: “Hamba uyegeza kasikhombisa+ emfuleni uJodani.+ Ungenza njalo, inyama yakho izavuselelwa uhlambuluke.”
11 UNamani wathi esizwa lokho wazonda wasuka wahamba esithi: “Mina bengizitshela ukuthi uzabuya afike ame phambi kwami abize ibizo likaJehova uNkulunkulu wakhe, ahambahambise isandla sakhe lapho okulobulephero khona angelaphe.
12 Imifula yeDamaseko+ u-Abhana loFariphari kayingcono yini kulayo yonke imifula yako-Israyeli? Bengingeke ngiyegeza kuyo ngihlambuluke yini?” Yikho watshibilika wahamba ethukuthele.
13 Izinceku zakhe zasondela kuye zathi: “Baba, aluba umphrofethi ubekutshele ukuthi wenze into engajayelekanga ubungeke uyenze yini? Pho kwehlulani njengoba ethe kuwe, ‘Hamba uyegeza uhlambuluke’?”
14 Ngakho wahamba wayacwila emfuleni uJodani kasikhombisa njengoba nje umuntu kaNkulunkulu weqiniso wayetshilo.+ Wahle wahlambuluka,+ inyama yakhe yavuselelwa yaba butshelezi njengeyomfana omncane.+
15 Ngemva kwalokho wabuyela emuntwini kaNkulunkulu weqiniso+ lazo zonke izinceku zakhe ayehamba lazo. Wafika wama phambi kwakhe wathi: “Khathesi sengikwazi ukuthi akulaNkulunkulu kwenye indawo emhlabeni ngaphandle kwako-Israyeli.+ Yikho ngicela uthathe isipho lesi inceku yakho ekupha sona.”
16 Kodwa u-Elisha wathi: “Ngifunga ngoJehova uNkulunkulu ophilayo engimkhonzayo,* ngeke ngisithathe.”+ UNamani wamncenga ukuthi asithathe kodwa yena waqhubeka esala.
17 Ekucineni uNamani wathi: “Nxa ungafuni ukuthatha isipho lesi, ngicela ungivumele ngithathe inhlabathi elizweni leli engathwalwa zimbongolo* ezimbili, ngoba mina nceku yakho angisoze ngiphinde ngenze umhlatshelo wokutshiswa kumbe nginikele kwabanye onkulunkulu. Ngizanikela kuJehova kuphela.
18 Kodwa nanku engicela ukuthi uJehova angixolele kukho: Nxa inkosi yami isiya endlini kaRimoni* ukuthi iyekhothama khona, ibambelela engalweni yami, yikho lami kumele ngikhothame endlini kaRimoni. Ngakho loba nini lapho engizakhothama khona endlini kaRimoni, ngicela uJehova angithethelele.”
19 U-Elisha wasesithi kuye: “Hamba ngokuthula.” UNamani wathi esesukile kuye futhi esehambe umango,
20 uGehazi+ inceku ka-Elisha umuntu kaNkulunkulu weqiniso,+ wathi enhliziyweni yakhe: ‘Inkosi yami iyekele uNamani umSiriya+ wahamba ingathathanga abuye lakho. Ngifunga ngoJehova uNkulunkulu ophilayo, ngizagijima ngimlandele ngiyekuthi anginike okunye.’
21 Yikho uGehazi wamlandela uNamani. UNamani wathi ebona kulomuntu ogijimayo emlandela wehla enqoleni yakhe wamhlangabeza wathi: “Konke kuhamba kuhle?”
22 UGehazi waphendula wathi: “Konke kuhamba kuhle. Inkosi yami ingithumile yathi ngikutshele ukuthi sekufike amajaha amabili evela emadodaneni abaphrofethi ahlala ezintabeni zako-Efrayimi. Yikho ithe icela uwanike ithalenta lesiliva elilodwa lezembatho ezimbili.”+
23 UNamani wathi: “Thatha amathalenta amabili.” Waqhubeka emncenga ukuthi athathe+ amathalenta esiliva amabili, wasewagoqela wawafaka ezikhwameni ezimbili. Wafaka lezembatho ezimbili, wasesithi izinceku zakhe zimthwalele. Izinceku zasezithwala zahamba phambi kukaGehazi.
24 Bathi befika e-Ofeli,* uGehazi wathatha izinto lezo ezincekwini zikaNamani wazifaka endlini, wasesithi izinceku lezo zibuyele. Zathi sezihambile,
25 uGehazi waya ku-Elisha wafika wama eceleni kwakhe. U-Elisha wathi kuye: “Uvela ngaphi Gehazi?” Yena waphendula wathi: “Inceku yakho ayizange iye ndawo.”+
26 U-Elisha wasesithi: “Ucabanga ukuthi angikwazi yini ukuthi ulandele indoda leyana lokuthi iyehle enqoleni yayo yakuhlangabeza? Kambe lesi yisikhathi sokwamukela isiliva, lezigqoko, lensimu zama-oliva, lensimu zamagilebisi, lezimvu, lenkomo kanye lezinceku lezincekukazi?+
27 Ubulephero bukaNamani+ sebuzanamathela kuwe lasezizukulwaneni zakho kuze kube nini lanini.” UGehazi wahle wasuka phambi kuka-Elisha eselobulephero, esemhlophe nke njengongqwaqwane.+
Amabala angaphansi
^ Ithalenta lalingamakhilogremu angu-34,2. Khangela iSengezo ku-B14.
^ NgesiHebheru, “engima phambi kwakhe.”
^ Imbongolo yinyamazana ezalwa libhiza lobabhemi.
^ Kumbe, “ethempelini likaRimoni.”
^ I-Ofeli kwakuyindawo eseSamariya. Kwakungabe kuluqaqa kumbe inqaba.
