UNkulunkulu weqiniso unguMdali wezinto zonke. Kazange abe lesiqalo njalo kasoze abe lesiphetho. (IHubo 90:2) Izindaba ezinhle ezitholakala eBhayibhilini zivela kuye. (1 Thimothi 1:11) Kumele sikhonze uNkulunkulu kuphela ngoba nguye owasinika ukuphila.​—Bala iSambulo 4:11.

Akula muntu owake wabona uNkulunkulu ngenxa yokuthi unguMoya. Mkhulu kakhulu kulezinye izidalwa eziphila emhlabeni. (Johane 1:18; 4:24) Loba kunjalo singenelisa ukwazi ubuntu bukaNkulunkulu ngokukhangela izinto azidalileyo. Ngokwesibonelo, imihlobo etshiyeneyo yezithelo lamaluba isitshengisa uthando lwakhe lenhlakanipho yakhe. Ubukhulu bamazulu lomhlaba kusitshengisa amandla akhe.​—Bala uRoma 1:20.

Kulokunengi njalo esingakufunda ngobuntu bukaNkulunkulu ngokubala iBhayibhili. Ngokwesibonelo, lisitshela ukuthi uNkulunkulu uthandani lokuthi uzondani, ukuthi ubaphatha njani abantu lokuthi wenzani nxa abantu benze okuhle loba okubi.​—Bala iHubo 103:7-10.

UJesu wathi: “Baba wethu osezulwini, malihlonitshwe ibizo lakho.” (Mathewu 6:9) Lanxa uNkulunkulu elamabizo okuhlonipha amanengi, ulebizo elilodwa. Libizwa ngendlela etshiyeneyo kundimi ngayinye. EsiNdebeleni libizwa kuthiwa ‘nguJehova.’​—Bala iHubo 83:18.

Ibizo likaNkulunkulu selikhitshiwe emaBhayibhilini amanengi kwafakwa amabizo okuhlonipha athi Nkosi kumbe Nkulunkulu. Kodwa kwathi kubhalwa iBhayibhili lalitholakala izikhathi ezingu-7 000.  UJesu wenza abantu babalazi ibizo likaNkulunkulu lapho ebafundisa.​—Bala uJohane 17:26.

Bukela ividiyo ethi UNkulunkulu Ulebizo Yini?

Ukuhlupheka okugcwele indawo yonke kutsho ukuthi uJehova nguNkulunkulu ongelandaba lathi yini? Abanye abantu bathi usenza sihlupheke ukuze asilinge, kodwa lokhu kakusilo qiniso.​—Bala uJakhobe 1:13.

UNkulunkulu wenze abantu baba lesithunzi ngokubanika ilungelo lokuzikhethela. Kumele sibonge ngelungelo esilalo lokuzikhethela ukukhonza uNkulunkulu. (Joshuwa 24:15) Kodwa abantu abanengi bakhetha ukwenza izinto ezimbi kwabanye abantu, yikho ukuhlupheka kukunengi kangaka. Kuyamdanisa uJehova ukubona ububi obunjalo.​—Bala uGenesisi 6:5, 6.

UJehova unguNkulunkulu olendaba lathi. Ufuna sithole intokozo empilweni. Sekuseduze ukuthi asuse ukuhlupheka lalabo abakubangelayo. Kodwa okwakhathesi ulesizatho esihle sokuvumela ukuhlupheka ukuthi kube khona okwesikhatshana. Kusifundo 8 sizafunda ukuthi siyini leso sizatho.​—Bala u-2 Phetro 2:9; 3:7, 13.

UJehova usinxusa ukuthi sisondele kuye ngokukhuluma laye ngomthandazo. Uthanda munye ngamunye wethu. (IHubo 65:2; 145:18) Uzimisele ukusithethelela. Uyananzelela ukuthi siyazama ukumthokozisa lanxa kwezinye izikhathi sisehluleka. Yikho-ke lanxa silesono, singenelisa ukuba lobuhlobo obuseduze loNkulunkulu.​—Bala iHubo 103:12-14; uJakhobe 4:8.

Kumele sithande uJehova ukwedlula loba ngubani ngoba nguye osinike ukuphila. (Makho 12:30) Njengoba utshengisa ukuthi uyamthanda uNkulunkulu ngokufunda okunengi ngaye lokwenza lokho akutshoyo, uzasondela kakhulu kuye.​—Bala u-1 Thimothi 2:4; u-1 Johane 5:3.