1. UJesu wayecabanga ngani ngobusuku obandulela ilanga abulawa ngalo?

UJESU wayelabafundi bakhe ngobusuku obandulela ilanga ayezabulawa ngalo. Wayekwazi ukuthi wayesezabatshiya njalo wayecabanga ngekusasa labo. Wabatshela wathi: “Kalisibo abomhlaba.” (UJohane 15:19) Wakhuleka kuYise wathi: “Kabasibo bomhlaba, njengoba lami ngingasiwawo.” (UJohane 17:15, 16) Wayesitshoni uJesu?

2. Yiwuphi ‘umhlaba’ uJesu ayekhululuma ngawo?

² Evesini le ibala elithi ‘umhlaba’ litsho abantu abangenzi lokho okufunwa nguNkulunkulu futhi ababuswa nguSathane. (UJohane 14:30; Kwabase-Efesu 2:2; UJakhobe 4:4; 1 UJohane 5:19) Singenzani ukuze singabi ‘ngabomhlaba’? Singakwenza ngezindlela lezi ezilandelayo: Ukuhlala siqotho eMbusweni kaNkulunkulu lokungangeneli kwezombusazwe. Ukuxwaya umoya womhlaba. Ukugqoka lokuzilungisa ngendlela elesithunzi. Ukuba lombono ofaneleyo ngemali kanye lokufaka isihlangu esipheleleyo sikaNkulunkulu.​—Khangela Amabala Asekucineni 16.

3. UJesu wangenela yini kwezombusazwe?

³ Ngesikhathi uJesu esemhlabeni wananzelela ukuthi abantu abanengi babe lezinhlupho futhi ukuphila kwabo kwakunzima. Wayelendaba labantu futhi wayefuna ukubanceda. Kodwa lokhu kwamenza waba ngumkhokheli wezombusazwe yini? Hatshi. Wayekwazi ukuthi uMbuso kaNkulunkulu yiwo kuphela ozanceda abantu. UJesu wayezakuba yiNkosi yoMbuso lowo futhi yiwo ayetshumayela ngawo kakhulu. (UDanyeli 7:13, 14; ULukha 4:43; 17:20, 21) UJesu kazange athathe angenele kwezombusazwe. Ngesikhathi ephambi kombusi weRoma uPhontiyu Philathu, wathi: ‘UMbuso wami kawusiwo walo umhlaba.’ (UJohane 18:36) Labafundi bakaJesu abazange bangenele kwezombusazwe. Ibhuku elithi On the Road to Civilization lithi amaKhristu akuqala awazange angenele kwezombusazwe. Lanamuhla amaKhristu eqiniso enza okufananayo. Kasingeneli kwezombusazwe kodwa sisekela uMbuso kaNkulunkulu.​—UMathewu 24:14.

4. AmaKhristu eqiniso awusekela njani uMbuso kaNkulunkulu?

⁴ Abameli bamazwe abangeneli kwezombusazwe emazweni abasebenzela kuwo. AmaKhristu agcotshiweyo asesimeni esifananayo. Umphostoli uPhawuli wabhalela abagcotshiweyo wathi: “Singabameli bakaKhristu.” (2 KwabaseKhorinte 5:20) AmaKhristu agcotshiweyo amela uhulumende kaNkulunkulu. Awangeneli kwezombusazwe. (KwabaseFiliphi 3:20)  Esikhundleni salokho asencede abantu abanengi kakhulu ukuthi bafunde ngohulumende kaNkulunkulu. “Ezinye izimvu” ezilethemba lokuphila emhlabeni zisekela abagcotshiweyo futhi lazo kazingeneli kwezombusazwe. (UJohane 10:16; UMathewu 25:31-40) Kusegcekeni ukuthi amaKhristu eqiniso kawangeneli kwezombusazwe.​—Bala u-Isaya 2:2-4.

5. Yisiphi isizathu esenza amaKhristu angayi empini?

⁵ AmaKhristu eqiniso ayimuli yinye futhi amanyene kungelani lokuthi avela kuliphi ilizwe. (1 KwabaseKhorinte 1:10) Yikho awayi empini ukuze angabulalani, lokhu akwenza elandela umlayo kaJesu othi athandane. (UJohane 13:34, 35; 1 UJohane 3:10-12) Okunye okwenza angayi empini yikuthi uJesu wathi athande izitha zawo.​—UMathewu 5:44; 26:52.

6. AmaKhristu eqiniso atshengisa njani ukuthi ayabahlonipha ohulumende?

 ⁶ Lanxa singangeneli kwezombusazwe, sisebenza nzima ukuthi sibe yizizalwane ezinhle. Ngokwesibonelo sitshengisa ukuthi siyabahlonipha ohulumende ngokulalela imithetho yelizwe kanye lokubhadala imithelo. Kodwa siba leqiniso lokuthi sinika ‘uNkulunkulu okungokukaNkulunkulu.’ (UMakho 12:17; KwabaseRoma 13:1-7; 1 KwabaseKhorinte 6:19, 20) “OkungokukaNkulunkulu” kugoqela ukuthi simthande, simlalele njalo simkhonze. Sizimisele ukulalela uJehova kuze kube sekufeni.​—ULukha 4:8; 10:27; bala ImiSebenzi 5:29; uRoma 14:8.

7, 8. Uyini “umoya wasemhlabeni” futhi wenza abantu babe njani?

⁷ Kumele sixwaye “umoya wasemhlabeni” nxa sifuna ukuhlala sehlukene lomhlaba kaSathane. Nxa kukhulunywa ngomoya wasemhlabeni kuyabe kutshiwo indlela abantu abacabanga ngayo labenza ngayo. Umoya lo uvela kuSathane futhi ukhanya ebantwini abangamkhonziyo uJehova. Kodwa amaKhristu ayawuxwaya umoya lo. Umphostoli uPhawuli wathi: “Kasamukelanga umoya wasemhlabeni kodwa umoya ovela kuNkulunkulu.”​—1 KwabaseKhorinte 2:12; Kwabase-Efesu 2:2, 3; khangela Amabala Asekucineni 17.

⁸ Umoya wasemhlabeni wenza abantu bangabi lendaba labanye, bazigqaje futhi bahlamuke. Ubenza bacabange ukuthi akumelanga balalele  uNkulunkulu. USathane ufuna abantu bazenzele umathanda futhi bangacabangi ngempumela yezenzo zabo. Ufuna abantu bacabange ukuthi ukusuthisa izinkanuko zabo yikho okuqakatheke kakhulu. (1 UJohane 2:16; 1 KuThimothi 6:9, 10) USathane usebenza nzima ezama ukudukisa abantu bakaJehova.​—UJohane 8:44; ImiSebenzi 13:10; 1 UJohane 3:8.

9. Ungaqalisa njani umoya wasemhlabeni?

⁹ Umoya wasemhlabeni ugcwele yonke indawo. Kumele sisebenze nzima ukuze siwuxwaye umoya lo. (Bala iZaga 4:23.) Ungaqalisa ngezindlela eziphansi njengokuba lemicabango efanana leyabantu abangamkhonziyo uJehova. (IZaga 13:20; 1 KwabaseKhorinte 15:33) Okunye okungatshengisa ukuthi sesilomoya lo yikubukela iphonografi, ukuzwanana labahlamuki kumbe ukuthanda ezemidlalo ngendlela edlulisa amalawulo.​—Khangela Amabala Asekucineni 18.

10. Singalwisana njani lomoya wasemhlabeni?

¹⁰ Pho singalwisana njani lomoya wasemhlabeni? Kumele silalele uJehova futhi sihlale siseduze laye. Kumele sikhuthale ekumkhonzeni njalo sihlale sithandaza sicela umoya ongcwele. UJehova ulamandla ukudlula loba ngubani yikho asithandabuzi ukuthi uzasincedisa ukuthi silwisane lomoya wasemhlabeni.—1 UJohane 4:4.

11. Umoya womhlaba wenza abantu bagqoke njani?

¹¹ Sitshengisa ukuthi kasisibo bomhlaba ngendlela esigqoka njalo sizilungise ngayo. Abantu abanengi  emhlabeni bagqokela ukubukwa ngabantu, ukwenza abanye bacabange ngezemacansini, ukutshengisa ukuthi balemali kumbe ukutshengisa ukuthi kabahloniphi muntu. Ikanti abanye abalandaba lokuthi bakhangeleka njani. Bahlala bengcolile futhi begqoke amanikiniki. Akumelanga silandele indlela abantu bomhlaba lo abagqoka njalo bazilungise ngayo.

12, 13. Yiziphi izimiso ezingasinceda nxa sikhetha esizakugqoka?

¹² Njengoba siyizikhonzi zikaJehova kumele  sihlale sihlanzekile njalo sigqoke kuhle. Kanti njalo kufanele sigqoke izigqoko ezihambelana lalapho esiyabe sikhona. IBhayibhili lithi nxa ‘sigqoka okuhle lokufaneleyo’ siyabe sitshengisa ukuthi ‘sikhonza uNkulunkulu.’​—1 KuThimothi 2:9, 10; UJuda 21.

¹³ Indlela esigqoka ngayo ingenza abantu badumise loba beyise uJehova labantu bakhe. Sifuna ukuthi ‘loba yini esiyenzayo, siyenzele udumo lukaNkulunkulu.’ (1 KwabaseKhorinte 10:31) Ukuzithoba kugoqela lokuhlonipha abanye. Yikho nxa sikhetha izigqoko kumbe indlela esifuna ukukhangeleka ngayo, kumele sicabange ngokuthi esikukhethayo kuzabaphatha njani abanye.​—1 KwabaseKhorinte 4:9; 2 KwabaseKhorinte 6:3, 4; 7:1.

14. Yiphi imibuzo okumele sizibuze yona nxa sikhetha esizakugqoka emihlanganweni lasekutshumayeleni?

¹⁴ Ngigqoka njani nxa ngisiya emihlanganweni yethu loba ekutshumayeleni? Ngifuna abantu bangibuke yini? Indlela engigqoka ngayo yenza abanye babe lenhloni yini? Ngiyalalela yini nxa abanye bengikhuza ngendlela engigqoka ngayo? (KwabaseFiliphi 4:5; 1 UPhetro 5:6) Sonke siyafuna ukubukeka kuhle, kodwa kumele sikhumbule ukuthi okuqakatheke kakhulu kuJehova yikuba lobuntu obuhle. Ubuntu obunjalo ‘buligugu elikhulu emehlweni kaNkulunkulu.’​—1 UPhetro 3:3, 4.

15. Kungani uJehova engasitsheli ukuthi sigqokeni?

¹⁵ UJehova kasinikanga imithetho yezinto okumele sizigqoke lokungamelanga sizigqoke. Kodwa usinike izimiso zeBhayibhili ezingasinceda ukuthi sikhethe  kuhle. (KumaHebheru 5:14) Ufuna senze izinqumo ezitshengisa ukuthi siyamthanda lokuthi siyabathanda abanye. (Bala uMakho 12:30, 31.) Abantu bakaJehova bagqoka ngezindlela ezitshiyeneyo kusiya ngamasiko abo kumbe ukuthi bathandani. Indlela abagqoka ngayo inhle futhi iyathokozisa.

16. Indlela abantu bomhlaba lo ababona ngayo imali itshiyene njani lokwafundiswa nguJesu? Yiphi imibuzo okumele sizibuze yona?

¹⁶ USathane ufuna abantu bacabange ukuthi imali lenotho yikho okungabenza bathokoze kodwa izikhonzi zikaJehova ziyakwazi ukuthi lokhu  akusiqiniso. Siyawathemba amazwi kaJesu athi: “Isiqokoqela sempilo yomuntu asikho ebunengini benotho yakhe.” (ULukha 12:15) Imali kayisenzi sibe lentokozo yeqiniso. Kayisenzi sithole ukuphila okungapheliyo, ukuhlaliseka kanye labangane beqiniso. Kulezinto esizidingayo empilweni futhi siyakufuna ukukholisa impilo. Kodwa uJesu wasifundisa ukuthi okuzasenza sithokoze yikuba lobuhlobo obuhle loNkulunkulu lokuqakathekisa ukukhonza. (UMathewu 5:3; 6:22) Ngakho zibuze imibuzo le: ‘Umbono wami ngemali usunjengowabantu bomhlaba lo yini? Ngihlala ngikhuluma ngemali yini kumbe ngicabanga ngayo?’​—ULukha 6:45; 21:34-36; 2 UJohane 6.

17. Impilo yethu izakuba njani nxa singaxwaya ukuthanda imali?

¹⁷ Nxa singaqakathekisa ukukhonza futhi sixwaye ukuthanda imali sizathokoza. (UMathewu 11:29, 30) Sizasuthiseka futhi sihlaliseke engqondweni lasenhliziyweni. (UMathewu 6:31, 32; KwabaseRoma 15:13) Kasisoze sizikhathaze ngokuba lezinto ezinengi empilweni. (Bala u-1 Thimothi 6:9, 10.) Sizathokoziswa yikupha. (ImiSebenzi 20:35) Nxa singaxwaya ukuthanda imali sizakuba lesikhathi sokuba lalabo esibathandayo futhi silale ubuthongo obumnandi.​—UmTshumayeli 5:12.

18. USathane uzama ukwenzani?

¹⁸ Kumele senze konke okusemandleni ethu ukuze sivikele ubuhlobo bethu loJehova ngoba uSathane uzama ukubuqeda. Silwisana “lamabutho emimoya  emibi.” (Kwabase-Efesu 6:12) USathane lamadimoni akhe abafuni sithokoze kumbe ukuthi sithole ukuphila okungapheliyo. (1 UPhetro 5:8) Izitha lezi zilamandla kodwa uJehova angasinceda ukuthi sinqobe.

19. U-Efesu 6:14-18 usichasisa njani “isihlangu” somKhristu?

¹⁹ Endulo amasotsha ayegqoka izigqoko zokuthi azivikele ngesikhathi esilwa. Yikho lathi kumele sigqoke “isihlangu” loba izigqoko zokuzivikela esizinikwe nguJehova. (Kwabase-Efesu 6:13) Isihlangu lesi kukhulunywa ngaso ku-Efesu 6:14-18 othi: ‘Ngakho manini liqine, ibhanti leqiniso libotshelwe ekhalweni lwenu, lesihlangu sasesifubeni esokulunga sisendaweni yaso, lezinyawo zenu zigqokiswe zalungiselelwa ngokuvela evangelini lokuthula. Phezu kwakho konke lokhu, thathani ihawu lokukholwa elizacitsha ngalo yonke imitshoko evuthayo yomubi. Thathani ingowane yokusindiswa lenkemba yomoya, eyilizwi likaNkulunkulu. Khulekani ngomoya ezikhathini zonke ngezinhlobo zonke zemikhuleko lezicelo. Ngalokhu qaphelani liqhubeke kokuphela libakhulekela bonke abangcwele.’

20. Kumele senzeni ukuze sizivikele kuSathane?

²⁰ Nxa isotsha lingahlomanga laphelela kuba lula ukuthi linqotshwe yisitha. Yikho lathi kumele sihlale sihlome saphelela ukuze sizivikele kuSathane. USathane lamadimoni akhe bazaqhubeka besihlasela kuze kube yisikhathi abazasuswa ngaso emhlabeni. (ISambulo 12:17; 20:1-3) Akumelanga sikhalale nxa silwisana lezifiso ezimbi kumbe ubuthakathaka esilabo.​—1 KwabaseKhorinte 9:27.

21. Ngubani ongasinceda ukuthi simnqobe uSathane?

 ²¹ UJehova nguye kuphela ongasinceda ukuthi simnqobe uSathane. Kumele sikhuleke kuye, sibale iLizwi lakhe futhi singene imihlangano yebandla ukuze sihlale sithembekile. (KumaHebheru 10:24, 25) Ukwenza lokhu kuzasinceda ukuthi sihlale siqotho kuNkulunkulu.

22, 23. (a) Kuyini okungasisiza ukuthi sihlale sikulungele ukuvikela ukholo lwethu? (b) Sizaxoxa ngani esahlukweni esilandelayo?

²² Kumele sihlale sikulungele ukuvikela ukholo lwethu. (UJohane 15:19) Kulezinye izindaba lapho oFakazi bakaJehova abalombono otshiyene lowabanye. Ngakho zibuze imibuzo le: ‘Ngiyakuzwisisa yini okwenza umbono wethu ngendaba ethile utshiyane lowabanye? Ngiyakukholwa yini ukuthi lokho okutshiwo liBhayibhili kanye lenceku ethembekileyo lehlakaniphileyo kuliqiniso? Ngiyaziqhenya yini ngokuba nguFakazi kaJehova? (IHubo 34:2; UMathewu 10:32, 33) Ngiyenelisa yini ukuchasisela abanye engikukholwayo?’​—UMathewu 24:45; UJohane 17:17; bala u-1 Phetro 3:15, 16.

²³ Ezimeni ezinengi kuyacaca okumele sikwenze ukuze sihlale sehlukene lomhlaba kodwa kwezinye izimo kuyabe kungacaci. USathane uzama ukusithiya ngezindlela ezitshiyeneyo. Okunye akusebenzisayo ngezokuzilibazisa. Kuyini okungasinceda ukuthi sikhethe kuhle ezokuzilibazisa? Sizabona esahlukweni esilandelayo.