Pampa sapanoa chikauak okiauik, oatemik Europa Central itech metstli junio, xiuitl 2013. Itech ueyi altepetl Hungría, kanin opanok aueyatl Danubio ompa sapanoa omoskalti atl, amo keman ijkon opanoaya.

Pampa omonekiaya totoka ma tlapaleuikan, Ministerio de Recursos Humanos okitlajtlanki itech Kali kanin tekitij iTlaixpantijkauan Jehová pampa ma tlapaleuikan uan amo okachi ma tlaijtlako aueyatl. Ik non, nin kali okinyole nochi tlanechikolmej tlen katej ik itech aueyatl Danubio ma tlapaleuikan ijkon ken tekiuajkej okijtokej.

Nochi tlanechikolmej kuali otlapaleuijkej. Uan itech okseki tonalmej, kanaj 1,000 iTlaixpantijkauan Jehová tlen uitsej itech 72 tlanechikolmej otlapaleuijkej pampa okapantijkej aueyatl. Okinmiluijkej ma kimotlalilikan se tarjeta tlen okijtoaya ITlaixpantijkauan Jehová uan noijki okijkuilojkej intoka uan itech tlen ueyi altepetl oualayaj.

Itech se ueyi altepetl, se tlakatl tlen tekiti itech Cruz Roja Húngara okilui se tlanechikol: “Timechtlasojkamatiliaj uan timechtlakaitaj, pampa amo nochipa tikinmitaj tlaltikpaktlakamej san sekan katej uan tlapaleuiaj ken namejuan, maski uejka onanualajkej. Niyolpaki nikijtos namejuan onankitemakakej kuali neskayotl itech nin ueyi altepetl”.

Okse tlakatl tlen kinyekanaj akinmej tlapaleuiaj ijkuak panoa se tlaxixinilistli uan poui itech Parlamento de Hungría, okititlanki se amatlajkuilol itech Kali kanin tekitij iTlaixpantijkauan Jehová pampa kintlasojkamatilis kuali otlapaleuijkej.