Religiones amo san se tlamantli tlamachtiaj. Itech Biblia kijtoua toTajtsin Dios amo okipaktiaya ken okiueyichiuayaj sekimej. Ma tikitakan ome tlamantli.

Achto: Akinmej kinueyichiuaj teotsitsintin

 Biblia kijtoua tla tikinueyichiuaj teotsitsintin amo techpaleuis (Jeremías 10:3-5; 16:19, 20). Jehová okilui altepetl Israel: “San ne nimoDios amo xikinpia teotsitsintin” (Éxodo 20:3, 23; 23:24). a Ijkuak israelitas opejkej kinueyichiuaj oksekimej teotsitsintin, Jehová okualanki (Números 25:3; Levítico 20:2; Jueces 2:​13, 14).

 ToTajtsin Dios amo kipatla ken mokuayejyekoua, ye amo kipaktia ma kinueyichiuakan teotsitsintin (1 Corintios 8:5, 6; Gálatas 4:8). Akinmej kinekij kiueyichiuaskej toTajtsin Dios, kinmiluia ayakmo ma kichiuakan tlen kichiuaj religiones tlen san tlakajkayauaj. Biblia kijtoua: “Xikinkakajtewakah, iwa ayakmó inwah ximonelokah” (2 Corintios 6:14-17). Tla nochtin religiones techpaleuiskiaj ma timouikakan iuan toTajtsin Dios, ¿tleka technauatia nin tlamantli?

Ome: Akinmej amo kiueyichiuaj toTajtsin Dios ken ye kipaktia

 Jehová amo okipakti ijkuak israelitas opejkej kinueyichiuaj teotsitsintin uan opejkej kichiuaj ken religión tlen amo melauak (Éxodo 32:8; Deuteronomio 12:2-4). Jesús okijto teopixkej amo okiueyichiuayaj toTajtsin Dios ken ye kipaktia, porque san omotaya okichiuayaj tlen kuali pero okipiayaj ome inmixko, ik non, Jesús okijto: “Mach [amo] nonkichiwah tlan okachi weyi kijtosneki inawak Dios, kemi xiyeknemikah, xiteiknomatikah iwa xikneltokakah Dios” (Mateo 23:23).

 Religión tlen moyekana ika tlen kijtoua Biblia techpaleuia ma timouikakan iuan toTajtsin Dios (Juan 4:24; 17:17; 2 Timoteo 3:16, 17). Pero religión tlen tlamachtia tlen amo melauak, san kichiua amo ma timouikakan iuan toTajtsin Dios. Sekimej kijtouaj Biblia techmachtia onka se Trinidad, ok tiyoltokej ijkuak tiixpoliuij uan techtlajyouiltiaj ijtik tlitl. Pero non amo melauak, ijkon tlamachtiaj para ma kinueyichiuakan teotsitsintin. Non tlamantli amitlaj ipati porque san kichiuaj tlen oksekimej tlamachtiaj uan amo kichiuaj tlen toTajtsin Dios kineki (Marcos 7:7, 8).

 ToTajtsin Dios kikokolia religión tlen tlamachtia tlen amo melauak (Tito 1:​16). Tla tiknekij religión ma techpaleui ma timouikakan iuan toTajtsin Dios, amo san moneki titlakuikaskej noso tikchiuaskej seki tlamantli, moneki ma tikchiuakan tlen ye kipaktia. Biblia techiluia: “Tla ikaj mokuayejyekoua kuali kiueyichijtok toTajtsin Dios uan amo kinauatia inenepil, san kikajkayajtok iyolo uan iueyichiualis amitlaj ipati. Ueyichiualistli tlen chipauak uan amo sokio ijkon ken kita toTajtsin Dios kijtosneki: tikinmaluiskej akinmej iknomej uan siuamej itech intlajyouilis tlen yomikik innamik, uan amo ma timosokiotikan ika tlen onka itech Tlaltikpak” (Santiago 1:​26, 27, TNM). Biblia La palabra de Dios para Todos kitokayotia “religión tlen melauak” akinmej kiueyichiuaj toTajtsin Dios ken kineki.