Kema, tlen kijtoua Biblia noijki ijkon kijtouaj ixtlamatkej, maski Biblia amo okichijchijkej para ma techmachti tlen kijtouaj ixtlamatkej. Ma tikitakan tlen kijtoua Biblia. Timomachtiskej tlen kijtouaj ixtlamatkej noijki ijkon kijtoua Biblia maski ijkuak omoijkuilo miakej okineltokayaj okse tlamantli.

•   Ikaj okichijchi semanauak (Génesis 1:1). Yiuejkika miakej okijtouayaj semanauak san omoyektlalijtiaj uan amo ikaj okichijchi. Akinmej ochantiayaj Babilonia okineltokayaj dioses okiskej ijtik ome ueyi atl uan yejuan okichijchijkej semanauak. Uan sekimej okineltokayaj semanauak okiski ijtik se ueyi teksistli noso totoltetl.

•   Semanauak okiyektlalijkej para kuali ma tekiti (Job 38:33; Jeremías 33:25). Miakej kineltokaj titlajyouiaj porque itlaj techpanotikisa noso porque sekimej dioses techtlajyouiltiaj.

•   Tlaltikpak amitlaj itech mokitskijtok (Job 26:7). Yiuejkika okijtouayaj tlaltikpak patlauak uan itlaj ipan mokitskijtok.

•   Kajki aueyatl porque kiaui, uetsi setl uan tesiui (Job 36:27, 28; Eclesiastés 1:7; Isaías 55:10; Amós 9:6). Griegos omokuayejyekouayaj omeyaya aueyatl porque kajki ueyi atl ijkon okineltokayaj hasta siglo XVIII.

•   Seki tepemej yikin mochijtiuij uan okseki tlen axkan katej okatkaj itlampa atl (Salmo 104:6, 8). Sekimej mokuayejyekouaj tepemej okinchijchijkej dioses uan hasta axkan ijkon katej.

•   Tla tichipauakej, amo timokokoskej. Tlanauatil tlen okijkuilo Moisés okijtouaya tla israelitas okikitskiayaj se mikatl noso se yolkatl tlen yomik, omonekiaya maltiskej. Noijki ompa okijtouaya tla ikaj omokokouaya uan uelis kinmajxiltiskia oksekimej, omonekiaya kisekantiskej uan noijki omonekiaya kitlalpachoskej kuitlatl (Levítico 11:28; 13:1-5; Deuteronomio 23:13). Pero egipcios okimotlaliliayaj kuitlatl para ika mopajtiskiaj.

 Sekimej kijtouaj Biblia amo mouika iuan tlen kimatij ixtlamatkej. Pero tla timomachtiskej Biblia, tikitaskej amo melauak tlen kijtouaj. Ma tikitakan tlen kijtouaj ixtlamatkej uan tikitaskej kox melauak.

 Sekimej kijtouaj: Biblia kijtoua okichijchijkej semanauak san itech chikuase tonal tlen kipia 24 horas.

 Tlen melauak: Biblia kiteititia toTajtsin Dios okichijchi semanauak yiuejkika (Génesis 1:1). Biblia amo kijtoua keski ouejka se tonal ijkuak otlachijchi toTajtsin Dios ken kijtoua Génesis capítulo 1. Génesis 2:4 kijtoua ‘toTajtsin Dios okichijchi tlaltikpak uan iluikak’. Nochi tlen ouejka kitokayotia “tonal”.

 Sekimej kijtouaj: Biblia kijtoua achto okichijchijkej xiuitl pero tla amo onka tonaltsin xiuitl amo moskaltiskia (Génesis 1:11, 16).

 Tlen melauak: Biblia kijtoua achto kichijchiuaskia xiuitl, ‘toTajtsin Dios okichi iluikak’ uan ompa kajki tonaltsin (Génesis 1:1). Itech achto “tonal” noso ijkuak otlachijchi toTajtsin Dios, tonaltsin amo chikauak okitlauiliaya tlaltikpak. Maski amo tikmatij keski ouejka “tonal” eyi ijkuak toTajtsin Dios otlachijchi, ijkuakon okachi yotlamotaya uan ijkon tonaltsin yokitlauiliaya tlaltikpak uan yiueliskia moskaltiskia xiuitl (Génesis 1:3-5, 12, 13). Satepan desde ipan tlaltikpak yomotaya tonaltsin (Génesis 1:16).

 Sekimej kijtouaj: Biblia kijtoua tonaltsin kiyaualojti tlaltikpak.

 Tlen melauak: Eclesiastés 1:5 kijtoua: “Tonaltsin kisa uan kalaki, ijkuakon oksepa san niman mokopa ik kanin kisa”. Nikan kijtoua ijkuak tikitaj tonaltsin molinijti miakej kijtouaj “tonaltsin kisa uan kalaki” pero tikmatokej tlaltikpak kiyaualojti tonaltsin.

 Sekimej kijtouaj: Biblia kijtoua tlaltikpak patlauak.

 Tlen melauak: Ualeua Biblia kijtoua kanin tlami tlaltikpak, non kijtosneki “itech nochi tlaltikpak”, amo kijtosneki tlaltikpak patlauak uan kipia kanin tlami (Hechos 1:8) Noijki ijkuak Biblia kijtoua naui inakastlan tlaltikpak, kijtosneki nochi tlaltikpak. Axkan non tikixmatij ken ik kanin kisa tonaltsin, ik kanin motlatia, norte uan sur (Isaías 11:12; Lucas 13:29).