TLAMACHTIL TLEN IKA PEUA | ¿TLEN TECHPANOA IJKUAK TIMIKIJ?
Akinmej yomikej kinyolitiskej. ¿Tleka tikneltokaj kinyolitiskej akinmej yomikej?
Miakej amo kineltokaj kinyolitiskej akinmej yomikej. Pero tlatitlanil Pablo amo ijkon omokuayejyekoaya, ye okijto: “Tla tikneltokah ke Cristo techpalewia sanwel ijkuak tiyolitokeh itech nin tlaltíkpaktli, timiálmasteh iwa okachi amitla topatih innawak nochteh n tlaltikpaktlakah. De milajka, ¡Cristo omikki iwa omoyoliti! Ye omochi Akin achto omoyoliti para ayakmó mikkis. Axa kuali tikmatokeh, akimeh yomikkeh, moyolitiskeh” (1 Corintios 15:19, 20). Pablo kuali okimatiaya kinyolitiskej akinmej yomikej. ¿Tleka ijkon okineltokaya? Iyolitilis Jesús okipaleui ma kineltoka kinyolitiskej akinmej yomikej (Hechos 17:31). * Pablo okijto itech Jesús “Ye omochi Akin achto omoyoliti para ayakmó mikkis”, Jesús ye akin achto okiyolitijkej pampa kipias yolilistli tlen amo keman tlamis. Ik non, tla Jesús ye akin achto okiyolitijkej, kijtosneki oksekimej noijki kinyolitiskej.
Job okilui toTajtsin Dios: “Tikneki tikitas tlen otikchijchi ika momauan”. (Job 14:14, 15)
Noijki tikneltokaj kinyolitiskej akinmej yomikej pampa toTajtsin Dios “amo tlakajkayawa” (Tito 1:2). Ye amo keman techkajkayaua nion amo keman kichiuas. Ik non, ¿uelis kijtos toTajtsin Dios kinyolitis akinmej yomikej uan kiteititis kipia chikaualistli pampa kichiuas uan amo kichiuas tlen yokijto? Amo uelis ijkon panos.
Jehová sapanoa kintlasojtla tlaltikpaktlakamej, ik non, kinyolitis akinmej yomikej. “Tla se tlakatl miki, ¿uelis oksepa moyolitis?” Ijkon omotlajtlani Job. “Tinechnotsas, uan ne nimitsnankilis. Tikneki tikitas tlen otikchijchi ika momauan” (Job 14:14, 15). Job kuali okimatiaya toTajtsin Dios kineki kiyolitis. ¿Ok kineki kichiuas toTajtsin Dios? Biblia kijtoa toTajtsin Dios amo kipatla iyelis (Malaquías 3:6). Kema, toTajtsin Dios kineki kinyolitis akinmej yomikej pampa ma yolpakikan miak. Ijkon ken kineki kichiuas se teta tlen omikik se ikone. Pero toTajtsin Dios amo san kineki kinyolitis akinmej yomikej, ye kipia chikaualistli pampa ijkon kichiuas (Salmo 135:6).
Mikilistli sapanoa tetlajyouiltia, pero toTajtsin Dios kimati ken kitlajtlamis
Jehová kimakas chikaualistli iKone pampa kinyolitis akinmej yomikej, non kinyolpaktis akinmej moyolkokoaj pampa kinekij kinmitaskej inkalchanejkauan noso inyolikniuan tlen yomikej. Uan Jesús ijkon kineki kichiuas. ¿Ken tikmatij? Achto kiyolitiskia Lázaro, “Jesús ochokak” pampa okinmitak ken sapanoa omoyolkokoayaj iikniuan Lázaro uan iyolikniuan (Juan 11:35). Itech okse tonal, “ijkuak Toteko okitak [se] iknosiwatl” tlen omikik itelpoch, “okiknoma” uan okilui: “Ayakmó xichoka”. Ijkuakon okiyoliti itelpoch non iknosiuatl (Lucas 7:13). Ninmej tlapoualismej kiteititiaj Jesús sapanoa moyolkokoa ijkuak ikaj miki. Ik non, ¡sapanoa yolpakis ijkuak kinmitas ken yolpakiskej nochtin tlaltikpaktlakamej, ijkuak ye kinyolitis akinmej yomikej!
¿Yomikik ikaj akin tejuatsin otiktlasojtlaya? Uelis timokuayejyekoa nochi tlami ika mikilistli. Pero amo ijkon: toTajtsin Dios kinyolitis akinmej yomikej uan yokimakak nin tekitl iKone. Xikilnamiki toTajtsin Dios kineki ompa xiyeto pampa tikinselis mokalchanejkauan noso moyolikniuan tlen kinyolitiskej. Ximokuayejyeko inmiuan tiyetos nochipa uan nankichiuaskej miak tlamantli. Uan nochipa san sekan nanyetoskej.
Lionel, tlen itech otimotlapouijkej ijkuak otipejkej, kijtoa: “Ijkuak onechiluijkej kinyolitiskej akinmej yomikej, amo okachi onikneltokaya, onimokuayejyekoaya san okijtoayaj tlen amo melauak. Pero satepan onikitak itech Biblia melauak tlen okijtoayaj. ¡Oksepa nikneki nikitas nokojkol!”.
¿Mitspaktiskia tikmatis okachi? ITlaixpantijkauan Jehová ika miak pakilistli mitsmachtiskej ika Biblia tleka kineltokaj kinyolitiskej akinmej yomikej. *
^ párr. 3 Itech amochtli La Biblia... ¿la Palabra de Dios, o palabra del hombre?, páginas 78 a 86, tlen kichijchiuaj iTlaixpantijkauan Jehová, moijtoa seki tlamantli tlen kiteititia Jesús melauak okiyolitijkej.
^ párr. 9 Xikita tlamachtil 7 itech amochtli ¿Tlen melauak tlamachtia Biblia?, tlen kichijchiuaj iTlaixpantijkauan Jehová.
