1. ¿Tleka moneki timoapolaktis?

 ¿TIKTLASOJTLA Jehová tlen mitsmaka yolilistli uan mitsmaka miak tlamantli para xipaki? ¿Tikneki tikteititis tiktlasojtla? Uelis ijkon tikteititis tla ixpan timotemakas uan timoapolaktis. Tipouis iuan ifamilia Jehová ijkuak ijkon tikchiuas. Ye yetos moteko, moTajtsin uan moyolikni. Noijki mitsyekanas uan mitsmaluis (Sal. 73:24; Is. 43:​1, 2). Satepan uelis nochipa tiyoltos tla timotemakas ixpan Jehová uan timoapolaktis (1 Ped. 3:21).

2. ¿Tlen timomachtiskej?

² Xamo itlaj mitstsakuilia tlen amo mitskauilia ximoapolakti. Pero amo ximotekipacho porque amo san te ijkon mitspanoua. Miakej noijki ijkon yokinpanok. Pero okipatlakej innemilis uan ayakmo mokuayejyekouaj ijkon ken achto okichiuayaj. Satepan omoapolaktijkej uan axkan pakij kitekichiuiliaj Jehová. Axkan tikitaskej ken mitspaleuis tlen okichijkej sekimej tokniuan tlen omoapolaktijkej achto siglo. Tikitaskej tlen okixnamikej uan ken mitspaleuis tlen okichijkej.

OMOAPOLAKTIJKEJ AKINMEJ OCHANTIAYAJ SAMARIA

3. ¿Tlen okixnamikej akinmej ochantiayaj Samaria?

³ Ijkuak Jesús okatka nikan tlaltikpak, sekimej tlen ochantiayaj Samaria okipiayaj se religión uan yejuan ochantiayaj ik ompa Siquem uan Samaria tlen kajki ik norte ompa Judea. Yejuan okineltokayaj san makuili amochmej okatka iTlajtol toTajtsin Dios. San okineltokayaj Génesis, Éxodo, Levítico, Números uan Deuteronomio uan xamo noijki okixmatiayaj  amochtli Josué. Pero omonekiaya okachi kixmatiskej iTlajtol toTajtsin Dios tla okinekiayaj moapolaktiskej. Yejuan okimatiayaj tlen kijtoua Deuteronomio 18:​18, 19 porque okichiayaj Mesías (Juan 4:25). Ikinon omonekiaya kineltokaskej Jesús ye Mesías tlen omoijto ualaskia uan “miakej tlen ochantiayaj Samaria okineltokakej Jesús” (Juan 4:39). Xamo sekimej tlen ochantiayaj Samaria okinchikoitayaj judíos ikinon omonekiaya kipatlaskej ken omokuayejyekouayaj (Luc. 9:​52-54).

4. Ijkon ken kijtoua Hechos 8:​5, 6, 14, ¿tlen okichijkej akinmej ochantiayaj Samaria ijkuak Felipe okintlapoui?

⁴ ¿Tlen okinpaleui mamoapolaktikan akinmej ochantiayaj Samaria? Sekimej “okineltokakej iTlajtol toTajtsin Dios” ijkuak Felipe “opejki kitematiltia akin Cristo” (xiktlajtolti Hechos 8:​5, 6, 14). Akinmej ochantiayaj Samaria okikakej Felipe maski ye okatka judío. Xamo okinmilnamikej seki versículos tlen kijtouaj toTajtsin Dios amo techikoita (Deut. 10:​17-19). Amo kuali tikmatij tleka ijkon okichijkej pero “miakej kuali okikakiayaj Felipe ijkuak okintlapouiaya” akin Cristo. Noijki okineltokakej toTajtsin Dios okititlanki Felipe porque okinpajti akinmej omokokouayaj uan okinkixti ejekamej (Hech. 8:7).

5. ¿Tlen mitsmachtia tlen okichijkej akinmej ochantiayaj Samaria?

⁵ Akinmej ochantiayaj Samaria uelis kijtoskiaj amo momachtiskiaj porque Felipe okatka judío noso porque yejuan amo keman okikakiayaj tlen otlamachtiaya. Pero yejuan amo ijkon okijtojkej. Yejuan san niman omoapolaktijkej ijkuak okajsikamatkej Felipe melauak otlamachtiaya iTlajtol toTajtsin Dios. Biblia kijtoua: “Miakej tlakamej uan siuamej omoapolaktijkej porque okineltokakej tlen okintlapoui Felipe. Ye okinmatilti kuali tlajtoli itech iTekiuajkayo toTajtsin Dios uan okinmatilti itoka Jesucristo” (Hech. 8:12). ¿Tikneltoka melauak tlen kijtoua iTlajtol toTajtsin Dios? ¿Tikneltoka iTlaixpantijkauan Jehová motlasojtlaj ijkon ken Jesús okijto motlasojtlaskiaj idiscípulos? (Juan 13:35). Ikinon amo ximomojti timoapolaktis. Noijki xikilnamikto Jehová mitsteochiuas.

6. ¿Tlen mitsmachtia tlen okichi Ruben?

⁶ Ruben omoskalti ompa Alemania uan akinmej pouij itech ifamilia kitekichiuiliaj Jehová. Ijkuak okatka telpochtli omotlajtlaniaya kox melauak kajki toTajtsin Dios. ¿Tlen okipaleui makineltoka melauak kajki toTajtsin Dios? Ye okitak amo okachi okimatiaya tlen kijtoua Biblia ikinon opejki okachi momachtia. Ye okijto: “Opejki nimomachtia Biblia porque omonekiaya nikmatis tlen melauak uan tlen amo melauak. Noijki miak uelta onimomachti kanin tiuitsej”. Ye okitlajtolti amochtli ¿Existe un Creador que se interese por nosotros? uan non okipaleui okachi matlaneltoka. Noijki okijto: “Nikilnamiki onikijto: ‘Jehová melauak kajki’”. Noijki Ruben otlachiato ompa Betel kanin kinyekanaj iTlaixpantijkauan Jehová. Omotlajtlachialti ijkuak okitak nochtin tokniuan kuali mouikaj. Ijkuak omokopki Alemania omoapolakti uan ijkuakon okipiaya 17 xiuitl. Tejuatsin noijki uelis titlatemos itech amatlajkuilolmej tlen tikinpiaj tla ok timotlajtlania kox melauak kajki toTajtsin Dios, kox melauak tlen tlamachtia Biblia uan okseki tlamantli. Non mitspaleuis kuali xikmati tlen tikneltokaj (Efes. 4:​13, 14). Okachi timouikas inuan tokniuan ijkuak tikmatis nochtin motlasojtlaj, san sekan kitekichiuiliaj Jehová ipan nochi tlaltikpak uan noijki kanin timonechikoua.

 OMOAPOLAKTI SAULO TLEN OUALAYA TARSO

7. ¿Tlen omonekiaya kichiuas Saulo tla okinekiaya moapolaktis?

⁷ Matikitakan tlen okichi Saulo tlen oualaya Tarso. Ye omomachti intlanauatiluan judíos uan okintlaniliaya judíos porque okatka okachi ixtlamatki (Gál. 1:​13, 14; Filip. 3:5). Ijkuakon akinmej okatkaj judíos okijtouayaj tokniuan okixnamikiayaj toTajtsin Dios. Ikinon Saulo okintlajyouiltiaya tokniuan. Ye omokuayejyekouaya ijkon okichiuaya tlen kineki toTajtsin Dios (Hech. 8:3; 9:​1, 2; 26:​9-11). Pero tlajyouiskia tla kineltokaskia Jesús uan tla okinekiaya moapolaktis.

8. (1) ¿Tlen okipaleui Saulo mamoapolakti? (2) Ijkon ken kijtoua Hechos 22:​12-16, ¿ken okipaleui Ananías mamoapolakti Saulo? (Noijki xikita dibujo).

⁸ ¿Tlen okipaleui Saulo mamoapolakti? Saulo ayakmo otlachixki ijkuak Jesús okiualnotski desde iluikak (Hech. 9:​3-9). Eyi tonal amo otlakua. Xamo san omokuayejyekojtoka tlen okipanok. Okajsikamatki Jesús ye okatka Mesías uan okajsikamatki tokniuan okatkaj itech religión kanin amo tlakajkayauaj. Noijki xamo okikuejsouaya itlalnamikilis porque ye noijki kuali okitak makimiktikan Esteban (Hech. 22:20). Opanok eyi tonal uan se discípulo tlen itoka Ananías okitato Saulo. Ye kualtsin okitlapoui, okichi oksepa matlachia uan okilui mamoapolakti (xiktlajtolti Hechos 22:​12-16). Saulo okatka yolyamanki, okikak Ananías uan omoapolakti (Hech. 9:​17, 18).

9. ¿Tlen mitsmachtia tlen okichi Saulo?

⁹ Techmachtia miak tlamantli tlen okipanok Saulo. Uelis kijtoskia amo moapolaktis porque ye omoueyinekiaya noso kijtoskia omomojtiaya. Pero ye amo omoueyineki nion omomojti. Okatka yolyamanki uan okipatlak inemilis uan ijkon opejki kichiua ken Cristo (Hech. 26:​14, 19). Ye opejki kichiua ken Cristo maski okimatiaya kitlajyouiltiskej (Hech. 9:​15, 16; 20:​22, 23). Ijkuak omoapolakti okachi okineltokak Jehová kipaleuiskia porque kixnamikiskia miak tlamantli  (2 Cor. 4:​7-10). Xamo tikixnamikis miak tlamantli ijkuak timoapolaktis noso titlajyouis pero amo xikilkaua amo tika moselti. Jehová uan Jesús nochipa mitspaleuiskej uan mouan yetoskej (Filip. 4:13).

10. ¿Ken mitspaleuia tlen okipanok Anna?

¹⁰ Matikitakan tlen okipanok Anna tlen chanti ompa Europa ik kanin kisa tonaltsin. Ijkuak imama omoapolakti, ye opejki momachtia Biblia ijkuak okipiaya chiknaui xiuitl. Ipapa okikauili mamomachti maski ye amo omomachtiaya. Ye uan ifamiliares san sekan ochantiayaj. Yejuan okimatkej omomachtiaya Biblia iuan iTlaixpantijkauan Jehová ikinon opejki kiluiaj amo ijkon makichiua. Ifamiliares kineltokaj tepinati tla kikauaskej inreligión tlen kinkajteuiliaj inuejkatatajuan. Ijkuak Anna okipiaya 12 xiuitl, omotlapoui iuan ipapa uan okilui okinekiaya moapolaktis. Ipapa okitlajtlani kox ikaj okinauati mamoapolakti noso ineuian okipejpenki ijkon kichiuas. Ana okilui ipapa: “Ne niktlasojtla Jehová”. Ikinon ipapa okilui uelis moapolaktiskia. Ifamiliares Anna ok okipinauiayaj uan okitoktijkej miak tlamantli ijkuak omoapolakti. Se ifamiliar okilui: “Okachi kuali tiyetoskia tla tiauilnemiskia uan tla titlachichinaskia”. ¿Tlen okipaleui Anna matlaxiko? Ye okijto: “Jehová onechmakak chikaualistli. Noijki onechpaleuijkej miak nopapa uan nomama”. Anna okijkuilo ken yokipaleui Jehová uan ualeua kojpauia para amo kilkauas. Tejuatsin noijki xikilnamikto Jehová mitspaleuis tla timomojtia mitstlajyouiltiskej (Heb. 13:6).

OMOAPOLAKTI CORNELIO

11. ¿Tleka Cornelio uelis kijtoskia amo moapolaktiskia?

¹¹ Axkan matikitakan tlen okichi Cornelio. Ye okinyekanaya 100 soldados romanos (Hech. 10:1). Ye oueyititoka itech ialtepe porque okinyekanaya soldados. Biblia kijtoua Cornelio “okinpaleuiaya akinmej amitlaj okipiayaj” (Hech. 10:2). Jehová okititlanki apóstol Pedro makitlapouiti kuali tlajtoli. ¿Tlen okichi Cornelio? ¿Omoapolakti maski oueyititoka?

12. ¿Tlen okipaleui Cornelio mamoapolakti?

¹² ¿Tlen okipaleui Cornelio mamoapolakti? Biblia kijtoua “Cornelio uan ifamilia okiueyichiuayaj toTajtsin Dios” uan ye “nochipa okitlatlaujtiaya” (Hech. 10:2). Pedro okitlapoui kuali tlajtoli ikinon Cornelio uan ifamilia okineltokakej Cristo uan san niman omoapolaktijkej (Hech. 10:​47, 48). Xamo Cornelio okipatlak seki tlamantli uan ijkon ueliskia kiueyichiuas Jehová iuan ifamilia (Jos. 24:15; Hech. 10:​24, 33).

13. ¿Tlen mitsmachtia tlen okichi Cornelio?

¹³ Cornelio oueyititoka ijkon ken Saulo uan non uelis kitsakuiliskia amo makichiua ken Cristo. Pero non tlamantli amo okitsakuili. Tejuatsin xamo moneki tikpatlas seki tlamantli uan ijkon uelis timoapolaktis. Jehová mitspaleuis xikpatla tlen moneki uan mitsteochiuas tla timoyekanas ika principios bíblicos.

14. ¿Ken mitspaleuia tlen okichi Tsuyoshi?

¹⁴ Tokni Tsuyoshi tlen chanti Japón omonekiaya kipatlas seki tlamantli kanin tekipanoua para uelis moapolaktiskia. Ye otlapaleuiaya itech se escuela tlen itoka Ikenobo kanin kiyektlaliaj xochitl. Akin okimakaya tekitl okiuikaya xochitl ijkuak okichiuiliayaj velorio akin oixpoliuik uan okichiuaya tlen kichiuaj budistas. Pero ualeua amo oueliaya yas ikinon okiluiaya Tsuyoshi mauia ipatka makichiuati non tlamantli. Pero ijkuak Tsuyoshi opejki momachtia Biblia,  okajsikamatki ken katej akinmej yoixpolikej. Okitak amo uelis moapolaktiskia tla ok kichiuaskia non tlamantli. Ikinon ayakmo okichi non tekitl (2 Cor. 6:​15, 16). Tsuyoshi okiyekilui akin okimakaya tekitl tleka ayakmo kichiuaskia non tlamantli. Ye ok okikauili ompa matekipano uan ayakmo kichiuaskia non tekitl. Ijkon Tsuyoshi omoapolakti ijkuak yokipiaya se xiuitl omomachtijtoka Biblia. a Tla tejuatsin moneki tikpatlas seki tlamantli kanin titekipanoua, xikilnamikto Jehová mitsmakas tlen mitspolos uan noijki amitlaj kipolos mofamilia (Sal. 127:2; Mat. 6:33).

OMOAPOLAKTIJKEJ AKINMEJ OCHANTIAYAJ CORINTO

15. ¿Tlen uelis kintsakuiliskia akinmej ochantiayaj Corinto mamoapolaktikan?

¹⁵ Miakej tlen ochantiayaj Corinto okinpaktiaya kipiaskej miak tlamantli uan oauilnemiayaj. Miakej okichiuayaj tlen amo kipaktia toTajtsin Dios. Ikinon oui kitekichiuiliskiaj Jehová. Ijkuak apóstol Pablo ompa otetlapouito kuali tlajtoli tlen kijtoua akin Cristo, “miakej tlen ochantiayaj Corinto okikakej kuali tlajtoli, otlaneltokakej uan omoapolaktijkej” (Hech. 18:​7-11). ToTeko Jesucristo okimonextili Pablo uan okilui: “Itech nin altepetl katej miakej tlen nechneltokaj”. Ikinon apóstol Pablo “ompa omoka uan otlamachti iTlajtol toTajtsin Dios se xiuitl uan tlajko”.

16. ¿Tlen okinpaleui akinmej ochantiayaj Corinto mamoapolaktikan? (2 Corintios 10:​4, 5).

¹⁶ ¿Tlen okinpaleui akinmej ochantiayaj Corinto mamoapolaktikan? (Xiktlajtolti 2 Corintios 10:​4, 5). Okipatlakej innemilis porque toTajtsin Dios okinpaleui ika iTlajtol uan ika iespíritu santo (Heb. 4:12). Akinmej okiselijkej kuali tlajtoli ayakmo otlauankej, ayakmo otlachtekej uan ayakmo omotekakej inuan tlakamej (1 Cor. 6:​9-11). b

17. ¿Tlen mitsmachtia tlen okichijkej akinmej ochantiayaj Corinto?

¹⁷ Sekimej akinmej ochantiayaj Corinto omonekiaya kipatlaskej innemilis tla okinekiayaj moapolaktiskej pero amo keman omokuayejyekojkej amo uelis ijkon kichiuaskiaj. Yejuan omochijchikajkej nemiskej itech “ojtli pitsauak” tlen techpaleuia matikpiakan yolilistli tlen amo keman tlamis (Mat. 7:​13, 14). ¿Tejuatsin timochijchikaua tikkauas itlaj tlen amo kuali? Ximochijchikaua ayakmo xikchiua  non tlamantli uan xikilui Jehová mamitspaleui ika iespíritu santo xikixtopeua tlen mitsyoltilana.

18. ¿Tlen mitsmachtia tlen okichi Monika?

¹⁸ Monika tlen chanti Georgia okinekiaya moapolaktis ijkuak okatka ichpochtli. Pero omonekiaya mochijchikauas ayakmo moyolpaktis ika tlen amo kuali uan ayakmo tlauijuikaltiskia. Ye okijto: “ToTajtsin Dios onechmakaya chikaualistli ijkuak oniktlatlaujtiaya. Jehová nochipa onechpaleui uan onechyekanki porque ye okimatiaya oniknekiaya nikchiuas tlen kuali”. Monika omoapolakti ijkuak okipiaya 16 xiuitl. ¿Tejuatsin noijki moneki tikkauas seki tlamantli para tikyolpaktis Jehová uan tiktekichiuilis? Nochipa xikilui Jehová mamitsmaka iespíritu santo porque ye amo kitemaka san tepitsin (Juan 3:34).

UELIS TIKOLINIS SE TEPETL TLA TITLANELTOKA

19. ¿Tlen moneki tikchiuas tla tikixnamiki itlaj tlen yetoskia ken tepeyo? (Noijki xikita foto).

¹⁹ Xamo tikita oui timoapolaktis porque mitstsakuilia seki tlamantli. Pero xikilnamikto Jehová mitstlasojtla uan kineki xipoui iuan ifamilia. Xikilnamikto tlen Jesús okinmilui idiscípulos: “Tla namotlaneltokilis yetoskia ken se iyolo mostaza, uelis nankiluiskiaj nin tepetl ik ne mamotoki uan ye motokiskia. Ijkon namejuan nochi uelis nankichiuaskiaj” (Mat. 17:20). Discípulos okatkaj iuan Jesús san kanaj keski xiuitl ikinon ok omonekiaya okachi tlaneltokaskej. Ye okinmilui tla okachi tlaneltokaskiaj, Jehová kinpaleuiskia amitlaj makintsakuili maski tlen kixnamikiskiaj yetoskia ken tepeyo. Tejuatsin noijki mitspaleuis tla okachi titlaneltokas.

20. ¿Ken yomitspaleui tlen okichijkej sekimej tokniuan?

²⁰ San niman itlaj xikchiua tla itlaj mitstsakuilia ximoapolakti. Yotikitakej miakej tokniuan tlen okatkaj achto siglo okipatlakej innemilis uan noijki oksekimej tokniuan. Non techpaleuia matimoyolchikauakan uan matimoyolseuikan. Ximokuayejyeko tlen yejuan okichijkej uan non mitspaleuis ximoyolchikaua. Noijki mitspaleuis ximotemaka ixpan Jehová uan ximoapolakti. Non tlen okachi kuali uelis tikchiuas.