Sekimej techtlajtlaniaj

Tla Biblia kijtoua amo matikmotlalilikan estli, ¿ken kitaj iTlaixpantijkauan Jehová ijkuak kinkixtiliaj inmieso uan ika kinpajtiaj?

Tinochtin moneki tikitaskej tlen kijtoua Biblia uan amo san toselti tikpejpenaskej tlen tiknekij noso tikchiuaskej tlen techiluis tepajti. Moneki kuali timokuayejyekoskej tlen tikpejpenaskej uan ijkon kuali timouikaskej iuan Jehová.

Jehová otechmakak toyolilis, ik non, otlanauati amo matikkuakan estli (Génesis 9:3, 4). Itech tlanauatilmej tlen okiselijkej israelitas, Jehová okinmilui ken omonekiaya kitaskej estli, ye okijto: “Porque yolilistli kajki itech estli uan ne noneuian oniktlali ipan altar para kinpojpoloskej namotlajtlakoluan”. ¿Tlen omonekiaya kichiuaskej ijkuak okimiktiayaj se yolkatl para kikuaskej? ToTajtsin Dios okijto: ‘Ieso moneki nankinokiskej uan nankitlaltemiskej’ a (Levítico 17:11, 13). Nin tlanauatil miak uelta okinmiluijkej israelitas (Deuteronomio 12:16, 24; 15:23). Se amochtli judío tlen itoka The Soncino Chumash kijtoua: “Estli amo makitlatikan, moneki kinokiskej ipan tlali para amikaj makikua”. Israelitas amo omonekiaya kitlatiskej nion kikuaskej ieso se yolkatl, porque yolilistli iaxka toTajtsin Dios.

Ijkuak Mesías oixpoliuik ayakmo omonekiaya kitlakamatiskej tlanauatil tlen okiseli Moisés. Pero toTajtsin Dios ok kipatioita estli, ik non, ika iespíritu santo okinpaleui apóstoles makinnauatikan tokniuan ‘amo makikuakan estli’. Nin tlanauatil noijki okatka sapanoua ipati ijkon ken tlanauatil tlen okijtouaya amo maauilnemikan uan amo makinueyichiuakan teotsitsintin (Hechos 15:28, 29; 21:25). Itech siglo veinte ijkuak opejki kitlajtlanij makitemakakan estli para oksekimej kintlaliliskej, iTlaixpantijkauan Jehová okajsikamatkej tla ijkon kichiuaskiaj amo kitlakamatiskiaj itlajtol toTajtsin Dios. b

Ualeua tepajtijkej kinmiluiaj akinmej kinchiuiliskej se operación, moneki kinkixtiliskej inmieso seki semanas achto (donación autóloga preoperatoria) uan tla satepan monekis oksepa kintlaliliskej. Pero tla ikaj kikixtiliaj ieso, kitlatiaj uan satepan oksepa kitlaliliaj kixnamiki tlen kijtoua Levítico uan Deuteronomio. Estli amo moneki tiktlatiskej, moneki tiknokiskej, yetoskia ken oksepa tikmakaj Jehová. Axkan ayakmo tiktlakamatij tlanauatil tlen okijkuilo Moisés. Pero tiiTlaixpantijkauan Jehová tiktlakamatij principios tlen katej itech non tlanauatil uan yotikpejpenkej amo ‘tikkuaskej estli’. Ik non, amo tiktemakaj toeso para oksekimej makintlalilikan uan amo tiktlatiaj toeso para oksepa tikmotlaliliskej. Ijkon tlanauatia toTajtsin Dios.

Biblia amo kijtoua tlajtlakoli ijkuak tepajtijkej kijtouaj itlaj kichiuiliskej toeso noso tikmochiuiliskej análisis. Miakej tokniuan kikauaj makinchiuilikan análisis porque non estli amo kitlatiaj. Pero ualeua tepajtijkej kijtouaj kikixtiliskej seki ieso akin kichiuiliskej operación para uelis ika kipajtiskej.

Ualeua akin kichiuiliaj se operación moneki kichiuiliskej hemodilución. Ijkuak ijkon kichiuaj kixelouaj ieso akin kipajtiskej, satepan estli tlen okixelojkej oksepa kalaki itech icuerpo (circuito extracorpóreo), ijkon oksepa kipia ieso ken achto. Noijki ijkon kichiuiliaj ieso akin eskisa, kichipauaj uan ijkon moyektlaliaj células uan oksepa kipia glóbulos rojos. Ualeua ieso akin kichiuiliaj se operación kipanoltiaj itech se máquina tlen yetoskia ken iyolo, ipulmones noso iriñones. Satepan estli tlen kajki itech máquina oksepa kalaki itech icuerpo akin kipajtiaj. Noijki kipanoltiaj estli itech se máquina noso centrifugador tlen kichipaua. Nin máquina kixeloua tlen kipia estli para oksekan kitlaliliskej akin kipajtiaj. Noijki kikixtiliaj ieso akin kipajtiaj uan kinelouaj ika pajtli uan satepan oksepa kitlaliliaj.

Tejuan amo tikijtoskej tlen ika moneki timopajtis porque nochi mopatlati uan tlatlamantli tlapajtiaj kanin tichantij, ik non, akin kichiua ken Cristo moneki kipejpenas tlen kichiuiliskej ieso ijkuak kichiuiliskej se operación, análisis noso ijkuak kichiuiliskej terapia. Moneki achto kitlajtlanis tepajti tlen kichiuiliskej ieso ijkuak kipajtiskej. Satepan kipejpenas tlen kiselis para amo makikuejso itlalnamikilis (xikita recuadro).

Akinmej kichiuaj ken Cristo moneki kilnamikiskej yomotemakakej ixpan Jehová uan moneki ‘kitlasojtlaskej ika nochi inyolo, ika nochi inmialma, inchikaualis uan intlalnamikilis’ (Lucas 10:27). ITlaixpantijkauan Jehová sapanoua kipatioitaj mouikaskej iuan toTajtsin Dios amo ken oksekimej. Akin otechmakak toyolilis techiluia matitlaneltokakan itech ieso Jesús. Biblia kijtoua: “Iwa Cristo ika iesso okintlaxtla totlajtlakolwah, iwa Dios yotechtlapojpolwi por itlasojtlalis non saikpanoa” (Efesios 1:7).

[Notas]

[Recuadro uan foto]

XIMOTLAJTLANI

¿Nechkauiliskia notlalnamikilis makixelokan noeso ika se máquina, noso makitlatikan uan satepan oksepa manechtlalilikan?

¿Nechkuejsoskia notlalnamikilis tla nechkixtiliskej noeso, kichipauaskej noso kineloskej ika okse pajtli uan satepan oksepa nechtlaliliskej?