1. ¿Tlen kichiuas Jesús?

 AXKAN panotok miak tlamantli tlen Biblia kijtoua panoskia. Ayakmo miak poliui ijkuak Jesús kinmixkomakas nochtin akinmej chantij nikan tlaltikpak. ¿Ken tikmatij ayakmo miak poliui? Porque Jesús okinmilui idiscípulos se profecía tlen kiteititia yinikan kajki “uan yitlamis tlen axkan onka” (Mat. 24:3). Nin profecía tikajsij itech Mateo capítulos 24 uan 25, noijki itech Marcos capítulo 13 uan Lucas capítulo 21.

2. ¿Tlen timomachtiskej uan tleka?

² Jesús okinmijto eyi neskayomej tlen techpaleuis matikmatikan tlen kichiuas toTajtsin Dios. Achto okijto tlen kineskayotiaj ichkamej uan tentsomej, majtlaktli ichpochmej uan tlakeualmej tlen okiselijkej tomin. Ninmej neskayomej techpaleuiskej matikajsikamatikan Jesús kitas tlen otikchijkej ijkuak techixkomakas. Axkan timomachtiskej nonmej neskayomej uan tikitaskej tlen techmachtiaj. Achto matikitakan tlen kineskayotiaj ichkamej uan tentsomej.

ICHKAMEJ UAN TENTSOMEJ

3. ¿Keman tlaixkomakas Jesús?

³ Jesús okijto ijkuak ye techixkomakas kitas kox otikselijkej kuali tlajtoli uan kox otikinpaleuijkej tlapejpenalmej (Mat.  25:​31-46). ¿Keman kijtos Jesús akin ichka uan akin tentso? Ijkon kichiuas ijkuak panotos ueyi tlajyouilistli pero ijkuak ayamo yipeua Armagedón (Mat. 24:21). Ijkon ken se tlajpixki kinxeloua ichkamej uan tentsomej, Jesús kinxelos akinmej okinpaleuijkej tlapejpenalmej uan akinmej amo okinpaleuijkej.

4. ¿Tleka tikneltokaj Jesús kuali tlaixkomakas ijkon ken kijtoua Isaías 11:​3, 4? (Noijki xikinmita fotos).

⁴ Jehová okitlali Jesús matlaixkomaka uan Biblia kijtoua ye kuali tlaixkomakas (xiktlajtolti Isaías 11:​3, 4). Ijkuak ye tlaixkomakas kitas tlen otimokuayejyekouayaj, tlen otikijtouayaj uan tlen otikchiuayaj. Noijki kitas kox otikintlakaitakej tokniuan tlapejpenalmej (Mat. 12:​36, 37; 25:40). Jesús kimatis kox otikinpaleuijkej tlapejpenalmej uan kox otikpatioitakej tekitl tlen okichijkej. a Ikinon ijkuak titetlapouiaj noijki tikinpaleuiaj tlapejpenalmej uan miak ipati ijkon matikchiuakan. Ijkuak ijkon tikinpaleuiaj tlapejpenalmej, Jesús kijtos tiyolkualmej uan uelis nochipa tiyoltoskej nikan tlaltikpak (Mat. 25:46; Apoc. 7:​16, 17). Kualtsin tlateochiuali tlen tikseliskej porque otitlapaleuijkej. Pero amo matikkauakan Jehová ijkuak panotos ueyi tlajyouilistli uan ijkuak tlamis. Ijkon ijkuilitos totoka “itech libro tlen kijtoua akinmej yoltoskej” (Apoc. 20:15).

5. ¿Tlen techmachtia neskayotl tlen okijto Jesús ijkuak otlajto itech ichkamej uan tentsomej uan akinmej kinpaleuia?

⁵ Matitlapaleuikan uan matitetlakamatikan. Neskayotl tlen okijto Jesús ijkuak otlajto itech ichkamej uan tentsomej techpaleuia akinmej nochipa tichantiskej nikan tlaltikpak. Tikteititiaj titlaneltokaj ijkuak tikinpaleuiaj tlapejpenalmej matetlapouikan uan ijkuak tiktlakamatij tlakeuali yolmelajki uan ixtlamatki (Mat. 24:45). Pero akinmej yaskej iluikak noijki moneki kitaskej ken kinpaleuia nin neskayotl. ¿Tleka? Porque Jesús kuali kitok tlen kichiuaj, tlen mokuayejyekouaj uan tlen kijtouaj. Ikinon yejuan noijki moneki kiteititiskej tetlakamatij. Axkan tikinmitaskej ome neskayomej tlen katej itech Mateo capítulo 25 kanin kijtoua seki tlamantli tlen moneki kichiuaskej tlapejpenalmej. Matikitakan neskayotl tlen tlajtoua itech majtlaktli ichpochmej.

MAJTLAKTLI ICHPOCHMEJ

6. ¿Ken okiteititijkej makuili ichpochmej okatkaj ixtlamatkej? (Mateo 25:​6-10).

⁶ Ijkuak Jesús otlajto itech majtlaktli ichpochmej, okijto yejuan okinamikitoj novio (Mat. 25:​1-4). Yejuan okinekiayaj kalakiskej iuan novio kanin monamiktiskia. Pero Jesús okijto makuili ichpochmej “okatkaj ixtlamatkej” uan makuili amo okatkaj ixtlamatkej. Ichpochmej tlen okatkaj ixtlamatkej omoyektlalijkej uan okichixtokaj novio maski ajsiskia sapanoua yiyouak. Ikinon okiuikakej intlauil tlen ika motlauiliskej. Noijki okinuikakej kontsitsintin tlen okipiayaj aceite porque amo okimatiayaj kox uejkauaskia novio uan ijkon intlauil amo seuiskia (xiktlajtolti Mateo 25:​6-10). Ikinon ichpochmej ixtlamatkej okalakej iuan novio ijkuak ye oajsito. Noijki ijkon kinpanos tlapejpenalmej. Tlapejpenalmej tlen moyektlaliskej uan motlachilijtoskej hasta ijkuak ajsiki Jesús, ye kinuikas iluikak iuan matlanauatikan (Apoc. 7:​1-3). b Pero ¿tlen kinpanos ichpochmej tlen amo ixtlamatkej?

7. ¿Tlen okinpanok makuili ichpochmej tlen amo ixtlamatkej uan tleka?

 ⁷ Ichpochmej ixtlamatkej okiselijkej novio ijkuak oajsito pero makuili ichpochmej tlen amo ixtlamatkej amo okiselijkej novio. Jesús okijto ichpochmej amo ixtlamatkej okikouatoj aceite porque intlauil yiseuiskia uan novio yiualajsiskia. Ikinon ijkuak novio oajsito yejuan amo ompa okatkaj. Pero “ichpochmej tlen ompa omochixtokaj, okalakej iuan novio kanin omonamikti uan otlatsakej” (Mat. 25:10). Satepan oajsitoj ichpochmej amo ixtlamatkej uan okinekiayaj kalakiskej. Pero novio okinmilui: “Ne [...] amo namechixmati” (Mat. 25:​11, 12). Nonmej ichpochmej amo omoyektlalijkej para kichiaskiaj novio maski uejkauaskia. ¿Tlen kinmachtia tlapejpenalmej tlen okichijkej ichpochmej tlen amo ixtlamatkej?

8, 9. ¿Tlen kinmachtia tlapejpenalmej tlen okichijkej majtlaktli ichpochmej? (Noijki xikita foto).

⁸ Matimoyektlalikan uan matimotlachilijtokan. Jesús amo okijto yetoskej ome grupos tlapejpenalmej. Amo okijto se grupo moyektlalis uan kichias maajsi tonal ijkuak toTajtsin Dios kipojpolos tlen axkan onka uan okse grupo amitlaj kichiuas. Jesús okijto tlapejpenalmej moneki moyektlaliskej para tlaxikoskej hasta ijkuak toTajtsin Dios kipojpolos nochi tlen axkan onka uan ijkon kiseliskej tlen ye okinmilui (Juan 14:​3, 4). Sapanoua miak ipati tlen okinmilui. Tinochtin moneki matimokuayejyekokan tlen okijto Jesús ijkuak okijto tlen okichijkej majtlaktli ichpochmej maski tikchiaj tichantiskej iluikak noso nikan tlaltikpak. Moneki matimoyektlalikan uan matimotlachilijtokan. Ijkon uelis titlaxikoskej hasta ijkuak toTajtsin Dios kipojpolos nochi tlen axkan onka (Mat. 24:13).

⁹ Tlen okijto Jesús itech majtlaktli ichpochmej techmachtia miak ipati matimoyektlalikan uan matimotlachilijtokan. Satepan okijto okse neskayotl kanin kijtoua sekimej tlakeualmej okinmakakej tomin  uan non techmachtia miak ipati matitekipanokan.

TLAKEUALMEJ TLEN OKISELIJKEJ TOMIN

10. ¿Ken okiteititijkej ome tlakeualmej otetlakamatkej? (Mateo 25:​19-23).

¹⁰ Jesús okijto tlen okichijkej tlakeualmej tlen okiselijkej tomin. Okijto ome tlakeualmej otetlakamatkej uan se amo otetlakamatki (Mat. 25:​14-18). Ye okijto se tlakatl okinmakak tomin intlakeualuan porque ye yaskia okse altepetl. Ome tlakeualmej otetlakamatkej uan san niman opejki kitekipanoltiaj tomin uan ijkon okitlankej okseki tomin. Yejuan okitlankej miak tomin ikinon ijkuak omokopato inteko yejuan yokipiayaj okachi miak tomin. Ikinon inteko okinmilui kuali tlen okichijkej uan sejse okinmilui: “Xiuiki uan nouan xipaki” (xiktlajtolti Mateo 25:​19-23). Pero ¿tlen okichi okse tlakeuali tlen noijki okiseli tomin?

11. ¿Tlen okipanok tlakeuali tlatsijki uan tleka?

¹¹ Tlakatl okimakak se bolsa tomin okse tlakeuali para makitekipanolti. Pero non tlakeuali san ‘otlatsiuiaya’ ikinon otlachkuak uan okitlalpacho tomin. Ijkuak iteko omokopato san okikopili tomin tlen okimakak. Non tlakeuali amo okatka yolkuali uan amo okilui iteko makitlapojpolui porque amo okitekipanolti itomin. Noijki okijto iteko san niman kualani. Ikinon iteko okajuak non tlakeuali, okikixtili tomin uan otlanauati makikixtikan ikalijtik (Mat. 25:​24, 26-30).

12. ¿Akinmej kineskayotiaj ome tlakeualmej tlen otetlakamatkej?

¹² Ome tlakeualmej tlen otetlakamatkej kineskayotiaj tlapejpenalmej tlen tetlakamatij. Jesús sejse kinmiluia: “Xiuiki uan nouan xipaki”. Non panos ijkuak kinyolitiskej ompa iluikak (Mat. 25:​21, 23; Apoc. 20:5b). Pero itlaj miak ipati kinmachtia tlapejpenalmej tlen okichi tlakeuali tlatsijki. Matikitakan tlen kinmachtia.

13, 14. ¿Tlen kinmachtia tlapejpenalmej neskayotl tlen okijto Jesús tlen tlajtoua itech tlakeualmej tlen okiselijkej tomin? (Noijki xikinmita fotos).

¹³ Matitekipanokan. Jesús amo okijto tlapejpenalmej mochiuaskiaj tlatsijkej. Ye  okinnejmachti ijkon ken ijkuak okinmilui neskayotl tlen tlajtoua itech majtlaktli ichpochmej. Okinmilui tlen kinpanoskia tla ayakmo yolpakiskiaj kitekichiuiliskej toTajtsin Dios. Ayakmo yetoskiaj tlapejpenalmej uan ayakmo kiseliskiaj tlateochiuali ikinon amo uelis tlanauatiskej iuan Jesús ompa iluikak (2 Ped. 1:10).

¹⁴ Ijkuak Jesús okijto neskayotl tlen tlajtoua itech majtlaktli ichpochmej uan tlakeualmej tlen okiselijkej tomin, okinmiluijtoka nochtin tlapejpenalmej moneki moyektlaliskej, motlachilijtoskej uan tekipanoskej. Pero ok okinmilui okseki tlamantli tlen kinpaleuiskia. Matikitakan okse neskayotl tlen kajki itech Mateo 24:​40, 41.

¿AKIN “KIUIKASKEJ”?

15, 16. ¿Tleka tlapejpenalmej moneki mamotlachilijtokan ijkon ken kijtoua Mateo 24:​40, 41?

¹⁵ Ijkuak Jesús ayamo okinmijtouaya eyi neskayomej, okijto ken kinmixkomakaskiaj tlapejpenalmej uan non kiteititis akinmej kinseliskej. Ye okijto ome tlakamej otekipanouayaj tlala uan ome siuamej otlapayanayaj. Nonmej tlakamej uan siuamej mota san se tlamantli okichijtokaj. Pero Jesús okijto: “Se kiuikaskej uan okse kikajteuaskej” (xiktlajtolti Mateo 24:​40, 41). Itech okse versículo okinmilui idiscípulos: “Ximotlachilijtokan porque amo nankimatij keman uits namoTeko” (Mat. 24:42). Jesús noijki ijkon okijto ijkuak otlanki otlajto itech majtlaktli ichpochmej (Mat. 25:13). Mota san se tlamantli kijtosneki tlen okijto Jesús itech ninmej ome neskayomej. Tlanauatiskej iuan Jesús ompa iluikak san akinmej melauak okinpejpenkej uan tetlakamatij (Juan 14:3).

¹⁶ Matimotlachilijtokan. Tla se tokni tlapejpenal amo motlachilijtok, amo uelis yas iluikak inuan oksekimej tlapejpenalmej (Mat. 24:31). Pero tinochtin akinmej tiknekij nochipa tichantiskej nikan tlaltikpak moneki matikkakikan tlen okijto Jesús, matitetlakamatikan uan matimotlachilijtokan.

17. ¿Tleka amo timotekipachouaj tla Jehová ok kinpejpena sekimej tokniuan mayetokan tlapejpenalmej?

¹⁷ Tejuan tikixmatij Jehová ikinon tikneltokaj tlen kipejpena kichiuas. Amo timotekipachouaj tla Jehová ok kinpejpena sekimej tokniuan mayetokan tlapejpenalmej. c Matikilnamikikan ijkuak Jesús okijto se tlakatl okipiaya itlal uan okintlakeuato sekimej tlakamej makitekitij uva saiktlami hora (Mat. 20:​1-16). Akinmej saiktlami opejki tekipanouaj noijki okintlaxtlaui ijkon ken akinmej achto opejkej tekipanouaj. Tlapejpenalmej noijki ijkon kinteochiuaskej ijkuak kinuikaskej iluikak maski yikin okinpejpenkej.

MATIKKAKIKAN TLEN OKIJTO JESÚS

18, 19. ¿Tlen techmachtiaj neskayomej tlen yotikinmitakej?

¹⁸ ¿Tlen otimomachtijkej? Neskayotl tlen okijto Jesús ijkuak otlajto itech ichkamej uan tentsomej, kiteititia miak ipati matitetlakamatikan uan amo matikkauakan toTajtsin Dios tla tiknekij tichantiskej nikan tlaltikpak. Moneki ijkon tikchiuaskej axkan uan ijkuak panotos ueyi tlajyouilistli. Ijkuak ajsis non tonal, Jesús kijtos akinmej “nochipa yoltoskej” (Mat. 25:46).

¹⁹ Noijki otikinmitakej ome neskayomej uan otikitakej tlen kinnejmachtia tlapejpenalmej. Otikitakej neskayotl tlen tlajtoua itech majtlaktli ichpochmej. Makuili ichpochmej omoyektlalijkej uan omotlachilijtokaj.  Yejuan okatkaj ixtlamatkej uan okichixkej novio maski ouejka. Pero ichpochmej amo ixtlamatkej amo omoyektlalijkej uan novio amo okinka makalakikan kanin omonamikti. ¿Tlen techmachtia? Moneki matimoyektlalikan uan matimochiakan hasta ijkuak Jesús makipojpolo nochi tlen axkan onka. Noijki otimomachtijkej se neskayotl tlen tlajtoua itech tlakeualmej tlen okiselijkej tomin uan otikitakej san ome tlakeualmej otekipanojkej. Yejuan otetlakamatkej uan omochijchikajkej otekipanojkej para kitlaniskej okseki tomin ikinon inteko okinmilui kuali tlen okichijkej. Pero okikixtijkej tlakeuali tlatsijki. ¿Tlen techmachtia? Moneki nochipa matiktekichiuilikan Jehová hasta ijkuak ye kipojpolos tlen axkan onka. Saiktlami otikitakej Jesús okinmilui tlapejpenalmej mamotlachilijtokan uan ijkon kinuikas iluikak iuan matlanauatikan. Yejuan kichiaj ika nochi inyolo maajsi non tonal ijkuak yetoskej iuan Jesús ompa iluikak. Ijkuak tlamis Armagedón, yejuan yetoskej ken novia tlen monamiktis iuan Jesús tlen moixmati ken “Ichkatsin” (2 Tes. 2:1; Apoc. 19:9).

20. ¿Tlen kichiuas Jehová tla tikkakij tlen technejmachtia?

²⁰ Ayakmo miak poliui Jesús tlaixkomakas pero tejuan amo matimomojtikan. ToTajtsin Dios techmakas ichikaualis “tlen amikaj uelis kipias” tla tejuan titetlakamatij uan ijkon uelis timoketoskej “ixpan iKone Tlakatl” (2 Cor. 4:7; Luc. 21:36). Ikinon matikinkakikan neskayomej tlen okinmijto Jesús maski tikchiaj tichantiskej iluikak noso nikan tlaltikpak. Tla ijkon tikchiuaskej toTajtsin Dios techselis uan totoka ijkuilitos “itech libro tlen kijtoua akinmej yoltoskej” (Dan. 12:1; Apoc. 3:5).