1. ¿Tlen tikneltokaj techmakas Jehová?

 JEHOVÁ kijtoua satepan uelis tiyoltoskej nochipa. Sekimej kineltokaj yoltoskej nochipa ompa iluikak (1 Cor. 15:50, 53). Pero timiakej tikneltokaj tichantiskej nochipa itech tlaltikpak, kanin ayakmo timokokoskej uan tiyolpakiskej (Apoc. 21:3, 4). Tinochtin tiknekij maajsi non tonal para tichantiskej iluikak noso tlaltikpak.

2. ¿Tleka tikneltokaj melauak itlaj tikseliskej?

² Ijkuak Biblia kijtoua tikneltokaj itlaj tikseliskej, uelis tikneltokaskej satepan kuali tiyetoskej. Tikneltokaj melauak ijkon panos porque Jehová yokijto (Rom. 15:13). Tejuan yitikixmatij Jehová uan tikmatij kichiuas tlen kijtoua (Núm. 23:19). Noijki tikmatij Jehová kineki kichiuas tlen ye mokuayejyekoua ikinon uelis tikneltokaskej melauak mochiuas tlen okijto.

3. ¿Tlen tikitaskej? (Salmo 27:14).

³ ToTajtsin Dios techtlasojtla uan kineki matikneltokakan (xiktlajtolti Salmo 27:14). Tla melauak tikneltokaj Jehová itlaj techmakas, titlaxikoskej uan tiyolpakiskej maski san tlen techpanos amo timomojtiskej. Axkan tikitaskej ken techpaleuis tla tikneltokaj itlaj tikseliskej. Matikitakan tleka yetoskia ken se ancla uan ken se casco. Satepan tikitaskej ken okachi uelis tikneltokaskej melauak itlaj tikseliskej.

4. ¿Tleka tikneltokaj tlen tikseliskej yetoskia ken se ancla? (Hebreos 6:19).

⁴ Ijkuak apóstol Pablo okintlajkuilili tokniuan hebreos, okijto tlen tikneltokaj tikseliskej yetoskia ken se ancla  (xiktlajtolti Hebreos 6:19). Miak uelta oyajki itech mar ikinon okimatiaya ancla okipaleuiaya barco para amo apolakiskia. Se tonal ye oyaya itech barco uan opejki chikauak ejekakiaui, ijkuakon okitak sekimej tlakamej okitlamotlakej anclas itech mar para amitlaj makipano barco (Hech. 27:29, 39-41). Ijkon ken ancla kipaleuia barco para amo maapolaki, noijki tlen tikneltokaj tikseliskej techpaleuis, maski sapanoua titlajyouiskej uelis titlaxikoskej. Maski techpanos tlen amo kuali, tikneltokaj satepan kuali tiyetoskej. Matikilnamiktokan Jesús okijto techtlajyouiltiskej (Juan 15:20). Ikinon tla timokuayejyekouaj Jehová melauak kichiuas tlen yokijto techpaleuia matiktekichiuilijtokan.

5. ¿Tlen okipaleui Jesús matlaxiko maski okimatiaya sapanoua kitlajyouiltiskiaj?

⁵ Matimoukuayejyekokan ken okipaleui Jesús okineltokak itlaj kiseliskia uan noijki okipaleui nochipa makitlakamati Jehová maski okimatiaya sapanoua kitlajyouiltiskiaj ijkuak kimiktiskiaj. Itech Pentecostés xiuitl 33, apóstol Pedro okijto se profecía tlen kajki itech Salmos, ompa kijtoua: “Ikinon, niyolpaki, noueyichiualis melauak paki. Uan ne kuali niyetos. Porque amo techkauas itech mikakoyoktli. Akin yolmelajki amo tikkauas ijtik tekochtli. […] Niyolpaki porque kuali techselia”. Jesús omoyolseuijtoka porque okineltokak melauak itlaj kiseliskia (Hech. 2:25-28; Sal. 16:8-11). Maski Jesús okimatiaya kimiktiskiaj, okineltokak Jehová kiyolitiskia uan satepan iuan yetoskia ompa iluikak (Heb. 12:2, 3).

6. ¿Tlen okijto se tokni?

⁶ Miakej tokniuan yotlaxikojkej porque kimatokej itlaj kiseliskej. Matikitakan tlen okipanok tokni Leonard Chinn, ye ochantiaya Inglaterra uan nochipa okitlakamatki Jehová. Ijkuak omochi Primera Guerra Mundial, okitsakej porque amo okinek mochiuas soldado uan amo okikauilijkej ome metstli ikaj iuan mamotlapoui, noijki okichiualtijkej sapanoua matekipano. Satepan ye okijkuilo. “Tlen onechpanok onechpaleui manikajsikamati tla nikneltoka tlen nikselis satepan uelis nitlaxikoskia. Tlen okichijkej Jesús, apóstoles, profetas uan tlen kijtoua Biblia tikseliskej, techpaleuia matimoyolchikauakan uan matitlaxikokan”. Tlen okineltokaya kiselis tokni Leonard yetoskia ken se ancla, non okipaleui uan axkan noijki uelis techpaleuis.

7. ¿Tlen techpaleuis matikneltokakan itlaj tikseliskej? (Romanos 5:3-5; Santiago 1:12).

⁷ Ijkuak titlajyouiaj uan titlaxikouaj okachi titlaneltokaj itlaj tikseliskej, noijki tikitaj ken techpaleuia Jehová uan techselis (xiktlajtolti Romanos 5:3-5; Santiago 1:12). Axkan okachi titlaneltokaj amo ken ijkuak opejki timomachtiaj. Satanás kineki san matimoyolkokojtokan ijkuak titlajyouiaj pero Jehová techpaleuia matitlaxikokan.

8. ¿Tleka tikneltokaj tlen tikseliskej yetoskia ken se casco? (1 Tesalonicenses 5:8).

⁸ Biblia noijki kijtoua tlen tikneltokaj tikseliskej yetoskia ken se casco (xiktlajtolti 1 Tesalonicenses 5:8). Se soldado okimotlaliliaya se casco para amitlaj kipanoskia itech itsonteko. Tejuan tikatej itech se guerra iuan Satanás uan  tla tiknekij tiktlaniliskej moneki tikmaluiskej tlen timokuayejyekouaj. Ye kineki techyoltilanas para matimokuayejyekokan tlen amo kuali. Ijkon ken casco okipaleuiaya se soldado, tlen tikneltokaj tikseliskej techpaleuia matimokuayejyekokan tlen kuali uan nochipa matiktekichiuilikan Jehová.

9. ¿Tlen kichiuaj akinmej amo kineltokaj itlaj kiseliskej?

⁹ Tejuan tikneltokaj satepan nochipa tiyoltoskej, non techpaleuia kuali matikpejpenakan tlen tikchiuaskej. Tla san timokuayejyekouaj tlen tiknekij xamo ayakmo tikneltokaskej tlen tikseliskej. Ijkon okinpanok yiuejkika tokniuan tlen ochantiayaj ompa Corinto, yejuan ayakmo okineltokayaj toTajtsin Dios kinyolitis akinmej oixpolikej (1 Cor. 15:12). Pablo okijto ayakmo otlaneltokayaj porque san omokuayejyekouayaj tlen yejuan okinekiayaj (1 Cor. 15:32). Axkan miakej noijki ijkon kichiuaj ikinon san moyolpaktiaj. Pero tejuan tikneltokaj tlen toTajtsin Dios kichiuas satepan. Tlen tikneltokaj tikseliskej satepan yetoskia ken se casco tlen techpaleuia amo san matimoyolpaktikan uan matimokuayejyekokan tlen kuali, noijki techpaleuia matimouikakan iuan Jehová (1 Cor. 15:33, 34).

10. Tla tikneltokaj tlen tikseliskej, ¿tlen amo timokuayejyekoskej?

¹⁰ Casco tlen moneskayotia ika tlen tikneltokaj tikseliskej techpaleuia amo matimokuayejyekokan amo tikyolpaktiskej Jehová. Xamo ikaj mokuayejyekoua: “Ne amo nikneltoka uelis niyoltos nochipa, amo niyolkuali uan amo uelis nikchiuas ken sekimej itekipanojkauan toTajtsin Dios”. Matikilnamikikan tlen okijto Elifaz ijkuak omotlapoui iuan Job. Ye okijto: “¿Ken uelis yetos se tlakatl chipauak […]?”. Noijki okijto: “ToTajtsin Dios amo kinneltokilia akinmej santos nion ixpan amo chipauak tlen kajki iluikak” (Job 15:14, 15). Satanás kineki ijkon matimokuayejyekokan uan tla ijkon tikchiuaj, ye kimati ayakmo tikneltokaskej tikseliskej tlen Jehová yokijto pero tejuan matikneltokakan ye melauak kichiuas tlen kijtoua. Nochipa matikneltokakan Jehová kineki matiyoltokan nochipa uan ye techpaleuis (1 Tim. 2:3, 4).

11. ¿Tleka moneki tikneltokaskej Jehová kichiuas tlen yokijto?

¹¹ Xamo ayamo tikitaj tlen toTajtsin Dios okijto kichiuas. Ikinon tikmachiliaj oui tikneltokaskej tlen tikseliskej. Tejuan timokuayejyekouaj poliui miak pero Jehová amo ijkon kita (2 Ped. 3:8, 9). Xamo Jehová amo kichiuas tlen yokijto ijkuak tejuan tiknekiskej pero moneki tikneltokaskej mochiuas nochi tlen yokijto. ¿Tlen techpaleuis nochipa matikneltokakan toTajtsin Dios melauak techmakas tlen yokijto? (Sant. 5:7, 8).

12. Ijkon ken kijtoua Hebreos 11:1, 6, ¿ken tikmatij melauak tikseliskej tlen Jehová yokijto?

¹² Jehová melauak techmakas tlen yokijto tla nochipa iuan timouikaj. Biblia kijtoua akinmej tlaneltokaj uan kichiaj itlaj kiseliskej Jehová “kinmakas intlatliokolil akimeh kitemoah” (xiktlajtolti Hebreos 11:1, 6). Tla tikneltokaj Jehová melauak onka, techpaleuis matikneltokakan ye kichiuas tlen yokijto. Matikitakan tlen uelis tikchiuaskej para okachi timouikaskej iuan Jehová.

13. ¿Tlen techpaleuis matimouikakan iuan Jehová?

 ¹³ Matimotlatlaujtikan uan matiktlajtoltikan Biblia. Maski amo ueli tikitaj Jehová kema uelis iuan timouikaskej. Tiktlatlaujtiaj porque tikmatij ye techkaki (Jer. 29:11, 12). Ijkuak tiktlajtoltiaj Biblia tikkakij Jehová. Noijki ijkuak tiktlajtoltiaj ken okinpaleui yiuejkika itekipanojkauan okachi tikneltokaj tikseliskej tlen yokijto. Tlen kajki itech Biblia “omoijkuilo para matimoixtlamachtikah, para matikchiakah ika yolsewílistli tlan Ye yokijto techmakas” (Rom. 15:4).

14. ¿Tleka moneki matimokuayejyekokan ken yiuejkika Jehová okinpaleui itekipanojkauan?

¹⁴ Matimokuayejyekokan ken Jehová yiuejkika okichi tlen okijto. Matimokuayejyekokan tlen okinpanok Abrahán uan Sara. Yejuan amo ueli okinpiayaj inkoneuan porque yokipiayaj miak xiuitl pero toTajtsin Dios okinmilui kipiaskiaj se inkone (Gén. 18:10). Biblia kijtoua Abrahán okineltokak mochiuaskia “teta de miaktikeh tlaltikpaktlakah” (Rom. 4:18). Xamo ikaj uelis mokuayejyekos toTajtsin Dios amo kichiuaskia tlen okilui Abrahán pero ye okineltokak uan melauak okitak Jehová kichiua tlen kijtoua (Rom. 4:19-21). Tlen okipanok Abrahán techmachtia Jehová kichiua tlen kijtoua uan amitlaj uelis kitsakuilis.

15. ¿Tleka moneki matimokuayejyekokan ken Jehová yotechpaleui?

¹⁵ Matimokuayejyekokan ken Jehová yotechpaleui. Xamo tikilnamikij tlen yokichi toTajtsin Dios uan yotikitakej kichiua tlen kijtoua. Jesús okijto iTajtsin nochipa techmakas tlen ika timopanoltiskej (Mat. 6:32, 33). Noijki okijto tla tikiluiaj Jehová matechmaka iespíritu  santo ye techmakas (Luc. 11:13). Jehová yokichi seki tlamantli tlen okijto uan xamo yotikitakej yokichi seki tlamantli topatka: techtlapojpoluia, techyolseuia uan techpaleuia matikpiakan nochi tlen moneki para iuan matimouikakan (Mat. 6:14; 24:45; 2 Cor. 1:3). Ijkuak timokuayejyekouaj ken Jehová yotechpaleui, non kichiuas matikneltokakan melauak tikseliskej tlen ye yokijto.

16. ¿Tleka se kualtsin tetliokolil tlen Jehová yokijto tikseliskej?

¹⁶ ToTajtsin Dios kineki satepan nochipa matiyoltokan uan non se kualtsin tetliokolil. Tinochtin tiknekij maajsi non tonal uan tikneltokaj melauak ijkon mochiuas. Tlen tikneltokaj tikseliskej yetoskia ken se ancla tlen techpaleuia matitlaxikokan, ijkuak techtlajyouiltiaj uan ijkuak ixpoliui akin tiktlasojtla. Noijki tlen tikneltokaj tikseliskej yetoskia ken se casco porque techpaleuia matimokuayejyekokan tlen kuali. Tlen Biblia kijtoua tikseliskej techpaleuia okachi matimouikakan iuan Jehová noijki ijkon tikitaj ye sapanoua techtlasojtla. Kuali timomachiliaj porque tikneltokaj tikseliskej tlen Jehová yokijto.

17. ¿Tleka tiyolpakij?

¹⁷ Ijkuak apóstol Pablo okintlajkuilili tokniuan tlen ochantiayaj Roma, okinmilui: “Xipaktinemikah ika tlan nomechchia” (Rom. 12:12). Pablo oyolpakiaya porque okimatiaya tla nochipa okitlakamatiaya Jehová yaskia iluikak. Tejuan noijki tiyolpakij porque tikneltokaj tikseliskej tlen Jehová yokijto techmakas. Se salmista okijto: “Yolpaki akin [...] mochia itech Jehová uan kipia ken iDios [...] nochipa kichiua tlen kijtoua” (Sal. 146:5, 6).