1922: yopanok cien xiuitl
“TOTAJTSIN DIOS […] techpaleuia ika toTeko Jesús para matitlatlanikan” (1 Cor. 15:57, Versión Moderna [VM], 1910). Non texto omotekitilti itech 1922 porque okinmilnamiktiayaj tokniuan tlen omomachtiayaj Biblia, tla nochipa kitlakamatiskiaj Jehová kinteochiuaskia. Ijkon opanok non xiuitl porque omochijchikajkej tetlapouiskej. Okinteochi ijkuak opejki kinchijchiuaj amochmej uan noijki ijkuak opejki tetlapouiaj ika radio. Satepan okachi okineltokakej Jehová kiteochiua ialtepe. Tokniuan oyajkej itech se ueyi nechikol ompa Cedar Point (Ohio, Estados Unidos). Non ueyi nechikol hasta axkan ok kilnamikij itekipanojkauan Jehová.
“NON OTECHTLAJTLACHIALTIJ”
Ijkuak omomiaktilijkej tokniuan tlen tetlapouiaj, okachi omonekiaya makipiakan amatlajkuilolmej. Betel tlen kajki ompa Brooklyn (Nueva York, Estados Unidos) okinchijchiuayaj revistas pero ok okinmiluiayaj seki empresas makinchijchiuakan amochmej. Pero seki metstli ayakmo okinpiayaj amochmej ikinon amo okachi otetlapouiayaj. Tokni Robert Martin okiyekanaya fábrica ikinon tokni Rutherford okitlajtlani kox ompa noijki uelis kinchijchiuaskiaj amochmej.
Fábrica tlen okatka itech calle Concord Brooklyn (Nueva York)
Tokni Martin okijto: “Non otechtlajtlachialti, amo otikneltokayaj porque omonekiaya miak tlamantli para tikinchiuaskiaj amochmej, ken impresoras uan encuadernación”. Tokniuan okipiayaj tlen moneki uan ompa Brooklyn calle Concord número 18, okitlanejkej se edificio para ompa tekipanoskiaj.
Sekimej amo okinpaktiaya tlen opejkej kichiuaj. Akin otlayekanaya itech empresa kanin okinchijchiuayaj amochmej, otechitato kanin otikinchijchiuayaj amochmej uan okijto: “Namejuan amo nankimatij nankitekitiltiskej nochi tlen nikan kajki. Kanaj tlajko xiuitl uan nochi ijtlakauis”.
Tokni Martin okijto: “Xamo non melauak pero Toteko amo keman techkaua toselti”. Melauak tlen okijto tokni Martin: satepan okinchijchijkej kanaj 2,000 amochmej.
Tokniuan tlen otlapaleuiayaj itech fábrica
MIAKEJ OKINTLAPOUIJKEJ IKA RADIO
Ijkuak itekipanojkauan Jehová opejkej kinchijchiuaj amochmej noijki opejkej tetlapouiaj ika radio. Domingo tiotlak, 26 de febrero 1922 tokni Rutherford opejki tlamachtia itech radio. Itech emisora KOG tlen okatka Los Ángeles California (Estados Unidos), tokni okipanolti se tlamachtil tlen itoka “Miakej tlen axkan katej amo ixpoliuiskej”.
Kanaj 25,000 okikakej tlamachtil. Sekimej omotlasojkamatkej ika cartas. Se carta okititlanki Willard Ashford, ochantiaya Santa Ana (California). Ye okijto tokni Rutherford kuali otlamachti: “Eyi tofamiliares omokokouayaj, amo tikakiskiaj non tlamachtil tla amo kipanoltiskiaj itech radio, maski ueyi nechikol mochiuaskia ik kanin tichantij amo uelis tiaskiaj”.
Satepan ok otlamachtiayaj itech radio. Itlamian xiuitl, revista The Watch Tower okitematilti kanaj 300,000 okikajkej tlamachtilmej ika radio.
Oyolpakej ijkuak okimatkej miakej okinkakiayaj tlamachtilmej, tokniuan tlen omomachtiayaj Biblia okitakej omonekiaya kitlaliskej se emisora de radio ompa Staten Island uan Betel tlen okatka Brooklyn. Satepan tokniuan kitekitiltiskiaj non emisora tlen omotokayotiaya WBBR, para kitematiltiskej tlen kichiuas iTekiuajkayo toTajtsin Dios.
“ADV”
Revista The Watch Tower tlen okiski 15 de junio 1922 okitematilti mochiuaskia se ueyi nechikol ompa Cedar Point (Ohio), peuaskia tonal 5 uan tlamiskia 13 de septiembre 1922. Tokniuan akinmej omomachtiayaj Biblia sapanoua oyolpakiayaj ijkuak oajsiayaj Cedar Point.
Ijkuak tokni Rutherford okipanolti achto tlamachtil, okinmilui tokniuan: “Nikneltoka Toteko […] kiteochiuas nin ueyi nechikol uan kichiuas mamotetlapoui itech nochi tlaltikpak”. Noijki oksekimej tokniuan tlen otlamachtijkej okinyolejkej tokniuan matetlapouikan.
Itech xiuitl 1922 miakej omonechikojkej itech ueyi nechikol tlen omochi Cedar Point (Ohio)
Viernes 8 de septiembre kanaj 8,000 okinekiayaj kikakiskej ken otlamachtiaya tokni Rutherford. Okinekiayaj kimatiskej tlen kijtosneki letras “ADV”, tlen okipiayaj invitaciones. Ijkuak omotlalijtiayaj miakej okitayaj se ueyi lona ikuapak plataforma. Arthur Claus ochantiaya Tulsa (Oklahoma, Estados Unidos) ye oyajki ueyi nechikol, omotlali kanin okachi kuali tlakakiskia porque ijkuakon amo okatkaj micrófonos nion bocinas.
“Otikakej nochi tlen otechmachtijkej”
Para kuali kikakiskiaj tlamachtilmej, tokni akin okiyekanaya ueyi nechikol okijto akinmej amo ajsiskiaj kualkan ayakmo kalakiskiaj auditorio. Kanaj 9:30 kualkan tokni Rutherford opejki kitlajtoltia Mateo 4:17 kijtoua iTekiuajkayo toTajtsin Dios yiualaskia (VM, 1910). Ijkuak opejki kijtoua ken miakej kikakiskia tlen kichiuaskia iTekiuajkayo toTajtsin Dios, tokni okijto: “Jesús okijto ijkuak yiualaskia kinechikoskia miakej imachtijkauan akinmej yolyamankej uan akinmej tetlakamatij”.
Tokni Claus okatka tlayekapan, ye okijto: “Otikakej nochi tlen otechmachtijkej”. Non tonal opejki amo kuali momachilia uan okiski itech auditorio maski ye okimatiaya ayakmo kikauaskiaj oksepa makalaki.
Satepan kuali omomachili. Ye okijto ijkuak oksepa omokopaya itech auditorio, okikak miakej omomatlaxkalojkej non okichi sapanoua mayolpaki. Ye omokuayejyeko uelis tlejkoskiaj ikuapak auditorio para kuali kikakiskia tlamachtil, ijkuakon ye okipiaya 23 xiuitl ikinon otlejkok. Amitlaj okatka ik kanin okalakiaya tlauili uan ijkuak okachi onejnemiaya okachi kuali omokakiaya tlamachtil.
Pero Arthur amo okatka iselti, sekimej tokniuan noijki otlejkokej ikuapak auditorio. Frank Johnson san niman okitlajtlani: “¿Tikualika se navaja?”.
Arthur okijto: “Kema”.
Frank okijto: “Jehová otechnankili. ¿Tikita non lona? Non se letrero uan ilpitok itech ome clavos. Xikkaki juez, a ijkuak ye kijtos “xiktematiltikan, xiktematiltikan…”, tiktekiskej mekatl.
Arthur san okichixtoka non makijto tokni. Ijkuak yitlamiskia tlamachtis tokni Rutherford, oyolpakik uan chikauak okijto: “Nochipa xiktlakamatikan uan xiktekichiuilikan toTeko. Xitlaxikojtokan hasta makixpolokan Babilonia. Xitetlapouikan itech nochi tlaltikpak. Nochtin moneki kimatiskej Jehová toTajtsin Dios uan Jesucristo toTeko uan kinnauatia akinmej tlanauatiaj. Amo xikilkauakan nin tonal. ¡Xikitakan, toTekiua tlanauatia! Namejuan nankipaleuia. Ikinon, xiktematiltikan, xiktematiltikan, xiktematiltikan tlen kichiuas Tekiua uan iTekiuajkayo”.
Arthur uan tokniuan okitekej mekatl uan okikajkakej lona. Ompa okijtouaya: “Xiktematiltikan tlen kichiuas Tekiua uan iTekiuajkayo”. Letras “ADV” kijtosneki ika inglés advertise uan motlajtolkopa ken “xiktematiltikan”.
OKITEMATILTIJKEJ TLEN OKACHI IPATI
Ueyi nechikol tlen omochi Cedar Point okinpaleui tokniuan okachi makitematiltikan tlen kichiuas iTekiuajkayo toTajtsin Dios, oyolpakiayaj akinmej otetlapouiayaj. Se precursor tlen ochantiaya Oklahoma, okijkuilo: “Otitetlapouiayaj ik kanin okikixtiaya tekoli uan akinmej ompa ochantiayaj amo okipiayaj miak tomin”. Ye okijto ochokayaj ijkuak okikakiayaj tlen kijtoua revista The Golden Age. Saiktlami okijto: “Sapanoua techyolpaktia tikinyolseuiskej tokniuan”.
Tokniuan tlen omomachtiayaj Biblia okajsikamatkej tlen okijto Jesús itech Lucas 10:2: “Onkateh miakeh akimeh moneki [tikintlapouiskej], pero amo miakeh akimeh kitematiltiskeh nin kualitlájtoli”. Saiktlami non xiuitl okachi okinekiayaj kitematiltiskej tlen kichiuas iTekiuajkayo toTajtsin Dios itech nochi tlaltikpak.
a Tokni Rutherford noijki okiluiayaj “juez” porque otekipanouaya ken juez ompa Misuri (Estados Unidos).
