1. ¿Tlen moneki tikchiuaskej pampa titlaneltokaj?

AMO nochtin tlaneltokaj (2 Tesalonicenses 3:2). Pero Jehová kichiua ma tlaneltokakan akinmej kiueyichiuaj (Romanos 12:3; Gálatas 5:22). Moneki ma tiktlasojkamatilikan Jehová pampa techpaleuia okachi ma titlaneltokakan.

2, 3. (1) ¿Tlen tlateochiualistli tikseliaj tla titlaneltokaj? (2) ¿Tlen tlajtlanilmej tikinnankiliskej?

² Jehová okitemakak iKone akin sapanoa kitlasojtla uan ijkon nochtin akinmej itech tlaneltokaj okintlapojpolui. Tla titlaneltokaj itech Jesús, uelis timouikaskej iuan Jehová uan uelis tiyoltoskej nochipa (Juan 6:44, 65; Romanos 6:23). Jehová melauak touan yolkuali. Maski titlajtlakolejkej uan technamiki ma timikikan, ye okitak uelis tikchiuaskej tlen kuali (Salmo 103:10). Ik non, otechmachti itech Jesús uan itech imikilis. Ijkuak otitlaneltokakej itech Jesús uan otimochijkej imachtijkauan, otikmatkej uelis tiyoltoskej nochipa (xiktlajtolti 1 Juan 4:9, 10).

³ Pero ¿tlen uelis timomachtiskej itech tlaneltokilistli? Tla tiknekij titlaneltokaskej, ¿san moneki ma tikmatikan tlen topatka  okichi toTajtsin Dios uan tlen kichiuas satepan? Amo. Ma tikitakan tlen okachi moneki tikchiuaskej.

4. ¿Tlen tikchiuaskej tla titlaneltokaj?

⁴ Ijkuak titlaneltokaj itech Jehová uan Jesús amo san tiknekij tikmatiskej tlen yokichijkej topatka uan tlen kichiuaskej. Ika nochi toyolo tiknekij tikpiaskej tonemilis ken yejuan techiluiaj uan tikinpaleuiskej oksekimej ma kinmixmatikan. Tlatitlanil Pablo okijto: “Tla ika mokamak tikijtos Cristo Jesús ye Moteko, iwa itech moyolo tikneltoka Dios okiyoliti de kan mikemeh, Dios mitsmakixtis. Porke ika moyolo titlaneltoka iwa Dios mitsita tichipawak, pero ika mokamak [titetlapouia pampa uelis timomakixtis, TNM]” (Romanos 10:9, 10; 2 Corintios 4:13).

5. ¿Tleka moneki ma titlaneltokakan? Ika se neskayotl xikyekijto tlen moneki tikchiuaskej tla tiknekij tikpiaskej chikauak totlaneltokilis.

⁵ Tla tiknekij tiyoltoskej nochipa itech Xochitlali, moneki ma titlaneltokakan ika nochi toyolo. Uan totlaneltokilis kajki ken se xochitl. Tla tiknekij kuali ma moskalti se xochitl, moneki tikatekiskej. Tla amo tikatekiskej, uakis. Noijki ijkon, moneki nochipa tikchikauaskej totlaneltokilis uan ijkon okachi titlaneltokaskej (Tito 2:2; 2 Tesalonicenses 1:3; Lucas 22:32; Hebreos 3:12).

6. ¿Ken techyekiluia Hebreos 11:1, TNM tlen kijtosneki tlaneltokilistli?

⁶ Biblia kijtoa tlen kijtosneki tlaneltokilistli itech Hebreos 11:1, TNM (xiktlajtolti). * Achto kijtoa tlaneltokilistli non “tlen se kichia melauak ma pano”. Itech tlamantli tlen tikchiaj poui tlen toTajtsin Dios yokijto kichiuas. Se neskayotl, kuali tikmatij nochi tlen amo kuali pojpoliuis uan yetos Xochitlali. Biblia noijki kijtoa tlaneltokilistli non “tlen kiteititia panos” tlen tikchiaj “maski ayamo tikitaj”. Seki tlamantli tlen melauak katej maski amo tikinmita ye Jehová, Jesucristo, ángeles uan Tekiuajkayotl tlen kajki iluikak (Hebreos 11:3). ¿Ken tikteititiaj melauak titlaneltokaj itech tlen toTajtsin Dios yokijto kichiuas uan itech tlamantli tlen amo tikitaj? Tikteititiaj ika tonemilis, ika tlen tikijtoaj uan ika tlen tikchiuaj.

7. ¿Ken techpaleuia tlen okichi Noé ma tikajsikamatikan tlen kijtosneki ma titlaneltokakan? (Xikita tlaixkopinal tlen ika peua tlamachtil).

⁷ Tlen okichi Noé techpaleuia ma tikajsikamatikan tlen kijtosneki ma titlaneltokakan. Tlatitlanil Pablo okijto Noé okiluijkej tlen “tlamochiwaskia, tlan ayamó omotaya” uan ken okinekiaya kiyolpaktis toTajtsin Dios, “opé kichijchiwa se weyi barko, non ika kinmakixtiskia non ken kimita” (Hebreos 11:7). Noé otlaneltokak itech tlen Jehová okilui kichiuaskia, ik non, okichijchi se ueyi akali. Uelis akinmej ik ompa ochantiayaj okitlajtlanijkej tleka okichijchiuaya non akali. Kuali tikmatij Noé okinnankili. Biblia kijtoa Noé “otlanonotsaya manemikah ika inyolo chipawak” tlaltikpaktlakamej (2 Pedro 2:5). Okinmilui toTajtsin Dios kiualikaskia se apachiuilistli uan ijkon kitlajtlamiskia nochi tlen amo kuali. Uelis okinmilui tlen Jehová okilui: “Nikinmixpolos nochtin akinmej yoltokej, pampa itech nochi Tlaltikpak nochtin sapanoa moteuiaj”. Noijki okilui: “Nikualikas se apachiuilistli ipan Tlaltikpak uan ijkon nikixpolos nochi tlen itech yoltok. Nochi tlen kajki  itech Tlaltikpak pojpoliuis”. Satepan, uelis Noé okinyekilui tlaltikpaktlakamej tlen omonekiaya kichiuaskej tla okinekiayaj momakixtiskej. Jehová okilui: “Moneki tikalakis itech akali” (Génesis 6:13, 17, 18).

8. ¿Tlen okijto Santiago itech tlaneltokilistli?

⁸ Santiago noijki otlajkuilo itech tlaneltokilistli. Uelis otlajkuilo satepan ijkuak tlatitlanil Pablo okintlajkuilili tokniuan hebreos. Santiago okijto: “Techititi motlaneltokalis iwa techititi tlan kuali tikchiwa, iwa ne nimitsititis milák nikneltoka Dios ika tlan kuali nikinchiwilia oksikimeh” (Santiago 2:18). Santiago okijto pampa tikpiaskej chikauak totlaneltokilis, amo san moneki titlaneltokaskej itech toTajtsin Dios. Amo kuali ejekamej kimatij onka toTajtsin Dios pero amo itech tlaneltokaj. Yejuan sepa amo kinekij kitlakamatiskej (Santiago 2:19, 20). Akin melauak tlaneltoka, kineki kiyolpaktis toTajtsin Dios, ik non, kichiua tlen kuali. Abrahán ijkon okichi. Santiago okijkuilo: “Towejkatata Abraham okipakti Dios, ijkuak okitlali ikone Isaac ipan artal para kimiktis. Yika Dios okiseli kemi yolchipawak. Itlaneltokalis Abraham omoteititi ika tlan ye okichi. Yika, ika tlan ye okichi itlaneltokalis omoyekajxiti”. Satepan Santiago noijki okijto amo ipati tla tikijtoaj titlaneltokaj pero amo tikteititiaj ika tlen tikchiuaj. Okijto: “Tla se kuerpo amo kipia espíritu, non kuerpo miktok, ijkó noiwa totlaneltokalis amitla ipati tla amitla tikchiwah” (Santiago 2:21-23, 26).

9, 10. ¿Tlen moneki tikchiuaskej tla tiknekij titlaneltokaskej itech iKone toTajtsin Dios?

⁹ Kanaj 30 xiuitl satepan ijkuak Santiago otlajkuilo itech tlaneltokilistli, Juan okijkuilo se Evangelio uan eyi cartas. Ken oksekimej tlen okijkuilojkej Biblia, Juan okajsikamatiaya tlen kijtosneki tlaneltokilistli. Miak uelta okitekitilti se tlajtoli griego tlen kijtosneki “ma titlaneltokakan”.

¹⁰ Se neskayotl, Juan okijto: “Akin kineltoka iKone in toTajtzin Dios, kipia nemilistle katlej mach keman tlamis. Pero akin amo kineltoka yon iKone, mach kipias yon nemilistle, sino ipan witz ikualanilis in Dios” (Juan 3:36, ITlajtol toTajtzin Dios [NHY]). Tla tiknekij titlaneltokaskej itech iKone toTajtsin Dios, moneki tikintlakamatiskej itlanauatiluan (xikita recuadro “¿Tlen kijtosneki?”). Ijkuak tiktlajtoltiaj tlen okijkuilo Juan, tikitaj Jesús miak uelta okijto tla tiknekij tikpiaskej yolilistli tlen amo keman tlamis, moneki itech titlaneltokaskej uan noijki itech iTajtsin (Juan 3:16; 6:29, 40; 11:25, 26; 14:1, 12).

11. ¿Ken tiktlasojkamatiliaj Jehová pampa otechmachti tlen melauak?

¹¹ Jehová ika iespíritu santo otechpaleui ma tikajsikamatikan tlen melauak itech ye uan itech iKone uan ijkon intech titlaneltokaj (xiktlajtolti Lucas 10:21). ¿Ken tiktlasojkamatiliaj Jehová nochi tlen yokichi? Nochipa ma tiktlasojkamatilikan pampa ika Jesús techkauiliaj iuan ma timouikakan, “porke imak [Jesús] wits nochi totlaneltokalis, porke Ye otechititi kenomi titlaneltokaskeh” (Hebreos 12:2). Noijki moneki okachi titlaneltokaskej. ¿Ken tikchiuaskej? Nochipa ma timotlatlaujtikan uan ma timomachtikan Biblia (Efesios 6:18; 1 Pedro 2:2).

12. ¿Tlen tikchiuaskej tla melauak titlaneltokaj?

 ¹² Tla melauak titlaneltokaj itech tlen Jehová yokijto kichiuas, tikteititiskej ika tlen tikchiuaj. Se neskayotl, nochtin tikintlapouiskej itech Tekiuajkayotl uan tikinpaleuiskej ma kichiuakan ken Jesús. Noijki moneki “nochtin ma tiktechiwilikan tlan kuale, iwan okachi moneki tikinchiwiliskej yejwan tokniwan katlej tlaneltokaj” (Gálatas 6:10, NHY). Uan timochijchikauaskej ‘tikauaskej tonemilis katlej achtoj otikipiayaj katlej otechtoktiaya ma tikchiwakan tlan amo kuale’, pampa amo tiknekij tikchiuaskej itlaj tlen kichiuas ayakmo kuali ma timouikakan iuan Jehová (Colosenses 3:5, 8-10, NHY).

13. (1) ¿Tleka moneki ma titlaneltokakan itech toTajtsin Dios? (2) ¿Tlen kijtoa Biblia itech tlaneltokilistli uan tleka?

¹³ Biblia kijtoa moneki ma titlaneltokakan: “Porke akin mijkuania [noso motokia] inawak Dios, moneki makineltoka Ye onka, iwa Ye kinmakas intlatliokolil akimeh kitemoah” (Hebreos 11:6). Biblia noijki kijtoa ma tikiskaltikan totlaneltokilis itech toTajtsin Dios. ¿Tleka? Pampa ijkuak ikaj peua kichiua ken Cristo achto moneki ma tlaneltoka itech toTajtsin Dios (Hebreos 6:1). Pero noijki moneki okseki tlamantli pampa kuali timouikaskej iuan Jehová (xiktlajtolti 2 Pedro 1:5-7, NHY; Judas 20, 21).

14, 15. ¿Tleka okachi moneki tlasojtlalistli uan amo tlaneltokilistli?

¹⁴ Akinmej okijkuilojkej Biblia okachi otlajkuilojkej itech tlaneltokilistli. ¿Kijtosneki tlaneltokilistli non tlen okachi moneki tikpiaskej? Ma tikitakan.

¹⁵ Pablo okijto tlaneltokilistli mouika iuan tlasojtlalistli: “Tla nitlaneltokaskia asta nikinmijkuanis tepemeh, pero amo nitetlasojtla, amitla nopati” (1 Corintios 13:2). Uan Jesús okijto tiktlasojtlaskej toTajtsin Dios non “tlanauatil tlen okachi ueyititok itech nochi Tlanauatil” (Mateo 22:35-40, TNM). Tlasojtlalistli techpaleuia ma tikpiakan itech toyelis okseki tlamantli tlen kipaktia Jehová. Se neskayotl, Biblia kijtoa “akin tetlasojtla [...] nochi kineltoka”. Ik non, tlasojtlalistli techpaleuia ma titlaneltokakan itech nochi tlen toTajtsin Dios kijtoa itech Biblia (1 Corintios 13:4, 7).

16, 17. (1) Ken kiteititia Biblia moneki tlaneltokilistli uan tlasojtlalistli? (2) ¿Tlen okachi moneki itech ninmej ome tlamantli, uan tlen okachi miak ipati?

 ¹⁶ Biblia kijtoa moneki ma titlaneltokakan uan ma titetlasojtlakan. Ik non, akinmej okijkuilojkej Biblia ualeua otlajtojkej itech se tlaxelol itech nonmej tlamantli. Se neskayotl, tlatitlanil Pablo okinmilui tokniuan “matikmoelpankentikah ika totlaneltokalis iwa ika totlasojtlalis” (1 Tesalonicenses 5:8). Pedro okijkuilo nin itech Jesús: “Nomejwah nonkitlasojtlah n Cristo, iwa nonkineltokah maya amo nonkitah” (1 Pedro 1:8). Santiago okinmilui tlapejpenalmej: “Dios okimpéjpenki n próbesteh itech nin tlaltíkpaktli, para makipiakah miak tlaneltokálistli iwa makimoaxkatikah tlan Dios yokinkakitijka kinmakas akimeh kitlasojtlah” (Santiago 2:5). Uan tlatitlanil Juan okijto toTajtsin Dios technauatia “matikneltokakah Ikone Cristo Jesús, iwa matimotlasojtlakah tinochteh” (1 Juan 3:23).

¹⁷ Pero Pablo noijki okijto “nochipa tikpiaskeh tlaneltokálistli, noiwa tikpiaskeh tlan itech timoyolchikajtoskeh iwa nochipa timotlasojtlaskeh. Pero tlan okachi ipati itech ninteh eyi, ye n tlasojtlálistli” (1 Corintios 13:13). ¿Tleka okijto tlatitlanil Pablo tlasojtlalistli non tlen okachi kipia ipati? Satepan ayakmo monekis ma titlaneltokakan itech tlen Jehová okijto kichiuas. Ijkuakon, mochiuas nochi tlen yokijto uan tiyolpakiskej ijkon ken kijtoa Biblia. Pero nochipa monekis tiktlasojtlaskej toTajtsin Dios uan oksekimej. Uan nochipa okachi tikintlasojtlaskej.

18, 19. ¿Tlen panotok pampa itekipanojkauan toTajtsin Dios tlaneltokaj, uan akin moneki ma tiktlasojkamatilikan?

¹⁸ Itekipanojkauan toTajtsin Dios kikauaj iespíritu santo ma kinyekana itech innemilis. Ik non, tlaneltokaj itech iTekiuajkayo toTajtsin Dios uan kipaleuiaj. Noijki nochtin motlasojtlaj (Gálatas 5:22, 23). Ik non, itech nochi Tlaltikpak katej kanaj 8,000,000 (ocho millones) tokniuan tlen kipiaj yolseuilistli uan san sekan katej itech tlanechikolmej. Kuali tikitaj tlaneltokilistli uan tlasojtlalistli sapanoa miakej kinyolinia.

¹⁹ Tinochtin san sekan tikatej pampa Jehová techpaleuia. Ik non, moneki ma tikueyichiuakan (Isaías 55:13). Sapanoa tiktlasojkamatiliaj Jehová pampa techkauilia ‘matimomakixtijkah por titlaneltokah’ (Efesios 2:8). Jehová ok kinpaleuis miakej tlaltikpaktlakamej itech ma tlaneltokakan. Uan se tonal, itech nochi Tlaltikpak yetoskej tlaltikpaktlakamej tlen amo tlajtlakolejkej, tlen yolmelajkej, tlen yolpakiskej uan nochipa kiueyichiuaskej Jehová.