1. ¿Tlen techkauilia Jehová ma tikchiuakan?

JEHOVÁ techkauilia ma tikpejpenakan tlen tikchiuaskej. Techmachtia ma tikpejpenakan tlen kuali uan techpaleuia ma tiyolpakikan tla tikpejpenaj tlen kipaktia (Sal. 119:173). ITlajtol techpaleuia kuali ma tikpejpenakan tlen tikchiuaskej (Heb. 5:14).

2. ¿Tleka ualeua oui tikchiuaskej tlen yotikijtojkej?

² Ualeua yotikpejpenkej itlaj tikchiuaskej pero oui tikchiuaskej ken yotikijtojkej. Ma tikitakan ken uelis panos. Se telpochtli kijtoa kitlajtoltis nochi Biblia. Pero san kanaj keski semanas ijkon kichiua uan satepan ayakmo kitlajtoltia. Se tokni kijtoa mochiuas precursora pero amo keman kipeualtia. Tlayekankej kijtoaj kintlajpalotiuij tokniuan pero panoa miak metstli uan amo ikaj okitlajpalotoj. Nochtin okijtojkej itlaj kichiuaskiaj pero amo keman okichijkej. Itech achto siglo tokniuan tlen ochantiayaj Corinto nesi noijki ijkon okinpanok. Ma tikitakan tlen techmachtia tlen okinpanok.

3. ¿Tlen okijtojkej kichiuaskiaj tokniuan tlen ochantiayaj Corinto uan tlen opanok?

³ Itech xiuitl 55 tokniuan tlen ochantiayaj Corinto okijtojkej itlaj kichiuaskiaj. Yejuan okimatkej tokniuan tlen ochantiayaj Jerusalén uan tlen okatkaj Judea ayakmo okipiayaj tlen kikuaskej. Oksekimej tokniuan okitakej ken kinpaleuiskiaj. Yejuan otetlasojtlayaj uan okinpaktiaya kitemakaskej  tlen okipiayaj, ik non, okijtojkej kinpaleuiskiaj tokniuan uan okitlajtlanijkej tlatitlanil Pablo ken tlapaleuiskiaj. Ye okinmilui ken kichiuaskiaj uan okinauati Tito ma kololo tlen kitetliokoliskiaj (1 Cor. 16:1; 2 Cor. 8:6). Opanok seki metstli Pablo okimatki nonmej tokniuan ayamo okinpaleuiayaj. Xamo ayamo okololoayaj tlen kisepantitlaniskiaj iuan okseki tlanechikolmej (2 Cor. 9:4, 5).

4. Ijkon ken kijtoa 2 Corintios 8:7, 10, 11, ¿tlen okinmilui Pablo ma kichiuakan tokniuan tlen ochantiayaj Corinto?

⁴ Tokniuan tlen ochantiayaj Corinto kuali tlen okinekiayaj kichiuaskej ijkuak okijtojkej kinpaleuiskiaj oksekimej tokniuan. Pablo okinyolchika porque otlaneltokayaj uan okinekiayaj kitemakaskej tlen okipiayaj. Pero okinmilui ma kichiuakan tlen yokijtojkaj (xiktlajtolti 2 Corintios 8:7, 10, 11). Nin techmachtia tinochtin moneki timochijchikauaskej tikchiuaskej tlen yotikijtojkej.

5. ¿Tlen tlajtlanilmej tikinnankiliskej?

⁵ Xamo techpanoa ken tokniuan tlen ochantiayaj Corinto. Ualeua oui tikchiuaskej tlen yotikijtojkej porque titlajtlakolejkej. Noijki ualeua itlaj techualpanotikisa uan ayakmo tikchiuaj tlen yotikijtojkej (Ecl. 9:11; Rom. 7:18). Itech nin tlamachtil tikinnankiliskej seki tlajtlanilmej. ¿Ken uelis kuali tikpejpenaskej tlen tikchiuaskej? ¿Tlen techpaleuis ijkuak monekis tikpatlaskej tlen yotikpejpenkej tikchiuaskej? ¿Tlen techpaleuis ma tikchiuakan tlen yotikijtojkej?

6. ¿Keman moneki tikpatlaskej tlen yotikpejpenkej tikchiuaskej?

⁶ Seki tlamantli tlen yotikpejpenkej amo keman uelis tikpatlaskej. Se tlamantli, nochipa tiknekij tiktekichiuiliskej Jehová. Okse tlamantli, tiknekij nochipa tiyetoskej iuan tonamik (Mat. 16:24, TNM; 19:6). Pero xamo ualeua monekis tikpatlaskej tlen yotikpejpenkej tikchiuaskej porque itlaj mopatla itech tonemilis. ¿Tlen techpaleuis kuali ma tikpejpenakan tlen tikchiuaskej?

7. ¿Tlen moneki tiktlajtlaniliskej Jehová uan tleka?

⁷ Ma tikiluikan Jehová ma techmaka ixtlamatilistli. Jehová okilui Santiago ma kijkuilo: “Tla seme de nomejwah amo kipia ixtlamatílistli, makitlajtlanili Dios. Ye nomechmakas miak ixtlamatílistli” (Sant. 1:5). Tinochtin techpoloa “ixtlamatílistli”. Ik non, ma tikiluikan Jehová ma techpaleui ijkuak tikpejpenaskej itlaj tikchiuaskej uan ijkuak tikpatlaskej tlen yotikijtojkaj tikchiuaskej. Jehová techpaleuis kuali ma tikpejpenakan tlen tikchiuaskej.

8. ¿Tlen moneki achto ma tikchiuakan ijkuak tiknekij itlaj tikpejpenaskej?

⁸ Achto moneki itlaj ma tikchiuakan. Ma timopaleuikan ika tlen kijtoa Biblia, ma tikintlajtoltikan amatlajkuilolmej tlen techmaka ialtepe Jehová uan ma timotlapouikan iuan se toyolikni (Prov. 20:18). Moneki ijkon tikchiuaskej ijkuak tiknekij tikpatlaskej toteki uan ijkuak oksekan tichantitiuij. Noijki ijkuak tikpejpenaskej tlen timomachtiskej uan ijkon tikpiaskej tlen ika timopanoltiskej uan tiktekichiuiliskej toTajtsin Dios.

9. ¿Ken techpaleuis amo ma timokajkayauakan?

⁹ Ma tikitakan tleka tiknekij itlaj tikchiuaskej. Jehová kineki kimatis tleka tiknekij tikchiuaskej seki tlamantli (Prov. 16:2). Ye amo kineki ma titlakajkayauakan. Ik non, amo ma timokajkayauakan nion ma tikinkajkayauakan oksekimej ijkuak tikijtoaj itlaj tikchiuaskej. Tla san titlakajkayauaj amo tikchiuaskej tlen yotikijtojkej. Ma tikijtokan se telpochtli mochiua precursor. Pero  panoa seki metstli amo kajxitia horas tlen moneki kitemakas uan amo yolpaki ijkuak tetlapouia. Xamo kijtoa omochi precursor porque kineki okachi kitekichiuilis Jehová. Pero xamo omochi precursor porque kineki kinyolpaktis itatajuan noso oksekimej.

10. ¿Tlen moneki tikchiuaskej tla tiknekij tikpatlaskej seki tlamantli?

¹⁰ Ma tikitakan okse tlamantli. Ikaj peua momachtia Biblia uan kijtoa ayakmo tlachichinas. Mochijchikaua amo tlachichinas kanaj se semana noso ome pero satepan oksepa peua tlachichina. Pero kitlasojtla Jehová uan kineki kiyolpaktis. Ik non, satepan ayakmo tlachichina (Col. 1:10; 3:23).

11. ¿Tlen moneki tikchiuaskej tla tiknekij kuali ma kisa tlen yotikpejpenkej?

¹¹ Ma timokuayejyekokan tlen tiknekij tikchiuaskej. Nin techpaleuis ma tikchiuakan tlen yotikpejpenkej. Ma tikitakan ken tikchiuaskej. Tla yotikijtojkej mojmostla tiktlajtoltiskej Biblia, moneki ma tikpiakan se programa porque tlamo amo keman tiktlajtoltiskej. * Tlayekankej ijkuak kijtoaj kintlajpalotiuij tokniuan moneki ma motlajtlanikan. ¿Akinmej moneki kintlajpalotiuij? ¿Yokijtojkej keman kintlajpalotiuij? Tla amo ijkon kichiuaskej, amo keman yaskej tetlajpalotiuij.

12. ¿Ualeua tlen moneki tikchiuaskej uan tleka?

¹² Ma tikitakan kox melauak tikchiuaskej tlen yotikijtojkej. Amikaj majxilia nion ueli kichiua nochi tlen kineki. Ik non, moneki ma tikitakan kox melauak tikchiuaskej tlen tikijtoaj. Ualeua xamo monekis tikpatlaskej tlen yotikijtojkej tikchiuaskej (Ecl. 3:6). Ijkuak tikpatlaskej tlen yotikijtojkaj, ma tikitakan tlen ayakmo tikchiuaskej uan satepan ma tikchiuakan ken yotikijtojkej. Pero ¿tlen techpaleuis ma tikchiuakan tlen yotikpejpenkej? Ma tikitakan makuili tlamantli tlen techpaleuis.

13. ¿Akin uelis tikiluiskej ma techpaleui ma tikchiuakan tlen yotikijtojkej?

¹³ Ma tikiluikan Jehová ma techpaleui ma tikchiuakan tlen yotikpejpenkej. Jehová techpaleuis ma tikchiuakan tlen yotikpejpenkej (Filip. 2:13). Ik non, ma tiktlajtlanilikan iespíritu santo uan ijkon tikchiuaskej tlen yotikijtojkej. Nochipa ma tiktlatlaujtikan maski ualeua tikmachiliaj amo san niman techpaleuia. Jesús okijto: “Xiktlajtlanilikah Dios, iwa Ye nomechmakas” iespíritu santo (Luc. 11:9, 13).

14. ¿Ken techpaleuia Lucas 14:28 ma tikchiuakan tlen yotikijtojkej?

¹⁴ Ma tikijkuilokan tlen tiknekij tikchiuaskej (xiktlajtolti Lucas 14:28). Moneki tikijkuiloskej tlen tiknekij tikchiuaskej tla tiknekij kuali ma kisa uan noijki ma tikchiuakan ken otikijkuilojkej. Noijki ijkon ma tikchiuakan ijkuak itlaj tikpejpenaskej. Achto ma tikchiuakan seki tlamantli uan satepan okseki tlamantli. Ijkon okachi tikitaskej tlen yotikchijkej. Pablo okinmilui tokniuan tlen ochantiayaj Corinto ma kixelokan tomin “ipewaya n semana” uan ijkon kipiaskiaj tlen kimakaskej ijkuak monekiskia (1 Cor. 16:2). Amo titlajyouiskej tla achto tikchiuaj seki tlamantli uan okseki satepan.

15. ¿Tlen tikchiuaskej tla yotikijkuilojkej tlen yotikijtojkej?

¹⁵ Uelis tikchiuaskej tlen yotikijtojkej tla tikijkuiloskej (1 Cor. 14:40). Ma tikitakan ken uelis tikchiuaskej. Tlayekankej kipiaj akin  tlajkuiloa. Ik non, moneki ma kiluikan non tlayekanki ma kijkuilo nochi tlen kichiuaskej, akinmej tetlajpalotiuij uan keman yaskej. Tlayekankej tlen ijkon kichiuaj kuali kisa tlen kipejpenaj kichiuaskej (1 Cor. 9:26). Tejuan noijki uelis ijkon tikchiuaskej. Ma tikijkuilokan nochi tlen techpoloa tikchiuaskej uan tlen moneki achto tikchiuaskej. Tla ijkon tikchiuaskej, amo san timotonalpoloskej uan tikchiuaskej tlen yotikijtojkej.

16. Ijkon ken kijtoa Romanos 12:11, ¿tlen techpaleuis ma tikchiuakan tlen yotikijtojkej?

¹⁶ Ma timochijchikauakan ma tikchiuakan tlen yotikijtojkej. Moneki timochijchikauaskej tla tiknekij tikchiuaskej tlen yotikijkuilojkej (xiktlajtolti Romanos 12:11). Pablo okilui Timoteo ma mochijchikaua okachi kuali ma tlamachti uan nochipa ijkon ma kichiua. Non noijki techpaleuis tla tiknekij okachi tiktekichiuiliskej toTajtsin Dios (1 Tim. 4:13, 16).

17. ¿Ken techpaleuis Efesios 5:15, 16 ma tikchiuakan tlen yotikijtojkej?

¹⁷ Amo ma timotonalpolokan (xiktlajtolti Efesios 5:15, 16). Ma tikitakan keman tikchiuaskej tlen yotikijtojkej uan amo ma tikpatlakan. Amo ma tikijtokan tikchiuaskej ijkuak timajxiliskej porque amo keman ijkon panos (Ecl. 11:4). Amo ma timotonalpolokan ika tlen amitlaj ipati porque tlamo ayakmo tikchiuaskej tlen okachi moneki (Filip. 1:10). Ma tikchiuakan tlen yotikijtojkej ijkuak amo okachi tikpiaj tlen tikchiuaskej. Noijki ma tikinmiluikan oksekimej tikchiuaskej seki tlamantli uan amikaj ma techkuejso. Ma tikseuikan tocelular, amo ma tikinmitakan correos nion tlen onka itech Internet. *

18, 19. ¿Tlen techpaleuis ma tikchiuakan tlen yotikijtojkej maski tikixnamikiskej ouijkayotl?

¹⁸ Ma timokuayejyekokan tlen panos tla tikchiuaskej tlen yotikijtojkej. Tlen tiknekij tikchiuaskej yetoskia ken kanaj tiaskej. Tla tiknekij tiajsitiuij kanin tiauij, moneki tiaskej maski kanaj okitsakej carretera uan moneki tikonanaskej okse ojtli. Noijki ijkon tla timokuayejyekoaj tlen panos tla tikchiuaskej tlen tikijtoaj, amo timosotlauaskej maski tikixnamikiskej ouijkayotl (Gál. 6:9).

¹⁹ Oui kuali tikpejpenaskej tlen tikchiuaskej. Pero Jehová techmakas ixtlamatilistli uan techpaleuis ma tikchiuakan tlen yotikijtojkej.