1. ¿Tlen kineki Jehová matikchiuakan? (Noijki xikinmita fotos).

 ¿AKIN tikiluiskej matechyekana uan matechyolseui? Tejuan kuali tikmatij ye Jehová tikiluiaj matechpaleui. Ye kineki nochipa iuan matimotlapouikan porque techiluia: “Ixmostla ximotiotsajtsilijtokah” (1 Tes. 5:17). Uelis tiktlatlaujtiskej uan tikiluiskej matechyekana (Prov. 3:5, 6). Jehová kipaktia techkakis ikinon techkauilia matiktlatlaujtikan miak uelta.

2. ¿Tlen tikitaskej?

² Tejuan tikpatioitaj timotlatlaujtiskej porque tikitaj ken se tetliokolil. Pero ualeua tikchiuaj miak tlamantli uan ayakmo timajxiliaj timotlapouiskej iuan Jehová. Xamo timokuayejyekouaj moneki okachi kuali timotlatlaujtiskej. Pero Biblia techiluia tlen moneki tikchiuaskej. Axkan tikitaskej tlen okichi Jesús uan tlen moneki tikchiuaskej tla tiknekij tiktlatlaujtiskej toTajtsin Dios. Noijki tikitaskej ken uelis okachi kuali timotlatlaujtiskej tla tikchiuaskej makuili tlamantli tlen miak ipati.

3. ¿Tlen okimatiaya Jesús?

³ Jesús okimatiaya miak ipati kitlatlaujtis toTajtsin Dios. Ijkuak okatka iluikak, ye okitak iTajtsin ken okinnankiliaya itekipanojkauan ijkuak okitlatlaujtiayaj. Jesús okitak ijkuak Jehová okinnankili Ana, David, Elías  uan oksekimej (1 Sam. 1:10, 11, 20; 1 Rey. 19:4-6; Sal. 32:5). Ikinon Jesús okinmilui imachtijkauan nochipa mamotlatlaujtikan uan amo mamomojtikan (Mat. 7:7-11).

4. ¿Tlen techmachtia tlen okichi Jesús?

⁴ Jesús okinmititi imachtijkauan ken motlatlaujtiskej. Ye nochipa omotlatlaujti ijkuak okitekichiuili toTajtsin Dios nikan tlaltikpak. Ye okitak ken kitlatlaujtiskia toTajtsin Dios maski amo omajxiliaya uan miakej iuan okatkaj (Mar. 6:31, 45, 46). Jesús omeuaya ijkuak otlayouatoka uan okitlatlaujtiaya iTajtsin (Mar. 1:35). Se tonal, omotlatlaujti youak porque omonekiaya kichiuas itlaj miak ipati (Luc. 6:12, 13). Jesús miak uelta okitlatlaujti Jehová ijkuak yikimiktiskiaj. Omotlatlaujti porque kichiuaskia itlaj sapanoua oui (Mat. 26:39, 42, 44).

5. ¿Ken uelis tikchiuaskej ken Jesús?

⁵ Jesús techmachtia uelis timajxiliskej tiktlatlaujtiskej Jehová maski tikchiuaj miak tlamantli. Ijkon ken okichi Jesús xamo moneki kualkan timeuaskej noso okachi yiyouak tikochiskej. Ijkon tikititiskej Jehová tikpatioitaj techkauilia matiktlatlaujtikan. Matikitakan tlen okichi se tokni itoka Lynne. Ye kilnamiki omotlasojkamatki miak ijkuak okimatki uelis kitlatlaujtiskia Jehová. Ye okijto: “Ijkuak onikmatki Jehová nochipa nechkakiskia, opejki nikita ken se noyolikni uan onikijto okachi kuali nimotlatlaujtiskia”. Xamo tejuan noijki ijkon otikchijkej. Axkan tikitaskej makuili tlamantli tlen uelis tikijtoskej ijkuak timotlatlaujtiaj.

6. ¿Tlen kinamiki kiselis Jehová ijkon ken kijtoua Apocalipsis 4:10, 11?

⁶ Matikueyichiuakan Jehová. Ijkuak apóstol Juan okitak itlaj tetlajtlachialti, okinmitak 24 tlayekankej okiueyichiuayaj Jehová ompa iluikak. Yejuan okiueyichiuayaj toTajtsin Dios uan okijtouayaj ‘sanwel Yejwatsi iaxka n weyílistli, mawistílistli iwa n weletílistli’ (xiktlajtolti Apocalipsis 4:10, 11). Ángeles noijki kimatij san Jehová kinamiki tikueyichiuaskej uan tiktlakaitaskej.  Yejuan kuali kixmatij porque katej iuan ompa iluikak. Yejuan kitaj ken iyelis ijkuak kitaj tlen kichiua uan non kinyolinia makiueyichiuakan (Job 38:4-7).

7. ¿Ken uelis tikueyichiuaskej Jehová ijkuak timotlatlaujtiaj?

⁷ Tejuan noijki moneki tikueyichiuaskej Jehová ijkuak iuan timotlapouiaj. Ijkon tikchiuaj ijkuak tikiluiaj tlen ye kichiua uan tlen okachi techtlajtlachialtia. Ijkuak tiktlajtoltiaj Biblia uan timomachtiaj, timochijchikauaj okachi tikixmatiskej Jehová (Job 37:23; Rom. 11:33). Satepan matikiluikan tlen kuali kichiua uan techpaktia. Noijki uelis tikueyichiuaskej Jehová ijkuak techpaleuia noso ijkuak kinpaleuia nochtin tokniuan. Jehová nochipa techmaluia (1 Sam. 1:27; 2:1, 2).

8. ¿Tlen uelis tiktlasojkamatiliskej Jehová? (1 Tesalonicenses 5:18).

⁸ Matiktlasojkamatilikan Jehová. Uelis tiktlasojkamatiliskej Jehová ijkuak timotlatlaujtiaj porque tikpiaj miak tlamantli (xiktlajtolti 1 Tesalonicenses 5:18). Matiktlasojkamatilikan nochi tlen kuali tikpiaj porque ye techmaka (Sant. 1:17). Uelis tiktlasojkamatiliskej porque tikpiaj se kuajkualtsin tlaltikpak. Kuajkualtsin otlachijchi, tiyoltokej, tikpiaj tofamilia, tikinpiaj akinmej inmiuan timouikaskej uan tlen tikchiaj tikseliskej. Noijki tiktlasojkamatiliskej porque techkauilia iuan matimouikakan.

9. ¿Tleka oui tiktlasojkamatiliskej toTajtsin Dios nochi tlen techmaka?

⁹ ¿Tleka moneki tiktlasojkamatiliskej Jehová nochi tlen techmaka? Xamo oui timotlasojkamatiskej porque axkan miakej amo motlasojkamatij. Miakej san kinekij kipiaskej tlen kinpaktia uan amo motlasojkamatij ika tlen kipiaj. Tla ijkon timokuayejyekouaj, ijkuak timotlatlaujtiskej san tiktlajtlaniskej tlen tiknekij tikpiaskej. Amo tiknekij ijkon matechpano ikinon moneki timochijchikauaskej tiktlasojkamatiliskej Jehová nochi tlen techmaka (Luc. 6:45).

10. ¿Tlen okipaleui se tokni mamotlasojkamati? (Noijki xikita foto).

¹⁰ Tla timotlasojkamatij techpaleuis matitlaxikokan ijkuak titlajyouiaj. Matikitakan tlen okipanok se tokni siuatl tlen itoka Kyung-sook. Tlen okipanok kajki itech revista Akin Tetlapouijtok 1 de enero 2015. Tlapajtijkej okiluijkej okipiaya cáncer itech ipulmón. Ye okijto: “Sapanoua onimoyolkoko. Onikmachili nochi onikpolo uan sapanoua onimomojti”. ¿Tlen okipaleui matlaxiko? Ijkuak yikochiskia, oyaya ikuapak ikal uan okitlatlaujtiaya Jehová. Ye okitlasojkamatiliaya makuili tlamantli kuali tlen okipixki non tonal. Non okiyolseui uan okiyolchika makitlasojtla Jehová. Ye okitak Jehová okipaleui uan okajsikamatki  ye techpaleuia ijkuak titlajyouiaj. Noijki okitak tikpiaj okachi miak tlamantli kuali uan amo san titlajyouiaj. Ijkon ken Kyung-sook tikpiaj miak tlamantli tlen tiktlasojkamatiliskej Jehová maski ualeua titlajyouiaj. Titlaxikouaj uan kuali timomachiliaj ijkuak tiktlasojkamatiliaj Jehová tlen techmaka.

11. ¿Tleka omonekiaya moyolchikauaskej imachtijkauan Jesús?

¹¹ Matikiluikan Jehová matechpaleui matitetlapouikan. Ijkuak Jesús yiyaskia iluikak, okinmilnamikti imachtijkauan omonekiaya tetlapouiskej “Jerusalén, Judea, Samaria; iwa itech nochi n tlaltíkpaktli” (Hech. 1:8; Luc. 24:46-48). Satepan judíos tlen otlayekanayaj okinkitskijkej Pedro uan Juan uan okinuikakej inmixpan akinmej otlanauatiayaj Sanedrín. Okinnauatijkej ayakmo matetlapouikan porque uelis itlaj kinpanoskia (Hech. 4:18, 21). ¿Tlen okichijkej nonmej ome apóstoles?

12. ¿Tlen okichijkej imachtijkauan Jesús ijkon ken kijtoua Hechos 4:29, 31?

¹² Ijkuak ijkon okinmiluijkej, Pedro uan Juan okijtojkej: “Kuali xikyejyekolikah nomejwah, kox kuali inawak Dios tlan nomejwah nontechnawatiah, ¿akin okachi moneki se makitlakita, nomejwah noso Dios? Mach weletis san tejwah matikpixtokah tlan otiktakeh iwa otikkakeh” (Hech. 4:19, 20). Teopixkej tlen otlayekanayaj okinkixtijkej nonmej apóstoles. Satepan Pedro uan Juan omonechikojkej inuan sekimej imachtijkauan Jesús. Okitlatlaujtijkej Jehová makinpaleui makichiuakan tlen ye kineki. Okiluijkej toTajtsin Dios: “Xikchiwa matimoyolchikawakah para matitetlapowikah de motlajtol iwa amitla matechmojti”. Jehová okinnankili ijkuak ijkon omotlatlaujtijkej (xiktlajtolti Hechos 4:29, 31).

13. ¿Tlen techmachtia tlen okichi tokni Jin-hyuk?

¹³ Uelis tikchiuaskej ken imachtijkauan Jesús tla techiluiskej tekiuajkej ayakmo matitetlapouikan. Matikitakan tlen okichi tokni Jin-hyuk ijkuak otsaktoka porque amo omokajkalakiaya itech política. Okinauatijkej makinmalui akinmej otsaktokaj. San uelis kintlajtlaniskia tlen okinpolouaya. Okinauatijkej amo uelis kintlapouiskia iTlajtol toTajtsin Dios. Tokni okilui Jehová makiyolchikaua para kuali tetlapouis ijkuak ueliskia (Hech. 5:29). Ye okijto: “Jehová onechnankili, onechyolchika uan onechpaleui maniyeto niixtlamatki. Opejki nikinmachtia kanaj makuili minutos akinmej otsaktokaj. Nochi youak onikinmijkuilouaya cartas uan mostlatika onikinmakaya akinmej otsaktokaj”. Uelis tikiluiskej Jehová matechyolchikaua uan matechpaleui matiyetokan tiixtlamatkej. Ijkon uelis titetlapouiskej ken okichi tokni Jin-hyuk.

14. ¿Tlen techpaleuis matitlaxikokan ijkuak titlajyouiaj? (Salmo 37:3, 5).

¹⁴ Matikiluikan Jehová matechpaleui matitlaxikokan ijkuak titlajyouiaj. Xamo titlajyouiaj porque oixpoliuik ikaj akin tiktlasojtlaj. Noijki xamo techtlajyouiltiaj, kanaj techkojkouaj, timoyolkokouaj noso tlajyouia tofamilia. Okachi titlajyouiaj porque onka miak kokolistli uan noijki guerras. Ikinon matiktlatlaujtikan Jehová ika nochi toyolo. Matikiluikan nochi tlen techtekipachoua ijkon ken timotlapouiskiaj iuan se  toyolikni. Jehová melauak techpaleuis (xiktlajtolti Salmo 37:3, 5).

15. Xikijto ken okipaleui se tokni ijkuak omotlatlaujtiaya.

¹⁵ Tla nochipa timotlatlaujtiaj, techpaleuis matitlaxikokan ijkuak titlajyouiaj (Rom. 12:12). Jehová kimati nochi tlen kinpanoua itekipanojkauan uan “kinkaki ijkuak kitlatlaujtiaj makinpaleui uan kinmakixtia” (Sal. 145:18, 19). Se precursora tlen itoka Kristie uan kipia 29 xiuitl okitak ken okipaleui Jehová. Ye san niman opejki chikauak mokokoua ikinon sapanoua omoyolkoko. Satepan inantsin okipixki se kokolistli uan ayakmo pajtiskia. Kristie okijto: “Ika nochi noyolo oniktlatlaujtiaya Jehová manechpaleui. Nochipa onimonechikouaya uan onimomachtiaya”. Noijki okijto: “Onechpaleui nimotlatlaujtis ijkuak sapanoua onitlajyouiaya. Onechyolchika nikmatis Jehová nouan okatka. Ye onechnankili ijkuak oniktlatlaujti maski amo san niman onipajtik uan sapanoua onechyolseui”. Nochipa matikilnamiktokan toTajtsin Dios “kinmakixtia akimeh nemih kemi Ye kineki” (2 Ped. 2:9).

16. ¿Tleka moneki matikiluikan Jehová matechpaleui para amo matechyoltilana tlen amo kuali?

¹⁶ Matikiluikan Jehová matechpaleui amo matechyoltilana tlen amo kuali. Tejuan titlajtlakolejkej ikinon moneki timochijchikauaskej amo matechyoltilana tlen amo kuali. Satanás mochijchikaua kichiuas matitlajtlakolchiuakan. Ye kineki matikitakan tlen amo kuali uan ijkon ayakmo kuali matimokuayejyekokan. Tla timoyolpaktiskej ika tlen amo kuali, ayakmo kuali timokuayejyekoskej uan Jehová ayakmo techitas tichipauakej. Noijki non uelis kichiuas matitlajtlakolchiuakan (Mar. 7:21-23; Sant. 1:14, 15).

17. ¿Tlen okachi moneki tikchiuaskej para amo matechyoltilana tlen amo kuali? (Noijki xikinmita fotos).

 ¹⁷ Toselti amo uelis titlaxikoskej ikinon moneki matechpaleui Jehová para amo tikchiuaskej tlen amo kuali. Jesús okijto ijkuak omotlatlaujti: “Amo xiktekawili matechyoltilana n tlajtlákoli, yej techmakixti imak n amokualitlakatl” (Mat. 6:13). Jehová kineki techpaleuis pero moneki tiktlatlaujtiskej matechpaleui. Pero amo moneki san non tikchiuaskej. Noijki moneki timochijchikauaskej amo timokuayejyekoskej tlen amo kuali para amo tikchiuaskej ken akinmej amo kitekichiuiliaj Jehová (Sal. 97:10). Moneki tiktlajtoltiskej Biblia uan timomachtiskej tla tiknekij kuali timokuayejyekoskej. Noijki moneki matimonechikokan uan matitetlapouikan. Jehová amo kitekauilis matechyoltilana tlen amo uelis tikxikoskej (1 Cor. 10:12, 13).

18. ¿Tlen moneki tikchiuaskej?

¹⁸ Moneki okachi timotlatlaujtiskej tla amo tiknekij tikkauaskej toTajtsin Dios itlamian ninmej tonalmej. Jehová kineki ‘matikiluikan tlen tikpiaj itech toyolo’ (Sal. 62:8). Ikinon nochipa matimajxilikan matiktlatlaujtikan ika nochi toyolo. Matikueyichiuakan Jehová uan matiktlasojkamatilikan nochi tlen techmaka. Matikiluikan matechyolchikaua ijkuak titetlapouiaj. Noijki matikiluikan matechpaleui matitlaxikokan ijkuak titlajyouiaj uan matechpaleui amo matechyoltilana tlen amo kuali. Nochipa matiktlatlaujtikan Jehová uan amikaj nion amitlaj matechtsakuili ijkon matikchiuakan. Pero ¿ken technankilia ijkuak tiktlatlaujtiaj? Non timomachtiskej itech okse tlamachtil.