TLAMACHTIL 10
¿Tleka moneki timoapolaktis?
“Sejse ximoapolaktikan” (HECH. 2:38, TNM).
TLAKUIKALI 34 Nikpias noyolo ajsitok
XIKILNAMIKTO a
1, 2. (1)¿Tlen panoua ijkuak ikaj moapolaktia? (2) ¿Tlen tikitaskej?
XAMO yotikinmitak akinmej moapolaktiskej. Ijkuak se tokni kintlajtlaniaj. Yejuan chikauak tlanankiliaj: “Kema”. Sapanoua yolpakij infamiliares uan inyolikniuan. Ijkuak tokniuan kisaj ijtik atl mota sapanoua yolpakij uan oksekimej tokniuan momatlaxkalouaj. Sejse semana miakej moapolaktiaj uan ijkon mochiuaj iTlaixpantijkauan Jehová.
2 Tla timokuayejyekojtok timoapolaktis, kijtosneki tikneki okachi timouikas iuan Jehová. Non sapanoua ipati porque axkan nikan tlaltikpak miakej kichiuaj tlen amo kuali (Sal. 14:1, 2). Nin tlamachtil mitspaleuis tla titelpochtli, ichpochtli noso tla yitikpia miak xiuitl. Timomachtis eyi tlamantli tlen mitspaleuis tiktekichiuilis Jehová. Nin tlamachtil techpaleuis akinmej yotimoapolaktijkej matiknekikan nochipa tiktekichiuiliskej Jehová.
XIKPATIOITA TLEN MELAUAK TLAMACHTIA BIBLIA UAN XIKCHIUA TLEN KUALI
Satanás yikipia miak xiuitl kisokiotia itoka Jehová. (Xikinmita párrafos 3 uan 4).
3. ¿Tleka tikpatioita tlen melauak tlamachtia Biblia uan tikinchiuilis tlen kuali oksekimej? (Salmo 119:128, 163).
3 Jehová technauatia matikpatioitakan tlen melauak tlamachtia Biblia (Zac. 8:19). Noijki Jesús okijto moneki tikpatioitaskej tikinchiuiliskej tlen kuali oksekimej (Mat. 5:6). Non kijtosneki ika nochi toyolo moneki tikpejpenaskej tikchiuaskej tlen kuali uan tlen chipauak ijkon ken Jehová kipaktia. ¿Tikpatioita tlen melauak tlamachtia Biblia uan tikinchiuilis tlen kuali oksekimej? Kema. Ikinon amo titlakajkayauaj uan amo mitspaktia ijkuak oksekimej tlakajkayauaj uan ijkuak oksekimej kichiua tlen amo kuali (xiktlajtolti Salmo 119:128, 163). Akinmej tlakajkayauaj kichiuaj ken Satanás (Juan 8:44; 12:31). Ye kineki kisokiotis itoka Jehová. Ijkuak opejki kixnamiki toTajtsin Dios itech xochitlali Edén uan hasta axkan kijtoua tlen amo melauak itech Jehová. Kijtoua amo kitekipachoua tlen techpanoua, tlakajkayaua uan amo techkauilia matikchiuakan seki tlamantli (Gén. 3:1, 4, 5). Miakej mokuayejyekouaj Jehová amo yolkuali porque Satanás kijtoua tlen amo melauak itech ye. Miakej amo kipatioitaj tlen melauak tlamachtia Biblia ikinon Satanás kinyolinia makichiuakan tlen amo kuali uan makintlajyouiltikan oksekimej (Rom. 1:25-31).
4. ¿Ken yokiteititi Jehová amo tlakajkayaua? (Noijki xikita dibujo).
4 Jehová amo tlakajkayaua ikinon akinmej kintlasojtla kinmachtia tlen melauak (Sal. 31:5). Ijkon kinpaleuia amo makineltokilikan Satanás. Noijki Jehová techmachtia amo matitlakajkayauakan uan matikchiuakan tlen kuali non kichiua matimoyolseuikan uan matimopatioitakan (Prov. 13:5, 6). ¿Ijkon yotechpanok? Yotikitakej san Jehová uelis techyekanas (Sal. 77:13). Ikinon tikneki tikchiuas tlen Jehová mitsnauatia (Mat. 6:33). Noijki tikneki tikinmiluis oksekimej tlen melauak tlamachtia Biblia uan tikneki tikteititis Satanás kijtoua tlen amo melauak itech toTajtsin Dios. ¿Ken uelis tikchiuas?
5. ¿Tlen uelis tikchiuas para tikinmititis oksekimej tlen melauak tlamachtia Biblia uan tikinchiuilis tlen kuali?
5 Nochi tlen tikchiuas kiteititis kox melauak amo tikneltokilia Satanás, tikneki tikinmachtis oksekimej tlen melauak tlamachtia Biblia, tikneki Jehová mamitsnauati uan kox melauak tikneki tiktlakamatis itlanauatiluan. Tla tikneki non tikchiuas, achto moneki tiktlatlaujtis Jehová uan tikiluis nochipa tiktekichiuilis. Satepan yiuelis timoapolaktis inmixpan oksekimej uan ijkon tikteititis yotimotemakak para tiktekichiuilis Jehová. Yotikitakej tla tikpatioita tlen melauak tlamachtia Biblia uan tikinchiuilia tlen kuali oksekimej, mitspaleuis ximoapolakti.
XIKTLASOJTLA JESUCRISTO
6. Ijkon ken kijtoua Salmo 45:4, ¿tleka tiktlasojtla Jesucristo?
6 ¿Tleka tiktlasojtla Jesucristo? Seki tlamantli tikajsij itech Salmo 45:4 (xiktlajtolti). Jesús otlamachti tlen melauak uan okijto ken oksekimej omonekiaya yetoskej yolyamankej uan kichiuaskej tlen kuali. Tikteititis tiktlasojtla Jesús tla tikpatioita tlen melauak tlamachtia Biblia uan tikinchiuilia tlen kuali oksekimej. Ximokuayejyeko Jesús sapanoua okipatioitak ijkon kichiuas (Juan 18:37). Pero, ¿ken okiteititi okipatioitaya yetos yolyamanki?
7. ¿Tlen okachi mitspaktia ijkuak timokuayejyekoua Jesús yolyamanki?
7 Tlen okijto uan tlen okichi Jesús okiteititi okatka yolyamanki. Ye amo kineki makiueyichiuakan oksekimej uan amo moueyineki porque nochipa kiueyichiua iTajtsin (Mar. 10:17, 18; Juan 5:19). ¿Tlen tikmachilia ijkuak timokuayejyekoua Jesús yolyamanki? ¿Mitsyolinia xiktlasojtla uan tikchiuas ken ye? Kema. ¿Tleka Jesús yolyamanki? Porque Jehová yolyamanki uan Jesús kitlasojtla iTajtsin ikinon kichiua ken ye (Sal. 18:35; Heb. 1:3). Ijkuak non tikmati mitspaleuia okachi xiktlasojtla Jesús.
8. ¿Tleka tiyolpakij Jesús matechnauati?
8 Tiyolpakij Jesús matechnauati porque san ye kuali ijkon kichiua, Jehová okimachti uan ye okitlali matechnauati (Is. 50:4, 5). Noijki ximokuayejyeko ijkuak Jesús okiteititi techtlasojtla (Juan 13:1). Jesús technauatia ikinon moneki matiktlasojtlakan, ye okijto yetoskej iyolikniuan akinmej melauak kitlasojtla uan kichiuaj tlen ye tlanauatia (Juan 14:15; 15:14, 15). ¡Sapanoua ipati timouikaskej iuan Jesús!
9. ¿Tleka tikijtouaj ijkuak Jesús omoapolakti noijki ijkon moapolaktiaj imachtijkauan?
9 Jesús noijki otlanauati imachtijkauan mamoapolaktikan (Mat. 28:19, 20, TNM). Jesús noijki omoapolakti. Maski amo okichi ijkon ken imachtijkauan kema okiteititi seki tlamantli (xikita recuadro: “ ¿Tleka Jesús amo omoapolakti ijkon ken imachtijkauan?”). Ijkuak Jesús omoapolakti okiteititi okinekiaya kichiuas tlen Jehová kineki (Heb. 10:7). Axkan noijki ijkon kichiuaj imachtijkauan. Ijkuak moapolaktiaj, non tonal kinmititiaj oksekimej yomotemakakej ixpan Jehová uan kinekij nochipa kichiuaskej tlen ye kipaktia. Ijkuak ijkon kichiuaj kiteititiaj kichiuaj ken Jesús.
10. ¿Tleka tiktlasojtla Jesús uan tlen moneki tikchiuas?
10 Axkan yitikmati Jesús iKone Jehová uan ye okipejpenki para matechnauati. Noijki tikmati Jesús yolyamanki uan kichiua ken iTajtsin. Yotimomachti ye miakej okintlamakak, okinyolchika akinmej omoyolkokouayaj uan okinpajti akinmej omokokouayaj (Mat. 14:14-21). Tikajsikamati ye kinyekana nochtin akinmej kitekichiuiliaj Jehová (Mat. 23:10). Noijki tikmati ye sapanoua kinteochiuas imachtijkauan porque ye tlanauatijtok itech iTekiuajkayo toTajtsin Dios. ¿Ken uelis tikteititis tiktlasojtla Jesús? Tla tikchiua ijkon ken ye (Juan 14:21). Tla tikneki timoapolaktis, moneki timotemakas ixpan Jehová.
XIKTLASOJTLA JEHOVÁ
11. ¿Tleka tikneki timoapolaktis?
11 ¿Tleka moneki timoapolaktis? Ijkuak Jesús okijto tlanauatil tlen okachi moneki tikpatioitaskej okijto tleka: “Xiktlasojtla Moteko Dios ika nochi moyolo, ika nochi moalma, ika nochi motlalnamikilis iwa ika nochi mochikawalis” (Mar. 12:30). ¿Tikmachilia ijkon ken kijtoua non texto?
Nochi tlen axkan tikpia omitsmakak Jehová uan noijki tlen tikpias satepan. (Xikinmita párrafos 12 uan 13).
12. ¿Tleka tiktlasojtla Jehová? (Noijki xikita dibujo).
12 Yotikitak tleka moneki tiktlasojtlas Jehová. Tikmati ye kichiua matiyoltokan uan techmaka “nochi tlan kuali iwa yekmilajka” (Sal. 36:9; Sant. 1:17). Nochi tlen tikpia omitsmakak Jehová porque ye sapanoua mitstlasojtla.
13. ¿Tleka sapanoua ipati Jehová okitemakak iKone?
13 Ijkuak Jehová okitemakak iKone okichi itlaj sapanoua ipati. ¿Tleka ijkon tikijtoua? Matimokuayejyekokan ken sapanoua techtlasojtlaj Jehová uan Jesús, ye okijto: “Notajtsi nechtlasojtla” uan “Ne niktlasojtla Notajtsi” (Juan 10:17; 14:31). Jehová uan Jesús opejkej okachi motlasojtlaj ijkuak san sekan okatkaj ompa iluikak (Prov. 8:22, 23, 30). Ximokuayejyeko, Jehová sapanoua omoyolkoko ijkuak okitak okitlajyouiltijkej uan okimiktijkej iKone. Jehová sapanoua okintlasojtlak miakej uan te noijki, ikinon okitemakak iKone para ijkon miakej uelis yoltoskej nochipa (Juan 3:16; Gál. 2:20). Tlen okichi Jehová techyolinia matiktlasojtlakan.
14. ¿Tlen okachi moneki tikpatioitas tikchiuas?
14 Axkan okachi tikixmati Jehová ikinon tiktlasojtla uan tikneki nochipa iuan timouikas. Xikneltoka kema uelis tikchiuas. Ika tlen tikijtos uan tlen tikchiuas tikyolpaktis Jehová uan ye mitsyoleua ijkon xikchiua (Prov. 23:15, 16). Tlen tikpejpenas tikchiuas kiteititis kox melauak tiktlasojtla Jehová (1 Juan 5:3). Moneki tikpatioitas tikchiuas tlen Jehová kipaktia.
15. ¿Ken uelis tikteititis tiktlasojtla Jehová?
15 ¿Ken uelis tikteititis tiktlasojtla Jehová? Achto moneki tiktlatlaujtis Jehová uan tikiluis tiktekichiuilis porque san ye akin melauak toTajtsin Dios (Sal. 40:8). Satepan yiuelis timoapolaktis inmixpan oksekimej para tikteititis tikchiuas tlen otikilui Jehová. Ken yotikitakej sapanoua tiyolpakis ijkuak timoapolaktis uan noijki sapanoua mitspaleuis. Ijkuak timoapolaktis tikteititis tikneki tikchiuas tlen otikilui Jehová uan nochipa tiktekichiuilis (Rom. 14:8; 1 Ped. 4:1, 2). Xamo non yetos oui pero mitspaleuis okachi xiyolpaki. Matikitakan tleka ijkon tikijtouaj.
16. Ijkon ken kijtoua Salmo 41:12, ¿ken kiteochiua Jehová akin kipejpena kitekichiuilis?
16 Jehová nochipa kitemaka tlen kipia. Maski san tikchiuas seki tlamantli ye uelis okachi mitsteochiuas (Mar. 10:29, 30). Axkan maski tikatej itlamian tonalmej, Jehová mitspaleuis xiyolpaki uan ye uelis kichiuas okseki tlamantli mopatka. Ikinon tla yotimoapolakti timitsyoleuaj nochipa xiktekichiuili Jehová. Ijkon okachi tiktlasojtlas, ye nochipa yoltok uan te noijki uelis tiyoltos nochipa (xiktlajtolti Salmo 41:12).
17. ¿Tlen uelis tikmakas Jehová?
17 Ijkuak ikaj motemaka ixpan Jehová uan moapolaktia, tlen kichiua sapanoua ipati. Jehová yomitsteochi porque tiyolpaki uan nochi tlen tikpia ye omitsmakak. Ye iaxka tlen onka iluikak uan tlaltikpak uan uelis tikmakas tlen ye amo kipia, uelis tiktlakamatis uan nochipa tiktekichiuilis (Job 1:8; 41:11; Prov. 27:11). Non sapanoua ipati uan uelis tikchiuas. Tla tiktlasojtla Jehová, mitsyolinis ximoapolakti.
¿TIMOAPOLAKTIS?
18. ¿Tlen uelis timotlajtlanis?
18 Yotikitakej tlen uelis tikchiuas pero san te tikpejpenas kox timoapolaktis. Uelis timotlajtlanis: “¿Yiuelis nimoapolaktis?” (Hech. 8:36, TNM). Xikilnamiki eyi tlamantli tlen moneki tikchiuas para timoapolaktis. Se, moneki tikpatioitas tlen melauak tlamachtia Biblia uan tikinchiuilis tlen kuali oksekimej. Ximotlajtlani: “¿Nikneki niyetos ijkuak nochtin makichiuakan tlen kuali uan ayakmo matlakajkayauakan?”. Ome, xiktlasojtla Jesucristo. Ximotlajtlani: “¿Nikneki iKone toTajtsin Dios manechyekana uan matechnauati?”. Eyi, xikpatioita tiktlasojtlas Jehová. Ximotlajtlani: “¿Nikneki niktekichiuilis Jehová uan nikyolpaktis?”. Tla kema tikneki ijkon tikchiuas, timitsyoleuaj ximoapolakti (Hech. 16:33).
19. ¿Tleka amo moneki timokuayejyekos kox uelis timoapolaktis? Xikyekijto (Juan 4:34).
19 Tla ayamo tikmati kox timoapolaktis, xikilnamiki tlen okijto Jesús (xiktlajtolti Juan 4:34). Jesús okijto kitekichiuiliskia iTajtsin yetoskia ken tlakuaskia. ¿Tleka ijkon okijto? Porque ijkuak titlakuaj techpaleuia. Jesús okimatiaya tlen Jehová techiluia matikchiuakan techpaleuia uan amo techiluia itlaj tlen techijtlakos. Jehová kineki ximoapolakti (Hech. 2:38, TNM). Ikinon xikneltoka, tla tikchiua tlen Jehová mitsnauatia uan timoapolaktia sapanoua mitspaleuis. Tla mitsmakaskiaj se tlakuali tlen sapanoua mitspaktia, amo timokuayejyekos kox tikkuas noso amo porque kema tikkuas. Noijki amo ximokuayejyeko kox uelis timoapolaktis.
20. ¿Tlen tikitaskej itech okse tlamachtil?
20 ¿Tleka sekimej amo moapolaktiaj? Porque xamo mokuayejyekouaj ayamo uelis moapolaktiskej. Sapanoua ipati tikpejpenas timotemakas ixpan Jehová uan timoapolaktis ikinon ximokuayejyeko kox yiuelis timoapolaktis uan okachi ximochijchikaua para ijkon tikchiuas. Pero tla yitikneki timoapolaktis, ¿tlen mitspaleuis para ijkon xikchiua? Non tikitaskej itech okse tlamachtil.
TLAKUIKALI 28 ¿Ken nimouikas iuan Jehová?
a Akinmej momachtiaj Biblia moneki mamoapolaktikan. ¿Tlen kinyolinis ijkon makichiuakan? Tla titetlasojtlaj. Axkan tikitaskej tlen uelis kitlasojtlaskej uan akinmej moneki kintlasojtlaskej. Noijki tikitaskej ken moneki kipias inemilis akin moapolaktia.
