1. ¿Ken techpaleuis tla timokuayejyekouaj ken moneki?

 MASKI yikin otimoapolaktijkej noso yikipia miak xiuitl, tinochtin moneki tikpiaskej tonemilis ijkon ken Jehová kineki. Para ijkon tikchiuaskej moneki timochijchikauaskej timokuayejyekoskej ken moneki. ¿Tleka? Porque tlen tikchiuaj kiteititia tlen timokuayejyekouaj. Tla nochipa timokuayejyekojtokej tlen tiknekij, tikijtoskej uan tikchiuaskej tlen amo kuali (Efes. 4:17-19). Tla timokuayejyekouaj tlen Jehová kipaktia tikijtoskej uan tikchiuaskej tlen ye kineki (Gál. 5:16).

2. ¿Tlen tiknankiliskej?

² Itech okse tlamachtil otimomachtijkej ualeua uelis timokuayejyekoskej tlen amo kuali. Pero uelis timochijchikauaskej amo ijkon tikchiuaskej. Para uelis timoapolaktiskej moneki amo titlajtoskej uan amo tikchiuaskej tlen Jehová kikokolia. Non moneki achto tikchiuaskej para tikkauaskej tlen techijtlakoua. Tla tikneki tikyolpaktiskej Jehová, moneki tikchiuaskej nin tlanauatil: “Ximoyolpatlatiwiah” (Col. 3:10). Itech nin tlamachtil tikinnankiliskej ninmej tlajtlanilmej: ¿Tlen kijtosneki timoyolpatlaskej? ¿Ken uelis nochipa tikteititiskej yotimoyolpatlakej?

3. ¿Tlen kijtosneki timoyolpatlaskej uan ken tikchiuaskej? (Gálatas 5:22, 23).

³ Akin moyolpatla kichiua uan mokuayejyekoua ken Jehová. ¿Ken uelis ijkon tikchiuaskej? Iespíritu santo  techpaleuia ma timokuayejyekokan uan ma tikchiuakan ken ye (xiktlajtolti Gálatas 5:22, 23). Akin moyolpatla kitlasojtla Jehová uan tokniuan (Mat. 22:36-39). Yolpaki maski tlajyouia (Sant. 1:2-4). Kuali mouika iuan oksekimej (Mat. 5:9). Kimati mochia uan kinchiuilia tlen kuali oksekimej (Col. 3:13). Mochijchikaua kichiua tlen kuali (Luc. 6:35). Ika tlen kichiua kiteititia tlaneltoka itech toTajtsin Dios (Sant. 2:18). Amo san niman kualani uan kimati monauatis para amo kichiuas tlen kiyoltilana (1 Cor. 9:25, 27; Tito 3:2).

4. ¿Tleka moneki nochi tikteititiskej tlen kijtoua Gálatas 5:22, 23? Xikyekijto.

⁴ Tla tiknekij timoyolpatlaskej, moneki tikchiuaskej ijkon ken kijtoua Gálatas 5:22, 23 uan noijki tlen kijtouaj okseki textos. * Non amo yetoskia ken tlatlamantli totlaken tikmotlalilijtiuij, techititia moneki nochi tikchiuaskej tlen kijtoua Gálatas. Tla melauak tikintlasojtlaj oksekimej, tikinchiuiliskej tlen kuali uan amo inmiuan tikualaniskej. Ik non, tla tiyolkualmej tikteititiskej tiyolyamankej uan tikmatij timonauatiskej.

5. ¿Tlen kijtosneki timokuayejyekoskej ken Cristo uan ken tikchiuaskej? (1 Corintios 2:16).

⁵ (Xiktlajtolti 1 Corintios 2:16). Para timoyolpatlaskej moneki timokuayejyekoskej ken Cristo, non kijtosneki moneki timomachtiskej ken ye mokuayejyekoua uan ijkon tikchiuaskej. Ye kiteititia kipia iespíritu toTajtsin Dios uan nochipa kichiua tlen kuali. Ijkon ken se espejo, Jesús kiteititia ken mokuayejyekoua toTajtsin Dios (Heb. 1:3). Tla timochijchikauaj timokuayejyekoskej ken Jesús, okachi kuali tikchiuaskej ijkon ken ye (Filip. 2:5).

6. ¿Tlen moneki tikilnamiktoskej ijkuak timochijchikauaj timoyolpatlaj?

⁶ ¿Melauak uelis tikchiuaskej ken Jesús? Xamo timokuayejyekouaj ye nochi kuali kichiua porque amo kipia tlajtlakoli. Tla ijkon timokuayejyekouaj, ma tikilnamiktokan eyi tlamantli. Se, Jehová otechchijchi ken ye uan Jesús,  ik non, uelis tikchiuaskej ken yejuan (Gén. 1:26). Ome, iespíritu toTajtsin Dios uelis techpaleuis ma tikchiuakan tlen tejuan xamo amo timokuayejyekouaj tikchiuaskiaj. Eyi, Jehová kijtoua ma tikteititikan tikpiaj iespíritu santo pero amo kijtoua amo ma timotlapololtikan. Ma tikilnamiktokan ye techmakas mil xiuitl uan ijkon ayakmo tikpiaskej tlajtlakoli (Apoc. 20:1-3). Jehová kineki ma timochijchikauakan uan kineki ma tikneltokakan ye techpaleuis.

7. ¿Tlen okseki timomachtiskej?

⁷ ¿Ken uelis tikchiuaskej ken Jesús? Axkan tikitaskej naui tlamantli tlen techpaleuia ma tikpiakan iespíritu santo toTajtsin Dios. Tikitaskej tlen okichi Jesús uan tlen techmachtia. Noijki tiknankiliskej seki tlamantli tlen techpaleuis ma tikitakan kox itlaj moneki tikpatlaskej.

8. ¿Ken okiteititi Jesús otetlasojtlaya?

⁸ Jesús kitlasojtla Jehová, ik non, okitekichiuiliko nikan tlaltikpak uan noijki otechpaleuiko (Juan 14:31; 15:13). Okiteititi otetlasojtlaya ijkuak okatka nikan tlaltikpak, nochipa oteiknomatiaya uan okintlasojtlaya oksekimej maski yejuan amo okitlasojtlayaj. Noijki okintlasojtlaya akinmej okintlapoui tlen kichiuas iTekiuajkayo toTajtsin Dios (Luc. 4:43, 44). Noijki okiteititi okitlasojtlaya toTajtsin Dios uan tejuan ijkuak omotekauili ma kitlajyouiltikan uan ma kimiktikan akinmej okatkaj tlajtlakolejkej. Ik non, tejuan uelis tiyoltoskej nochipa.

9. ¿Ken uelis titetlasojtlaskej ijkon ken Jesús?

⁹ Tiktlasojtlaj Jehová, ik non, ixpan otimotemaktijkej uan otimoapolaktijkej. Ijkon ken Jesús moneki tikteititiskej tikintlasojtlaj oksekimej. Apóstol Juan okijto: “Tla amo kitlasojtla se ikni non konitok [kita], kenomi weletis kitlasojtlas Dios non amo kita” (1 Juan 4:20). Ma timotlajtlanikan: “¿Melauak nikintlasojtla oksekimej? ¿Nikinmiknomati oksekimej maski nechchiuiliaj tlen amo kuali? ¿Nimajxilia nikintlapouis oksekimej para ma kixmatikan Jehová porque nikintlasojtla? ¿Ijkon nikchiua maski oksekimej amo kinpaktia uan nechkokoliaj? ¿Uelis okachi nitetlapouis?” (Efes. 5:15, 16).

10. ¿Tlen okichiuaya Jesús?

¹⁰ Jesús amo omokualaniaya iuan oksekimej uan amo omomakopaya pero amo san non okichiuaya. Ye nochipa okichiuaya tlen moneki para kuali mouikas iuan oksekimej uan okinyoleuaya ijkon ma kichiuakan tla okinekiayaj kiueyichiuaskej Jehová (Mat. 5:9, 23, 24). Miak uelta okinmilui iapóstoles amo ma moueyinekikan nion ma mokualanikan (Luc. 9:46-48; 22:24-27).

11. ¿Tlen moneki tikchiuaskej para kuali timouikaskej iuan oksekimej?

¹¹ Para kuali timouikaskej iuan oksekimej amo san moneki amo timokualaniskej. Achto moneki tejuan titetlapojpoluiskej uan tikinyoleuaskej oksekimej noijki ijkon ma kichiuakan (Filip. 4:2, 3; Sant. 3:17, 18). Ma timotlajtlanikan: “¿Tlen nikchiua para nikintlapojpoluis oksekimej? ¿Nikkokolia se tokni porque onechyolkoko? ¿Nikneki achto tokni ma nechtlapojpolui noso ne achto niktlapojpoluia? Tla moneki  nikinpaleuis oksekimej, ¿nikinyoleua ma motlapojpoluikan?”.

12. ¿Ken okiteititi Jesús okatka yolkuali?

¹² Jesús okatka yolkuali (Mat. 11:28-30). Oteiknomatiaya uan okinmajsikamatiaya oksekimej. Ijkuak se siuatl fenicia okilui ma kipajti itakotsin, Jesús kuali okinankili. Maski amo san niman okipaleui, ijkuak okitak otlaneltokaya ye okipajti itakotsin (Mat. 15:22-28). Maski Jesús otetlasojtlaya, noijki okinyektlaliaya oksekimej. Ijkuak Pedro okilui amo ma kichiua tlen Jehová okinauati Jesús, ye okiyektlali ixpan oksekimej imachtijkauan (Mar. 8:32, 33). Amo okichi para kipinauis Pedro, ijkon okichi para kinmachtis imachtijkauan amo omonekiaya moueyinekiskej. Maski Pedro omopinati tepitsin, satepan okipaleui.

13. ¿Ualeua tlen moneki tikchiuaskej?

¹³ Tla melauak tiknekij tikinpaleuiskej akinmej tikintlasojtlaj, ualeua monekis tikinyektlaliskej. Ijkuak ijkon tikchiuaskej, ma tikchiuakan ken Jesús uan ma tikinmiluikan tlen kijtouaj principios bíblicos. Ma tikintlasojtlakan, ma tikneltokakan akinmej kitlasojtlaj Jehová uan noijki techtlasojtlaj, techkakiskej ijkuak itlaj tikinmiluiskej. Ma timotlajtlanikan: “¿Nikyektlalia akin niktlasojtla ijkuak kichiua tlen amo kuali? ¿Ken nikchiua? ¿Ijkuak niktlapouia nikititia niktlasojtla noso nikajua? ¿Nikyektlalia porque iuan nikualani noso porque nikneki ma moyektlali?”.

14. ¿Ken okiteititi Jesús okichiuaya tlen kuali?

¹⁴ Jesús amo san kimati tlen kuali, noijki kichiua. Kitlasojtla iTajtsin, ik non, nochipa kichiua tlen kuali. Akin kichiua tlen kuali nochipa kinpaleuia oksekimej porque tetlasojtla. Amo san moneki tikmatiskej tlen kuali, moneki timochijchikauaskej tikchiuaskej. Uelis timotlajtlaniskej: “¿Kox ikaj uelis kichiuas tlen kuali maski amo kineki?”. Kema. Jesús okijto sekimej okinmakayaj tomin akinmej amitlaj okipiayaj uan okinmiluiayaj oksekimej tlen okichiuayaj pero Jehová amo okipatioitaya tlen yejuan okichiuayaj (Mat. 6:1-4).

15. ¿Ken uelis tikteititiskej melauak tiyolkualmej?

¹⁵ Tla melauak tiyolkualmej tikinpaleuiskej oksekimej pero amo san porque tiknekij ma techitakan. Ma timotlajtlanikan: “¿Nikmati tlen kuali uan nikchiua? ¿Tlen nechyolinia ma nikchiua tlen kuali?”.

16. ¿Tlen moneki tikchiuaskej mojmostla uan tleka?

¹⁶ Amo ma timokuayejyekokan akinmej yotimoapolaktijkej yotikpatlakej tonemilis uan ayakmo moneki timochijchikauaskej. Tlen tikchiuaj yetoskia ken totlaken, moneki tikmaluiskej para kuali ma yeto. Ik non, mojmostla moneki ma timochijchikauakan para tikpiaskej iespíritu Jehová. ¿Tleka? Porque ye nochipa tekipanojtok ika iespíritu santo (Gén. 1:2). Iespíritu santo uelis techyolinis ma tikpiakan tonemilis ken Jehová kineki. Santiago okijto: “Totlaneltokalis amitla ipati tla amitla tikchiwah” (Sant. 2:26). Iespíritu santo Jehová noijki uelis techpaleuis ma tikteititikan okseki tlamantli tlen kuali.  Ijkuak tikchiuaj ken Jehová kineki, tikteititiskej iespíritu santo techpaleuijtok.

17. ¿Tlen tikchiuaskej tla amo tikpiaj tonemilis ken toTajtsin Dios kineki?

¹⁷ Maski miakej tokniuan yikipiaj miak xiuitl omoapolaktijkej ok kitaj oui nochipa kichiuaskej ken Jehová kineki pero amo ma mosotlauakan. Ijkuak se totlaken tlen techpaktia uan tsomoni, ¿kox san niman tiktlamotlaj? Xamo tikijtsomaj uan satepan okachi tikmaluiaj. Noijki ijkon tla se tonal amo tikintlakaitaj, amo tikmatij timochiaskej, amo tikinmititiaj tikintlasojtlaj, amo ma timosotlauakan. Ma tikinmiluikan ma techtlapojpoluikan uan ijkon uelis inmiuan timouikaskej uan satepan ma timochijchikauakan ma tikteititikan tiyolkualmej.

18. ¿Tlen moneki ma tikilnamiktokan?

¹⁸ ¡Techpaleuia miak tla timomachtiaj ken kipia inemilis Jesús! Tla timochijchikauaj timokuayejyekoskej ken ye, tikchiuaskej ken ye. Ijkon okachi tikchiuaskej uan timokuayejyekoskej ken Jehová. Axkan yotimomachtijkej naui tlamantli tlen kiteititia tikpiaj iespíritu santo Jehová pero ok ma timomachtikan okseki tlamantli tlen noijki techpaleuis ijkon ma tikteititikan. Uelis okachi timomachtiskej amatlajkuilol Tlen ika momachtiaj iTlaixpantijkauan Jehová kanin kijtoua “Innemilis akinmej kichiuaj ken Cristo” uan kanin kijtoua “Itech espíritu santo poui”. Ma tikilnamiktokan tla timochijchikauaj tikpiaj tonemilis ken Jehová kineki, ye techpaleuis.