Sekimej tokniuan kitekitiltiaj tecnología para motlapouiskej iuan infamilia uan oksekimej tokniuan. Tokniuan tlen kipiaj chikauak intlaneltokilis kilnamiktokej ninmej tlajtolmej: “Akin ixtlamatki kita ouijkayotl uan motlatia, pero akinmej amo ixtlamatkej yauij tlayekapan uan tlajyouiaj” (Prov. 27:12).

Jehová kineki techmaluis, ik non, amo timouikaj iuan akinmej kinekij techxexeloskej, akinmej kinkixtiaj itech tlanechikol noso akinmej tlamachtiaj tlen amo kijtoua Biblia (Rom. 16:17; 1 Cor. 5:11; 2 Juan 10, 11). Xamo sekimej tlen touan monechikouaj amo kitlakamatij tlen kijtoua Biblia (2 Tim. 2:20, 21). Amo oui tikinpejpenaskej akinmej inmiuan timouikaskej tla tikinmitaj pero xamo oui tikitaskej tla san tikintekitiltiaj aplicaciones para tikintitlaniskej mensajes.

Tla timokuayejyekojtokej tikalakiskej itech se ueyi grupo para tikintitlaniskej mensajes, ma timotlajtlanikan akinmej ompa yetoskej. Sekimej tokniuan okalakej itech nonmej grupos uan itlaj amo kuali okitakej. ¿Ken timomaluiskej tla tikatej itech se grupo tlen sapanoua miakej? Amo uelis nochtin tikinmixmatiskej nion tikmatiskej kox nochtin mouikaj iuan Jehová. Salmo 26:4 kijtoua: “Amo nimouika iuan akinmej tlakajkayauaj uan amo nimouika iuan akinmej kitlatiaj inyelis”. Tiixtlamatkej tla san tikintitlaniliaj mensajes akinmej tikinmixmatij.

Maski amo ueyi grupo kanin tikintitlanij mensajes, moneki tikitaskej tlen timotlapouiaj uan kox tiuejkauaj. Amo moneki tiknankiliskej nochi mensajes tla amo tiknekij, maski san tlen motlapouijtoskej uan maski uejkatoskej. Pablo okilui Timoteo ma momalui para amo mouikas iuan akinmej “xolópijteh, iwa san kan [...] mokajkalakijtinemih” (1 Tim. 5:13). Non noijki uelis techpanos ika Internet.

Tokniuan tlen kipiaj chikauak intlaneltokilis amo kinteneuaj oksekimej nion kijtojtinemij tlen amo moneki momatis (Sal. 15:3; Prov. 20:19). Amo kikakij nion kijtojtinemij itlaj tlen oksekimej kijtouaj opanok uan kintlajtlachialtia uan amo kijtojtinemij itlaj tlen amo momati kox melauak opanok (Efes. 4:25). Ika jw.org uan JW Broadcasting^® tokniuan techmachtiaj ken timouikaskej iuan Jehová uan ompa kijtouaj tlen melauak panoua.

Sekimej tokniuan kintekitiltiaj aplicaciones para tlanemakaskej, tlakouaskej noso para tetlakeuaskej. Non para kitlaniskej tomin pero amo para kiueyichiuaskej Jehová. Tokniuan tlen amo kinekij kipiaskej miak tlamantli amo san kintemouaj tokniuan para kintlanemakiltiskej (Heb. 13:5).

¿Kox uelis tiktekitiltiskej nonmej aplicaciones para tiktlajtlaniskej tomin uan ijkon tikinpaleuiskej tokniuan tlen otlaxixinki inmialtepe noso okseki tlamantli okinpanok? Tikintlasojtlaj tokniuan, ik non, timochijchikauaj tikinyolchikauaskej uan tikinpaleuiskej (Sant. 2:15, 16). Pero tla non tiknekij tikchiuaskej itech se ueyi grupo, amo tikinkauiliskej tokniuan tlen tlapaleuiaj Betel uan tokniuan tlen tlayekanaj itech totlanechikol ma kichiuakan tlen moneki para tlapaleuiskej (1 Tim. 5:3, 4, 9, 10, 16). Amo tiknekij oksekimej ma kijtokan tejuan otechpejpenkej para tikinmaluiskej tokniuan.

Tiknekij nochipa tikueyichiuaskej toTajtsin Dios (1 Cor. 10:31). Ijkuak tiktekitiltiskej se aplicación para tiktitlaniskej mensajes, ma tiyetokan tiixtlamatkej, ma timomaluikan uan amo ma timouijtilikan.