1. ¿Ken techpaleuia Salmo 15:​1-5?

 YICHIKOME otimomachtijkej itekipanojkauan Jehová uelis mokalotiskej ikalijtik tla yejuan ok iuan mouikaj. ¿Tlen moneki tikchiuaskej tla tiknekij iuan timouikaskej? Salmo 15 kijtoua tlen moneki tikchiuaskej tla tiknekij okachi timotokiskej inauak toTajtsin Dios (xiktlajtolti Salmo 15:​1-5).

2. ¿Tlen omokuayejyeko David ijkuak okijto ikalijtik Jehová?

² Salmo 15 kijtoua: “Jehová, ¿akin uelis mokalotis mokalijtik? ¿Akin uelis chantis itech motepe tlen chipauak?” (Sal. 15:1). Ijkuak David okijto ‘ikalijtik’ Jehová, xamo omokuayejyeko itech tabernáculo tlen okatka ompa altepetl Gabaón. Noijki ijkuak David okijto ‘itepe’ toTajtsin Dios “tlen chipauak” xamo okinekiaya kijtos Sión tlen okatka ompa Jerusalén. Non omokauaya seki kilómetros ik sur ik kanin okatka altepetl Gabaón. David ompa okichi se kaltsintli para ompa yetoskia arca porque ayamo okichijchiuayaj templo (2 Sam. 6:17).

3. ¿Tleka miak ipati matikitakan Salmo 15? (Noijki xikita dibujo).

³ Israelitas amo keman otlapaleuijkej itech tabernáculo nion okalakej itech kaltsintli kanin okitlatiayaj arca. Pero nochtin itekipanojkauan Jehová uelis mokalotiskiaj ikalijtik tla kuali iuan omouikayaj. Tinochtin techpaktiskia matechkaloti Jehová. Itech Salmo 15 kijtoua ken moneki  tikpiaskej toyelis tla tiknekij nochipa timouikaskej iuan Jehová.

MATIKCHIUAKAN TLEN KUALI UAN AMO MATITLAJTLAKOLCHIUAKAN

4. ¿Tleka amo san moneki timoapolaktiskej tla tiknekij matechseli Jehová? (Isaías 48:1).

⁴ Salmo 15:2 kijtoua akin mouika iuan toTajtsin Dios “amo tlajtlakolchijtinemi” uan “kichiua tlen kuali”. Pero moneki nochipa timochijchikauaskej tikchiuaskej tlen kuali. ¿Melauak uelis tikchiuaskej tlen kuali? Kema. Tinochtin titlajtlakolejkej pero uelis timochijchikauaskej tiktlakamatiskej Jehová. Peua timouikaj iuan toTajtsin Dios ijkuak ixpan timotemakaj uan timoapolaktiaj. Matikilnamikikan yiuejkika amo san omonekiaya ikaj yetos israelita tla okinekiaya mokalotis ikalijtik Jehová. Ijkon moijtoua porque sekimej okinotsayaj Jehová pero amo okichiuayaj ika nochi inyolo nion okichiuayaj tlen kuali (xiktlajtolti Isaías 48:1). Pero akinmej melauak okinekiayaj mouikaskej iuan Jehová, omonekiaya kinmixmatiskej itlanauatiluan uan kintlakamatiskej. Axkan noijki amo san moneki timoapolaktiskej uan timonechikoskej tla tiknekij matechseli toTajtsin Dios. Moneki nochipa tikchiuaskej tlen kuali. Matikitakan tleka ijkon tikijtouaj.

5. ¿Tlen kijtosneki ijkuak ikaj “amo tlajtlakolchijtinemi” uan “kichiua tlen kuali”?

⁵ Akin “amo tlajtlakolchijtinemi” uan “kichiua tlen kuali” amo san monechikoua para kiueyichiuas Jehová (1 Sam. 15:22). Ikinon moneki nochipa timochijchikauaskej tiktlakamatiskej toTajtsin Dios maski ualeua tiyetoskej toselti (Prov. 3:6; Ecl. 12:​13, 14). Nochipa matiktlakamatikan Jehová maski mota amo miak ipati tlen tikchiuaskej. Ijkon tikteititiskej tiktlasojtlaj uan ye noijki techtlasojtlas (Juan 14:23; 1 Juan 5:3).

6. Ijkon ken kijtoua Hebreos 6:​10-12, ¿tlen ok moneki tikchiuaskej maski Jehová kipatioita tlen yotikchijkej?

 ⁶ Jehová sapanoua kipatioita nochi tlen yotikchijkej. Pero non amo kijtosneki nochipa techkalotis san porque yokitak tlen yotikchijkej yiuejkika ijkon ken kijtoua Hebreos 6:​10-12 (xiktlajtolti). Jehová amo kilkaua tlen yotikchijkej pero kineki matimochijchikauakan matiktekichiuilikan ika nochi toyolo ‘hasta ijkuak mochiuas tlen tikchixtokej’. Ijkon Jehová techteochiuas uan techkauilis nochipa iuan matimouikakan “tla amo timosotlauaj” (Gál. 6:9).

MATIKIJTOKAN TLEN MELAUAK

7. ¿Tleka moneki matikijtokan tlen melauak?

⁷ Salmo 15:2 kijtoua Jehová kikalotia akin “kijtoua tlen melauak”. Pero amo san kijtosneki amo titlakajkayauaskej. Jehová kineki nochipa matikteititikan uan matikijtokan tlen melauak (Heb. 13:18). Miak ipati matikijtokan tlen melauak “porque Jehová kikokolia akin kitlatia iyelis pero ye kuali mouika inuan akinmej yolmelauakej” (Prov. 3:32).

8. ¿Tlen amo moneki tikchiuaskej?

⁸ Akin kijtoua tlen melauak nochipa kintlakamati itlanauatiluan Jehová uan amo san ijkuak oksekimej kitaj (Is. 29:13). Tejuan amo tiknekij tikchiuaskej ken akinmej kintlakamatij tlanauatilmej san ijkuak oksekimej kinmitaj. ¿Tleka ijkon kinpanoua? Xamo peua mokuayejyekouaj itlanauatiluan Jehová amo kinpaleuiaj (Sant. 1:​5-8). Xamo amo kichiuaskej seki tlamantli tlen technauatia Jehová porque mokuayejyekouaj amo okachi ipati. Tla kitaskej amo tlajyouiaj ijkuak ijkon kichiuaj, satepan xamo moueyinekiskej uan okachi kinekiskej tlajtlakolchiuaskej. Ijkon kiteititiskej kipiaj ome inmixko uan ayakmo kiueyichiuaskej Jehová ijkon ken ye kineki (Ecl. 8:11). Pero tejuan tiknekij nochipa tikijtoskej tlen melauak uan amo keman tiknekij titlakajkayauaskej.

9. ¿Tlen techmachtia tlen opanok ijkuak Jesús okixmatki Natanael? (Noijki xikita dibujo).

 ⁹ Miak ipati matikijtokan tlen melauak. Jesús ijkon okiteititi ijkuak okixmatki Natanael. Opanok itlaj tetlajtlachialti ijkuak Felipe okiuikak Natanael makixmatiti Jesús. Jesús amo okixmatiaya Natanael pero ye okijto: “Xikitakan, nin tlakatl israelita amo tlakajkayaua” (Juan 1:47). Jesús okimatiaya idiscípulos okijtouayaj tlen melauak. Pero okitak Natanael okachi ijkon okichiuaya. Natanael okatka tlajtlakole ijkon ken tejuan. Pero amo okipiaya ome ixko uan amo keman otlakajkaya. Ikinon Jesús okitlakaitaya uan okilui kuali tlen okichiuaya. ¡Tejuan tipakiskiaj tla Jesús ijkon techiluiskia!

10. ¿Tleka moneki kuali matiknauatikan tonenepil? (Santiago 1:26).

¹⁰ Salmo 15 techiluia ken moneki timouikaskej inuan oksekimej. Salmo 15:3 kijtoua Jehová kikalotia akin “amo kinteneua oksekimej para amo kuali makinmitakan, amo kitetoktia tlen amo kuali uan amo kinteneua iyolikniuan”. Jehová amo techkalotis tla amo kuali tiknauatiaj tonenepil uan tikinyolkokouaj oksekimej (xiktlajtolti Santiago 1:26).

11. ¿Tlen kijtosneki ijkuak ikaj “kinteneua oksekimej para amo kuali makinmitakan” uan tlen kipanos tla amo moyolkopa?

¹¹ ¿Tlen kijtosneki ijkuak moijtoua ikaj “kinteneua oksekimej para amo kuali makinmitakan”? Kijtosneki ijkuak ikaj kijtoua tlen amo melauak para ikaj amo kuali matikitakan. Akinmej ijkon kichiuaj kinkixtiaj itech tlanechikol tla amo moyolkopaj (Jer. 17:10).

12, 13. ¿Tlen tlamantli uelis kichiuas matikinteneuakan toyolikniuan? (Noijki xikita foto).

¹² Salmo 15:3 noijki kijtoua Jehová kikalotia akin “amo kitetoktia tlen amo kuali uan amo kinteneua iyolikniuan”. ¿Tlen  tlamantli uelis kichiuas matikinteneuakan toyolikniuan?

¹³ Ualeua amo tikitaj ijkuak ikaj tikteneuaj para amo kuali makitakan oksekimej. Matikijtokan eyi tlamantli tlen uelis panos. Se, se tokni ayakmo okachi kitekichiuilia Jehová. Ome, se tokni iuan isiua ayakmo tlapaleuiaj Betel. Eyi, kanin timonechikouaj techiluiaj se tokni ayakmo tlapaleuis ken tlayekanki noso siervo ministerial. ¿Moneki tikijtojtinemiskej itlaj okichijkej ikinon ayakmo tlapaleuiskej? Tejuan amo tikmatij nochi tlen opanok. Matikilnamiktokan Jehová kikalotia akin “amo kitetoktia tlen amo kuali uan amo kinteneua iyolikniuan”.

MATIKINTLAKAITAKAN AKINMEJ KIMAUILIAJ JEHOVÁ

14. ¿Ken tikmatiskej akin amo yolkuali uan tleka moneki tikixtopeuaskej?

¹⁴ Salmo 15:4 kijtoua akin mouika iuan Jehová “kixtopeua akin amo yolkuali”. ¿Ken tikmatiskej ikaj amo yolkuali? Tejuan titlajtlakolejkej ikinon amo uelis tikijtoskej akin yolkuali. ¿Tleka? Porque ualeua sekimej kuali inuan timouikaj uan oksekimej san techkualaniaj. Ikinon moneki matikinmixtopeuakan akinmej Jehová kinmita ‘amo yolkualmej’ (1 Cor. 5:11). Moneki tikinmixtopeuaskej akinmej tlajtlakolchiuaj uan amo moyolkopaj. Noijki moneki tikinmixtopeuaskej akinmej amo kitlakaitaj tlen tikneltokaj uan akinmej amo kinpaktia matimouikakan iuan Jehová (Prov. 13:20).

15. ¿Ken tikteititiaj tikintlakaitaj akinmej “kimauiliaj Jehová”?

¹⁵ Salmo 15:4 noijki kijtoua moneki tikintlakaitaskej akinmej “kimauiliaj Jehová”. Ikinon timochijchikauaj tikteititiskej tikintlakaitaj akinmej mouikaj iuan toTajtsin Dios (Rom. 12:10). ¿Ken uelis ijkon tikchiuaskej? Salmo 15:4 kijtoua Jehová kikalotia akin “kichiua tlen kijtoua maski tlajyouis”. Ikinon tla tikchiuaskej tlen yotikijtojkej amo tikinyolkokoskej oksekimej (Mat. 5:37). Akinmej kinkalotia Jehová noijki kineki makichiuakan tlen yokijtojkej kichiuaskej. Ijkon moneki kichiuaskej akinmej yomonamiktijkej. Noijki tetajmej mamochijchikauakan makichiuakan tlen kinmiluiaj inkoneuan. Tejuan tiktlasojtlaj toTajtsin Dios uan noijki oksekimej, ikinon tiknekij timochijchikauaskej tikchiuaskej tlen tikijtouaj.

16. ¿Ken tikteititiaj tikintlakaitaj iyolikniuan toTajtsin Dios?

¹⁶ Noijki tikteititiaj tikintlakaitaj iyolikniuan toTajtsin Dios ijkuak kuali tikinseliaj uan tikinmakaj tlen tikpiaj (Rom. 12:13). Matikinyoleuakan tokniuan ijkuak timoyolpaktiskej uan ijkon okachi kuali inuan timouikaskej. Noijki okachi kuali timouikaskej iuan Jehová. Tikchiuaj ijkon ken Jehová kichiua ijkuak tikinseliaj tokniuan.

AMO MATIKIXNEKIKAN TOMIN

17. ¿Tleka Salmo 15 kijtoua ken moneki tikitaskej tomin?

¹⁷ Salmo 15 noijki kijtoua Jehová kikalotia akin “amo kitetlanetia tomin para okachi kitlanis tomin uan amo kiselia makitlaxtlauikan para kitlajyouiltis akin amitlaj itlajtlakol” (Sal. 15:5). ¿Tleka nin salmo kijtoua ken moneki tikitaskej tomin? Porque uelis tikixnekiskej tomin tla amo timomaluiskej. Okachi tikpatioitaskej tomin uan ayakmo tikintlasojtlaskej oksekimej nion timouikaskej iuan Jehová (1 Tim. 6:10). Yiuejkika sekimej tokniuan okitetlanetiayaj tomin uan okinekiayaj okachi miak makinkopilikan.  Noijki sekimej jueces okiseliayaj makintlaxtlauikan para makintlajtlakoltikan akinmej amitlaj okichijkej. Jehová kinkokolia akinmej ijkon kichiuaj (Ezeq. 22:12).

18. ¿Tlen moneki timotlajtlaniskej? (Hebreos 13:5).

¹⁸ Moneki matimokuayejyekokan ken tikitaj tomin. Matimotlajtlanikan: “¿San nimokuayejyekojtok ken nikpias tomin uan tlen nikmokouis? Tla ikaj nechtlanetia tomin, ¿nimokuayejyekoua amo san niman nikkopilis porque yikipia miak tomin? ¿Nimoueyineki porque nikpia tomin? ¿Nechixkokoua niktemakas tlen nikpia? ¿Nimokuayejyekoua tokniuan tlaixnekij porque kipiaj miak tomin? ¿San nechpaktia nimouikas inuan akinmej kipiaj miak tomin?”. Ijkon moneki matimotlajtlanikan porque okachi tikpatioitaj matechkaloti Jehová. Non techpaleuis amo matikixnekikan tomin uan Jehová amo keman techkauas (xiktlajtolti Hebreos 13:5).

JEHOVÁ KINTLASOJTLA AKINMEJ IUAN MOUIKAJ

19. ¿Tleka Jehová kineki matikchiuakan tlen kijtoua Salmo 15?

¹⁹ Salmo 15 saiktlami kijtoua: “Amo keman itlaj kipanos akin ijkon kichiua” (Sal. 15:5). Tlen okijkuilo salmista techititia tlen kineki Jehová matikchiuakan porque kineki matiyolpakikan. Non techmachtia tlen moneki tikchiuaskej tla tiknekij matechteochiua uan matechmalui (Is. 48:17).

20. ¿Ken yetoskej akinmej kinkalotia Jehová?

²⁰ Akinmej kinkalotia Jehová satepan kuali yetoskej tla nochipa tetlakamatij. Tlapejpenalmej yaskej iluikak kanin Jesús otlayektlalito para mayeto ‘tlakualkan kanin chantiskej’ (Juan 14:2). Oksekimej akinmej kichiuaj ken Cristo yolpakiskej nikan tlaltikpak porque mochiuas tlen kijtoua Apocalipsis 21:3. Sapanoua tiyolpakij porque Jehová otechyole iuan matimouikakan uan nochipa techkalotis ikalijtik.