1, 2. ¿Tleka tikijtouaj tiyetoskiaj ken kali tlen okichijchijkej Japón? (1 Corintios 15:58).

 ITECH 1978 ompa Japón okichijchijkej se kali tlen okipiaya 60 pisos. Akinmej ompa opanouayaj omotlajtlaniayaj kox tlaxikoskia non kali ijkuak tlalolinis. Pero non kali amo ouetski porque okichijchijkej chikauak uan ijkuak molinis amo maxitini. Akinmej tikchiuaj ken Cristo tiyetoskiaj ken non kali. ¿Tleka ijkon tikijtouaj?

² Akin kitekichiuilia Jehová moneki nochipa tlaneltokas uan kimatis keman teajsikamatis para tlaxikos ken non kali. Moneki tlaneltokas para kintlakamatis itlanauatiluan Jehová (xiktlajtolti 1 Corintios 15:58). Moneki kintlakamatis principios bíblicos tlen techinmaka toTajtsin Dios. Noijki teajsikamatis ijkuak moneki ijkon kichiuas (Sant. 3:17). Tla ijkon tikchiuaj, nochipa tikchiuaskej tlen moneki uan amo tikchiuaskej san tlen tejuan tiknekij. Itech nin tlamachtil tikitaskej keman moneki tikteititiskej titlaneltokaj. Noijki tikitaskej makuili tlamantli tlen kichiua Satanás para techkajkayauas uan tlen techpaleuis amo matikchiuakan tlen ye kineki.

3. ¿Tlen technauatia Jehová matikchiuakan ijkon ken kijtoua Hechos 15:28, 29?

³ Jehová toueyi Tekiua uan kinamiki techiluis tlen moneki tikchiuaskej. Noijki tlen ye techiluia amo oui tikajsikamatiskej (Is. 33:22). Itech achto siglo cuerpo gobernante okijto eyi tlamantli tlen moneki tikchiuaskej  para tikteititiskej titlaneltokaj: Se, matikueyichiuakan Jehová uan amo matikinueyichiuakan teotsitsintin. Ome, matikpatioitakan estli. Eyi, matikintlakamatikan itlanauatiluan toTajtsin Dios para amo tiauilnemiskej (xiktlajtolti Hechos 15:28, 29). ¿Ken uelis tikteititiskej titlaneltokaj tla tikchiuaj nin eyi tlamantli?

4. ¿Ken tikteititiaj san Jehová tikueyichiuaj? (Apocalipsis 4:11).

⁴ Tikueyichiuaj san Jehová uan amo tikinueyichiuaj teotsitsintin. Jehová okinmilui israelitas san ye makiueyichiuakan (Deut. 5:6-10). Ijkuak Diablo okiyejyeko Jesús, ye okiteititi moneki tikueyichiuaskej san Jehová (Mat. 4:8-10). Ikinon amo tikinueyichiuaj imágenes nion tikinueyichiuaj oksekimej. Noijki amo tikinmitaj ken dioses akinmej tlayekanaj itech religiones, políticos nion akinmej miakej kinmixmatij. Tejuan tikchiuaj tlen Jehová kineki porque ye otlachijchi uan san ye tikueyichiuaj (xiktlajtolti Apocalipsis 4:11).

5. ¿Tleka tikpatioitaj tiyoltokej uan tikpatioitaj toeso?

⁵ Tikpatioitaj tiyoltokej uan tikpatioitaj toeso. Ijkon tikchiuaj porque Jehová kijtoua itech toeso kajki toyolilis uan ye otechtliokoli toyolilis (Lev. 17:14). Ijkuak yiuejkika Jehová okinkauili itekipanojkauan makinkuakan yolkamej, okinnauati amo makikuakan inmieso (Gén. 9:4). Satepan ijkuak Jehová okinmakak israelitas iTlanauatil Moisés oksepa okinmilui amo makikuakan estli (Lev. 17:10). Itech achto siglo Jehová okichi akinmej opouiayaj itech cuerpo gobernante makinnauatikan tokniuan amo makikuakan estli nion makimotlalilikan (Hech. 15:28, 29). Tejuan noijki tiktlakamatij non tlanauatil ijkuak tikitaj ken timopajtiskej. b

6. ¿Tlen techpaleuis amo matiauilemikan?

⁶ Timochijchikauaj tikintlakamatiskej itlanauatiluan Jehová para amo tiauilnemiskej (Heb. 13:4). Apóstol Pablo okijto: “Xikpojpolokah tlan amo kuali kelewia nomokuerpo”. Tlen Pablo okijto techyoleua matimochijchikauakan amo matikchiuakan tlen techyoltilana. Timochijchikauaj amo tikitaskej nion tikchiuaskej itlaj tlen kichiuas matiauilnemikan (Col. 3:5; Job 31:1). Noijki san niman tikixtopeuaj tlen uelis kichiuas ayakmo matimouikakan iuan Jehová.

7. ¿Tlen moneki tikchiuaskej uan tleka?

⁷ Jehová kineki matiktlakamatikan ika nochi toyolo (Rom. 6:17). Tlen Jehová technauatia matikchiuakan nochipa techpaleuia uan amo uelis tikpatlaskej (Is. 48:17, 18; 1 Cor. 6:9, 10). Tiknekij nochipa tikyolpaktiskej Jehová uan tikchiuaskej ken salmista okijto: “Yonikijto nochipa nikchiuas tlen technauatia, hasta ijkuak niixpoliuis” (Sal. 119:112). Pero tikmatij Satanás kineki kichiuas ayakmo matitlaneltokakan. ¿Tlen kichiua para techkajkayauas?

8. ¿Tleka techtlajyouiltia Satanás?

⁸ Ijkuak techtlajyouiltiaj. Satanás kichiua oksekimej matechteuikan uan makichiuakan amo kuali matimomachilikan para ayakmo matitlaneltokakan. Ye kineki ayakmo matimouikakan iuan Jehová (1 Ped. 5:8). Tokniuan itech achto siglo okinteuijkej uan okinmiktijkej porque  otlaneltokayaj (Hech. 5:27, 28, 40; 7:54-60). Axkan Satanás noijki techtlajyouiltia. Ye kichiua makintlajyouiltikan tokniuan tlen chantij Rusia uan itech okseki altepemej. Noijki miakej tokniuan kinpanoua okseki tlamantli tlen kintlajyouiltia.

9. Xikyekijto tleka moneki timomaluiskej.

⁹ San ichtaka techyejyekouaj. Satanás noijki tlatlamantli techkajkayaua uan amo san techtlajyouiltia (Efes. 6:11). Matikitakan tlen okipanok se tokni tlen itoka Bob. Ye okatka itech hospital porque kichiuiliskia se operación uan okinmilui tepajtijkej amo makitlalilikan estli. Tepajti okijto kichiuaskia tlen okilui. Pero ijkuak yikichiuiliskiaj operación uan ifamilia ayakmo ompa okatka tepajti okitato. Okilui xamo amo kitlaliliskiaj estli pero ompa kipiaskiaj ijkuak kichiuiliskiaj operación. Tepajti xamo omokuayejyeko Bob kijtoskia makitlalilikan estli porque ayakmo ompa okatka ifamilia. Pero Bob okiteititi otlaneltokaya uan okijto amo kiseliskia estli maski san tlen kipanoskia.

10. ¿Tleka uelis techijtlakos tlen mokuayejyekouaj akinmej amo kitekichiuiliaj Jehová? (1 Corintios 3:19, 20).

¹⁰ Tlen mokuayejyekouaj oksekimej. Uelis tikkauaskej Jehová uan ayakmo tiktlakamatiskej tla timokuayejyekoskej ken oksekimej (xiktlajtolti 1 Corintios 3:19, 20). “Inmixtlamatilis n tlaltikpaktlakah” kichiua makichiuakan tlen yejuan kinpaktia. Matikitakan tlen okinpanok tokniuan tlen omonechikouayaj Pérgamo uan Tiatira. Sekimej opejki auilnemij uan opejki kinueyichiuaj teotsitsintin ijkon ken okichiuayaj oksekimej. Jesús okinmajuak nonmej tokniuan porque okitekauiliayaj maauilnemikan (Apoc. 2:14, 20). Axkan xamo oksekimej kinekiskej matimokuayejyekokan ijkon ken yejuan mokuayejyekouaj. Xamo tofamilia noso oksekimej techiluiskej matikchiuakan tlen techpaktia uan amo matiktlakamatikan Jehová. Uelis techiluiskej amo tlajtlakoli tikchiuaskej tlen tiknekij uan ayakmo techpaleuia tlen kijtoua Biblia.

11. ¿Tlen moneki tikixtopeuaskej?

¹¹ Ualeua xamo timokuayejyekoskej Jehová amo techyekiluia tlen moneki tikchiuaskej. Uan xamo tiknekiskej ‘tikixpanawiskeh itlajkuilol Dios’ (1 Cor. 4:6). Ijkuak Jesús nikan okatka akinmej otlayekanayaj itech religiones ijkon okichijkej. Yejuan okijkuilojkej itech Tlanauatil seki tlamantli tlen omokuayejyekouayaj, ikinon oksekimej okitakej oui kichiuaskej tlen ompa okijtouaya (Mat. 23:4). Pero Jehová techyekiluia itech iTlajtol tlen moneki tikchiuaskej uan noijki ialtepe techpaleuia matikmatikan tlen moneki tikchiuaskej. Ikinon amo timokuayejyekouaj moneki tikchiuaskej okseki tlamantli (Prov. 3:5-7). Tikchiuaj san tlen kijtoua Biblia uan amo tikchiuaj tlen tejuan timokuayejyekouaj para oksekimej noijki ijkon makichiuakan.

12. ¿Ken tlakajkayaua Satanás?

¹² Akinmej tlakajkayauaj. Satanás tlakajkayaua ika “tlamachtílisteh non amitla impati” uan tlen “kiyejyekoliah n tlaltikpaktlakah”. Ijkuak ijkon kichiua kinxexeloua miakej (Col. 2:8). Itech achto siglo Satanás otlakajkayauaya ijkuak judíos otlamachtiayaj tlen amo kijtoua Biblia uan okijtouayaj tokniuan omonekiaya kitlakamatiskej iTlanauatil Moisés. Tlen yejuan otlamachtiayaj amo melauak porque okichiuayaj amo makikakikan Jehová akin melauak ixtlamatki. Axkan itech noticias uan redes sociales  políticos kijtouaj miak tlamantli tlen amo melauak uan ijkon kichiua Satanás porque kineki techkajkayauas. Ijkuak opejki COVID-19 okijtojkej miak tlamantli tlen amo melauak. c Akinmej okineltokakej sapanoua otlajyouijkej uan omotekipachojkej pero tejuan otikchijkej tlen otechnauati ialtepe Jehová uan non otechpaleui (Mat. 24:45).

13. ¿Tleka amo matiktekauilikan itlaj matechtlapololti?

¹³ Tlen uelis techtlapololtis. Moneki matikilnamiktokan tlen okachi ipati (Filip. 1:9, 10). Onka seki tlamantli tlen uelis techtlapololtis uan techtonalpolos. Non kichiuas ayakmo matikchiuakan tlen okachi moneki. Tla okachi tikpatioitaj titlakuaskej, itlaj tikoniskej, timoyolpaktiskej uan titekipanoskej uelis techtlapololtis (Luc. 21:34, 35). Noijki tikkakij miakej mokualaniaj ika política uan okseki tlamantli. Pero amo matiktekauilikan matechtlapololti tlen tikkakij. Tla tikkakiskej non tlamantli, itech toyolo uelis tiknekiskej timokuayejyekoskej ken yejuan. Satanás tlakajkayaua ika makuili tlamantli tlen yotikitakej para amo matikchiuakan tlen Jehová kipaktia. Matikitakan tlen techpaleuis amo matechkajkayaua.

14. ¿Tlen techpaleuis amo matikkauakan Jehová?

¹⁴ Matikilnamiktokan tleka otimotemakakej ixpan Jehová uan otimoapolaktijkej. Ijkon otikchijkej porque tiknekij tikchiuaskej tlen Jehová kipaktia. Matikilnamikikan tlen otechpaleui matikneltokakan melauak tlen kijtoua Biblia. Otikixmatkej Jehová, opejki tikitaj ken toTajtsin, opejki tiktlakaitaj uan tiktlasojtlaj. Opejki okachi titlaneltokaj uan non otechpaleui matimoyolkopakan. Noijki otikkajkej tlen Jehová kikokolia uan opejki tikchiuaj tlen ye kipaktia. Otiyolpakej porque otikmatkej  toTajtsin Dios techtlapojpoluia (Sal. 32:1, 2). Opejki timonechikouaj uan opejki tikintlapouiaj oksekimej tlen otimomachtijtokaj. Axkan yotimoapolaktijkej uan tikchiuaj ken Cristo. Tikatej itech “ojtli non tewika kan nochipa se yolitos” uan tiknekij nochipa ompa tiyetoskej (Mat. 7:13, 14).

15. ¿Ken techpaleuia ijkuak timomachtiaj iTlajtol toTajtsin Dios uan timokuayejyekouaj tlen ompa kijtoua?

¹⁵ Matimomachtikan iTlajtol toTajtsin Dios uan matimokuayejyekokan tlen ompa kijtoua. Se kuauitl moneki kipias ineluayo uejkatlan para uelis tlaxikos. Tejuan noijki moneki timomachtiskej Biblia para okachi titlaneltokaskej uan titlaxikoskej. Ijkuak se kuauitl moskaltia, ineluayo noijki moskaltia uan okachi motoka. Tejuan ijkuak timomachtiaj uan timokuayejyekouaj tlen timomachtiaj okachi titlaneltokaj uan tikitaj techpaleuia tlen toTajtsin Dios techmachtia (Col. 2:6, 7). Matimokuayejyekokan ken yiuejkika itekipanojkauan Jehová okinpaleui tlen ye okinmachti, okinpaleui ijkuak okinyekanki uan okinmalui. Ezequiel okiyekitak se ángel okitamachiuaya teokali. Tlen okitak Ezequiel okipaleui okachi matlaneltoka, pero noijki techpaleuia matiktlakamatikan Jehová para matikueyichiuakan (Ezeq. 40:1-4; 43:10-12). d Tejuan noijki techpaleuia ijkuak timomachtiaj seki tlamantli oui tlen kajki itech iTlajtol toTajtsin Dios uan timokuayejyekouaj tlen otimomachtijkej.

16. ¿Ken okipaleui Bob otlaneltokaya ika nochi iyolo? (Salmo 112:7).

¹⁶ Matitlaneltokakan ika nochi toyolo. Ijkuak David otlakuikak, okijto nochipa kitlasojtlaskia Jehová. Ye okilui nochipa kitlakamatiskia ika nochi iyolo (Sal. 57:7). Noijki tejuan tla tikneltokaj Jehová uelis tiktlakamatiskej ika nochi toyolo (xiktlajtolti Salmo 112:7). Oksepa matikitakan tlen okipanok Bob tlen otikitakej itech párrafo 9. Ye otlaneltokaya ika nochi iyolo, ikinon okilui tepajti san niman yaskia tla ijkuak kichiuiliskiaj  operación ompa kipiaskiaj estli. Bob okijto: “Onikmatiaya tlen nikchiuas uan amo onechmojti tlen nechpanoskia”.

17. ¿Tlen techmachtia tlen okipanok Bob? (Noijki xikinmita fotos).

¹⁷ Bob yokipejpenka tlen kichiuas, ikinon ijkuak okatka itech hospital yokimatiaya tlen kichiuas. Ye okinekiaya kiyolpaktis Jehová. Omomachti Biblia uan amatlajkuilolmej tlen kijtouaj moneki tikpatioitaskej tonemilis uan toeso. Noijki okineltokaya Jehová kiteochiuaskia tla nochipa kitlakamatiskia. Tejuan noijki uelis titlaneltokaskej ika nochi toyolo ijkon ken okichi Bob maski san tlen techpanos.

18. ¿Tlen techmachtia tlen okichi Barac? (Xikita dibujo tlen kajki itech página 1).

¹⁸ Matikneltokakan Jehová. Matikilnamikikan ken Barac okipaleui ijkuak okichi tlen okinauati Jehová. Ijkuakon israelitas amo okipiayaj se escudo nion se lanza tlen ika moteuiskiaj. Pero Jehová okilui Barac mamoteuiti inuan Sísara uan isoldados tlen okinpiayaj miakej teposmej (Juec. 5:8). Profetisa Débora okilui Barac matemo kanin ixtlauak para moteuiskia iuan Sísara uan 900 icarros. Barac okichi tlen okilui Débora maski kanin ixtlauak oui moteuiskiaj israelitas. Jehová okichi makiaui ijkuak israelitas otemotokaj uan icarros Sísara omotsekojkej ijtik sokitl. Ijkon Jehová okipaleui Barac matlatlani (Juec. 4:1-7, 10, 13-16). Jehová noijki techpaleuis matitlatlanikan tla tikneltokaj uan tikchiuaj tlen techiluia ialtepe (Deut. 31:6).

19. ¿Tleka tiknekij nochipa titlaneltokaskej?

¹⁹ Matimochijchikauakan matitlaneltokakan axkan ijkuak ayamo tlami tlen amo kuali (1 Tim. 6:11, 12; 2 Ped. 3:17). Nochipa matitlaneltokakan maski techtlajyouiltiskej, maski san ichtaka techkajkayauaskej, maski oksekimej kinekiskej matimokuayejyekokan ken yejuan, maski oksekimej tlakajkayauaj uan maski seki tlamantli uelis techtlapololtis (Efes. 4:14). Matitlaneltokakan, nochipa matiktlasojtlakan Jehová uan matiktlakamatikan. Pero noijki matiteajsikamatikan. Itech okse tlamachtil tikitaskej Jehová uan Jesús nochipa teajsikamatij uan tikitaskej ken uelis tikchiuaskej ken yejuan.