1. ¿Tlen techpaktiskia ma kichiuakan oksekimej?

¿KEN timomachiliskia tla ikaj tikixmati, tiktlakaita, tiknotsa ika itoka uan kijtos amo mitsixmati? Xamo sapanoa timoyolkokos. ¿Tleka? Porque tinochtin tiknekij ma techixmatikan. Uan amo tiknekij san ma techixmatikan. Tiknekij ma techpatioitakan uan noijki tlen tikchiuaj (Núm. 11:16; Job 31:6).

2, 3. ¿Tlen panos tla tiknekij ma techpatioitakan? (Xikita dibujo kanin peua tlamachtil).

² Tla amo timomaluiskej, amo san tiknekiskej ma techixmatikan. Satanás uan nochi tlen kiyekana kineki ma timokuayejyekokan miak ipati ma timoueyinekikan uan miakej ma techixmatikan. Tla ijkon tikchiuaskej, amo  tikueyichiuaskej Jehová ken moneki uan amo tiktlakaitaskej (Apoc. 4:11).

³ Ijkuak Jesús nikan okatka, sekimej teopixkej okinekiaya ma kinpatioitakan. Jesús okinmilui imachtijkauan: “Ximotlachilikah de akimeh kitemachtiah n tlanawatílistli, porke kiwilitah nemiskeh ika intlakeh weweyak, iwa kinekih makinyektlajpalokah ijkuak nemi tiánkistli. Iwa itech sinagogas kiwilitah motlaliskeh kan motlaliah n tlayakankeh, iwa kiwilitah motlaliskeh kan okachi kualteh lojarteh itech ilwimeh”. Noijki okijto: “Ninteh kiseliskeh okachi weyi tlaijyowílistli” (Luc. 20:46, 47). Uan Jesús okipatioitak tlen okichi se siuatl tlen omikik inamik ijkuak okitemakak tomin ika nochi iyolo maski amo ikaj okitak (Luc. 21:1-4). Ijkon okiteititi ken kita Jehová ijkuak ikaj kineki ma kipatioitakan. Nin tlamachtil techpaleuis ma tikpatioitakan tlen Jehová kipatioita.

4. ¿Tlen okachi moneki tikpatioitaskej uan tleka?

⁴ ¿Akin tiknekij okachi ma techpatioita? Amo tiknekij ma techixmatikan ken miakej kinpatioitaj porque kuali momachtiaj, kinpatioitaj porque kipiaj miak tomin uan oksekimej miakej kinmixmatij. Tlatitlanil Pablo okijto: “Pero axa nomejwah ya nonkixmatih Dios, noso okachi kuali Dios ya nomechixmati. ¿Kenijki oksepa nonkinekih nonkitlakitaskeh tlan amitla ipati nion tepalewia, iwa oksepa manomechmapixtinemi?” (Gál. 4:9). ToTajtsin Dios akin ueyi tekiua itech nochi semanauak uelis ‘techixmatis’. ¡Melauak se tlateochiualistli! Jehová kuali techixmati, sapanoa techtlasojtla uan kineki touan mouikas. Ye kineki touan mouikas porque ye otechchijchi (Ecl. 12:13, 14).

5. ¿Tlen moneki tikchiuaskej para timouikaskej iuan toTajtsin Dios?

⁵ Moisés omouikaya iuan toTajtsin Dios. Ijkuak okilui Jehová: “Nikchiuas tlen techtlajtlanilia porque techyolpaktia uan nikmati motoka” (Éx. 33:12-17). Jehová techixmati ika totokayo. Pero ¿tlen moneki tikchiuaskej para iuan timouikaskej? Moneki tiktlasojtlaskej uan tikmaktiliskej toyolilis (xiktlajtolti 1 Corintios 8:3).

6, 7. ¿Tlen tlamantli uelis kichiuas ayakmo ma timouikakan iuan Jehová?

⁶ Moneki tikpatioitaskej timouikaskej iuan toTajtsin Dios. Ijkon ken Pablo okintlajkuilili tokniuan tlen ochantiayaj Galacia, amo ma tikpatioitakan “tlan amitla ipati nion tepalewia” nin kijtosneki amo ma tikchiakan ma techselikan oksekimej (Gál. 4:9). Tokniuan tlen ochantiayaj Galacia yokinmixmatiaya Jehová. Pablo okinmilui okitemoayaj tlen amo itlaj ipati. Okintlajtlani: “¿Tleka oksepa nankitemoaj tlen amo itlaj ipati?”.

⁷ ¿Tejuan noijki uelis ijkon techpanos? Kema. Ijkuak otikixmatkej Jehová xamo otikkajkej nochi tlen kiyekana Satanás ijkon ken okichi Pablo (xiktlajtolti Filipenses 3:7, 8). Ijkuakon  xamo ayakmo otimomachtijkej escuela, ayakmo otikselijkej se kuali tekitl noso ayakmo otiknekej tiktlaniskej miak tomin. Xamo kuali otitlatsotsonayaj noso kuali otimauiltiayaj uan xamo tiktlaniskiaj miak tomin uan miakej techixmatiskiaj. Pero otikkajkej nochi non tlamantli (Heb. 11:24-27). ¿Ok tikpatioitaj nochi non tlamantli tlen otechpaktiaya? Amo kuali tla oksepa ijkon tikchiuaskej. Tla amo timomaluiskej, uelis oksepa tiknekiskej tikchiuaskej tlen amo itlaj ipati.

8. ¿Tlen techpaleuis ma timouikakan iuan Jehová?

⁸ ¿Tlen techpaleuis nochipa ma timouikakan iuan Jehová uan amo ma tiknekikan ma techpatioitakan akinmej amo kitekichiuiliaj? Moneki ma tikilnamiktokan ome tlamantli. Achto, Jehová nochipa kinmilnamiktok akinmej yolmelajkej (xiktlajtolti Hebreos 6:10, TNM; 11:6). Tinochtin techpatioita Jehová uan amo keman techixtopeua tla tiyolmelajkej. Porque Jehová nochipa “kinmixmatok nochteh iaxkawah” (2 Tim. 2:19). Jehová kinmaluia akinmej yolmelauakej uan kimati ken kinpaleuis ijkuak moyejyekoa intlaneltokilis (Sal. 1:6; 2 Ped. 2:9).

9. ¿Ken okimakixti Jehová ialtepe?

⁹ Yimiak uelta Jehová yokiteititi kinseliaj akinmej kitekichiuiliaj (2 Crón. 20:20, 29). Jehová okinmakixti israelitas ijtik Mar Rojo ijkuak faraón uan isoldados okinekiayaj kinmiktiskej (Éx. 14:21-30; Sal. 106:9-11). Oksekimej sapanoa okintlajtlachialti porque opanok kanaj cuarenta xiuitl uan ok omotlapouiayaj itech non tlamantli (Jos. 2:9-11). Jehová amo techilkauas ijkuak Gog de Magog kinekis techtlajyouiltis uan techpaleuis ken yiuejkika okichi (Ezeq. 38:8-12). Ijkuakon tiyolpakiskej porque otimochijchikajkej ma techpatioita Jehová uan amo oksekimej.

10. ¿Tlen okse tlamantli moneki tikilnamiktoskej?

¹⁰ Okse tlamantli tlen moneki tikilnamiktoskej Jehová uelis techmakas tlen amo tikchiaj. Ye amo techteochiuas tla tiknekij oksekimej ma kitakan tlen tikchiuaj. ¿Tleka? Porque Jesús okijto techpatioitaskej tla oksekimej kitaj tlen tikchiuaj uan non amo kuali (xiktlajtolti Mateo 6:1-5, TNM). Pero noijki okijto iTajtsin kipatioita tlen tikchiuaj maski oksekimej amo kitaj. Jehová kita tlen tikchiuaj uan ualeua techmaka tlen amo otikchiayaj. Ma tikitakan ken kichiua.

11. ¿Ken okiteititi Jehová okipatioitaya María?

¹¹ Jehová okipejpenki se ichpochtli itoka María tlen ayamo omonamiktiaya para ma yeto inantsin Jesús. Ye ochantiaya Nazaret itech se altepetsintli tlen amo miakej okixmatiayaj uan noijki teokali uejka omokauaya (xiktlajtolti Lucas 1:26-33). ¿Tleka Jehová  okipejpenki María? Ángel Gabriel okilui María toTajtsin Dios “satlawel omitstiochi”. María okiteititi omouikaya iuan Jehová ijkuak omotlapoui iuan Elisabet (Luc. 1:46-55). Jehová okitak María okatka yolmelajki, ik non, okiteochi.

12. ¿Ken okipatioitakej Jesús ijkuak oneski?

¹² Ijkuak oneski Jesús, Jehová okitematilti itlaj miak ipati. ¿Ken okitematilti? Ye amo okinmatilti tekiuajkej tlen okatkaj Jerusalén uan Belén kanin nesiskia Jesús. Okinualtitlanki ángeles para ma kinmatiltikij akinmej otlajpiayaj Belén kanin nesiskia Jesús (Luc. 2:8-14). Uan okitatoj konetsintli (Luc. 2:15-17). María uan José oyolpakej ijkuak okitakej Jesús okitlakaitayaj. Ma tikitakan tlen kichiua Jehová uan tlen kichiua Diablo. Ijkuak Satanás okintitlanki tlachixkej ma kitlajpalotij Jesús uan itatajuan, nochtin tlen ochantiayaj Jerusalén okimatkej oneski konetl (Mat. 2:3). Pero ijkuakon okinmiktijkej miakej chokotsitsintin (Mat. 2:16).

13. ¿Ken okipatioitakej Jesús ijkuak okiuikakej itech teokali?

¹³ Israelitas okinnauatijkej tla se siuatl okipiaya ikone, omonekiaya ma kimaktiliti Jehová se tototl ijkuak okajxitiaya cuarenta tonalmej. María uan José okiuikakej Jesús uan onejnenkej kanaj nueve kilómetros para ajsitiuij Belén (Luc. 2:22-24). Xamo ijkuak onejnentiayaj María omotlajtlaniaya kox teopixki kipatioitaskia Jesús porque kichiuaskia miak tlamantli satepan. Jesús okipatioitakej pero amo ken María omokuayejyekoaya. Jehová okitekitilti se tlakatl “yolmilajka” tlen omotokayotiaya Simeón uan Ana tlen okatka iprofeta toTajtsin Dios para ma kitematiltikan Jesús yetoskia Cristo noso Mesías (Luc. 2:25-38).

14. ¿Tlen tlateochiuali okimakakej María?

¹⁴ ¿Ok okipatioitak Jehová María porque okiskalti Jesús? Kema. Jehová otlanauati ma kijkuilokan itech Biblia nochi tlen okichi. María amo otetlapoui iuan Jesús eyi xiuitl uan tlajko. ¿Tleka? Xamo omoka Nazaret porque omikik inamik. Ik non, amo okitak nochi tlen kualtsin okinpanok oksekimej. Pero ijkuak omikik Jesús ompa okatka (Juan 19:26). Noijki ompa okatka Jerusalén iuan imachtijkauan Jesús itech xiuitl 33 ijkuak okiselijkej espíritu santo (Hech. 1:13, 14). Xamo María noijki okipejpenkej ma yeto tlapejpenal. Tla noijki okipejpenkej, noijki kajki iluikak uan nochipa yetos iuan Jesús. ¿Melauak okipatioitakej nochi tlen okichi?

15. ¿Ken okiteititi Jehová okipatioitaya Jesús ijkuak nika okatka?

¹⁵ Jesús amo okinekiaya ma kipatioitakan teopixkej uan tekiuajkej. Ye okinekiaya ma kipatioita Jehová. Kanaj eyi uelta okiualtlapoui uan okiyolchika. Ijkuak omoapolakti itech aueyatl Jordán Jehová okijto: “Ye nin Nokone non saikpanoa niktlasojtla, iwa satlawel nechyolpaktia” (Mat. 3:17). Ijkuakon san ye Juan okikak tlen okiualijto Jehová. Ijkuak opoliuiaya kanaj se xiuitl para kimiktiskiaj  Jesús, eyi imachtijkauan okikakej ijkuak Jehová okiualijto: “Ye ni Nokone non niktlasojtla, non Ne onikpejpenki xikkakikah itlajtol” (Mat. 17:5). Uan saiktlami Jehová okiualtlapoui iKone ijkuak ayamo okimiktiaya (Juan 12:28).

16, 17. ¿Tlen okimakakej Jesús?

¹⁶ Jesús okimatiaya kiteluiskiaj okiuijuikalti toTajtsin Dios, ik non, tlajyouiskia ijkuak kimiktiskiaj. Pero ye okitlatlaujti toTajtsin Dios ma kipaleui ma mochiua tlen ye okinekiaya (Mat. 26:39, 42). Jesús okixiko ijkuak okitlajyouiltijkej uan omochijchika ma kiseli iTajtsin (Heb. 12:2, TNM). ¿Ken okiteititi Jehová okipatioitaya Jesús?

¹⁷ Ijkuak Jesús nikan okatka, okitlatlaujti iTajtsin oksepa ma kipatioitakan itech iluikak (Juan 17:5). Ye amo okichiaya ma kimakakan okse tekitl. Pero ¿tlen okichi Jehová? Okimakak itlaj tlen amo okichiaya. ToTajtsin Dios okiyoliti uan “okiweyijkatlali”. Uan Jehová okichi ayakmo keman ma miki (Filip. 2:9; 1 Tim. 6:16, TNM). * ¡Melauak okiseli se tlateochiualistli porque okatka yolmelajki!

18. ¿Tlen techpaleuis amo ma tiktemokan ma techpatioitakan oksekimej?

¹⁸ ¿Tlen techpaleuis amo ma tiktemokan ma techpatioitakan oksekimej? Ma tikilnamiktokan Jehová nochipa techteochiuas tla tiyolmelajkej uan techmakas miak tlamantli tlen amo tikchiaj. Amo tikmatij ken techteochiuaskej satepan. Pero moneki ma tikxikokan nochi ouijkayotl uan ma tikilnamiktokan yitlamis nochi tlen kiyekana Satanás (1 Juan 2:17). Jehová techtlasojtla, ik non, amo kilkauas tlen otikchijkej uan tlasojtlalistli tlen otikteititijkej itech itoka (Heb. 6:10, TNM). Ye techteochiuas uan techmakas tlen amo tikchiaj.