1, 2. Ijkon ken kijtoa Hebreos 13:4, ¿tlen moneki tikchiuaskej?

TINOCHTIN tiktlakaitaj Jehová. Kineki ma tiktlakaitakan uan ye noijki techtlakaitas (1 Sam. 2:30; Prov. 3:9; Apoc. 4:11). Noijki kineki ma tikintlakaitakan tekiuajkej (Rom. 12:10; 13:7). Pero Jehová noijki kineki ma motlakaitakan akinmej yomonamiktijkej.

² Tlatitlanil Pablo okijkuilo: “Nochteh akimeh yomonamiktijkeh moneki mamotlakitakah, machipaujkanemikah iwa amo mamomekatikah” (Heb. 13:4). Pablo okijto amo san ma tikajauilmatikan nin tlamantli. Porque okinnauati ma motlakaitakan akinmej yomonamiktijkej. ¿Axkan ijkon motlakaitaj akinmej yomonamiktijkej?

3. ¿Ken moneki timotlakaitaskej akinmej yotimonamiktijkej? (Xikita dibujo kanin peua tlamachtil).

³ Tikchijtokej ken Jesús tla timotlakaitaj akinmej yotimonamiktijkej. Ijkuak fariseos okitlajtlanijkej kox ikaj uelis mokajkauas inmixpan tekiuajkej, okijto Jehová achto okinamikti Adán uan Eva. Okijto: “Tlakatl kikauas itajtsin uan inantsin uan mosetilis iuan isiua uan moneki mochiuaskej san se”. Noijki okijto: “Tlan Dios  yokiseitili, amaka makinxexelo” (xiktlajtolti Marcos 10:2-12; Gén. 2:24).

4. ¿Ken okinekiaya Jehová ma yetokan akinmej yomonamiktijkej?

⁴ Jesús kuali okimatoka Jehová ye achto otenamikti uan okijto amo keman ma mokajkauakan. Jehová amo okilui Adán uan Eva uelis mokajkauaskiaj. Okinmilui okinekiaya san sekan ma yetokan.

5. ¿Tlen panoa ijkuak ikaj miki inamik?

⁵ Adán uan Eva otlajtlakolchijkej, ik non, omopatlak seki tlamantli. Opejki ixpoliuij uan tlajyouiaj akinmej yomonamiktijkej. Ijkon okijto Pablo ijkuak okijto akinmej kichiuaj ken Cristo ayakmo moneki kitlakamatiskej tlanauatil tlen okijkuilo Moisés. Okijto uelis oksepa monamiktiskej akinmej yoixpoliuik innamik (Rom. 7:1-3).

6. ¿Ken okiteititi yiuejkika toTajtsin Dios kineki ma motlakaitakan akinmej yomonamiktijkej?

⁶ Tlanauatil tlen Jehová okinmakak israelitas, techiluia seki tlamantli itech akinmej yomonamiktijkej. Yiuejkika tlakamej okinpiayaj miakej insiuauan. Nin tlamantli yokichiuayaj ijkuak toTajtsin Dios okinmakak tlanauatilmej israelitas. Tlanauatil tlen okitemakak Jehová okinpaleuiaya siuamej uan konemej amo ma kintlajyouiltikan. Okijtoaya tla se israelita omonamiktiaya iuan se siuatl uan satepan okse okimotemoliaya, omonekiaya kimakas tlen ika mopanoltis tlen achto iuan omonamikti. ToTajtsin Dios okinnauati tlakamej tlen okinpiayaj miakej insiuauan ma kinmaluikan tlen achto inmiuan omonamiktijkej (Éx. 21:9, 10). Tejuan ayakmo tiktlakamatij non Tlanauatil pero toTajtsin Dios kineki kuali ma tiyetokan akinmej yotimonamiktijkej. Nin techmachtia moneki timotlakaitaskej akinmej yotimonamiktijkej.

7. ¿Ken okinpaleuiaya israelitas Deuteronomio 24:1?

⁷ ¿Ken okitaya toTajtsin Dios akinmej omokajkauayaj inmixpan tekiuajkej? Jehová okinkauili israelitas ma mokajkauakan inmixpan tekiuajkej maski ye kineki ma motlakaitakan akinmej yomonamiktijkej (xiktlajtolti Deuteronomio 24:1). Tlakatl uelis kikajkauaskia isiua tla okitaya itlaj amo kuali. Pero omonekiaya itlaj tlen sapanoa tepinati (Deut. 23:14). Ijkuak Jesús okatka nikan tlaltikpak, miakej judíos san tlen amo okitemoayaj para kinkajkauaskiaj insiuauan inmixpan tekiuajkej (Mat. 19:3). Pero tejuan amo tiknekij ijkon tikchiuaskej.

8. ¿Ken mokuayejyekoa Jehová ijkuak mokajkauaj inmixpan tekiuajkej?

⁸ Ijkuak okatka profeta Malaquías noijki miakej tlakamej okinkajkauayaj insiuauan inmixpan tekiuajkej. Satepan omonamiktiayaj iuan se ichpochtli tlen amo okiueyichiuaya Jehová. Malaquías okijto tlen omokuayejyekoaya Jehová. Okijkuilo: “Ne amo nechpaktia ma mokajkauakan inmixpan tekiuajkej” (Mal. 2:14-16). Nin mouika iuan tlen okijto ijkuak okinamikti Adán uan Eva, okijto tlakatl “mosetilis iuan isiua uan moneki mochiuaskej san se” (Gén. 2:24). Jesús okiteititi mokuayejyekoa ken iTajtsin ijkuak okijto: “Tlan Dios yokiseitili, amaka makinxexelo” (Mat. 19:6).

9. ¿Tlen kijtosneki tlen kijtoa Marcos 10:11, 12?

⁹ Xamo ikaj motlajtlania: “¿Ika tlen tlamantli uelis ikaj kikajkauas inamik inmixpan tekiuajkej uan oksepa uelis monamiktis?”. Jesús okiyekijto tlen omokuayejyekoaya ijkuak ikaj kikajkaua inamik: “Akin kikajkawa isiwa iwa monamiktia iwan ok se, nin tlakatl san kimomekatijtok iwa tlajtlakolchijtok inawak non achto isiwa, iwa tla n siwatl kikajkawa iokich  iwa monamiktia iwa ok se, nin siwatl noiwa san momekatijtok” (Mar. 10:11, 12; Luc. 16:18). Nin kiteititia Jesús kineki ma timotlakaitakan akinmej yotimonamiktijkej. Tlajtlakolchiuas akin kitemoa san tlen amo para kikajkauas isiua uan oksepa monamiktis. Noijki ijkon panoa ijkuak siuatl kikajkaua inamik. Pero ixpan toTajtsin Dios yejuan amo mokajkauaj. Noijki Jesús okijto akin kikajkaua isiua inmixpan tekiuajkej, kitekauilia ma momekati. ¿Tleka? Porque ijkuak se siuatl ayakmo kipia inamik, moneki oksepa monamiktis uan ijkon inamik kimakas tlen ika mopanoltis. Ik non, kiteititis momekatis ijkuak oksepa monamiktis.

10. ¿Tlen tlamantli kitekauilia ikaj ma mokajkaua inmixpan tekiuajkej uan oksepa uelis monamiktis?

¹⁰ Onka san se tlamantli para ikaj mokajkauas inmixpan tekiuajkej. Jesús okijto: “Ne nomechilia, sanwel tla isiwa omomekati, weletis itlákau kikajkawas isiwa. Porke akin mosiwakajkawa iwa monamiktia iwan ok se siwatl kijtosneki san kimomekatijtok” (Mat. 19:9). Noijki ijkon okijto ijkuak otlamachti itech tepetl (Mat. 5:31, 32). Ome uelta ijkon okijto. Kijtosneki momekatia se tlakatl tla moteka iuan se siuatl maski ayamo monamiktiaj. Noijki momekatia ijkuak ikaj auilnemi porque kineki kitlanis tomin uan ijkuak se tlakatl moteka iuan se siuatl tlen amo inamik. Noijki ijkuak se tlakatl moteka iuan se tlakatl uan se siuatl moteka iuan se siuatl noso ijkuak ikaj moteka iuan se yolkatl. Ma tikijtokan se tlakatl kikajkayaua isiua. Nin siuatl ye kijtos kox kikajkauas inamik inmixpan tekiuajkej. Tla mokajkauaskej inmixpan tekiuajkej, toTajtsin Dios ayakmo kinmita san se tlalnakayotl.

11. ¿Uelis ikaj kijtos amo kikajkauas inamik inmixpan tekiuajkej maski okikajkaya?

¹¹ Jesús amo okijto moneki mokajkauaskej inmixpan tekiuajkej tla tlakatl noso siuatl kikajkayaua inamik. Porque se siuatl uelis kijtos ok yetos iuan inamik maski okikajkaya. Xamo kitlapojpoluis, kitlasojtlas uan mochijchikauaskej oksepa kuali yetoskej. Pero tla mokajkauaskej inmixpan tekiuajkej, siuatl xamo  ayakmo monamiktis uan kipias ouijkayotl. Oui kipias tlen ika mopanoltis uan ayakmo kipias akin iuan motekas uan xamo noijki moyolkokos. Tla kinpia ikoneuan oui kinmiskaltis uan kinmachtis tlen kijtoa Biblia (1 Cor. 7:14). Nin tlamantli kiteititia akinmej kipejpenaj mokajkauaskej inmixpan tekiuajkej kipiaskej ouijkayotl.

12. ¿Tlen okipanok Oseas?

¹² Profeta Oseas noijki okijto toTajtsin Dios kineki ma motlakaitakan akinmej yomonamiktijkej. Jehová okilui Oseas ma monamikti iuan se siuatl tlen omotokayotiaya Gómer. Nin siuatl satepan auilnemiskia uan kinpiaskia ikoneuan pero amo yetoskiaj ikoneuan Oseas. Satepan Gómer okipixki se ikone iuan Oseas (Os. 1:2, 3). Satepan xamo omotekak iuan okse tlakatl uan okipixki se takotsin uan se chokotsin. Oseas amo okikajka isiua inmixpan tekiuajkej maski okikajkaya. Satepan nin siuatl okikajte inamik uan omochi tlakeuali. Pero Oseas okiko non siuatl (Os. 3:1, 2). Jehová okika ijkon ma kipano Oseas para kiteititis miak uelta okintlapojpolui israelitas maski okinueyichijkej teotsitsintin. ¿Tlen techmachtia nin tlamantli?

13. ¿Tleka Oseas oksepa okinotsato isiua uan tlen techmachtia nin tlamantli?

¹³ Nin tlamantli techmachtia tla se tlakatl kikajkayaua isiua, moneki ye siuatl kipejpenas kox ok iuan yetos inamik. Jesús okijto akin okikajkayajkej tla kineki uelis kikajkauas inamik inmixpan tekiuajkej uan uelis oksepa monamiktis. Pero tla kineki uelis kitlapojpoluis inamik. Amo tlajtlakolchiuas tla amo kikajkauas inamik inmixpan tekiuajkej. Biblia kijtoa Oseas oksepa okinotsato isiua uan oksepa iuan ochantik. Pero isiua ayakmo ikaj iuan motekaskia. Noijki Oseas amo san niman iuan omotekak (Os. 3:3, nota, nwt-E). Satepan Oseas oksepa iuan omotekak. Nin siuatl okiteititi ijkuak israelitas oksepa okiselijkej ma kinnauati Jehová (Os. 1:11; 3:3-5). ¿Tlen techmachtia nin tlamantli? Tla tlakatl kikajkayaua isiua uan siuatl kijtoa iuan chantis uan oksepa iuan motekas, kiteititis yokitlapojpolui (1 Cor. 7:3, 5). Ayakmo uelis mokajkauaskej inmixpan tekiuajkej. Tlakatl uan isiua moneki motlakaitaskej ijkon ken kineki Jehová.

14. Ijkon ken kijtoa 1 Corintios 7:10, 11, ¿tlen kinpanoa sekimej tlen yomonamiktijkej?

¹⁴ Akinmej tikchiuaj ken Cristo moneki ma timotlakaitakan akinmej yotimonamiktijkej ken Jehová kineki uan Jesús. Pero ualeua sekimej san kajauilmatij nin tlamantli. Ijkon kichiuaj porque titlajtlakolejkej (Rom. 7:18-23). Noijki ijkon okichijkej sekimej tokniuan itech achto siglo. Pablo okijkuilo “tesiwa amo makikajkawa iokich”. Pero sekimej amo okitlakamatkej tlen okijkuilo Pablo (xiktlajtolti 1 Corintios 7:10, 11).

15. ¿Tlen moneki kichiuaskej akinmej yomonamiktijkej maski kixnamikij ouijkayotl uan tleka?

¹⁵ Pablo amo okijto tleka sekimej tokniuan omoxelojkej. Amo omoxelojkej porque tlakatl okikajkaya isiua. Porque tlamo siuatl uelis kikajkauaskia inamik inmixpan tekiuajkej uan ye uelis oksepa monamiktiskia. Pablo okijto tla moxeloskiaj, siuatl amo uelis monamiktis noso tla ye kinekiskia uelis kitlapojpoluiskia inamik. ToTajtsin Dios ok kinmita ken san se. Pablo okinmilui tla amo omomekatijkej, omonekiaya ma mochijchikauakan oksepa kuali ma mouikakan maski kixnamikij ouijkayotl. Noijki uelis kinmiluiskej tlayekankej ma kinpaleuikan. Kinpaleuiskej ika Biblia uan amo kinmiluiskej tlen mokuayejyekoaj.

16. ¿Tlen moneki kichiuaskej tokniuan tlen innamik amo kitekichiuilia Jehová uan kipiaj ouijkayotl?

 ¹⁶ Xamo okachi oui ijkuak innamik tokniuan amo kitekichiuilia toTajtsin Dios. Pero ¿moneki moxeloskej porque kipiaj ouijkayotl? Biblia kijtoa uelis mokajkauaskej inmixpan tekiuajkej ijkuak ikaj auilnemij. Pero amo kijtosneki mokajkauaskej porque kipiaj ouijkayotl. Pablo okijto: “Tla se siwatl kipia iokich amo tlaneltokak, iwa ye kineki yetos íwa, amo makikajkawa iokich” (1 Cor. 7:12, 13). Ok techpaleuia tlen kijtoa nin principio.

17, 18. ¿Tleka sekimej tokniuan kipejpenaj amo moxeloskej maski kixnamikij ouijkayotl?

¹⁷ Ualeua siuatl tlen inamik amo kitekichiuilia Jehová xamo kijtoa ayakmo kineki iuan chantis. Porque xamo sapanoa kiuiteki uan noijki sapanoa kikojkokoa noso uelis kimiktis. Noijki xamo ayakmo kineki kinmakas tlen ika mopanoltiskej ikalchanejkauan noso amo kikauilia ma kiueyichiua Jehová. Ijkuak ijkon panoa, sekimej tokniuan kipejpenaj kikajkauaskej innamik porque sapanoa tlajyouiaj. Pero oksekimej tokniuan amo ijkon kichiuaj. Kipejpenaj chantiskej iuan innamik maski kintlajyouiltiaj uan mochijchikauaj kuali yetoskej. ¿Tleka ijkon kichiuaj?

¹⁸ Akinmej moxeloaj, ok kipiaj ouijkayotl uan toTajtsin Dios ok kinmita san se tlalnakayotl. Pablo okijto tleka moneki yetoskej san sekan maski tlajyouiaj. Ye okijkuilo: “Porke n teokich non amo tlaneltokak kiselia itlatiochiwalis Dios por isiwa. Iwa n siwatl non amo tlaneltokak, kiselia itlatiochiwalis Dios por iokich. Tla amo ijkó yetoskia, nomopilwah mach kiseliskiah itlatiochiwalis Dios, pero axa yolchipawakeh” (1 Cor. 7:14). Miakej tokniuan kipejpenaj mokauaskej iuan innamik tlen amo kitekichiuilia Jehová maski kixnamikij ouijkayotl. Sekimej yolpakij ijkuak kitaj innamik peua kitekichiuilia Jehová (xiktlajtolti 1 Corintios 7:16; 1 Ped. 3:1, 2).

19. ¿Tleka kuali mouikaj tokniuan tlen yomonamiktijkej?

¹⁹ Jesús okijto keman moneki mokajkauaskej inmixpan tekiuajkej akinmej yomonamiktijkej. Noijki Pablo okijto tleka amo moneki moxeloskej akinmej yomonamiktijkej uan ken kita toTajtsin Dios. Jesús uan Pablo okinekiayaj ma motlakaitakan akinmej kitekichiuiliaj Jehová. Axkan itech tlanechikolmej tikinmitaj miakej tokniuan tlen yomonamiktijkej kuali mouikaj. Xamo noijki kanin tejuan timonechikoaj tikinmitaj yolpakij tlen yomonamiktijkej. Tlakatl amo kikajkayaua isiua uan kitlasojtla uan siuatl noijki kitlasojtla inamik uan kitlakaita. Ninmej tokniuan kiteititiaj uelis timotlakaitaskej akinmej yotimonamiktijkej. Tiyolpakij porque miakej akinmej yomonamiktijkej kichiuaj ken kijtoa iTlajtol toTajtsin Dios: “N tlakatl kikajtewas ita iwa ina iwa moseitilis iwan isiwa. Ijkó n tlakatl iwan siwatl mochiwaskeh sa se kuerpo” (Efes. 5:31, 33).