Itech non tlamachtil otikitakej tejuan uan ángeles moneki tikchipauaskej itoka Jehová. San Jehová kinamiki tlanauatis ikinon moneki mochipauas itoka. Moneki tikteititiskej nochipa tiktlakamatij Jehová tla tiknekij tikchipauaskej itoka.

¿Tleka axkan okachi moneki matikchipauakan itoka toTajtsin Dios? Matikitakan eyi tlamantli tlen techpaleuis ijkon matikchiuakan.

Satanás okisokioti itoka Jehová itech xochitlali Edén. Tlen okilui Eva omoajsikamatki toTajtsin Dios amo kipaktia kitemakas tlen kipia uan okinnauati makichiuakan miak tlamantli tlen oui. Satanás okixnamik toTajtsin Dios uan ijkon okijto ye tlakajkayaua. Ye okisokioti itoka toTajtsin Dios ijkuak ijkon okichi. Ijkon omochi Diablo tlen kijtosneki okitene toTajtsin Dios para amo kuali makitakan oksekimej (Juan 8:44). Eva okineltokak tlen Satanás okilui ikinon ayakmo okitlakamatki toTajtsin Dios uan ijkon okijto amo kinamiki tlanauatis (Gén. 3:1-6). Axkan noijki Satanás ok kisokiotia itoka toTajtsin Dios porque kineki oksekimej makineltokakan ye amo yolkuali. Ikinon amo kitlakamatij Jehová akinmej kineltokaj tlen Satanás kijtoua. Tejuan timoyolkokouaj porque okisokiotijkej itoka toTajtsin Dios. Ikinon tinochtin titlajyouiaj uan techpanoua tlen amo kuali.

Jehová yokijto kichipauas itoka para kuali mayeto nochi tlen okichijchi. Biblia kijtoua ye kineki ika nochi iyolo kichipauas itoka (Ezeq. 36:23). Jesús okijto: “Mamochipaua motoka”. Ijkon okiteititi moneki matimotlatlaujtikan mamochipaua itoka Jehová (Mat. 6:9, TNM). Biblia kijtoua miak uelta matikueyichiuakan itoka Jehová. Matikitakan kanin ijkon kijtoua: “Xikueyichiuakan itoka Jehová ijkon ken kinamiki” (1 Crón. 16:29; Sal. 96:8). “Xiktlakuikilikan itoka tlen ueyititok” (Sal. 66:2). “Nochipa nikueyichiuas motoka” (Sal. 86:12). Se tonal toTajtsin Dios oualtlajto iluikak ijkuak Jesús okatka itech teokali ompa Jerusalén. Ijkuakon Jesús okilui iTajtsin: “Maweyijkachito Motoka”. Jehová okinankili: “Yonikweyijkachi iwa oksepa nikweyijkachiwas” (Juan 12:28). a

Jehová kineki nochipa matikueyichiuakan itoka. ¿Tlen panos ijkuak tlamis tlanauatis Cristo mil xiuitl uan ijkuak saiktlami techyejyekoskej? ¿Ken timomachiliskej ijkuak tikitaskej tlen kipanos itoka Jehová? ¿Nochipa tiktlakamatiskej uan moteititis san ye kinamiki tlanauatis? Tejuan ayakmo  techyejyekoskej kox tiktlakamatiskej toTajtsin Dios. ¿Tleka ijkon tikijtouaj? Porque ayakmo tiyetoskej titlajtlakolejkej uan tikteititiskej amo keman tikkauaskej Jehová. Amikaj kijtos Jehová amo kinamiki tlanauatis porque moteititis san ye okachi kuali tlanauatia. Nochtin ángeles uan tejuan tikseliskej matechnauati toTajtsin Dios. ¿Ok tikpatioitaskej itoka Jehová non tonal?

Ijkuakon itoka Jehová yetos chipauak porque amikaj kisokiotis nion ikaj kiteneuas. Itoka Jehová tikpatioitaskej nikan tlaltikpak uan noijki ijkon kichiuaskej iluikak. Porque Jehová ok kichiuas miak tlamantli tetlajtlachialti. Ijkuakon Jesús kiteititis yolyamanki porque kimaktilis Tekiuajkayotl iTajtsin. Ijkon toTajtsin Dios “kinawatijtos nochi tlan onka” (1 Cor. 15:28). Ijkuakon “momakixtiskeh ipilwah n Dios”, nochipa yolpakiskej uan chantiskej nikan tlaltikpak (Rom. 8:21). Jehová kichiuas tlen okinekiaya porque san sekan yetoskej ifamilia tlen katej iluikak uan akinmej katej tlaltikpak (Efes. 1:10).

¿Ken momachiliskej akinmej pouij itech ifamilia Jehová? Nochtin akinmej katej iluikak uan tlaltikpak kinekiskej kiueyichiuaskej itoka Jehová ika nochi inyolo. David okijkuilo: “Maueyitito toTajtsin Dios Jehová [...]. Nochipa makiueyitlalikan itoka tlen ueyititok” (Sal. 72:18, 19). Nochipa tikueyichiuaskej itoka Jehová porque ye kichiuas miak tlamantli yankuik uan tetlajtlachialti.

Itoka Jehová kiteititia ye ueyititok. Ikinon ijkuak tikkakij itoka timokuayejyekouaj ye tetlasojtla (1 Juan 4:8). Nochipa tikilnamiktoskej Jehová techtlasojtla porque otechchijchi, topatka okitemakak iKone uan okiteititi san ye kuali tlanauatia. Noijki tikitaskej Jehová sapanoua techtlasojtla porque techteochiuas miak. Nochipa tikitaskej ken uelis okachi iuan timouikaskej. Noijki nochipa tiktlakuikiliskej itoka ika nochi toyolo (Sal. 73:28).