OMPA océano Atlántico atl omotlauitekiaya itech barco tlen oyaya Europa. Ompa oyaya tokni George Young uan okilnamik ken otlapaleui okachi ma motetlapoui ompa Brasil. * Pero omokuayejyekojtiaya itech España uan Portugal kanin peuas tetlapouiskia uan ompa amo okachi omotetlapouiaya. Ijkuak ajsiskia, omonekiaya nochi kiyektlalis para ma kinkakikan tlapoualismej tlen kintemakaskia tokni Joseph F. Rutherford uan omonekiaya kintemajmakas 300,000 amatsitsintin.

Tokni George oajsito Lisboa (Portugal) itech 1925. Ijkuakon itech non altepetl nochtin otlajyouijtokaj. Revolución tlen omochi 1910 okichi ayakmo ma tlanauati san se tekiua uan okichijkej ayakmo ma mokajkalakikan teopixkej. Maski nochi kuali yokatka, ok okixnamikiayaj okseki ouijkayotl.

Ijkuak tokni George otlayektlali nochi para ma kikakikan tokni Rutherford, tekiuajkej okitlalijkej se tlanauatil itoka ley marcial uan nochtin otlajyouijkej. Se secretario tlen opouiaya itech Sociedad Bíblica Británica y Extranjera okilui tokni George xamo sapanoa kitlajyouiltiskiaj. Pero tokni okitlane se gimnasio tlen okipiaya Escuela Secundaria Camões.

Uan 13 de mayo okitemakakej tlapoualistli uan miakej omonechikojkej. Kalmej okintlalilijkej amamej uan noijki itech periódicos okitematiltijkej tlapoualistli tlen omotokayotiaya “¿Ken tichantiskej nochipa itech tlaltikpak?”. Akinmej okinkokoliayaj tokniuan san niman okitematiltijkej itech periódico oajsitoj sekimej “profetas tekajkayakeh”. Noijki kanin okatka gimnasio okintemajmakakej miakej amatsitsintin kanin okijtoayaj amo melauak tlen ompa tlamachtiskia tokni Rutherford.

Maski miak tlamantli okichijkej, omonechikojkej kanaj dos mil uan ok kanaj dos mil amo okalakej. Sekimej okinekiayaj kimatiskej hasta otlejkokej itech escaleras uan oksekimej omotlalijkej ipan aparatos tlen ompa okintekitiltiayaj.

Pero opanok seki tlamantli. Akinmej otechkokoliayaj otechtsatsajtsilijkej uan okinpojpostekej sillas. Tokni Rutherford amo okualanki uan otlejkok ipan se mesa uan ijkon oksekimej kikakiskiaj. Otlanki kanaj tlajko yoak uan kanaj mil doscientos okikajtejkej intoka uan kanin ochantiayaj para ma kintitlanilikan amatlajkuilolmej. Uan mostlatika se periódico itoka O Século otlajto itech tlapoualistli tlen okitemakak tokni Rutherford.

 Uan septiembre 1925 ompa Portugal opejki kitlajtolkuepaj La Torre del Vigía ika portugués uan axkan moixmati ken Akin Tetlapouijtok (nin revista achto yokikixtiayaj ompa Brasil). Ijkuakon se tlakatl itoka Virgílio Ferguson omomachtijtoka Biblia uan okijto yaskia Portugal tetlapouiti. Ye uan tokni George otlapaleuijkej ijkuak okichijchijkej se Betel tsikitsin ompa Brasil kanin omomachtiayaj Biblia. Virgílio uan isiua itoka Lizzie oyajkej Portugal uan okajsitoj tokni George. Melauak kuali oajsitoj porque kipaleuiskiaj tokni George ma tetlapoui ompa Unión Soviética uan itech okseki altepemej.

Okachi opejki tlajyouiaj tokniuan ijkuak soldados otlanauatijkej yetoskia san se tekiua. Pero tokni Virgílio amo omosotla. Ye okinmalui tokniuan, okinpaleui okachi ma tetlapouikan uan okinmiluito tekiuajkej ma kikauilikan ikalijtik ma monechikokan tokniuan. Uan octubre 1927 okiluijkej ma monechikokan ikalijtik.

Oajsik se xiuitl ijkuak okijtojkej soldados ma tlanauati san se tekiua, cuatrocientas cincuenta okitlajtlankej revista Akin Tetlapouijtok. Noijki okintlajtlankej amatsitsintin uan amatlajkuilolmej uan nin okinpaleui ma tetlapouikan Angola, las Azores, Cabo Verde, Goa (India), Madeira, Mozambique uan Timor Oriental.

Itlamian 1920 ompa Lisboa oajsito se jardinero tlen ichan Portugal uan itoka Manuel da Silva Jordão. Ijkuak ochantiaya Brasil okikak tlapoualistli tlen okitemakak tokni George. Uan okineltokak tlen tlamachtia Biblia uan okijto tetlapouiskia iuan tokni Virgílio. Ik non, Manuel omochi colportor, ijkuakon ijkon okintokayotiayaj precursores. Omomiaktilijkej tokniuan porque totoka okinkixtiayaj amatlajkuilolmej uan totoka okintitlaniayaj ompa Lisboa.

Tokni Virgílio uan isiua omokuepkej Brasil itech 1934. Pero miakej yokinmachtijka ompa Portugal. Maski akinmej ochantiayaj Europa otlajyouijtokaj porque opanotoka guerra civil tlen okichijkej españoles uan Segunda Guerra Mundial, tokniuan okipiayaj chikauak intlaneltokilis. Amo miakej okatkaj tokniuan pero itech 1947 opejki momiaktiliaj porque oajsito se misionero tlen itoka John Cooke. Ijkuakon opejki okachi momiaktiliaj maski itech 1962 tekiuajkej ayakmo okinkauilijkej ma tetlapouikan. Uan diciembre 1974 ijkuak tekiuajkej okinmiluijkej oksepa uelis tetlapouiskiaj, yokatkaj kanaj 13,000 tokniuan itech non altepetl.

Axkan tetlapouiaj kanaj 50,000 tokniuan ompa Portugal uan itech isla Azores uan Madeira. Ok ompa katej inmixuiuan tlen okikakej tlapoualistli tlen okitemakak tokni Rutherford itech 1925.

Tiktlasojkamatiliaj Jehová uan tokniuan porque otetlapouijkej ijkuak yikin opejkej uan okichijkej ken tlatitlanil Pablo okijto ‘maniktekichiwili n Cristo kan amo judíojteh’ (Rom. 15:15, 16). (Tlen kajki itech kali kanin tekitij iTlaixpantijkauan Jehová ompa Portugal).