1, 2. (1) ¿Tlen kichiuaj sekimej para kichiuaskej ken kinekij? (2) ¿Uan tlen kinpanoa?

AXKAN miakej kijtoaj amo ma kinchikoitakan uan ma kinkauilikan ma kichiuakan san tlen kinekij. Itech miakej altepemej ayakmo kinekij ma kintlajyouiltikan, amo ma kinchikoitakan uan kinekij kipiaskej tomin. Sekimej kinekij ma kinkakikan tlen mokuayejyekoaj, kinekij kichiuaskej tlen kitaj okachi kuali uan yetoskej ken yejuan kinekij. Nochtin kinekij kichiuaskej ken mokuayejyekoaj.

² Para ijkon kichiuaskej, miakej monechikoaj uan yauij ojtli para kijtoskej tlen kinekij kichiuaskej uan noijki ualeua moteuiaj. ¿Kinkauiliaj ma kichiuakan tlen kinekij? Amo. Ualeua san okachi tlajyouiaj uan kinmiktiaj. Melauak mochiua tlen okijkuilo Salomón: “Nochtin san nochipa motlajyouiltiaj ijkuak san yejuan monauatiaj” (Ecl. 8:9).

3. ¿Tlen moneki tikchiuaskej para melauak tiyolpakiskej?

³ Biblia techiluia tlen moneki tikchiuaskej para melauak tiyolpakiskej uan tikchiuaskej miak tlamantli. Santiago  okijto: ‘Ximoyekketsa itech n yekmilajka tlanawátili iwa xikmopanti, iwa xikchiwa tlan kijtoa non tlanawátili’ (Sant. 1:25). Jehová okitemakak “yekmilajka tlanawátili”, ik non, ye okachi kimati ken tiyolpakiskej uan kuali tiyetoskej. Jehová okimakak Adán uan Eva nochi tlen omonekiaya para ma yolpakikan.

4. ¿Tlen okipiaya Adán uan Eva? (Xikita dibujo kanin peua tlamachtil).

⁴ Ome capítulos tlen ika peua Génesis, kijtoa itech xochitlali amo itlaj okinpoloaya, amo omomojtiayaj nion ikaj otlajyouiaya. Adán uan Eva melauak oyolpakiayaj amo ken tejuan san titlajyouiaj. Amo okintekipachoaya tlen kikuaskej, okipiayaj tekitl, amo omokokoayaj uan amo keman mikiskiaj (Gén. 1:27-29; 2:8, 9, 15). ¿Okichiuayaj nochi tlen okinekiayaj? Ma tikitakan.

5. ¿Tlen moneki para melauak tiyolpakiskej?

⁵ Sekimej kijtoaj tla tiknekij tiyolpakiskej moneki tikchiuaskej nochi tlen tiknekij maski ualeua techpanos tlen amo kuali. Se amochtli tlen itoka The World Book Encyclopedia kijtoa: “Ijkuak ikaj kineki kichiuas tlen kineki, kijtosneki ineuian kipejpenas tlen kichiuas”. Noijki kijtoa: “San uelis tikchiuaskej tlen tiknekij tla akinmej tlanauatiaj techkauiliaj ma tikchiuakan tlen moneki uan tla kuali tlen tikchiuaskej”. Nin kijtosneki para tikchiuaskej tlen tiknekij uan nochi kuali ma kisa moneki techmakaskej seki tlanauatilmej. ¿Pero akin moneki kintlalis tlanauatilmej?

6. (1) ¿Tleka san Jehová kinamiki tlanauatis? (2) Xikijto kox uelis tikchiuaskej nochi tlen tiknekij.

⁶ Moneki ma tikilnamiktokan san Jehová kichiua tlen kineki. ¿Tleka? Porque okichijchi nochi tlen onka uan ye “Torey non nochipa yolitok” akin kipia sapanoa miak chikaualistli (1 Tim. 1:17; Apoc. 4:11). Ma tikilnamikikan ueyi tekiua David okijkuilo san Jehová akin okachi ueyititok (xiktlajtolti 1 Crónicas 29:11, 12). Ik non, akinmej katej iluikak uan tejuan amo ueli tikchiuaj nochi tlen tiknekij. Jehová kinekij ma tikajsikamatikan san ye kinamiki tlanauatis uan san ye kichiua tlen kineki. Uan san ye uelis kijtos tlen tikchiuaskej uan tlen amo. Ijkon okichi ijkuak opejki kichijchiua nochi tlen onka.

7. (1) ¿Tlen tlanauatilmej otechmakak Jehová? (2) ¿Uan tleka tiyolpakij ijkuak ijkon tikchiuaj?

⁷ Adán uan Eva okichiuayaj nochi tlen okinekiayaj pero Jehová okinmakak seki tlanauatilmej. Maski amo omotayaj ken tlanauatilmej pero omonekiaya tlakuaskej, mijyotiskej, okochiayaj uan okseki tlamantli. Uan amo omokuayejyekoayaj nin okintsakuiliaya para kichiuaskej tlen okinekiayaj. Jehová okichi nin tlamantli ma kinyolpakti (Sal. 104:14, 15; Ecl. 3:12, 13). ¿Amo melauak techpaktia tikijyotilanaskej ejekatl chipauak, tikkuaskej tlen techpaktia uan kuali tikochiskej? Nochi nin tlamantli techpaktia tikchiuaskej. Uan tikmatij Adán uan Eva noijki okinpaktiaya ijkon kichiuaskej.

8. ¿Tlen okinauatijkej Adán uan Eva uan tleka?

 ⁸ Jehová okinauati Adán uan Eva ma kinpiakan miakej inkoneuan uan ma kimaluikan tlaltikpak (Gén. 1:28). ¿Kijtosneki amo okinkauili ma kichiuakan tlen okinekiayaj? Amo. Okinkauili iuan ma tekipanokan uan ijkon tlaltikpak kikuepaskiaj se xochitlali uan inkoneuan nochipa yolpakiskiaj (Is. 45:18). Axkan miakej amo monamiktiaj uan akinmej yomonamiktijkej amo kinekij kinpiaskej inkoneuan pero non amo kijtosneki amo kinekij kitlakamatiskej tlen otlanauati Jehová. Pero miakej monamiktiaj uan kinpiaj inkoneuan maski tlajyouiaj (1 Cor. 7:36-38). ¿Tleka ijkon kichiuaj? Porque ijkon yolpakij (Sal. 127:3). Tla Adán uan Eva kitlakamatiskiaj Jehová, nochipa yolpakiskiaj inmiuan inkoneuan.

9. ¿Tleka kinpaleuiskia Adán uan Eva tlen kijtoa Génesis 2:17?

⁹ Jehová okinmakak okse tlanauatil Adán uan Eva, okinmilui mikiskiaj tla amo kitlakamatiskiaj: “Pero kuauitl tlen kitekauilia ma kimatikan tlen kuali uan tlen amo kuali, amo moneki tikkuas itlakilo porque ijkuak tikkuas, melauak timikis” (Gén. 2:17). ¿Non se tlanauatil tlen amo omonekiaya uan amo kinkauiliskia ma kichiuakan nochi tlen okinekiayaj? Amo. Non kinpaleuiskia. Akinmej momachtiaj Biblia kijtoaj non tlanauatil omonekiaya uan kinpaleuiskia. Uan noijki kijtoaj: “San toTajtsin Dios kimati ‘tlen kuali uan tlen amo kuali’ [...] para nochtin. Para melauak yolpakiskiaj omonekiaya tlaneltokaskej itech toTajtsin Dios uan kitlakamatiskiaj. Tla amo kitlakamatiskiaj, san yejuan kipejpenaskiaj tlen kuali uan tlen amo kuali”. Uan nin amo uelis inneuian kichiuaskiaj.

10. ¿Tleka amo san se tlamantli kijtosneki tikpejpenaskej tlen tikchiuaskej uan tikijtoskej tlen kuali uan tlen amo?

¹⁰ Miakej mokuayejyekoaj tlanauatil tlen okimakakej Adán uan Eva amo okinkauiliaya ma kipejpenakan tlen kichiuaskej. Pero amo melauak. Uelis tikpejpenaskej tlen tikchiuaskej pero non amo kijtosneki tejuan tikijtoskej tlen kuali uan tlen amo kuali. Adán uan Eva uelis kipejpenaskiaj kox kitlakamatiskiaj Jehová noso amo. Pero san Jehová kinamiki kijtos tlen kuali uan tlen amo kuali. Nin okijtosnekiaya “kuauitl tlen kitekauilia ma kimatikan tlen kuali uan tlen amo kuali” tlen okatka ompa xochitlali Edén (Gén. 2:9). Tejuan amo tikmatij kox nochi kuali kisas tlen tikpejpenaj tikchiuaskej uan noijki amo tikmatij kox melauak techpaleuis. Ik non, ualeua sekimej kipejpenaj tlen okachi kuali pero non san okachi kintlajyouiltia (Prov. 14:12). Ijkon techpanoa porque tinochtin titlajtlakolejkej. Tlanauatil tlen Jehová okimakak Adán uan Eva, okiteititi omonekiaya kitlakamatiskej tla okinekiayaj melauak yolpakiskej. ¿Pero tlen okichijkej?

11, 12. ¿Tleka ayakmo oyolpakik Adán uan Eva? Xikijto se neskayotl.

¹¹ Adán uan Eva okipejpenkej amo kitlakamatiskej Jehová. Uan Eva okikak  tlen Satanás okilui: “Motlaposkej namoixtololouan uan nanyetoskej ken Dios, nankimatiskej tlen kuali uan tlen amo kuali” (Gén. 3:5). ¿Pero melauak okichijkej nochi tlen okinekiayaj? Amo. Tlen okipejpenkej okiteititi Satanás san okinkajkaya. San niman otlajyouijkej porque amo okitlakamatkej toTajtsin Dios (Gén. 3:16-19). ¿Tleka? Porque Jehová amo otechchijchi para tikijtoskej tlen kuali uan tlen amo kuali (xiktlajtolti Proverbios 20:24; Jeremías 10:23).

¹² Nin yetoskia ken akin kiuika se avión. Tla kineki kuali ajsiti kanin yaui, moneki yas kanin moneki. Moneki kinmitas mapas, kuali kitekitiltis tlen kipia avión uan kintlakamatis akinmej kiluiaj kanin ik yas. Pero tla amo tetlakamatis, uelis kinkuitikisa okseki aviones. Ijkon okipanok Adán uan Eva, okichijkej tlen san yejuan okinekiayaj. Amo okitlakamatkej toTajtsin Dios. ¿Uan tlen opanok? Opejki tlajtlakolchiuaj uan noijki okinpanoltilijkej nochtin inkoneuan uan opejki mikij (Rom. 5:12). Adán uan Eva ayakmo okichijkej tlen okinekiayaj porque yejuan okipejpenkej tlen kuali uan tlen amo. Ayakmo oyolpakej ken ijkuak okitlakamatiayaj Jehová.

13, 14. ¿Ken melauak tiyolpakiskej?

¹³ Miakej kijtoaj okachi tiyolpakiskej tla techkauiliskej ma kichiuakan tlen san tejuan kinekij. Pero titlajyouiskej tla tikchiuaskej nochi tlen tiknekij. Porque yetoskia ken se cuchillo tlen sapanoa tlateki. Melauak tiyolpakij tla tikchiuaj tlen tiknekij. Pero ¿ken tiyetoskiaj tla tikchiuaskej tlen san tejuan tiknekij? Ik non, amochtli tlen otikitakej itech párrafo makuili, kijtoa: “Tlanauatilmej tlen axkan tikinpiaj moneki kijtoskej tlen tikchiuaskej uan tlen amo”. Melauak oui ninmej tlanauatilmej. Ik non, katej miakej abogados  uan jueces para techiluiskej tlen kijtosnekij uan ken tikintlakamatiskej.

¹⁴ Pero Jesús okijto ken melauak tiyolpakiskej. Okijto: “Tla nomejwah nochipa nonkitlakitaskeh notlajtol, milák nonyetoskeh notlamachtijkawah. Iwa nonkixmatiskeh tlan milák, iwa tlan milák nomechmakixtis” (Juan 8:31, 32). Moneki tikchiuaskej ome tlamantli tla tiknekij tiktlakamatiskej tlen okijto Jesús. Achto moneki tikseliskej tlen otlamachti uan noijki tikchiuaskej ken ye. Melauak tiyolpakiskej tla ijkon tikchiuaskej. ¿Tleka? Porque Jesús okijto: “Nochteh akimeh kichiwa tlajtlákoli kijtosneki n tlajtlákoli kinnawatijtok kemi se tekowa”. Noijki okijto: “Tla Ikone Dios nomechmakixtis, nomejwah de milajka nonmomakixtiskeh” (Juan 8:34, 36).

15. ¿Tleka tlen okijto Jesús melauak ‘techmakixtis’?

¹⁵ Tlen Jesús okinmilui imachtijkauan amo ken axkan tlen kinekij kichiuaskej tekiuajkej uan oksekimej. Ijkuak Jesús okijto: “Tla Ikone Dios nomechmakixtis, nomejwah de milajka nonmomakixtiskeh” porque ye okijto kitlajtlamis tlajtlakoli tlen techtlajyouiltia. Tlajtlakoli technauatia uan amo techkauilia ma tikchiuakan tlen kuali. Sapanoa techtlajyouiltia, timotekipachoaj uan satepan timikij (Rom. 6:23). Tlatitlanil Pablo kuali okimatiaya tlen kijtosneki technauatia tlajtlakoli (xiktlajtolti Romanos 7:21-25). Ijkuak ayakmo tiyetoskej titlajtlakolejkej, Melauak tiyolpakiskej ken ijkuak okatka Adán uan Eva.

16. ¿Ken melauak tiyolpakiskej?

¹⁶ Ijkuak Jesús okijto “tla nomejwah nochipa nonkitlakitaskeh notlajtol” kijtosneki moneki tikchiuaskej seki tlamantli para uelis techmakixtis. ¿Tlen moneki tikchiuaskej? Akinmej tikchiuaj ken Cristo, yotikkajkej nochi uan tikchiuaj tlen Jesús kijtoa (Mat. 16:24, TNM). Ijkon ken okijto Jesús melauak tiyolpakiskej ijkuak techmakaskej nochi tlateochiualistli porque ye yotechtlaxtla.

17. (1) ¿Tlen kichiuas melauak ma tiyolpakikan? (2) ¿Tlen timomachtiskej chikome?

¹⁷ Melauak tiyolpakiskej tla tikchiuaskej tlen otlamachti Jesús. Uan satepan techpaleuis para ayakmo ma tikpiakan tlajtlakoli uan ayakmo timikiskej (xiktlajtolti Romanos 8:1, 2, 20, 21). Chikome timomachtiskej ken tikueyichiuaskej Jehová ika tlen tikpejpenaj tikchiuaskej porque ye nochipa kichiua tlen kineki.