Jueces 7:1-25
7 Ijkuakon Jerubaal noso Gedeón uan nochtin tlen iuan okatkaj, san kualkan* omejkej uan omokauatoj inakastlan ameyali Harod. Madianitas okatkaj ik inorte kanin okatka Gedeón uan oksekimej, ompa tlamaniktli inakastlan tepetsintli Moré.
2 Ikinon Jehová okilui Gedeón: “Amo uelis nimitsinmaktilis madianitas porque tikinpia miakej soldados. Tla ijkon nikchiuas, israelitas uelis moueyinekiskej uan kijtoskej: ‘San tejuan toselti otimomakixtijkej’.
3 Ikinon nimitstlatlaujtia ijkin xikinmilui mosoldados: ‘Akin momojtia uan hasta uiuioka mamokopa ikalijtik’”. Gedeón ijkon okinyejyeko isoldados. Oyajkej 22,000* uan san 10,000* tlakamej omokajkej.
4 Ijkuakon Jehová okilui Gedeón: “Ok tikinpia miakej soldados. Xikinmilui matemokan kanin panoua atl uan ompa nikinyejyekos. Tla ne nimitsiluis: ‘Nin tlakatl mouan yas’, ye mouan yas. Pero tla ne nimitsiluis: ‘Nin tlakatl amo mouan yas’, kijtosneki ye amo mouan yas”.
5 Satepan Gedeón uan isoldados oyajkej kanin panoua atl.
Jehová okilui Gedeón: “Nochtin akinmej atliskej ijkon ken kichiuaj itskuimej amo xikinsetili inuan akinmej motlankuaketsaj para atliskej”.
6 San 300 tlakamej oatlikej ika inma uan amo omotlankuaketskej. Pero oksekimej ijkuak oatlikej omotlankuaketskej uan omotolojkej.*
7 Satepan Jehová okilui Gedeón: “Ika nonmej 300 soldados tlen oatlikej nimitsmaktilis Madián uan namechmakixtis. Nochtin oksekimej soldados mamokopakan inkalijtik”.
8 Satepan ijkuak 300 soldados okonankej tlen inmiaxka oksekimej soldados uan kuakonmej, Gedeón okinmilui oksekimej soldados mamokopakan inkalijtik uan san 300 omokajkej. Ijkuakon madianitas omokajtokaj ikxitlan tlamaniktli.
9 Non youak Jehová okilui Gedeón: “Xikinmixnamiki akinmej ik ompa katej porque nimitsinmaktilis.
10 Pero tla tikinmimakasi,* xikuika Purá akin mitspaleuia uan xitemo kanin katej.
11 Ijkuak tikkakis tlen kijtouaj timoyolchikauas uan tikinmixnamikitij kanin katej”. Ijkuakon Gedeón uan Purá akin okipaleuiaya omotokijkej ik kanin okatkaj akinmej okinkokoliayaj.
12 Madianitas, amalequitas uan akinmej ochantiayaj ik kanin kisa tonaltsin okatkaj tlamaniktli uan okatkaj sapanoua miakej ken chapulimej. Incamellos sapanoua miakej ken xali tlen kajki itempa mar.
13 Ijkuak Gedeón oajsito, okikak se tlakatl okitlapouijtoka okse tlakatl tlen okitemik, non tlakatl okijtojtoka: “Nin tlen oniktemik, onikitak se pan yaualtik* de cebada, omomimilojtiaya* uan okalakito kanin katej madianitas. Non pan omotlauitekito itech se kaltsintli, sapanoua chikauak omotlauitek hasta okitlamotlak”.
14 Akin okikaktoka okijto: “Nin kijtosneki iespada Gedeón ikone Joás, akin israelita. Dios kimaktilis Madián uan akinmej kikokoliaj”.
15 Ijkuak Gedeón okikak tlen okitemik non tlakatl uan tlen kijtosneki, omotolo* para kiueyichiuas toTajtsin Dios. Satepan omokopki kanin okatkaj israelitas uan okijto: “¡Tiauij! Jehová yonamechmaktili Madián”.
16 Ika eyi grupos okinxelo trescientos soldados uan nochtin okinmakak kuakonmej. Noijki okinmakak kouitl tlen oxotlatoka tlen okatkaj ijtik konmej.
17 Satepan okinmilui: “Techitakan uan xikchiuakan ijkon ken ne nikchiuas. Ijkuak niajsiti kanin katej xikchiuakan tlen ne nikchiuas.
18 Ijkuak ne uan akinmej nouan katej tikinpitsaskej kuakonmej, namejuan noijki nankinpitsaskej kuakonmej kanin yejuan katej uan chikauak nankijtoskej: ‘¡Iespada Jehová uan Gedeón!’”.
19 Gedeón uan 100 soldados oajsitoj kanaj tlajkoyouak* ijkuak akinmej otlamaluijtokaj yomopatlakej. Okinpitskej kuakonmej uan okintlajtlapankej konmej tlen okinkitskijtiayaj.
20 Eyi grupos okinpitskej kuakonmej uan okintlajtlapankej konmej, ika inpochma okinkitskijtiayaj kouitl tlen oxotlatoka, okinpitskej kuakonmej tlen okinkitskijtiayaj ika inyekma uan chikauak okijtojkej: “¡Iespada Jehová uan Gedeón!”.
21 Isoldados Gedeón tlen otlayaualojtokaj san omoketokaj pero akinmej okinkokoliayaj chikauak otsajtsikej uan ocholojkej.
22 Satepan 300 soldados ok okinpitstokaj kuakonmej uan Jehová okichi tlakamej tlen ik ompa okatkaj mamomijmiktikan ika inmiespada. Akinmej okinkokoliayaj israelitas ocholojkej hasta Bet-Sitá, Zererá uan Abel-Meholá ik inakastlan Tabat.
23 Satepan okinnechikojkej nochtin soldados israelitas tlen opouiayaj itech itribu Neftalí, itribu Aser uan itribu Manasés. Yejuan okinkuitlapantokakej madianitas.
24 Gedeón okintitlanki sekimej tlakamej itech nochi tepeyo tlen kajki Efraín uan okinmiluijkej: “Xitemokan, xikinmixnamikikan uan xiakan inyekapan madianitas uan amo xikinkauilikan makipanouikan aueyatl* Jordán nion Bet-Bará”. Ijkuakon nochtin soldados tlen pouij itech itribu Efraín omonechikojkej uan amo okinkauilijkej makipanouikan aueyatl Jordán nion Bet-Bará
25 Noijki okinkitskijkej ome príncipes madianitas, Oreb uan Zeeb. Oreb okimiktijkej ipan se ueyi tetl,* satepan non tetl okitokayotijkej tetl Oreb uan Zeeb okimiktijkej kanin okipatskayaj uvas, ompa okitokayotijkej Zeeb. Okinkuitlapantokakej madianitas uan satepan okiuikilijkej Gedeón itsonteko Oreb uan Zeeb, ik kanin okatka Jordán.
Notas
^ Noso “sankuel”.
^ Veintidós mil.
^ Diez mil.
^ Noso “omopachojkej”.
^ Noso “tikinmauilia”.
^ Noso “tankachtik”.
^ Noso “omotankachojtiaya”, “omotemimilojtiaya”, “omotenkuichojtiaya”.
^ Noso “omopacho”.
^ Noso “kanaj las 10 youak hasta las 2 kualkan”.
^ Noso “atenko”, “atitla”, “apan”.
^ Noso “tepexitl”.
