Jueces 10:1-18
10 Ijkuak Abimélec ayakmo oyoltoka, Tolá okinmakixti israelitas, ye ikone Pua, ixui Dodó, tlen opouiaya itech itribu Isacar. Ochantiaya Samir itech itepeyo Efraín.
2 Ye okatka 23 xiuitl injuez israelitas. Satepan omiki uan okitokakej ompa Samir.
3 Ijkuak Tolá ayakmo oyoltoka, Jaír akin galaadita okatka 22 xiuitl injuez israelitas.
4 Jaír okinpiaya 30 ikoneuan uan sejse ikone okipiaya se iburro uan se ialtepe. Hasta axkan nonmej altepemej kintokayotiaj Havot-Jaír uan katej Galaad.
5 Satepan Jaír omiki uan okitokakej ompa Camón.
6 Israelitas oksepa opejki kichiuaj tlen amo kuali ixpan Jehová uan opejki kintekichiuiliaj Baales, imágenes de Astoret, indioses akinmej chantij Aram,* indioses akinmej chantij Sidón, indioses akinmej chantij Moab, indioses ammonitas uan indioses filisteos. Okikajkej Jehová uan ayakmo okitekichiuilijkej.
7 Ikinon Jehová okualanki inuan israelitas uan okinka inmak ammonitas uan filisteos.
8 Itech non xiuitl yejuan okinyolkokojkej uan fiero okintlajyouiltijkej israelitas. Noijki 18 xiuitl okintlajyouiltijkej israelitas tlen ochantiayaj ik okse lado Jordán, ompa Galaad kanin achto okatka intlal amorreos.
9 Uan ammonitas okipanouiayaj aueyatl* Jordán para kinmiktitiuij akinmej pouij itech itribu Judá, itribu Benjamín uan ixuiuan Efraín. Ikinon israelitas san omotekipachouayaj.
10 Uan yejuan okitlatlaujtiayaj Jehová makinpaleui. Yejuan okiluiayaj: “ToTajtsin Dios moixpan otitlajtlakolchijkej, porque otimitskajkej uan opejki tikintekichiuiliaj Baales”.
11 Pero Jehová okinmilui israelitas: “Ne onamechmakixti inmak egipcios, amorreos, ammonitas, filisteos,
12 sidonios, amalequitas uan madianitas ijkuak yejuan onamechtlajyouiltiayaj. Ijkuak namejuan onantechtlatlaujtiayaj manamechpaleui, ne inmak onamechmakixtiaya.
13 Pero namejuan onantechkajkej uan onankintekichiuilijkej oksekimej dioses. Ikinon ayakmo namechmakixtis.
14 Xikintlajtlanilikan dioses tlen onankinpejpenkej manamechpaleuikan, yejuan manamechmakixtikan ijkuak nanmotekipachoskej”.
15 Pero israelitas okiluijkej Jehová: “Tejuan otitlajtlakolchijkej ikinon techtokti* san tlen te tiknekis pero timitstlatlaujtiaj oksepa techmakixti”.
16 Ijkuakon yejuan ayakmo okinpixkej dioses tlen oksekan kinueyichiuaj uan oksepa opejki kiueyichiuaj Jehová. Ijkuakon ye ayakmo okixiko kitas ken israelitas otlajyouiayaj.
17 Satepan, ammonitas omonechikojkej uan omokajkej Galaad. Pero israelitas omololojkej uan omokajkej Mizpá.
18 Príncipes de Galaad uan akinmej ompa ochantiayaj okimoluiayaj: “Akin techyekanas ijkuak tikinmixnamikitiuij ammonitas, noijki makinyekana nochtin akinmej chantij Galaad”.
